Mí Gán Gbawhàn Wangbẹna Tọn!
Be a ko jiya wangbẹna tọn pọ́n ya?
Eyin e ma tlẹ ko jọ do gowe pọ́n, a gán ko mọ wunmẹ wangbẹna tọn de to aliho de mẹ. Linlinnamẹnu lẹ nọ saba dọho gando mẹdelẹ go he yin wangbẹna, na yé wá sọn otò devo mẹ, tindo sinmẹ agbasa tọn he gbọnvo, kavi na yé nọ doalọ to zanhẹmẹ mẹhe tindo vijinu dopolọ lẹ tọn mẹ wutu. Enẹ zọ́n bọ gandudu lẹ nọ de osẹ́n lẹ tọ́n nado hoavùn sọta wangbẹnamẹ wunmẹ voovo lẹ.
Wangbẹna nọ saba hẹn wangbẹna wá dogọ. Mẹhe jiya wangbẹna tọn lẹ nọ saba yiahọsu, podọ ehe nọ zọ́n bọ wangbẹna sọ nọ sinyẹn dogọ.
Vlavo a ko jiya nuvẹun, nuvẹdomẹ, mẹṣanko, mẹzunzun, po adánsin-namẹ po tọn pọ́n. Amọ́, wangbẹna nọ saba sinyẹn humọ. To paa mẹ, e nọ dekọtọn do danúwadomẹgo, nukunvandomẹ, kanyinylan, zanhẹmẹ gánnugánnu, mẹhùhù, kavi etlẹ yin akọ̀ vivasudo mẹ.
Linlinwe ehe na na gblọndo kanbiọ he bọdego lẹ tọn, bo na do lehe mẹde gán gbawhàn wangbẹna tọn do hia:
Naegbọn wangbẹna do sù sọmọ?
Nawẹ mẹde gán gbawhàn wangbẹna tọn gbọn?
Be wangbẹna na wá busẹ mlẹnmlẹn ya?