“Todin, N’Yiwanna Lizọnyizọn Lọ!”

N’HẸN AYAJẸ ṢIE BU

E blawu dọ whenue n’biọ owhe aflanmẹ tọn lẹ mẹ, haṣinṣan pẹkipẹki he n’do hẹ Jehovah masọ lodo ba. E nọ ṣí na mi dọ klasigbẹ́ ṣie lẹ dibla do mẹdekannujẹ he madodogbó, bọ n’nọ lẹndọ nude to gbigbọ go e. N’nọ mọdọ osẹ́n mẹjitọ ṣie lẹ tọn po nujinọtedo Klistiani tọn lẹ po gbẹ́gbẹ́, bọ nuwiwa gbigbọmẹ tọn lẹ nọ taidi agbàn na mi. Dile etlẹ yindọ n’ma do ayihaawe gbede dọ Jehovah tin, gbigbọnọ-yinyin ṣie jẹ mimiọn ji.

E ma yindọ n’doalọtena yẹwhehodidọ mlẹnmlẹn wẹ gba, amọ́ sinsẹ̀nzọn ṣie na Jehovah wá jẹ mọmọ tọn. Eyin e wá jọ bọ n’jei kunnudegbe janwẹ, n’ma nọ wleawu gbede, enẹwutu, e ma nọ yin fifátẹn bọ n’do nọ bẹ hodọdopọ lẹ jẹeji kavi dotana yé. Lizọnyizọn ṣie ma nọ de sinsẹ́n tọ́n bo masọ nọ hẹn awuvivi wá na mi, ehe lọsu zọ́n bọ n’sọ gbẹwanna lizọnyizọn lọ dogọ. N’nọ kanse dee dọ, ‘Nawẹ gbẹtọ gán fọ́n bo to ehe wà to sẹmẹsẹmẹ kavi to sunmẹsunmẹ gbọn?’

Whenue n’do owhe 17, n’jlo na jẹ jlòkoko. Enẹwutu, n’bẹ agbàn sọn whégbè bo sẹtẹn yì Australie. E ma bọawuna mẹjitọ ṣie lẹ nado mọ bọ n’to whégbè tlọ́n. Dile etlẹ yindọ ayiha yetọn ma jai, yé lẹndọ na zindonukọn to nuwiwa gbigbọmẹ tọn ṣie lẹ mẹ.

To Australie, ninọmẹ gbigbọmẹ tọn ṣie sọ vantan dogọ. Dopo vlavo wẹ n’nọ yì opli. N’nọ dogbẹ́ hẹ jọja delẹ, he taidi yẹnlọsu gán yì pli to whèjai de fẹẹ, amọ́ to whèjai devo, gán yì nùahàn bo dúwe to gbẹdutẹn zánmẹ tọn lẹ. Eyin n’flin ojlẹ enẹlẹ, n’nọ mọdọ afọ dopo to agé dopo to otọ̀ wẹ n’bayi, amọ́ n’ma yọ́n otọ̀ he mẹ whèvi hù n’te taun.

NUPLỌNMẸ MADONUKUN DE HE HỌAKUẸ TAUN

To nudi owhe awe godo, n’dukosọ hẹ mẹmẹyọnnu de na ojlẹ kleun de, mẹhe to mayọnẹn mẹ hẹn mi nado jẹ nulẹnpọn ji do fie gbẹzan ṣie pànta ji. To ojlẹ lọ mẹ, míwu mẹmẹyọnnu tlẹnnọ atọ́n wẹ nọ nọ̀ owhé dopolọ gbè, bọ mí bayi oylọna nugopọntọ lẹdo tọn po asi ẹ Tamara po nado wá nọ owhé mítọn gbè na osẹ dopo. Whenue whẹho agun tọn delẹ hẹn alọnu asu etọn tọn ján, Tamara yí whenu zan dopọ hẹ míwu awhlivu lọ lẹ bosọ yìn aslan hẹ mí. N’yiwanna taun. Gbẹtọ whiwhẹnọ he sọ yọ́n dọnsẹpọ de wẹ. E paṣa mi dọ gbẹtọ gbigbọnọ mọnkọ gán nọ dọ fànfún domọ.

Tamara hunzo taun. Eyin a to apá etọn, a na yiwanna nugbo lọ po lizọnyizọn lọ po janwẹ. Homẹ etọn nọ hùn dọ e to dagbe hugan etọn na Jehovah, amọ́ yẹn ma do ayajẹ, na sinsẹ̀nzọn mọmọ tọn wà n’te wutu. Pọndohlan dagbe etọn po ayajẹ he e do po yinuwado gbẹzan ṣie ji sisosiso. Apajlẹ etọn dọ̀n ayidonugo ṣie wá nugbo Owe-wiwe lẹ tọn titengbe de ji, enẹ wẹ yindọ: Jehovah jlo dọ mímẹpo ni yí ‘ayajẹ po awhágbe ayajẹ tọn po’ do sẹ̀n emi.—Salm. 100:2.

