Nawẹ Mí Sọgan Jẹ Ahun Mẹhe Mí to Nuplọn lẹ Tọn mẹ Gbọn?

1. Nuyiwadomẹji tẹwẹ aliho mẹpinplọn tọn Jesu tọn nọ tindo do ahun todoaitọ etọn lẹ tọn ji?

¹ Jesu Klisti nọ jẹ ahun todoaitọ etọn lẹ tọn mẹ. E whè gbau to ninọmẹ dopo mẹ, ahun devi etọn lẹ tọn yin “whinwhàn sinsinyẹn” to whenue e basi zẹẹmẹ Owe-wiwe lẹ tọn na yé hezeheze godo. (Luku 24:32) Na ahun mẹ wẹ tonusisena Jiwheyẹwhe dona wá sọn wutu, nawẹ mí sọgan whàn ahun mẹhe mí to nuplọn lẹ tọn gbọn na yé nido sọgan diọ gbẹzan yetọn?—Lom. 6:17.

2. Nawẹ zinzin po wuntuntun po nọ hẹn ẹn yọnbasi na mí nado jẹ ahun gbẹtọ lẹ tọn mẹ gbọn?

² Nọ Yí Zinzin po Wuntuntun po Zan: To paa mẹ, nado dọ nuhe sọgbe po nuhe ma sọgbe po na gbẹtọ lẹ poun ma ko pé na yé nido wà nulọ kavi dapana ẹn. Na nugbo tọn, wefọ voovo lẹ yiyizan nado dohia gbẹtọ lẹ dọ nuyise yetọn lẹ ma sọgbe tlẹ sọgan zọ́n bọ yé na joagọ. Whẹpo mí na penugo bo whàn ahun mẹde tọn, mí dona yọ́n whẹwhinwhẹ́n voovo he wutu mẹlọ do tindo nuyise de bo nọ yinuwa sọgbe hẹ nuyise enẹ. Zinzin yíyí do kàn kanbiọ mẹhẹnlẹnnupọn tọn lẹ sè mẹlọ sọgan whàn ẹn nado dọ linlẹn etọn tọ́n. (Howh. 20:5) Whenẹnu kẹdẹ wẹ mí sọgan yọ́n wefọ Biblu tọn he sọgan jẹ ahun mẹlọ tọn mẹ. Enẹwutu, mí dona nọ do ojlo nujọnu tọn hia mẹhe mí to nuplọn lẹ bo nọ fahomẹ hẹ yé. (Howh. 25:15) Flindọ e nọ biọ whenu to mẹdelẹ si nado yinukọn to gbigbọ-liho. Na dotẹnmẹ gbigbọ wiwe Jehovah tọn nado yinuwado linlẹn po walọ mẹlọ tọn po ji.—Malku 4:26-29.

3. Nawẹ mí sọgan gọalọna mẹhe mí to nuplọn lẹ nado wleawuna jẹhẹnu dagbe lẹ gbọn?

³ Gọalọna Yé Nado Wleawuna Jẹhẹnu Dagbe Lẹ: Wefọ Biblu tọn he do dagbewà po owanyi Jehovah tọn po hia lẹ sọgan gọalọna mẹhe mí to nuplọn lẹ nado wleawuna jẹhẹnu dagbe lẹ. Mí sọgan yí wefọ delẹ zan taidi Psalm 139:1-4 kavi Luku 12:6, 7 nado do obá he mẹ Jiwheyẹwhe nọ tindo ojlo nujọnu tọn to dopodopo mítọn mẹ jẹ hia yé. To whenue gbẹtọ lẹ wleawuna pinpẹn-nutọn-yinyọnẹn na nukundagbe majẹhẹ Jehovah tọn, owanyi he yé tindo na ẹn na sudeji bọ yé na ze yede jo na ẹn dogọ. (Lom. 5:6-8; 1 Joh. 4:19) Podọ, to whenue yé mọnukunnujẹemẹ dọ walọyizan yetọn nọ yinuwado Jehovah ji, yé na yin whinwhàn nado nọ yinuwa to aliho he na hẹn homẹ etọn hùn bo nasọ hẹn pipà wá na ẹn de mẹ.—Ps. 78:40, 41; Howh. 23:15.

4. To whenue mí to nuplọn gbẹtọ lẹ to lizọnyizọn lọ mẹ, nawẹ mí sọgan nọ dohia dọ mí tindo sisi na jlọjẹ yetọn nado basi nudide gbọn?

⁴ Jehovah ma nọ hẹn mẹde gánnugánnu nado setonuna gbedide etọn lẹ. Kakatimọ, e nọ whàn ahun gbẹtọ lẹ tọn gbọn nuyọnẹn he tin to tonusisena ayinamẹ etọn lẹ mẹ didohia yé dali. (Isa. 48:17, 18) Enẹwutu, apajlẹ Jehovah tọn hodo wẹ mí te to whenue mí dike aliho he mẹ mí nọ plọnnu gbẹtọ lẹ te hẹn ẹn yọnbasi na yé nado wá tadona yetọn titi kọ̀n. To whenue gbẹtọ lẹ kudeji dọ nujọnu wẹ e yin dọ emi ni basi vọjlado to gbẹzan emitọn mẹ, kọdetọn lọ lẹ nọ dẹn-to-aimẹ taun. (Lom. 12:2) Enẹ sọ nọ zọ́n bọ yé nọ dọnsẹpọ Jehovah hugan gbede pọ́n, yèdọ mẹhe “to ayiha whlepọn.”—Howh. 17:3.