GBẸZAN KLISTIANI TỌN

Lehe A Sọgan Bẹ Hodọdopọ Jẹeji po Alọnuwe Pẹvi lẹ po Do

Bẹsọn janvier 2018, wepa Nuplọnwe Opli Gbẹzan po Lizọnyizọn Mítọn po Tọn nọ bẹ nuzedonukọnnamẹ lẹ hẹn to hodọdopọ hẹ whétọ lẹ glọ. Mí ko mọ ayinamẹ yí dọ hodọdopọ hẹ whétọ lẹ wẹ dona nọ duahunmẹna mí todin hú owe mítọn lẹ didogbonu poun. Na mí nido jẹakọ hẹ aliho kunnudide tọn yọyọ ehe, video nuzedonukọnnamẹ tọn lẹ nọ do lehe mí gán bẹ hodọdopọ jẹeji gbọn Biblu kẹdẹ yiyizan dali do hia. Enẹwutu, be ehe zẹẹmẹdo dọ mí masọ dona nọ yí owe mítọn lẹ zan to whenue mí to yẹwhehodọ sọn whédegbè jẹ whédegbè wẹ ya? Lala! Di apajlẹ, alọnuwe pẹvi lẹ yin azọ́nwanu dagbe de nado bẹ hodọdopọ jẹeji. Aliho he bọdego ehelẹ gán gọalọ to whenue mí to alọnuwe pẹvi lẹ yizan:

Kàn kanbiọ he tindo gblọndo voovo to wepa lọ ji sè.
Do gblọndo Biblu tọn hia, ehe tin to aga to weda awetọ ji. Eyin whenu tin, hia nudọnamẹ delẹ sọn alọnuwe pẹvi lọ mẹ bo dọhodo yé ji.
Ze alọnuwe lọ na mẹlọ, bo na ẹn tuli nado hia nudọnamẹ he pò lọ lẹ.
Whẹpo a nado tọ́n sọn finẹ, do kanbiọ he to adà lọ “Dindonanu” glọ hia ẹ bo basi tito nado dọhodo gblọndo Biblu tọn ji hẹ mẹlọ to whedevonu.

Alọnuwe pẹvi lọ ‘Etẹwẹ Yin Linlẹn Towe Gando Sọgodo Go?’ po sọha delẹ po sọn tintan jẹ ẹnẹ nado do adà voovo alọnuwe pẹvi lọ tọn lẹ hia.

Whenue a lẹkọyi, na gblọndo kanbiọ lọ tọn bo fọ́n kanbiọ he ji mì na dọhodo to whedevonu dote. A sọgan de kanbiọ de to nọtẹn Intẹnẹt tọn mítọn ji kavi to owe he sọawuhia to wepa godo tọn alọnuwe pẹvi lọ tọn mẹ. Eyin e yọnbasi, yí owe lọ Wẹndagbe de sọn Jiwheyẹwhe Dè! na mẹlọ kavi owe oplọn tọn devo sọn Azọ́nwanu Mẹpinplọn tọn mítọn mẹ.