Nọ Nọgodona Mẹplọnlọ Jehovah Tọn

Tito mẹdesẹ sọn agun mẹ tọn nọ basi hihọ́na agun lọ. E sọ yin aliho de nado domẹplọnlọ mẹhe waylando bo ma lẹnvọjọ lọ go. (1Kọ 5:6, 11) Owanyi wẹ nọ whàn mí nado nọgodona tito mẹplọnlọ Jehovah tọn enẹ. Whenue yè de mẹde sọn agun mẹ, whẹndo etọn, mẹhe nọ wedegbẹ́ whẹdida tọn lọ mẹ lẹ po mẹhe yọnẹn lẹpo po wẹ nọ sè vivẹ́. Eyin mọ wẹ, nawẹ tito enẹ yin ohia owanyi tọn gbọn?

Whẹwhinwhẹ́n titengbe lọ wẹ yindọ, mí yiwanna Jehovah bo ma jlo dọ nudepope ni kọnmasin do oyín wiwe etọn go. (1Pi 1:14-16) Mí sọ nọ dohia dọ mí yiwanna mẹhe yè de sọn agun mẹ lọ eyin mí ma nọ dogbẹ́ hẹ ẹ. Whenue yè do mẹplọnlọ sinsinyẹn mẹde go, e nọ sè vivẹ́ taun, amọ́ enẹ gán de “sinsẹ́n jijọho tọn, yèdọ dodowiwa tọ́n.” (Heb 12:5, 6, 11) Eyin mí nọ dogbẹ́ hẹ mẹhe yè de sọn agun mẹ kavi mẹhe de ede sọn agun mẹ, mí to aliglọnna ẹn nado mọaleyi sọn mẹplọnlọ Jehovah tọn mẹ. Flindọ Jehovah nọ domẹplọnlọ omẹ etọn lẹ go “jẹ obá he jẹ mẹ.” (Jel 30:11) To gbèdopo, mẹlọ gán lẹkọwa Otọ́ lẹblanunọ mítọn dè. Amọ́ todin whẹ́, mí ni nọ nọgodona mẹplọnlọ lọ bo nọ wà nulẹpo nado hẹn haṣinṣan mítọn hẹ Jehovah sinyẹn deji.—Isa 1:16-18; 55:7.

PỌ́N VIDEO LỌ HẸN KADANINỌ GO PO AHUNDOPO PO, ENẸGODO NA GBLỌNDO NA KANBIỌ HE BỌDEGO LẸ:

• 

  Vivẹ́ tẹwẹ mẹjitọ Klistiani lẹ nọ sè eyin ovi yetọn jo Jehovah do?

• 

  Nawẹ agun lọ gán gọalọna hagbẹ whẹndo lọ tọn he gbẹ́ yin nugbonọ lẹ gbọn?

• 

  Kandai Biblu tọn tẹwẹ dohia dọ mí dona yin nugbonọ na Jehovah hú whẹndo mítọn?

• 

  Nawẹ mí gán dohia gbọn dọ mí yin nugbonọ na Jehovah hú whẹndo mítọn?