Be Wepinplọn po Akuẹ po Gán Zọ́n Bọ Yè Na Do Sọgodo Dagbe Ya?

Mẹsusu nọ dọ dọ sọgodo mẹhe sewé ganji bo do adọkun lẹ tọn nọ pọnte. Yé yise dọ mẹhe yì wehọmẹ alavọ tọn lẹ nọ yin azọ́nwatọ dagbe, tòvi dagbe bọ whẹndo yetọn nọ vò. Linlẹn devo wẹ yindọ mẹhe plọnwe ganji lẹ wẹ nọ mọ azọ́n he pekuẹ lẹ bọ mẹhe do akuẹ lẹ wẹ nọ do ayajẹ.

NUHE MẸSUSU NỌ WÀ

Dawe de he nọ yin Zhang Chen bo wá sọn Chine dọ dọ: “N’lẹndọ eyin n’yì wehọmẹ alavọ tọn bo fó, oyà ṣie na gbọ. Podọ eyin n’mọ azọ́n he pekuẹ, n’na vò bo do ayajẹ.”

Mẹsusu wẹ nọ jlo na yì wehọmẹ alavọ tọn he diyin lẹ, etlẹ gán yin to tògodo, na ogbẹ̀ yetọn nido pọnte. Azọ̀nylankan COVID-19 he hẹn tomẹyiyi vẹawu wẹ zọ́n bọ ehe do depò. Linlin 2012 tọn de dọ dọ: “Hugan mado-awe mẹhe to weplọn to tògodo lẹ tọn wẹ yin Asie-nu.” (L’Organisation de coopération et de développement économiques)

Mẹjitọ lẹ nọ saba yí nususu do sanvọ́, na ovi yetọn lẹ nido yì wehọmẹ alavọ tọn to tògodo. Nuhe dawe de he nọ yin Qixiang bo wá sọn Taïwan dọ die: “Mẹjitọ ṣie lẹ ma do alọnu sọmọ, amọ́ míwu ovi yetọn ẹnẹ lẹpo wẹ yé dohlan wehọmẹ alavọ tọn to États-Unis.” Taidi mẹjitọ Qixiang tọn lẹ, mẹjitọ susu wẹ nọ tlọ biọ ahọ́ mẹ nado penukundo ovi yetọn he to weplọn to tògodo lẹ go.

BE E NỌ HẸN ALE WÁ YA?

Dopo to awhli lọ lẹ mẹ nọ zánnukle to ọdinatẹẹ kọ̀n bọ e didọ apọṣi i. — Susu mẹhe nọ doafọna wepinplọn yinukọn po adọkun po lẹ tọn wẹ nọ wá jẹflumẹ

Wepinplọn gán hẹn ale delẹ wá nugbo. Amọ́, mẹhe yì wehọmẹ lẹ nọ wá mọ to whedelẹnu dọ ovò wẹ emi lẹn, ovò wẹ emi ka wá mọ. Di apajlẹ, mẹlẹ nọ jẹtukla na owhe susu bo nọ yàn akuẹ he yinukunkẹ bo ma nọ wá mọ azọ́n he donukun yé te. Rachel Mui na linlin to owe de mẹ dọ: “Mẹhe fó wehọmẹ alavọ tọn bo ma mọ azọ́n lẹ fọ́n bo to susudeji.” (Owe lọ Singapore’s Business Times) Wesetọ de he nọ yin Jianjie bo nọ nọ̀ Taïwan dọ dọ: “Mẹsusu wẹ ma nọ mọ owe he yé plọn sin azọ́n wà.”

Mẹdelẹ he tlẹ nọ mọ owe he yé plọn sin azọ́n nọ wá dọ dọ e ma yin ogbẹ̀ dagbe he yé lẹn wẹ yé wá mọ. Dawe Thaïlande-nu de he nọ yin Niran yì wehọmẹ alavọ tọn to Royaume-Uni. To whenue e lẹkọ bo mọ azọ́n he sin owe e plọn, e dọmọ: “Whenue n’fó wehọmẹ alavọ tọn, n’mọ azọ́n he pekuẹ taun de nugbo. Amọ́, n’dona to azọ́nwa poun. Dile ojlẹ to yìyì, azọ́nwhé lọ wá yàn mẹsusu bọ yẹnlọsu demẹ. N’wá mọdọ azọ́n de ma do jide.”

