Dùdù to Avùnnukundiọsọmẹ Nugbodidọ Tọn Ji
“Na mì ni sọ ze gbẹtọ yọyọ lọ dogo, mẹhe yè da to dodo mẹ di apajlẹ Jiwheyẹwhe tọn, podọ to [nugbodidọ, NW] mẹ.”—EFESUNU LẸ 4:24.
1.Naegbọn mí do duahọ nugbodidọ tọn do Jehovah Jiwheyẹwhe?
DÙDÙ to avùnnukundiọsọmẹ nugbodidọ tọn ji tindo ada susu lẹ. Dehe yin titengbe hugan wẹ yin dùdù to avùnnukundiọsọmẹ nugbodidọ tọn ji hlan Jehovah Jiwheyẹwhe. Na nugbo tọn, to pọndohlan mẹ na mẹhe nkọ Jehovah yin po nuhe e ko basi na mí po, podọ na klandowiwe mítọn hlan ẹn wutu, mí duahọ nugbodidọ tọn do e. Nawẹ mí nọ do nugbodidọ hia hlan Jehovah Jiwheyẹwhe gbọn? Aliho tintan wẹ yin gbọn yinyin nugbodọtọ hlan nunọwhinnusẹ́n dodo Jehovah tọn lẹ dali.
2, 3. Haṣinṣan tẹwẹ tin to nugbodidọ po dodonọ-yinyin po ṣẹnṣẹn?
2 Nado dù to avùnnukundiọsọmẹ enẹ ji, mí dona setonuna hogbe lọ lẹ he yin mimọ to 1 Pita 1:15, 16 mẹ he dọmọ: “Le ewọ he ylọ mì yin wiwe do, mọwẹ mì ni yin wiwe do to owalọ alọpalọpa popo mẹ; na yè ko wlanwe etọn dọ, mì na yin wiwe, na wiwe wẹ yẹn.” Nugbodidọ hlan Jehovah Jiwheyẹwhe na gọalọna mí nado nọ setonuna ẹn to whepoponu, bo nọ hẹn linlẹn, ohó, po nuyiwa mítọn lẹ po tin to kọndopọmẹ po ojlo wiwe etọn po. Ehe zẹẹmẹdo hinhẹn ayihadawhẹnamẹnu dagbe de go, dile mí yin gbedena to 1 Timoti 1:3-5 mẹ do dọmọ: “Opodo aṣẹ lọ tọn [ma nado plọnmẹ sinsẹ̀n-nuplọnmẹ he gbọnvo kavi nado payi otàn lalo lẹ go] wẹ owanyi sọn ayiha wiwe mẹ, sọn homẹdagbe mẹ, podọ sọn yise he madoklọ mẹ.” Nugbo wẹ dọ, depope to mí mẹ ma pe gba, ṣigba mí dona to tintẹnpọn nado basi dehe go mí pé lẹpo, be e ma jẹ dọ mí ni basi mọ ya?
3 Nugbodidọ hlan Jehovah na hẹn mí ma nado gbọn ṣejannabi dali do jogbe na nunọwhinnusẹ́n dodo tọn lẹ. Na nugbo tọn, nugbodidọ na hẹn mí ma nado yin yẹnuwatọ. Nugbonọ-yinyin wẹ yin nuhe psalmkantọ lọ tindo to ayiha mẹ to whenuena e jihàn dọmọ: “Oklunọ E, plọ́n ali towe mi; yẹn na nọ zinzọnlin to nugbo towe mẹ; hẹn ayiha ṣie do dopo nado nọ dibusi oyín towe.” (Psalm 86:11) Nugbodidọ biọ nuhe ko yin zẹẹmẹ basina ganji taidi “tonusise he yè ma yí huhlọn do hẹnmẹ basi.”
4, 5. Nugbodidọ na gọalọna mí nado dapana nuyiwa agọ̀ tẹ?
