Be A to Awuwlena Oflin lọ Ya?

Juwayi godo tọn he Jesu basi jẹna ayidego. Na okú etọn ko sẹpọ wutu, e basi tito nado dù Juwayi hẹ apọsteli etọn lẹ, podọ to Juwayi enẹ whenu wẹ e na ze hùnwhẹ whemẹwhemẹ tọn yọyọ de dai, enẹ wẹ Tenu-Núdùdù Oklunọ tọn. Enẹwutu, e biọ to Pita po Johanu po si nado yì wleawuna abò he yé na zan. (Luk 22:7-13; pọ́n yẹdide he to wepa ji.) Nuflinmẹ de wẹ ehe yin na mí nado wleawu dote na Oflin he mí na basi to 27 mars. Matin ayihaawe, agun lẹ na ko basi tito hodọtọ gọna yẹhiadonu lẹ tọn, po mọmọ po sọyi. Amọ́, nawẹ dopodopo mítọn gán wleawudaina Oflin lọ gbọn?

Wleawuna ahun towe. Hia adà Biblu tọn he yin didena ojlẹ Oflin tọn lọ bosọ lẹnayihamẹpọn do nuhe a hia lẹ ji. A gán mọ tito-to-whinnu Biblu hihia he yin awuwlena tọn to alọnuwe lọ Dogbapọnna Owe-Wiwe lẹ Egbesọegbesọ mẹ. Adà lọ Nudọnamẹ Dogọ B12 to Owe Wiwe lẹ—Lẹdogbedevomẹ Aihọn Yọyọ Tọn mẹ bẹ tito-to-whinnu nujijọ azán dopodopo tọn he gbloada hugan de hẹn. (Sọ pọ́n Nuplọnwe Opli Gbẹzan po Lizọnyizọn Mítọn po Tọn avril 2020 tọn.) Whẹndo lẹ gán mọ nudọnamẹ he gando nujọnu-yinyin ofligọ lọ tọn go he ji yé na dọhodo to sinsẹ̀n-bibasi whẹndo tọn yetọn whenu eyin yé pọ́n Index des publications Watch Tower kavi Anademẹwe Dodinnanu Tọn Na Kunnudetọ Jehovah Tọn Lẹ.

Basi oylọna mẹlẹ. Tindo mahẹ gigọ́ to nujijla oylọ-basinamẹ tọn lọ mẹ. Lẹnnupọndo mẹhe a gán basi oylọna lẹ ji, taidi gọyìpọn lẹ, plọnmẹ Biblu hoho lẹ, mẹyinyọnẹn gọna hẹnnumẹ towe lẹ. Mẹho agun tọn lẹ dona basi oylọna mẹhe gbọjọ lẹ. Eyin mẹhe a jlo na basi oylọna de ma to lẹdo towe mẹ, a gán mọ gànmẹ po fihe Oflin lọ na yin bibasi te to lẹdo etọn mẹ po to jw.org ji eyin a zín YỌ́N MÍ DOGỌ, enẹgodo “Oflin.”

Etẹlẹ wẹ mí gán sọ wà nado wleawudai?