Mẹdatọ Mítọn Yiwanna Mí

1. MẸDATỌ MÍTỌN WẸ DÁ OWHÈ

Be gbẹtọ gán nọ aigba ji, eyin owhè ma tin ya? Owhè wẹ nọ zọ́n bọ atin lẹ nọ jọ amà, nọ gbàsẹ́, bo nọ sẹ́n. Huhlọn owhè tọn sọ nọ zọ́n bọ adọ̀ atin lẹ tọn nọ gbọ́n osin sọn dòglọ, podọ osin lọ nọ sà gbọn atin lọ mẹ yì fie amà lẹ te bo nọ tọ́nyi jẹhọn mẹ taidi azọ̀.

2. MẸDATỌ MÍTỌN NỌ NA MÍ JIKUN

Jiwheyẹwhe nọ hẹn jikun ja, na aigba nido de jinukun he mí na dù lẹ tọ́n. Jikun wẹ nọ ja to ojlẹ sisọ mẹ bọ mí do nọ mọ núdù bo nọ jaya.

3. MẸDATỌ MÍTỌN NỌ NA MÍ NÚDÙDÙ PO AVỌ̀ PO

Mẹjitọ susu wẹ nọ to nulẹnpọn nado mọ núdùdù po avọ̀ po na whẹndo yetọn. Amọ́, nuhe Owe-wiwe lẹ dọ die: “Mì pọ́n ohẹ̀ agahomẹ tọn lẹ tlintlin; yé ma nọ do jinukun kavi gbẹ̀n kavi bẹpli do agbànhọ lẹ mẹ, ṣogan Otọ́ mìtọn olọn tọn nọ na núdùdù yé. Be mìwlẹ ma họakuẹ hú yé?”—Matiu 6:25, 26.

“Mì plọnnu sọn vounvoun danji tọn lẹ dè, lehe yé nọ whẹ́n do . . . ; ṣigba yẹn dọna mì dọ [Ahọlu] Sọlomọni lọsu to gigo etọn lẹpo mẹ ma tlẹ yin aṣọ́dona di dopo to ehelẹ mẹ. Todin, eyin Jiwheyẹwhe nọ doaṣọ́na ogbé danji tọn lẹ . . . domọ, be ewọ ma na doaṣọ́na mì humọ?”—Matiu 6:28-30.

Eyin Jiwheyẹwhe gán na mí núdùdù po avọ̀ po, be e gán na mí nuhe pò bọ mí do hudo etọn to gbẹ̀mẹ lẹ. Eyin mí nọ tẹnpọn nado wà ojlo etọn, e na dona tuklajijẹ mítọn nado mọ núdù kavi gọalọna mí nado mọ azọ́n, bo họ̀ nuhe sin hudo mí do lẹ.—Matiu 6:32, 33.

Eyin mí lẹnnupọndo nuhe Jiwheyẹwhe dá lẹ ji, enẹ wẹ owhè, jikun, ohẹ̀ po vounvoun lẹ po, mí nọ mọdọ mí dona yiwanna Jiwheyẹwhe. To hosọ he bọdego mẹ, mí na mọ lehe Mẹdatọ mítọn dọhona gbẹtọ lẹ gbọn Owe-wiwe lẹ gblamẹ do.