4 Nugbodidọ hlan Jehovah Jiwheyẹwhe na hẹn mí ga ma nado wà nudepope he na kọ̀n masin do oyín po Ahọluduta etọn po go. Di apajlẹ, Klistiani awe to ojlẹ de mẹ wayi biọ nuhahun mẹ hẹ ode awetọ sọmọ bọ e hẹn yé to aliho he ma sọgbe mẹ nado lẹhlan whẹdọtẹn aihọn tọn de. Whẹdatọ lọ kanse dọ, ‘Be Kunnudetọ Jehovah Tọn wẹ mì omẹ awe lẹ ya?’ E họnwun dọ e ma sọgan mọnukunnujẹ nuhe yé wá basi to whẹdọtẹn gba. Lehe enẹ yin masin kọndomẹgo do sọ! Nugbodidọ hlan Jehovah Jiwheyẹwhe na ko hẹn mẹmẹsunnu enẹlẹ nado setonuna ayinamẹ apọsteli Paulu tọn he dọmọ: “Núgúgú gbidigbidi de wẹ e yin to mì mẹ, dọ mì tindo owhẹylọ lẹ mẹde po mẹde po. Etẹwutu mì ma nọ kuku gbọ yí oguwhẹ? Etẹwutu mì ma nọ kuku gbọ yin mẹbibadu?” (1 Kọlintinu lẹ 6:7) Na nugbo tọn, aliho nugbodidọ tọn hlan Jehovah Jiwheyẹwhe wẹ yin nado jiya onú mẹdetiti tọn hinhẹnbú kakati nado kọ̀n masin do Jehovah po titobasinanu etọn po go.
5 Nugbodidọ hlan Jehovah Jiwheyẹwhe sọ bẹ ma nado jogbena obu gbẹtọ tọn hẹn ga. “Obu gbẹtọ tọn wẹ nọ hẹn omọ̀ wá: Ṣigba mẹdepope he yí otù etọn do Oklunọ go, wẹ yè na ze daga.” (Howhinwhẹn lẹ 29:25) Gbọnmọ dali, mí ma nọ jogbe to whenuena mí pannukọn homẹkẹn gba, ṣigba mí nọ hodo apajlẹ he Kunnudetọ Jehovah Tọn lẹ zedai to Union Soviétique dai tọn, to Malawi, to Ethiopie, po otò susu devo lẹ po mẹ.
6.Nugbodidọ na gọalọna mí ma nado dogbẹ́ hẹ mẹnu?
6 Eyin mí yin nugbodọtọ hlan Jehovah Jiwheyẹwhe, mí na dapana họntọnjiji hẹ mẹhe yin kẹntọ etọn lẹpo. Enẹwutu wẹ devi Jakobu wlan dọmọ: “Mì yọnnu ayọdetọ lẹ, be mìwlẹ ma yọnẹn dọ họntọnji hẹ aihọn, okẹ̀n wẹ e yin to Jiwheyẹwhe de? Na mẹdepope he na yin họntọn aihọn tọn, kẹntọ Jiwheyẹwhe tọn wẹ.” (Jakobu 4:4) Mí jlo na yin nugbodọtọ he Ahọlu Davidi dohia to whenuena e dọmọ: “Oklunọ E, be yẹn ma gbẹwanna yé he gbẹwanna we lẹ? Be homẹ ma gble mi do yé he fọ́n do oji we lẹ go? Yẹn yí wangbẹnamẹ he pé do gbẹwanna yé: Yẹn sọ hia yé dogọ kẹntọ ṣie lẹ.” (Psalm 139:21, 22) Mí ma na jlo nado dogbẹ́ hẹ ylanwatọ sọn ojlo mẹ wá depope gba, na mí ma tindo nude to kọndopọmẹ po yé po gba. Be nugbodidọ hlan Jiwheyẹwhe ma na glọnalina mí sọn gbẹdido mẹ po kẹntọ Jehovah tọn mọnkọtọn depope po, vlavo omẹ lọ lọsu tlọlọ kavi gbọn yizan televiziọn tọn gblamẹ ya?
