GBẸZAN KLISTIANI TỌN

Hẹn Lizọnyizọn Towe Pọnte Dogọ—JW.ORG Yiyizan

NUHEWUTU E DO YIN NUJỌNU: Owe he Azọ́nwanu Mẹpinplọn tọn mítọn bẹhẹn lẹpo wẹ nọ dlẹnalọdo jw.org. Na nugbo tọn, yanwle tangan kalti JW.ORG tọn lẹ po alọnuwe Fie Wẹ Mí Sọgan Mọ Gblọndo Na Kanbiọ Titengbe Gbẹ̀mẹ Tọn lẹ Te? po tọn wẹ nado deanana gbẹtọ lẹ yì nọtẹn Intẹnẹt tọn mítọn ji. A sọgan yí jw.org zan nado do owe he Azọ́nwanu Mẹpinplọn tọn mítọn bẹhẹn lẹ depope gbonu. Gbọnna? Gbọn vọkan Intẹnẹt ji tọn etọn kavi adlẹsi fie owe lọ sọgan yin mimọ te to Intẹnẹt ji tọn didohlan mẹlọ dali, ehe nọ yọ́n taun titengbe to whenue mí dukosọ hẹ mẹhe nọ do ogbè devo. Humọ, mẹlẹ gán kàn kanbiọ lẹ sè bọ owe he mẹ gblọndo lọ te ma to Azọ́nwanu Mẹpinplọn tọn mítọn mẹ. Eyin mí yọ́n nọtẹn lọ zan ganji, mí na tindo kọdetọn dagbe dogọ to lizọnyizọn mítọn mẹ.

LEHE MÍ SỌGAN WÀMỌ DO:

Pọ́n adà lọ “NUHE BIBLU PLỌN MÍ.” Mí ni dọ dọ a to kunnudena mẹjitọ de he jlo na mọ nudọnamẹ lẹ dogọ gando ovi lẹ pinplọn whẹ́n go. Zín NUHE BIBLU PLỌN MÍ > ALỌWLE PO WHẸNDO PO.
Pọ́n adà lọ “OWE LẸ.” Mí ni dọ dọ a to kunnu mayin aṣa tọn de to wehọmẹ bo jlo na má alọnuwe lọ Gblọndo Na Kanbiọ 10 He Jọja lẹ Nọ Kanse hẹ wehọmẹvigbẹ́ de. Zín OWE LẸ > OWE LẸ PO ALỌNUWE LẸ PO.
Pọ́n adà lọ “YỌ́N MÍ DOGỌ.” Mí ni dọ dọ a to kunnudena azọ́ngbẹ́ de he jlo na yọ́n nuyise mítọn delẹ. Zín YỌ́N MÍ DOGỌ > KANBIỌ HE MẸSUSU NỌ KANSE LẸ.

PỌ́N VIDEO LỌ JW.ORG YIYIZAN, ENẸGODO GBADOPỌNNA FIE MÍ GÁN YÌ TO NỌTẸN LỌ JI NADO GỌALỌNA:

mẹhe ma yise dọ Jiwheyẹwhe tin de
mẹhe go nujijọ ylankan de ṣẹṣẹ jọ do
mẹmẹsunnu kavi mẹmẹyọnnu he gbọjọ de
gọyìpọn de he kàn lehe azọ́n mítọn nọ yin nukunpedego to akuẹzinzan-liho te sè
mẹhe wá sọn tògodo bo jlo na yì opli to otò etọn titi mẹ