OWANYI ṢIE NA LIZỌNYIZỌN LỌ VỌ́ JẸ YỌYỌ

N’jlo na do ayajẹ he Tamara do nkọ, amọ́ eyin e na pà mi, n’dona bayi diọdo titengbe delẹ. E yí whenu, amọ́ n’wá jẹ afọdide kleunkleun delẹ ze ji. Todin, n’nọ wleawu whẹpo do nọ tọ́n na lizọnyizọn lọ bosọ nọ bayi gbehosọnalitọ alọgọtọ tọn sọn ojlẹ de mẹ jẹ devo mẹ. Ehe de nuhiha ṣie pò bosọ yidogọna jidide ṣie. Dile n’to Biblu yizan to lizọnyizọn lọ mẹ sọ, mọ wẹ n’nọ do ayajẹ dogọ do niyẹn. E madẹn bọ n’jẹ gbehosọnalitọ alọgọtọ tọn bayi ji to osun lẹpo mẹ.

N’jẹ họntọn ṣie lẹ ji ji to jọja po mẹho po ṣẹnṣẹn, yèdọ mẹhe to dagbe wà to nugbo lọ mẹ bosọ to vivi sinsẹ̀nzọn yetọn na Jehovah tọn dù lẹ. Apajlẹ dagbe yetọn gọalọna mi nado vọ́ nue to otẹn tintan mẹ na mi lẹ gbeje pọ́n bosọ wleawuna aṣa gbigbọmẹ tọn dagbe de. N’jẹ vivi lizọnyizọn lọ tọn dù ji hugan dai, podọ to godo mẹ, n’lẹzun gbehosọnalitọ whepoponu tọn. Whla tintan to owhe susu godo, n’do ayajẹ bosọ vò to agun lọ mẹ.

N’MỌ GBEHOSỌNALITỌ-GBẸ́ TẸGBẸ TỌN DE

To owhe dopo godo, n’dukosọna Alex, yèdọ mẹmẹsunnu dagbe de he jọmẹ bosọ yiwanna Jehovah po lizọnyizọn lọ po. Devizọnwatọ lizọnyizọnwiwa tọn de wẹ he ko to gbehosọnalitọ bayi sọn owhe ṣidopo die. Alex ko sọ sẹ̀n na ojlẹ de to fie nuhudo sù te to Malawi. To dọ́n, e jihọntọn hẹ mẹdehlan delẹ he tindo nuyiwadomẹji dagbe do e ji, bosọ na ẹn tuli nado zindonukọn bo to Ahọluduta lọ zedo otẹn tintan mẹ.

To 2003, yẹn po Alex po wlealọ bo zindonukọn to sinsẹ̀nzọn whenu-gigọ́ tọn mẹ sọn whenẹnu. Mí ko plọn nudagbe susu lẹ, podọ Jehovah ko dona mí susugege.

OHỌ̀N DE NA DONA SUSU DEVO LẸ

To 2009, mí yin oylọ-bayina nado sẹ̀n di mẹdehlan lẹ to Timor-Leste, yèdọ otò pẹvi de to lopo Indonésie tọn de ji. E paṣa mí, bọ obu sọ di mí, amọ́ homẹ mítọn hùn. To osun atọ́n godo, mí wá Dili he yin tatọ́-tònọ otò lọ tọn.

Tẹnsisẹ lọ biọ dọ mí ni bayi diọdo ayidego tọn lẹ to gbẹzan mítọn mẹ. Mí dona diọada sọgbe hẹ aṣa, ogbè, núdùdù po aliho gbẹninọ tọn yọyọ lẹ po. To lizọnyizọn lọ mẹ, mí nọ saba dukosọna mẹhe ma do alọnu, mẹhe ma yì wehọmẹ susu po mẹhe ko yin kọgbidina lẹ po. Podọ, mí nọ mọ mẹsusu he go awhàn po danuwiwa po ko hẹnnugble te lẹ.a