Yiyiavunlọ na Jehovah
7.Nugbodidọ na gọalọna mí nado wà etẹ gando Jehovah go, podọ nawẹ Elihu wà ehe gbọn?
7 Nugbodidọ na whan mí nado yiavunlọ na Jehovah Jiwheyẹwhe. Lehe Elihu yin apajlẹ dagbe he mí tindo do sọ! Job 32:2, 3 dọ na mí dọmọ: “Yè hẹn homẹgble Elihu . . . tọn jimiyọn: Job go wẹ yè hẹn homẹgble etọn jimiyọn do, na e to whẹsuna ede hú na Jiwheyẹwhe wutu. Do họntọn etọn atọ̀n helẹ go ga wẹ yè hẹn homẹgble etọn jimiyọn do, na yé ma din ogblọndo de mọ wutu, podọ ganṣo yé ko gblewhẹdo Job.” To Job weta 32 kakajẹ 37 mẹ, Elihu yiavunlọ na Jehovah. Di apajlẹ, e dọmọ: “Nọtepọn mi, yẹn nasọ dohia we; na ohó gbẹsọ tin na Jiwheyẹwhe. . . . Bo na klọ́n dodo ṣie jó hlan Obasitọ ṣie. . . . Ewọ ma dọ̀n nukun etọn lẹ do godo sọn dodonọ go gba.”—Job 36:2-7.
8.Naegbọn mí do tindo nuhudo nado yiavunlọ na Jehovah?
8 Naegbọn nuhudo de do tin nado yiavunlọ na Jehovah? To egbehe, Jehovah Jiwheyẹwhe mítọn nọ yin vivlẹ to aliho susu tlala lẹ mẹ. E yin didohia dọ ewọ ma tin gba, dọ ewọ yin apadewhe Atọ̀n-to-dopomẹ tọn, dọ ewọ nọ sayana gbẹtọ mavọmavọ to olọnzo miyọnnọ de mẹ, dọ ewọ to tintẹnpọn po madogán po nado diọ aihọn lọ, dọ ewọ ma nọ hò gbẹtọvi lẹ tọn pọ́n gba, po mọmọ po sọyì. Mí na do nugbodidọ mítọn hia ẹ gbọn yiyiavunlọ na ẹn dali bo dohia dọ Jehovah tin; dọ ewọ yin Jiwheyẹwhe he tindo nuyọnẹn, he nọ dawhẹ jijlọ, ganhunupotọ, po owanyinọ po; dọ ewọ tindo ojlẹ na onú lẹpo; podọ to whenuena ojlẹ sisọ etọn na wá, ewọ na doalọtena ylanwiwa lẹpo bo na hẹn aihọn lọ pete zun paladisi. (Yẹwhehodọtọ 3:1) Ehe biọ dọ mí na yí dotẹnmẹ hundote lẹpo zan nado dekunnu hlan oyín Jehovah tọn po Ahọluduta etọn tọn po.
Nugbodidọ Hlan Titobasinanu Jehovah Tọn
9.Do whẹho tẹlẹ ji wẹ mẹdelẹ ko gboawupo to nugbodidọ mẹ te?
