Mẹnu lẹ Wẹ Yin Họntọn Towe to Intẹnẹt Ji?

Wezẹhomẹ de dọ dọ họntọn wẹ “mẹhe yè yiwanna na onú etọn nọ jẹ mẹtọn ji kavi na yè do sisi na ẹn wutu.” Di apajlẹ, Jonatani po Davidi po lẹzun họntọn alọmayiemẹ to whenue Davidi hù Goliati godo. (1Sa 18:1) Jẹhẹnu dagbe he yé omẹ awe lẹ do wẹ zọ́n bọ yé do vẹ́. Ehe dohia dọ oyọnẹn Jehovah tọn wẹ nọ yin dodonu dagbe na họntọnjiji. E nọ saba biọ whenu po vivẹnudido po nado yọ́n mẹhe yè jlo na jihọntọn hẹ. Amọ́ to Intẹnẹt ji, yè gán zín onú dopo poun bo do họntọn. To Intẹnẹt ji, e nọ bọawuna mẹlẹ nado whlá nuhe yé yin, na yé gán zan ayiha wintinwintin bo ṣinyankẹ́nna nudọnamẹ he yé nọ na lẹ kavi tlẹ na nudọnamẹ agọ̀ lẹ. Enẹwutu, nuyọnẹnnu wẹ e yin nado to aṣeji gando họntọnjiji to Intẹnẹt ji go. Eyin mẹhe a ma yọnẹn ganji de do obiọ họntọnjiji tọn de hlan we to Intẹnẹt ji, ma pọ́n dọ mẹlọ na gblehomẹ bo dibu nado gbẹ́ kavi dovọ́na obiọ lọ blo. Nado dapana owù lẹ, mẹdelẹ tlẹ ko bayi dide ma nado nọ zan nọtẹn gbẹdido Intẹnẹt ji tọn depope. Amọ́, eyin a bayi dide nado zan, etẹlẹ wẹ a dona hẹn do ayiha mẹ?

PỌ́N VIDEO LỌ NỌ AṢEJI GANDO HỌNTỌNJIJI TO INTẸNẸT JI GO, ENẸGODO NA GBLỌNDO NA KANBIỌ HE BỌDEGO LẸ:

• 

  Etẹwẹ a dona hopọ́n whẹpo do kàn linlẹn towe lẹ kavi má fọto lẹ to Intẹnẹt ji?

• 

  Naegbọn a dona nọ aṣeji taun gando mẹhe yin họntọn towe to Intẹnẹt ji lẹ go?

• 

  Naegbọn a dona ze dogbó lẹ dai gando whenu he a nọ yizan to nọtẹn gbẹdido Intẹnẹt ji tọn ji go?—Efe 5:15, 16