Mẹlẹpo Wẹ Nọ Jlo Sọgodo Dagbe
Sọgodo wunmẹ tẹwẹ nọ jlo we? Mẹsusu wẹ nọ jlo sọgodo dagbe de na yewlẹ po whẹndo yetọn po. Yé nọ jlo na do jijọho bo to jogún-jogún; yé sọ nọ jlo na vò bo jẹ adọkun. Vlavo nuhe nọ jlo hiẹ lọsu niyẹn.
Amọ́, mẹsusu wẹ nọ lẹndọ odlọ de poun wẹ sọgodo enẹ yin. Nujijọ ajiji po ninọmẹ madonukun lẹ po taidi azọ̀nylankan COVID-19 ko hẹn gbẹninọ po akuẹ dindin po vẹawu bọ mẹsusu ko sọ kú. Yé nọ wá mọdọ po enẹ po, emi ma gán do sọgodo dagbe de gbede.
Na ogbẹ̀ lọ ma do jide wutu, mẹlẹ nọ to ayiha kàn klinkán-klinkán nado do sọgodo dagbe. Mẹdelẹ yise dọ tadagbe po biọwá po mẹ wẹ nulẹpo te. Mẹsusu nọ plọnwe yinukọn bo nọ jẹ adọkun, na yé nọ lẹndọ enẹ wẹ na zọ́n bọ emi ma na jẹdò nuhe nọ jlo emi lẹ tọn. Mẹdevo lẹ nọ mọdọ eyin emi ko gbẹ́ yin mẹdagbe, ohó fó.
Todin, be onú enẹlẹ na gọalọna we nugbo nado do sọgodo he nọ jlo we lọ ya? Nado yọnẹn, lẹnnupọndo kanbiọ he bọdego lẹ ji:
Etẹwẹ yin aṣli lọ nado do sọgodo dagbe?
Be wepinplọn po akuẹ po gán zọ́n bọ yè na do sọgodo dagbe ya?
Eyin mẹde ko gbẹ́ yin mẹdagbe, be sọgodo etọn na yọ́n ya?
Be anademẹ dejidego de tin nado do sọgodo dagbe ya?
Atọ̀họ̀-Nuhihọ́ lọ Tọn ehe na gọalọna we nado mọ gblọndo kanbiọ enẹlẹ tọn.