9 Dinvie mí wá whẹho yinyin nugbodọtọ hlan titobasinanu yinukundomọ Jehovah tọn ji. Na nugbo tọn, mí duahọ nugbodidọ tọn do e, gọna “afanumẹ nugbonọ, nuyọnẹntọ” lọ, gbọn ehe gblamẹ agun Klistiani tọn lọ nọ yin núdùdù na to gbigbọmẹ te. (Matiu 24:45-47) Mí ni dọ dọ nude sọawuhia to Owe Watch Tower tọn lẹ mẹ ehe mẹ mí ma mọnukunnujẹ kavi ma kẹalọyi to ojlẹ lọ mẹ. Etẹwẹ mí na wà? Mí na gblehomẹ bo tọ́n sọn titobasinanu lọ mẹ wẹ ya? Nuhe mẹdelẹ basi niyẹn to whenuena Atọ̀họ̀-Nuhihọ́ Lọ Tọn, to owhe susu lẹ die wayi, yí alẹnu yọyọ lọ zan na mẹhe na tin to aihọn ji to owhe Fọtọ́n whenu lẹ. Mẹdevo lẹ gblehomẹ gando nuhe Atọ̀họ̀-Nuhihọ́ Lọ Tọn dọ do whẹho kadaninọ tọn ji go. Eyin mẹhe dahli to whẹho ehe mẹ lẹ ko yin nugbodọtọ hlan titobasinanu lọ po mẹmẹsunnu yetọn lẹ po wẹ, yé na ko nọtepọn Jehovah nado hẹn whẹho ehelẹ họnwun, ehe e basi to ojlẹ sisọ etọn mẹ. Gbọnmọ dali, nugbodidọ bẹ teninọ po sọwhiwhe po hẹn kakajẹ whenuena nukunnumọjẹnumẹ dogọ na yin zinzinjẹgbonu gbọn afanumẹ nugbonọ nuyọnẹntọ lọ dali.
10. Nugbodidọ na gọalọna mí ma nado yin tlintlindo dintọ dogbọn etẹ dali?
10 Nugbodidọ hlan titobasinanu yinukundomọ Jehovah tọn sọ zẹẹmẹdo ma nado tindo nudepope nado yiwà hẹ atẹṣitọ lẹ. Klistiani nugbodọtọ lẹ ma na yin tlintlindo dintọ dogbọn nuhe omẹ mọnkọtọn lẹ tindo nado dọ dali gba. Nugbo wẹ dọ, mẹhe nọ yin yiyizan gbọn Jehovah Jiwheyẹwhe dali nado deanana azọ́n etọn to aigba ji lẹ ma pé gba. Ṣigba etẹwẹ Ohó Jiwheyẹwhe Tọn dọ na mí nado wà? Be nado tọ́n sọn titobasinanu Jiwheyẹwhe tọn mẹ wẹ ya? Lala. Owanyi mẹmẹsunnu tọn dona hẹn mí nado yin nugbodọtọ hlan ẹn, podọ mí dona zindonukọn nado “tindo owanyi zogbe sọn ahun mẹ wá na mínọzo.”—1 Pita 1:22, NW.
Nugbodidọ Hlan Mẹho Nugbodọtọ Lẹ
11. Nugbodidọ na gọalọna mí nado họ́ míde sọta linlẹn agọ̀ tẹ?
11 To whenuena nude yin didọ kavi yin bibasi to agun lọ mẹ he e vẹawu na mí nado mọnukunnujẹemẹ, nugbodidọ na glọnalina mí ma nado dawhẹnamẹ podọ na gọalọna mí nado tindo teninọ de ehe vlavo yin whẹho wuntuntun tọn. Be e ma na yọ́n hugan nado nọ lẹnnupọn do jẹhẹnu dagbe mẹho heyin dide lẹ tọn po yisenọ hagbẹ mẹtọn devo lẹ po to ayiha mẹ kakati nado to nuṣiwa yetọn lẹ kẹdẹ pọ́n ya? Mọwẹ, mí jlo nado họ́ míde sọta linlẹn agọ̀ mọnkọtọn lẹpo, na e gando nugbomadọ go wutu! Nugbodidọ nasọ gọalọna mí ga nado setonuna anademẹ Paulu tọn “ma nado dọho gbigble do mẹde go.”—Titu 3:1, 2.
12, 13. Avùnnukundiọsọmẹ tangan tẹlẹ wẹ mẹho lẹ dona pannukọn?
