Hẹn Lizọnyizọn Towe Pọnte Dogọ—Doalọtena Plọnmẹ Biblu He Ma to Nukọnyi Lẹ

NUHEWUTU E DO YIN NUJỌNU: Gbẹtọvi lẹ dona dawhá ylọ oyín Jehovah tọn nado yin whinwhlẹngán. (Lo 10:13, 14) Amọ́, e ma yin mẹhe yigbe nado plọn Biblu lẹpo wẹ nọ jlo na nọgbẹ̀ sọgbe hẹ nujinọtedo Jehovah tọn lẹ. Whenu mítọn yiyizan po nuyọnẹn po to lizọnyizọn lọ mẹ nọ biọ dọ mí ni gọalọna mẹhe jlo nugbonugbo nado basi vọjlado bo hẹn homẹ Jehovah tọn hùn lẹ. Eyin mí ko to Biblu plọn hẹ mẹde na ojlẹ de bọ mẹlọ ma to vọjlado he jẹ lẹ basi, nuyọnẹnnu wẹ e nọ yin nado doalọtena oplọn lọ bo yí whenu mítọn do gọalọna mẹhe Jehovah to dindọn wá ewọ po titobasinanu etọn po dè lẹ. (Joh 6:44) Amọ́, eyin mẹlọ wá dohia to nukọn mẹ dọ emi “tindo ninọmẹ ahun mẹ tọn he jẹna ogbẹ̀ madopodo,” homẹ mítọn na hùn nado vọ́ jẹ Biblu plọn hẹ ẹ ji.—Ow 13:48.

LEHE MÍ SỌGAN WÀMỌ DO:

• Pà nuplọntọ lọ na ojlo etọn nado tindo oyọnẹn he pegan.—1Ti 2:4

• Dohia ẹ dọ nujọnu wẹ e yin dọ ni yí nuhe e ko plọn lẹ do yizan mẹ.—Luk 6:46-49

• Yí homẹdagbe do dọhodopọ hẹ ẹ do apajlẹ nudotọ lọ tọn he Jesu na ji bo biọ to e si nado lẹnnupọndo nuhe zọ́n bọ e ma to nukọnyi lẹ ji.—Mt 13:18-23

• Yí zinzin do dọ nuhewutu a to alọdotena oplọn lọ na ẹn

• Dọna ẹn dọ emi na nọ wá dla ẹ pọ́n sọn ojlẹ de mẹ jẹ devo mẹ nado na ẹn tuli, bọ mì gán wá gọ̀ oplọn lọ bẹ eyin e jẹ vọjlado lẹ basi ji

PỌ́N VIDEO LỌ, ENẸGODO NA GBLỌNDO NA KANBIỌ HE BỌDEGO LẸ:

• Etẹ go wẹ a doayi to hodọdopọ lọ mẹ he dohia dọ nuplọntọ lọ ma to nukọnyi to gbigbọ-liho?

• Nawẹ wẹnlatọ lọ gọalọna nuplọntọ lọ nado mọdọ e dona basi vọjlado gbọn?

• Nawẹ wẹnlatọ lọ gọalọna nuplọntọ lọ nado mọdọ yé sọgan wá gọ̀ oplọn lọ bẹ gbọn?