Nọ Hodo Apajlẹ Yẹwhegán lẹ Tọn—Nahumi
1. Etẹwẹ mí plọn sọn owe Nahumi tọn mẹ?
1 Gbakija Nineve hohowhenu tọn dohia dọ dile Nahumi dọ dọdai do, Jehovah yiahọsu to kẹntọ Etọn lẹ go podọ agbàwhlẹnhẹmẹtọ he tlẹ sinyẹn hugan ma sọgan nọte to nukọn Etọn. (Nah. 1:2, 6) Eyin mí gbadopọnna dọdai Nahumi tọn sisosiso, mí na mọ nuplọnmẹ delẹ yí he na yọ́n-na-yizan na mí to lizọnyizọn lọ mẹ.
2. Nawẹ mí sọgan yí owẹ̀n he lá mí te do jlọmẹdote gbọn?
2 Nọ Miọnhomẹnamẹ bo Nọ Namẹ Todido: Tlolo he yè hia owe Nahumi tọn, e nọ taidi dọ nulila vasudo tọn sọta Nineve he yin tatọ́-tònọ Asilia hohowhenu tọn kẹdẹ wẹ owe lọ bẹhẹn. (Nah. 1:1; 3:7) Ṣigba, nulila ehe yin owẹ̀n homẹhunhun tọn de na omẹ Jehovah tọn lẹ. Nahumi, mẹhe yinkọ etọn zẹẹmẹdo “Homẹmiọnnamẹtọ,” vọ́ jide na Ju hatọ etọn lẹ dọ to madẹnmẹ kẹntọ yetọn lẹ ma na tin ba! Humọ, Nahumi hẹn yé deji dọ Jehovah yin “figángán de to azán tukla tọn gbè.” (Nah. 1:7) Dile mí to yẹwhehodọ, mílọsu nọ lá wẹndagbe de na mẹdevo lẹ bo nọ na yé tuli nado dín fibẹtado to Jehovah mẹ.—Nah. 1:15.
3. Taidi Nahumi, nawẹ mí sọgan nọ yí apajlẹ lẹ zan gbọn?
3 Nọ Yí Apajlẹ lẹ Zan: Jehovah gbọdo Nahumi nado yí vasudo Nineve tọn jlẹdo Thèbes (No-amọni) he yin tòdaho Egipti tọn go, ehe yin vivasudo gbọn Asilia lọsu dali to ojlẹ de mẹ wayi. (Nah. 3:8-10) Dile mí to hodọna gbẹtọ lẹ gando vasudo aihọn ehe tọn go, mí sọgan zinnudo dọdai Biblu tọn lẹ ji, ehe dohia dọ Jehovah nọ hẹn ohó etọn di to gigọ́ mẹ. Di apajlẹ, to whenue Babilọninu lẹ po Medianu lẹ po hoavùn sọta tòdaho Nineve tọn to 632 J.W.M., jikun sinsinyẹn de hẹn Tọ̀sisa Tigre gọfla, bọ apadewhe adó he yin hihọ́ na tòdaho lọ tọn họ́. Nineve yin vivasudo to ojlẹ kleun de gblamẹ, dile Jehovah dọ dọdai etọn do.—Nah. 1:8; 2:6.
4. Nawẹ mí sọgan nọ hẹn ohó mítọn họnwun to lizọnyizọn lọ mẹ gbọn?
4 Nọ Dike Ohó Towe Ni Họnwun: Aliho he mẹ Nahumi kanwe te gọ́ na zẹẹmẹ bo yinuwadomẹji taun. Nuagokun etọn lẹ họnwun. (Nah. 1:14; 3:1) Mílọsu dona nọ yí hogbe he mẹ yè sọgan yawu mọnukunnujẹ lẹ zan. (1 Kọl. 14:9) To dlapọn tintan whenu, nọ hẹn whẹwhinwhẹ́n he wutu a do dla whétọ lẹ pọ́n họnwun na yé. Dile a to Biblu plọn hẹ gbẹtọ lẹ, nọ gọalọna yé nado wleawuna yise to Jehovah po Ohó etọn po mẹ bo nọ do lehe nudọnamẹ lọ gando gbẹzan yetọn go do hia yé.—Lom. 10:14.
5. Jidenamẹ tẹwẹ mí mọ to dọdai Nahumi tọn mẹ?
5 Jide mlẹnmlẹn Nahumi tọn to hẹndi ohó Jehovah tọn mẹ họnwun to owe Biblu tọn he tindo yinkọ etọn mẹ. Dile opodo titonu Satani tọn to sisẹpọ, mí nọ mọ homẹmimiọn to ohó Jiwheyẹwhe tọn mẹ dọmọ: “Nukunbibia ma na fọ́n tite whla awetọ gba.”—Nah. 1:9.