Lizọnyizọn lọ hẹn awuvivi wá taun! Di apajlẹ, to gbèdopo, n’dukosọna Maria, yèdọ viyọnnu owhe 13 mẹvi de he to awubla mẹ.b Iya etọn ko kú to owhe delẹ die, podọ dopo vlavo wẹ e nọ mọ baba etọn. Taidi ovi susu he to ogbẹ́ etọn ji lẹ, Maria ma do yanwle de to gbẹ̀mẹ. N’flindọ to gbèdopo, e bẹ avi dile e to numọtolanmẹ etọn lẹ dọ tọ́n. Amọ́, n’ma yọ́n nue dọ e te, na n’ma ko sè ogbè etọn ganji to ojlẹ lọ mẹ wutu. N’hodẹ̀ na Jehovah bo biọ dọ ni gọalọna mi nado na ẹn tuli, podọ to enẹgodo, n’jẹ wefọ mẹjlọdote tọn lẹ hia na ẹn ji. To owhe kleun he bọdego lẹ gblamẹ, n’mọdọ nugbo lọ diọ pọndohlan, aliho nusisọ́ tọn po gbẹzan Maria tọn po. E yí baptẹm, podọ to alọnu e nọ deanana plọnmẹ Biblu etọn titi lẹ. To egbehe, Maria do whẹndo gbigbọmẹ tọn daho de bo nọ mọdọ mẹlẹ yiwanna emi.

Jehovah to didona azọ́n lọ to Timor-Leste. Dile etlẹ yindọ owhe ao agọe tọn lẹ poun gblamẹ wẹ suhugan wẹnlatọ he to finẹ lẹ tọn yí baptẹm te, susu yetọn wẹ to sinsẹ̀n di gbehosọnalitọ, devizọnwatọ lizọnyizọnwiwa tọn kavi mẹho agun tọn. Mẹdevo lẹ to azọ́nwa to azọ́nwatẹn lẹdogbedevomẹ tọn he ma to Bẹtẹli, bo nọ gọalọ nado lilẹ́ núdùdù gbigbọmẹ tọn do ogbè lẹdo lọ tọn lẹ mẹ. Homẹ ṣie nọ hùn taun nado sè hàngbe yetọn lẹ to opli lẹ ji, nado mọ bọ yé to nuko bosọ doayi whinwhẹ́n gbigbọmẹ tọn yetọn go.

N’MA GÁN KO KUDLỌ GBẸZAN AYAJẸ TỌN MỌNKỌ DE TỌN

Gbẹninọ to Timor-Leste gbọnvo taun na Australie tọn, amọ́ n’ma gán ko kudlọ ayajẹ he e hẹnwa tọn. To whedelẹnu, mí nọ do ahihun he mẹ gbẹtọ ko gọ́ de, ehe mẹ whèvi húhú po omá-gbàn po ko yin dido do sọn ahi lẹdo lọ tọn de mẹ. To azán delẹ ji, mí nọ deanana oplọn de to ohọ̀ pẹvi he hlá bọ yè ma tlẹ́ kọmẹ na de mẹ, bọ koklo lẹ nọ to yìyì pé. Mahopọnna avùnnukundiọsọmẹnu ehe lẹpo, n’nọ saba lẹndọ, ‘Gbẹzan ehe jiawu taun!’

Eyin n’flin ojlẹ he wayi lẹ, n’nọ dopẹ́ dọ mẹjitọ ṣie lẹ wà nue go yé pé lẹpo nado plọn mi aliho Jehovah tọn, bosọ nọgodona mi etlẹ yin to owhe aflanmẹ tọn ṣie he vẹawu lẹ gblamẹ. N’mọ nugbo-yinyin Howhinwhẹn lẹ 22:6 tọn to whẹho ṣie mẹ. Homẹ Papa po Mama po tọn nọ hùn do yẹn po Alex po go; e nọ vivi na yé dọ Jehovah to mí yizan. Sọn 2016, mí to sinsẹ̀n to azọ́n lẹdo tọn mẹ to aigba-denamẹ alahọ Australasie tọn ji.

E vẹawu nado yise dọ azọ́n yẹwhehodidọ tọn ko pẹnagbàn mi pọ́n to ojlẹ de mẹ wayi. Todin, n’yiwanna lizọnyizọn lọ! N’ko wá mọdọ eyin etlẹ to kínni bo to kanna, Jiwheyẹwhe sinsẹ̀n po ahun lẹpo po wẹ nọ hẹn ayajẹ nujọnu tọn wá. Na nugbo tọn, owhe 18 he wayi lẹ, ehe yẹn po Alex po ko yí do sẹ̀n Jehovah dopọ lẹ wẹ yin owhe ayajẹ tọn hugan lẹ to gbẹzan ṣie mẹ. Todin, n’mọ nugbo-yinyin nue salmu-kantọ Davidi dọna Jehovah tọn dọmọ: “Mẹhe nọ dín fibẹtado to hiẹ mẹ lẹpo wẹ na jaya; yé na nọ yí ayajẹ do dawhá to whepoponu. . . . Podọ mẹhe yiwanna oyín towe lẹ na nọ jaya to hiẹ mẹ.”—Salm. 5:11.