GBẸZAN KLISTIANI TỌN

Kunnudide to Lẹdo He mẹ Ogbè Susu Nọ Yin Dido te Nọ Biọ Gbekọndopọ

Asu po asi po de dukosọ hẹ dawe de po visunnu etọn po to kunnudegbe he nọ do ogbè devo

Mẹlẹ nọ yawu kẹalọyi wẹndagbe lọ eyin yé sè e do ogbè yetọn titi mẹ. Vlavo enẹ wẹ na ko zọ́n bọ to Pẹntikọsti 33 W.M., Jehovah do basi tito bọ “Ju he dibusi Jiwheyẹwhe sọn akọta he to olọn glọ lẹpo mẹ” do sè wẹndagbe lọ “to ogbè [yetọn] titi lẹ” mẹ, mahopọnna dọ yemẹpo gán ko nọ do ogbè dopolọ to paa mẹ, enẹ wẹ Heblugbe kavi Glẹkigbe. (Ow 2:5, 8) To fie ogbè susu nọ yin dido te lẹ, agun he nọ basi opli do ogbè voovo mẹ lẹ gán nọ wazọ́n to aigba-denamẹ dopolọ lẹ ji. Mahopọnna dọ wẹnlatọ he to agun mọnkọ mẹ lẹ dona nọ dekunnuna mẹlẹpo, nawẹ yé gán kọngbedopọ ma nado nọ yì whétọ dopolọ lẹ dè to ojlẹ dopolọ gblamẹ bo hẹn homẹgble yé gbọn?

Wedide Dopọ (Hwh 15:22): Nugopọntọ sinsẹ̀nzọn tọn agun mọnkọ lẹ tọn lẹ dona nọ dewé dopọ nado wleawuna tito dagbe de, na agun lọ lẹ nido nọ dekunnu to aliho kannukannu tọn mẹ. Eyin aigba-denamẹ agun he nọ basi opli to ogbè devo mẹ lẹ tọn ma sù, yé gán biọ dọ agun mìtọn ni ma nọ dekunnu to owhé he gbè yè nọ do ogbè yetọn te lẹ blo. Amọ́, eyin yé ma penugo nado dekunnu gbọn owhé lẹpo gbè, na owhé lẹ sù bosọ to kato-kato wutu, yé gán biọ dọ mì ni ma nọ jo owhé de do blo, amọ́ eyin mẹhe nọ do ogbè yetọn de do ojlo hia, mì ni nọ dọna yé. (od 93 huk. 37) Kavi yé gán biọ dọ agun mìtọn ni gọalọna yé nado nọ dín mẹhe nọ do ogbè yetọn lẹ bo do adlẹsi yetọn hlan yé. (km 7/12 5, apotin) Hẹn do ayiha mẹ dọ to whedelẹnu, ogbè susu gán nọ yin dido to owhé delẹ gbè. Eyin osẹ́n de tin to otò mìtọn mẹ gando hihọ́-bibasina nudọnamẹ mẹdevo lẹ tọn mimá go, tito mìtọn lẹ dona sọgbe hẹ osẹ́n enẹ.
Gbekọndopọ (Efe 4:16): Mì nọ yí sọwhiwhe do hodo anademẹ he nugopọntọ sinsẹ̀nzọn tọn nọ na lẹ. Be a do plọnmẹ Biblu de bọ ogbè he e sè hugan ma yin ogbè he agun mìtọn nọ do wẹ ya? Eyin a ze oplọn lọ do alọmẹ na agun kavi kándo he to yakẹ bo nọ do ogbè nuplọntọ lọ tọn, e gán yawu yinukọn.
Nọ wleawu (Hwh 15:28; 16:1): Eyin a dukosọ hẹ whétọ de he nọ do ogbè devo, tẹnpọn bo lá wẹndagbe lọ na ẹn. A gán ko lẹnnupọn jẹnukọn do ogbè he a gán dukosọ hẹ lẹ ji bo yí Biblu po video lẹ po to ogbè lọ lẹ mẹ do alokan towe kavi nuyizan mọnkọ de ji. A gán sọ yí JW Language zan nado plọn nudọdomẹ to ogbè delẹ mẹ.