Ayinamẹ lẹ Na Opli Sinsẹ̀nzọn Kunnudegbe Tọn

Taidi opli agun tọn lẹpo, opli sinsẹ̀nzọn kunnudegbe tọn lọsu yin awuwledainanu Jehovah tọn de na mí nido nọ whàn mídelẹ hlan owanyi po azọ́n dagbe lẹ po kọ̀n. (Heb 10:24, 25) Opli ehe ma dona zẹ̀ nukunwhiwhe atọ́n kavi ṣinawe go, podọ to ojlẹ ehe gblamẹ wẹ yè na má mẹlẹ, de aigba-denamẹ bosọ hodẹ̀. (Amọ́, eyin opli de godo wẹ opli ehe yin bibasi, ojlẹ lọ sọ dona whè humọ.) Mẹhe jlo na deanana lọ dona wleawuna nudọnamẹ he na yọ́n-na-yizan na mẹhe jlo na tindo mahẹ to lizọnyizọn lọ mẹ to gbenẹgbe lẹ. Di apajlẹ, eyin Sibigbe de wẹ bọ susu mẹhe wá lẹ tọn ma ko tindo mahẹ to lizọnyizọn lọ mẹ sọn sẹfifo he jẹnukọn, e gán yọ́n nado gbadopọnna lehe yè gán bẹ hodọdopọ de jẹeji do. Nudevo tẹlẹ wẹ yè gán sọ gbadopọnna?

• Nuzedonukọnnamẹ de sọn Gbẹzan po Lizọnyizọn Mítọn Po—Nuplọnwe Opli Tọn mẹ

• Lehe mí gán yí nujijọ kavi linlin agọe tọn de zan nado bẹ hodọdopọ de jẹeji do

• Lehe mí gán duto hodidọ aliglọnnamẹ tọn he mí nọ saba pehẹ de ji do

• Lehe mí gán bẹ hodọdopọ jẹeji do hẹ mẹhe ma yise dọ Jiwheyẹwhe tin, mẹhe yise dọ nulẹ wá aimẹ na yede, mẹhe ma sè ogbè he mí nọ do kavi mẹhe to sinsẹ̀n he mẹsusu ma nọ yì to aigba-denamẹ mítọn ji de mẹ

• Lehe mí gán yí adà nọtẹn Intẹnẹt tọn mítọn jw.org, aplikasiọn JW Library^®, kavi Biblu tọn de zan do

• Lehe mí gán yí nuhe to Azọ́nwanu Mẹpinplọn tọn mítọn mẹ de zan do

• Lehe mí gán tindo mahẹ to adà tangan lizọnyizọn lọ tọn de mẹ do, vlavo kunnudide gbọn alokan ji, kunnudide gbọn wekanhlanmẹ gblamẹ, kunnudide gbangba tọn, gọyìpọn kavi plọnmẹ Biblu lẹ

• Nuflinmẹ lẹ gando hihọ́, alọdidiọ, walọ dagbe didohia, pọndohlan dagbe tintindo, po onú mọnkọ devo lẹ po go

• Nupinplọn kavi video de sọn alọnuwe lọ Jo Dewe Na Wehihia po Mẹpinplọn Po mẹ

• Lehe mí gán na tuli mẹhe to azọ́nwa hẹ mí to lizọnyizọn lọ mẹ kavi gọalọna ẹn do

• Wefọ de he tindo kanṣiṣa hẹ lizọnyizọn lọ kavi numimọ sinsẹ̀nzọn kunnudegbe tọn de he whànmẹ