12 Nugbodidọ nọ ze avùnnukundiọsọmẹ tangan lẹ donukọnna mẹho lẹ. Dopo to avùnnukundiọsọmẹnu ehelẹ mẹ wẹ yin whẹho aṣli tọn. Hagbẹ agun lọ tọn de sọgan dọ aṣlihó na mẹho de. Nugbodidọ hlan omẹ enẹ na hẹn mẹho lọ ma nado gbà nunọwhinnusẹ́n aṣli tọn. Ewọ na setonuna ayinamẹ he tin to Howhinwhẹn lẹ 25:9 mẹ he dọmọ: “Aṣli mẹdevo tọn hiẹ dehia blo.” Enẹ zẹẹmẹdo ma na tlẹ do dọ ẹ na asi etọn lọsu gba!
13 Mẹho lẹ sọ vọ́ tindo whlepọn nugbodidọ tọn devo lẹ nado pehẹ ga. Be yé na yin mẹnukuntahopọntọ lẹ wẹ, kavi yé na yí tugbigbo po whiwhẹ po do gọalọna mẹhe tindo nuhudo vọjlado tọn lẹ, yèdọ eyin yé tlẹ yin hẹnnumẹ dopolọ kavi họntọn vivẹ lẹ ya? Nugbodidọ hlan titobasinanu Jehovah tọn na hẹn mẹhe yin mẹho to mí mẹ lẹ nado tẹnpọn bo gọalọna mẹdepope he tindo nuhudo alọgọ gbigbọmẹ tọn. (Galatianu lẹ 6:1, 2) Dile mí tlẹ sọgan yin dagbewanyinọ do sọ, nugbodidọ na hẹn mí yin hójọhó-dọtọ hẹ mẹho hatọ mítọn, kẹdẹdile apọsteli Paulu dọho hlan apọsteli Pita to aliho hójọhó-didọnamẹ tọn mẹ do. (Galatianu lẹ 2:11-14) To alọ devo mẹ, nugopọntọ lẹ na jlo nado payi yede go, eyin yé yinuwa matin nuyọnẹn kavi do mẹnukuntahopọn hia kavi to aliho devo lẹ mẹ ṣi aṣẹpipa yetọn zan, yé na hẹn onú lẹ vẹawu na mẹhe tin to nukunpedomẹgo yetọn lẹ glọ nado yin nugbodọtọ hlan titobasinanu Jiwheyẹwhe tọn.—Filippinu lẹ 4:5.
14, 15. Onú titengbe tẹlẹ wẹ sọgan whle nugbodidọ hagbẹ agun lọ tọn lẹ pọ́n?
14 Onú devo lẹ tin hlan whẹho dùdù to avùnnukundiọsọmẹ nugbodidọ tọn ji hlan agun lọ po mẹho etọn lẹ po. Eyin to aliho de mẹ ninọmẹ nuhahun tọn lẹ tin to agun lọ mẹ, ehe nọ na mí dotẹnmẹ hundote lọ nado do nugbodidọ hia hlan Jehovah po mẹhe to afọ̀ etọn zedai lẹ po. (Pọ́n Atọ̀họ̀-Nuhihọ́ Lọ Tọn [Flansegbe] 15 juin 1987, weda 15-17.) To whenuena mẹdesẹ sọn agun mẹ wá aimẹ, nugbodidọ biọ dọ mí ni nọgodona mẹho lẹ, e ma yin nado tẹnpọn nado mọhodọ vlavo eyin whẹwhinwhẹn he pe tin na afọdide heyin zize lọ gba.
15 Nugbodidọ hlan agun lọ sọ nọ biọ to mí si nado nọgodona opli atọ́n sẹmẹsẹmẹ tọn lẹpo jẹ obá ninọmẹ po nugopipe mítọn lẹ po tọn mẹ. Nugbodidọ biọ to mí si e ma yin yìyì yé to gbesisọmẹ kẹdẹ gba ṣigba nọ wleawuna yé bo nọ na gblọndo mẹhẹnlodo tọn lẹ dile dotẹnmẹ etọn hundote do.—Heblu lẹ 10:24, 25.
