Nawẹ Yise Towe to Opagbe Jehovah Tọn lẹ mẹ Lodo Do Sọ?

Jọṣua po Sọlomọni po dohia dọ dopo tata ma gboawupo to opagbe he Jehovah do lẹ mẹ. (Jọṣ 23:14; 1Ah 8:56) Kunnudide kunnudetọ dejidego awe ehelẹ tọn yidogọna dodonu dolido he ji yise mítọn sọgan sinai do.​—2Kọ 13:1; Tit 1:2.

Nawẹ Jehovah hẹn opagbe etọn lẹ di gbọn to azán Jọṣua tọn gbè? To pọmẹ hẹ whẹndo towe, pọ́n video nupinpọn-do-plọnnu tọn lọ ‘Opagbe Dopo Ma Gboawupo.’ Enẹgodo, gbadopọnna kanbiọ he bọdego lẹ: (1) Nawẹ a sọgan hodo apajlẹ nuyiwa yise tọn Lahabi tọn gbọn? (Heb 11:31; Jak 2:24-26) (2) Nawẹ apajlẹ Akani tọn dohia dọ tolivivẹ sọn ojlo mẹ wá nọ dekọtọn do nugbajẹmẹji mẹ gbọn? (3) Mahopọnna dọ sunnu Gibeọni tọn lẹ yin awhànfuntọ lẹ, naegbọn yé klọ Jọṣua bo basi jijọho hẹ Islaeli? (4) Nawẹ ohó Jehovah tọn mọ hẹndi gbọn to whenue ahọlu atọ́n Amolinu lẹ tọn lẹ tọ́nawhàn Islaeli? (Jọṣ 10:5-14) (5) Nawẹ Jehovah ko yinuwado ota towe mẹ gbọn dile a ze Ahọluduta Jiwheyẹwhe tọn po dodowiwa etọn po do otẹn tintan mẹ to gbẹzan towe mẹ?—Mt 6:33.

Eyin mí lẹnnupọndo nuhe Jehovah ko wà, nuhe e to wiwà, po nuhe e na wá wà lẹ po ji, yise mítọn to opagbe etọn lẹ mẹ na lodo dogọ.—Lo 8:31, 32.