Nọ Hodo Apajlẹ Yẹwhegán lẹ Tọn—Habakuku
1. Naegbọn ninọmẹ mítọn do taidi Habakuku tọn?
1 Dile mí to pipehẹ kanyinylan he fọ́n bo to sinsinyẹn deji to aihọn ehe mẹ, mí sọgan tindo numọtolanmẹ dopolọ taidi Habakuku, mẹhe kanse Jiwheyẹwhe dọmọ: “Etẹwutu wẹ hiẹ do ylanwa hia mi, bosọ hẹn mi nado pọ́n tasinyẹn?” (Hab. 1:3; 2 Tim. 3:1, 13) Ayihamẹlinlẹnpọn do nuhe Habakuku dọ po apajlẹ nugbonọ-yinyin tọn etọn po ji sọgan gọalọna mí nado to akọndonanu dile mí to tenọpọn whẹdazan Jehovah tọn.—2 Pita 3:7.
2. To egbehe, nawẹ mí sọgan dohia dọ mí yin nugbonọ gbọn?
2 Yin Nugbonọ bo Nọgbẹ̀: Kakati Habakuku ni na dotẹnmẹ ninọmẹ ylankan lẹ nado yinuwado e ji, e gbọṣi nukle bo hẹn alọnu etọn ján to gbigbọ-liho. (Hab. 2:1) Jehovah na jide yẹwhegán lọ dọ Ohó emitọn na mọ hẹndi to ojlẹ sisọ mẹ bọ “nugbonọ na nọgbẹ̀ to nugbowa etọn mẹ.” (Hab. 2:2-4) Etẹwẹ ehe zẹẹmẹdo na Klistiani he to gbẹnọ to vivọnu azán godo tọn lẹ tọn? Nuhe yin nujọnu hugan wẹ nado kudeji dọ opodo lọ na wá, e ma yin nado yọ́n whenue e na wá. Yise nọ whàn mí nado gbọṣi nukle bo ze lizọnyizọn lọ do otẹn tintan mẹ.—Heb. 10:38, 39.
3. Naegbọn mí dona hẹn ayajẹ mítọn go to Jehovah sinsẹ̀n mẹ?
3 Nọ Jẹaglin to Jehovah Mẹ: Whenue Gọgi po Magọgi po na tọ́nawhàn omẹ Jehovah tọn lẹ, yise mítọn na yin whiwhlepọn. (Ezek. 38:2, 10-12) Awhàn nọ hẹn awusinyẹnnamẹ wá, etlẹ yin na mẹhe gbawhàn lẹ lọsu. Núdùdù sọgan hán, nutindo lẹ sọgan yin hinhẹnbu, podọ ohẹ́n sọgan gbayipe. Nawẹ mí na yinuwa gbọn to whenue nuhahun lẹ wá fọ́n? Na Habakuku yọnẹn dọ emi na pehẹ awusinyẹnnamẹnu lẹ wutu, e magbe nado hẹn ayajẹ etọn go to Jehovah sinsẹ̀n mẹ. (Hab. 3:16-19) “Ayajẹ [Jehovah] tọn” na gọalọna mílọsu lẹ nado doakọnna whlepọn he to nukọn ja lẹ.—Nẹh. 8:10; Heb. 12:2.
4. Ayajẹ tẹwẹ mí sọgan duvivi etọn todin podọ to sọgodo?
4 Mẹhe Jehovah na pò dogbẹ̀ to whẹdazan etọn he ja lọ gbè lẹ na gbẹ́ zindonukọn nado to nuplọn gando aliho ogbẹ̀ tọn Jiwheyẹwhe tọn go. (Hab. 2:14) Mẹhe na yin finfọnsọnku lẹ lọsu na plọnnu gando Jehovah go. Enẹwutu, mì gbọ mí ni nọ yí dotẹnmẹ hundote lẹpo zan nado dọho gando Jehovah po azọ́n jiawu etọn lẹ po go bẹsọn din.—Ps. 34:1; 71:17.