Nugbodidọ Alọwle Tọn
16, 17. Avùnnukundiọsọmẹ tẹlẹ hlan nugbodidọ wẹ Klistiani he ko wlealọ lẹ dona pannukọn?
16 Mẹdevo tẹwẹ mí sọ duahọ nugbodidọ tọn do? Eyin mí ko wlealọ, to pọndohlanmẹ na pàdido alọwle mítọn tọn lẹ, mí dona pehẹ avùnnukundiọsọmẹ nugbodidọ tọn hlan alọwlemẹ mítọn. Nugbodidọ hlan alọwlemẹ mítọn na hẹn mí ma nado basi nuṣiwa yinyin mẹdagbe tọn hlan yọnnu kavi sunnu devo lẹ hugan lehe mí te do hlan asi kavi asu mítọn. Nugbodidọ hlan alọwlemẹ mítọn sọ biọ dọ mí ma dona de madogán kavi nuṣiwa alọwlemẹ mítọn tọn hia mẹdevo lẹ gba. E bọawu nado fànkoe na mẹdevo lẹ hugan nado wazọ́n sinsinyẹn nado hùn kanṣiṣa hodọdopọ tọn dote hẹ alọwlemẹ mítọn, ehe mí dona basi to kọndopọmẹ hẹ Osẹ́n Sika Tọn lọ. (Matiu 7:12) Na nugbo tọn, ninọmẹ alọwle tọn nọ ze avùnnukundiọsọmẹ nujọnu tọn donukọnna nugbodidọ Klistiani tọn mítọn.
17 Nado dù to avùnnukundiọsọmẹ nugbodidọ tọn ehe ji, e ma yin dọ mí na dapana yinyin mẹhe huwhẹ nuṣiwa daho tọn kẹdẹ gba ṣigba mí sọ dona họ́ linlẹn po numọtolanmẹ mítọn lẹ po. (Psalm 19:14) Di dohia, eyin ahun mẹklọtọ mítọn lẹ yin nukunkẹnnọ na awuvivi po gbẹ̀fẹdudu po, e bọawu na mí nado zindonukọn po ṣejannabi po nado yiwanna nuhe e jlo. To whenuena e to tudohomẹna nugbodidọ alọwle tọn whenu, Ahọlu Sọlọmọni na ayinamẹ asu lẹ to yẹhiadonu liho nado ‘nù osìn sọn avundoe yetọn lọsu mẹ.’ (Howhinwhẹn lẹ 5:15) Podọ Jesu dọmọ: “Eyin mẹdepope pọ́n yọnnusi de nado wà núgbigble hẹ ẹ, e ko deayọ hẹ ẹ to ayiha etọn mẹ dote.” (Matiu 5:28) Asu he nọ ylọn yedelẹ do owe fẹnnuwiwa tọn hihia mẹ lẹ tin to owù yinyin kiklọ biọ ayọdide tọn mẹ, bo na gbọnmọ dali lẹzun nugbomadọtọ hlan asi yetọn lẹ bo ma na yin nugbodọtọ hlan yé. Na whẹwhinwhẹn dopolọ wutu, asi he tindo gbigbọ nado nọ pọ́n aihundida televiziọn tọn lẹ he nọ yinuwa hẹ tito ogalilọ tọn lẹ sọgan yin whiwhlepọn nado lẹzun mẹhe mayin nugbodọtọ hlan asu etọn. Nalete, gbọn yinyin nugbodọtọ hlan alọwlemẹ mítọn nugbonugbo dali, nalete, mí na hẹn kanṣiṣa alọwle lọ tọn lodo, bo na gọalọna ode awetọ to vivẹnudido mítọn lẹ mẹ nado hẹn homẹ Jehovah Jiwheyẹwhe tọn hùn.
