Nọ Hodẹ̀ Na Klistiani He Yin Homẹkẹndo Lẹ

Biblu dọ dọdai dọ Satani na dohomẹkẹn mí nado sọgan glọnalina lizọnyizọn mítọn. (Joh 15:20; Osọ 12:17) Etẹwẹ mí sọgan wà nado gọalọna Klistiani he to oyà homẹkẹn tọn ji to otò devo mẹ lẹ? Mí sọgan nọ hodẹ̀ do ota yetọn mẹ. “Ovẹ̀ dodonọ tọn nọ wazọ́n taun.”—Jak 5:16.

Etẹlẹ wẹ mí sọgan dọ to odẹ̀ mítọn lẹ mẹ? Mí sọgan biọ to Jehovah si nado na adọgbigbo mẹmẹsunnu po mẹmẹyọnnu mítọn lẹ po bo gọalọna yé ma nado dibu. (Isa 41:10-13) Mí sọgan sọ hodẹ̀ na aṣẹpipa lẹ nido tindo ayilinlẹn dagbe gando azọ́n yẹwhehodidọ tọn lọ go, “na mí nido sọgan . . . zindonukọn to gbẹzan abọẹninọ tọn po whii-ninọ tọn po zinzan mẹ.”—1Ti 2:1, 2.

To whenue Paulu po Pita po yin homẹkẹndo, Klistiani owhe kanweko tintan tọn lẹ donù yinkọ yetọn lẹ go to odẹ̀ mẹ. (Ow 12:5; Lo 15:30, 31) Eyin mí ma tlẹ yọ́n yinkọ mẹhe yè to homẹkẹndo to egbehe lẹpo tọn, be mí sọgan nọ donù agun, otò kavi lẹdo yetọn go ya?

Kàn otò delẹ he mẹ Klistiani lẹ to yinyin homẹkẹndo te bọ a jlo na hodẹ̀ do ota yetọn mẹ.