Mẹhe tlẹ do adọkun kavi jẹyín dọ emi vò to gbẹ̀mẹ lẹ gbẹ́ nọ do nuhahun to whẹndo mẹ, nọ jẹazọ̀n sinsinyẹn, bo nọ hanú gando akuẹ go. Katsutoshi he wá sọn Japon dọmọ: “N’do adọkun taun, amọ́ e nọ vẹna mi dọ mẹlẹ nọ jlo na whlẹnagbà hẹ mi. Yé nọ whànwu mi bo tlẹ nọ wadanu do mi.” Nawe de he nọ yin Lam bo wá sọn Viêt Nam dọmọ: “Na mẹlẹ jlo na vò to gbẹ̀mẹ wutu, yé nọ to wezunhọ̀n to azọ́n he pekuẹ de godo. Amọ́, susu yetọn wẹ nọ wá pò na nuhiha, azọ̀n, flumẹjijẹ po apọṣimẹ po.”

WEPINPLỌN PO AKUẸ PO KẸDẸ MA PÉ

Nado dọ hójọhó, nude ma ylan to e mẹ nado yì wehọmẹ jẹ obá de mẹ bo mọ akuẹ nado penukundo míde po whẹndo mítọn po go. Amọ́, enẹ kẹdẹ ma ko pé nado do sọgodo dagbe de. Etẹwutu? Pọ́n nuhe Owe Wiwe lẹ dọ.

YÈ GÁN PLỌNWE YINUKỌN GANṢO BỌ E MA NA PÀMẸ.

“E ma yin awuyatọ lẹ wẹ nọ duto wezundido ji to whepoponu, . . . podọ e ma yin mẹhe tindo zinzin lẹ wẹ nọ jẹ adọkun to whepoponu, mọjanwẹ e ma yin mẹhe tindo oyọnẹn lẹ wẹ nọ tindo kọdetọn dagbe to whepoponu, na yemẹpo ji wẹ ojlẹ po kosọ po nọ wá.”—YẸWHEHODỌTỌ 9:11.

E ma yin whelẹponu wẹ nulẹ nọ pà mẹhe sewé lẹ, podọ e ma nọ yin owhẹ̀ yetọn dandan. Di apajlẹ, nuhahun akuẹ tọn, nuyiwahẹmẹ agọ̀ po wangbẹnamẹ po gán zọ́n bọ nulẹ ma na pà mẹhe plọnwe ganji.

ADỌKUN MA DO JIDE.

“A do magbọjẹ na dewe nado sọgan jẹ adọkun blo. Yì agbọ́ji bo do wuntuntun hia. Whenue hiẹ na ze nukun towe deji, e ma na tin ba, na ayihaawe ma tin dọ e na wú awà di akùn bo zlọn yì agahomẹ.”—HOWHINWHẸN LẸ 23:4, 5.

Akuẹ ma nọ namẹ jide dẹn-to-aimẹ de. Mẹhe jẹtukla bo bẹ akuẹ pli na owhe susu gán hẹn nulẹpo bu to zánto dopo mẹ. Nujijọ ajiji lẹ taidi aigba-sisọsisọ, miyọ́n po jẹhọn-ahizi po gán tlọ ajọwatọ de bọ e ma na do fie e na nọ lọsu ba.

AKUẸ NỌ SABA YIN ADỌ̀ NUHAHUN SUSU TỌN.

“Nutindo susugege adọkunnọ tọn ma nọ na ẹn agbọ́ nado damlọn.” —YẸWHEHODỌTỌ 5:12.

Dawe de he nọ yin Franklin bo nọ nọ̀ Hong Kong mọdọ nugbo wẹ wefọ lọ dọ. E plọnwe taun bo mọ azọ́n he pekuẹ. To nukọn mẹ, e wá jẹ ogán tẹnmẹ. E dọmọ: “Lẹnpọn wá jẹ azọ̀n do mi ji. N’nọ hanú sọmọ bọ n’ma tlẹ sọ nọ damlọn ba.” E wá jẹ fide bọ nulẹ húagbọ́ ẹ. Nue e dọ die: “N’masọ wá yọ́n nue zọ́n n’do to azọ́nwa gàn-an. N’nọ kanse dee nuewutu mí do to ogbẹ̀ lọ mẹ taun.”

“A do magbọjẹ na dewe nado sọgan jẹ adọkun blo.”—HOWHINWHẸN LẸ 23:4

Taidi Franklin, mẹsusu lẹ wẹ wá mọnukunnujẹemẹ dọ nudevo lẹ sọ to nukọnna wepinplọn po adọkun po. Kakati nado doafọna adọkun, yé nọ tẹnpọn nado yin mẹdagbe bo nọ wà dagbe na mẹhe lẹdo yé lẹ nado do sọgodo dagbe. Amọ́, be e nọ pà yé ya? Mí na mọ gblọndo lọ to hosọ he bọdego mẹ.