Alọgọnamẹnu lẹ Nado Gbọṣi Nugbodidọ Mẹ
18. Pinpẹn etẹ tọn yinyọnẹn wẹ na gọalọna mí nado yin nugbodọtọ?
18 Etẹwẹ na gọalọna mí nado dù to avùnnukundiọsọmẹ nugbodidọ tọn ji to awa ẹnẹ ehelẹ ji: nugbodidọ hlan Jehovah, hlan titobasinanu etọn, hlan agun lọ, podọ hlan alọwlemẹ mítọn? Alọgọnamẹnu dopo wẹ yin yinyọ́n pinpẹn etọn dọ dùdù to avùnnukundiọsọmẹ nugbodidọ tọn ji gando whẹsuna nupojipetọ-yinyin Jehovah tọn go. Mọwẹ, gbọn gbigbọṣi nugbodidọ mẹ dali mí dohia dọ mí pọ́n Jehovah hlan taidi Nupojipetọ Wẹkẹ lọ tọn. Gbọnmọ dali, mí sọgan sọ tindo osi mẹdetiti tọn po todido ogbẹ̀ madopodo tọn po to aihọn yọyọ Jehovah tọn mẹ. Mí sọgan gọalọna míde nado gbọṣi nugbodidọ mẹ gbọn dogbapọnna apajlẹ dagbe nugbodọtọ tọn lẹ dali, sọn Jehovah ji kakajẹ mẹhe yin nùdego to Biblu po owe Watch Tower tọn lẹ po mẹ, gọna linlin Annuaire tọn lẹ lọsu ji.
19. Ada tẹwẹ yise nọ yiwà to nugbodidọ mítọn tọn mẹ?
19 Yise he lodo to Jehovah Jiwheyẹwhe mẹ po obu ma nado hẹn ẹn gblehomẹ po na gọalọna mí nado dù to avùnnukundiọsọmẹ nugbodidọ tọn ji. Mí nọ hẹn yise mítọn lodo bo nọ dibusi Jehovah gbọn pinplọn Ohó Jiwheyẹwhe Tọn vẹkuvẹku dali podọ gbọn tintindo mahẹ to lizọnyizọn Klistiani tọn lọ mẹ dali. Ehe na gọalọna mí nado yinuwa to kọndopọmẹ hẹ ayinamẹ Paulu tọn he yin kinkandai to Efesunu lẹ 4:23, 24 mẹ dọmọ: “Na mì ni lẹzun yọyọ to gbigbọ ayiha mìtọn tọn mẹ; na mì ni sọ ze gbẹtọ yọyọ lọ dogo, mẹhe yè da to dodo mẹ di apajlẹ Jiwheyẹwhe tọn, podọ to [nugbodidọ, NW ] mẹ.”
20. Hu popolẹpo, jẹhẹnu tẹwẹ na gọalọna mí nado yin nugbodọtọ hlan Jehovah podọ hlan mẹdevo lẹpo he mí duahọ nugbodidọ tọn do?
20 Yinyọ́n pinpẹn jẹhẹnu Jehovah tọn lẹ nọ gọalọna mí nado yin nugbodọtọ. Hu popolẹpo, owanyi matin ṣejannabi na Otọ́ mítọn olọn tọn po pinpẹn nutọn yinyọnẹn po na onú lẹpo he e ko basi na mí, nado yiwanna ẹn po ahun mítọn lẹpo po podọ po alindọn po podọ po ayiha po gọna huhlọn na gọalọna mí nado yin nugbodọtọ hlan ẹn. Yinukọn dogọ, tintindo owanyi he Jesu dọ dọ e na dohiagona hodotọ etọn lẹ na gọalọna mí nado yin nugbodọtọ hlan Klistiani lẹpo to agun lọ mẹ podọ to whẹndo mítọn mẹ. Nado dọ ẹ to aliho devo mẹ, na nugbo tọn whẹho yinyin vlavo ṣejannabinọ kavi mayin ṣejannabinọ tọn wẹ eyin. Nugbomadọ zẹẹmẹdo yinyin ṣejannabinọ. Nugbodidọ zẹẹmẹdo yinyin mẹhe mayin ṣejannabinọ.—Malku 12:30, 31; Johanu 13:34, 35.
