Be Hiẹ to Awuwledaina Oflin lọ Ya?

To owhe 33 W.M, to azán 13tọ osun Nisan tọn gbè, Jesu yọnẹn dọ whèjai dopo wẹ pò bọ emi na yizan hẹ họntọn vivẹ́ emitọn lẹ whẹpo emi nado yin hùhù. E na basi hùnwhẹ Juwayi tọn etọn godo tọn hẹ yé, podọ enẹgodo e na ze hùnwhẹ yọyọ de dai, yèdọ Tenu-Núdùdù Oklunọ tọn. Nujijọ vonọtaun enẹ biọ awuwiwle jẹnukọn. Enẹwutu, e do Pita po Johanu po hlan nado yì wleawuna juwayi lọ. (Luku 22:7-13) Sọn whenẹnu gbọ́n, to owhe dopodopo mẹ, dandannu wẹ e yin dọ Klistiani he jlo na basi hùnwhẹ Oflin tọn lẹ ni nọ wleawudaina nujijọ ehe. (Luku 22:19) Enẹwutu, onú tangan tẹlẹ wẹ mí dona wà nado wleawudaina hùnwhẹ Oflin tọn he na yin bibasi to 3 avril he ja?

Nuhe Mẹho Agun Tọn lẹ Na Wleawuna:

Mì basi tito nado zan Plitẹnhọ Ahọluduta tọn kavi nọtẹn devo he na pọnte de. Nọtẹn lọ dona tindo aisinnu he pemẹnu, miyọ́n dona tin to e mẹ, podọ jẹhọn dona nọ yìn biọ e mẹ ganji. Mì basi tito nado hẹn nọtẹn lọ do wiweji jẹnukọnna hùnwhẹ lọ.
Mì de hodọtọ he pegan de, azinponọ hodidọ lọ tọn, gọna mẹmẹsunnu he na hodẹ̀ do yẹhiadonu lọ lẹ ji.
Eyin agun devo lẹ na zan nọtẹn dopolọ, mì deanana tito lọ to aliho kannukannu tọn mẹ, na gànmẹ he yin didena opli dopodopo ma sù sọmọ wutu, podọ nujọnu wẹ e yin nado wá do gànmẹ bosọ yawu jotẹnna mẹhe na bọdego lẹ. Mì sọ deanana lehe gbẹtọ lẹ na biọ nọtẹn lọ po húnglintẹn lọ po bosọ tọ́n sọn e mẹ do.
Mì de aisinnunamẹtọ lẹ po mẹhe na ze yẹhiadonu lọ lẹ po bosọ na yé anademẹ he jẹ lẹ.
Mì wleawuna yẹhiadonu he dona yin yiyizan lẹ, gọna agbánvla lẹ, kọfo ovẹn tọn lẹ, tafo dagbe de, po avọ̀ tafo ji tọn po.

Lehe Wẹnlatọ lẹ Dona Wleawu Do:

Basi tito nado tindo mahẹ gigọ́ to oylọ-basinamẹwe Oflin tọn lọ mimá mẹ.
Basi kandai de he na bẹ plọnmẹ Biblu towe lẹ, hẹnnumẹ, wehọmẹvigbẹ́, azọ́nwatọgbẹ́, po mẹdevo lẹ po hẹn, bo basi oylọna yé.
Hia adà Biblu tọn he yin didena Oflin lọ bo lẹnayihamẹpọn deji.
Wá Oflin lọ do gànmẹ nado dokuavọna jonọ lẹ.