Nuplọnmẹ Delẹ sọn Gbẹzan Samuẹli Tọn Mẹ

Samuẹli yin nugbonọ na Jehovah to gbẹzan etọn blebu mẹ. Whenue e to pẹvi, e ma dike walọ gblezọn Họfini po Finehasi po tọn, yèdọ visunnu Yẹwhenọ Daho Eli tọn lẹ ni bẹpla ẹ. (1Sa 2:22-26) Samuẹli to whinwhẹ́n deji bọ Jehovah sọ tin hẹ ẹ. (1Sa 3:19) To whenue e whẹ́n mẹho lọsu, e gbẹ́ sẹ̀n Jehovah po nugbonọ-yinyin po, mahopọnna dọ visunnu etọn lẹ ma to dagbe wà.—1Sa 8:1-5.

Etẹwẹ mí gán plọn sọn apajlẹ Samuẹli tọn mẹ? Eyin jọja de wẹ a yin, deji dọ Jehovah yọ́n nuhe to gbigbò we lẹ bosọ yọ́n numọtolanmẹ towe. Ewọ na gọalọna we nado nọ gboadọ. (Isa 41:10, 13) Eyin mẹjitọ de wẹ a yin bọ ovi towe danbú, apajlẹ Samuẹli tọn gán miọnhomẹna we. Visunnu Samuẹli tọn lẹ ko whẹ́n mẹho bọ ewọ ma gán hẹn yé gánnugánnu nado tẹdo nujinọtedo Jehovah tọn lẹ go. E jo whẹho lọ do alọ Jehovah tọn mẹ bo tẹnpọn nado hẹn tenọgli etọn titi go, podọ ehe hẹn homẹ Otọ́ olọn mẹ tọn etọn Jehovah tọn hùn. Vlavo apajlẹ dagbe towe gán yinuwado ovi towe ji bọ e na lẹkọwa Jehovah dè.

PỌ́N VIDEO LỌ PLỌNNU SỌN YÉ DÈ—SAMUẸLI, ENẸGODO NA GBLỌNDO NA KANBIỌ HE BỌDEGO LẸ:

• 

  To whenue Samuẹli to pẹvi, nawẹ e do adọgbigbo hia gbọn?

• 

  Nawẹ Danny do adọgbigbo hia gbọn?

• 

  Apajlẹ tẹwẹ Samuẹli zedai na mẹhomẹ lẹ?

• 

  Nawẹ mẹjitọ Danny tọn lẹ ze apajlẹ dagbe dai gbọn?