21. Nawẹ whẹho dùdù to avùnnukundiọsọmẹ nugbodidọ tọn ji sọgan yin bibladopọ gbọn?
21 To bladopọ mẹ: Nugbodidọ wẹ yin jẹhẹnu titengbe hugan he nọ yin didohia gbọn Jehovah Jiwheyẹwhe dali, gbọn Jesu Klisti dali, podọ gbọn devizọnwatọ nugbo Jehovah tọn lẹpo dali. Nado tindo haṣinṣan dagbe de po Jehovah Jiwheyẹwhe po, mí dona dù to avùnnukundiọsọmẹ nugbodidọ tọn ji gbọn gbẹninọ to kọndopọmẹ hẹ nubiọtomẹsi dodo tọn lẹ dali, gbọn nudepope ma tindo nado yiwà po kẹntọ etọn lẹ po dali, podọ gbọn yiyiavunlọ na Jehovah to kunnudide aṣa tọn po mayin aṣa tọn po dali. Mí sọ dona dù to avùnnukundiọsọmẹ nugbodidọ hlan titobasinanu yinukundomọ Jehovah tọn ji. Mí dona yin nugbodọtọ hlan agun mítọn lẹ podọ sọ dona yin nugbodọtọ hlan alọwlemẹ mítọn lẹ ga. Gbọn dùdù to avùnnukundiọsọmẹ nugbodidọ tọn po kọdetọn dagbe po ji dali, mí na to mahẹ tindo to whẹsuna nupojipetọ yinyin Jehovah tọn, bo na tin to awa etọn ji to whẹho lọ mẹ. Gbọnmọ dali, mí na mọ nukundagbe etọn bo na mọ ale ogbẹ̀ madopodo tọn yí. Nuhe apọsteli Paulu dọ dogbọn mẹdezejo jijọ-di-Jiwheyẹwhe tọn dali sọgan sọ yin didọ dogbọn dùdù to avùnnukundiọsọmẹ nugbodidọ mítọn tọn ji dali ga. Alenu wẹ e yin na ogbẹ̀ dinvie tọn podọ na enẹ he ja tọn.—Psalm 18:25; 1 Timoti 4:8.
Nawẹ Hiẹ Na Na Gblọndo Gbọn?
◻ To aliho tẹlẹ mẹ wẹ mí sọgan dù to avùnnukundiọsọmẹ nugbodidọ hlan Jiwheyẹwhe tọn ji te?
◻ Etẹwẹ nugbodidọ hlan titobasinanu Jehovah tọn nọ biọ to mí si?
◻ Nawẹ mẹho lẹ sọgan dù to avùnnukundiọsọmẹ nugbodidọ tọn ji gbọn?
◻ Avùnnukundiọsọmẹ he bẹ nugbodidọ hẹn tẹ ji wẹ Klistiani he ko wlealọ lẹ dona dù te?
◻ Jẹhẹnu tẹlẹ wẹ na gọalọna mí nado dù to avùnnukundiọsọmẹ nugbodidọ tọn ji?
[Yẹdide to weda 15]
Nugbodidọ hlan hagbẹ agun lọ tọn lẹ na gọalọna mẹho lẹ ma nado de whẹho aṣli tọn lẹ hia
[Yẹdide to weda 16]
Nugbodidọ hlan alọwlemẹ mẹtọn nọ hẹn kanṣiṣa alọwle tọn lodo