Naegbọn Wangbẹna Do Sù Sọmọ?

Etẹwẹ Wangbẹna Yin?

Nado gbẹwanna mẹde zẹẹmẹdo ma nado nọ jlo ohó mẹlọ tọn kavi pipli gbẹtọvi tọn de tọn paali. Numọtolanmẹ sinsinyẹn he nọ dẹn-to-aimẹ de wẹ e yin.

NUHEWUTU MẸLẸ NỌ JẸ WANGBẸNAMẸ JI

Nususu wẹ nọ zọ́n bọ mẹlẹ nọ jẹ wangbẹnamẹ ji. To paa mẹ, yè nọ gbẹwanna mẹdevo lẹ, e ma yin na nuhe yé wà dandan wutu gba, amọ́ na mẹhe yé yin wutu. Mẹhe yè gbẹwanna lẹ gán nọ yin pinpọnhlan di mẹylankan, danuwatọ, kavi mẹhe ma gán diọ lẹ. Yè gán nọ pọ́n yé hlan di mẹhe yìdo lẹ, owùnu, kavi mẹhe nọ hẹn nuhahun wá lẹ. Mẹhe nọ do numọtolanmẹ wangbẹna tọn na mẹdevo lẹ gán ko jiya kanyinylan, mawadodo, kavi nuyiwa devo he nọ zọ́n bọ wangbẹna nọ hẹnai lẹ tọn.

LEHE WANGBẸNA NỌ GBAYIPE DO

Mẹde gán gbẹwanna mẹhe e ma tlẹ mọ pọ́n nukun sọ nukun de. Di apajlẹ, to mayọnẹn mẹ mẹde gán wleawuna pọndohlan agọ̀, na mẹhe e nọ na sisi kavi mẹvivẹ etọn de tindo pọndohlan mọnkọ wutu. Enẹ nọ zọ́n bọ wangbẹna gán yawu gbayipe, bọ mẹsusu na jẹ pọndohlan dopolọ tindo ji.

Eyin mí mọnukunnujẹ lehe wangbẹna nọ yawu gbayipe do mẹ, mí gán yọ́n nuhewutu e do nọ yinuwado mẹsusu ji sọmọ. Amọ́, nado gbawhàn wangbẹna he gbayipe to aihọn lọ mẹ tọn, mí dona mọnukunnujẹ lehe wangbẹna bẹjẹeji do mẹ. Biblu basi zẹẹmẹ etọn na mí.

BIBLU DỌ NUHE NỌ HẸN WANGBẸNA WÁ

GBẸTỌVI LẸ MA YIN DIDÁ PO WANGBẸNA PO. Wangbẹna bẹjẹeji whenue angẹli de to olọn mẹ, he wá yin yiylọdọ Satani Lẹgba ṣiatẹ sọta Jiwheyẹwhe. “Hlọnhutọ de wẹ [Lẹgba yin] sọn dowhenu,” enẹ wẹ sọn bẹjẹeji atẹṣiṣi etọn tọn. “Lalonọ de wẹ ewọ podọ otọ́ lalo tọn,” podọ e zindonukọn nado nọ fọ́n wangbẹna po kanyinylan po dote. (Johanu 8:44; 1 Johanu 3:11, 12) Biblu ylọ ẹ dọ mẹylankan, hùnylantọ, podọ danuwatọ.—Jobu 2:7; Osọhia 12:9, 12, 17.

GBẸTỌVI LẸ NỌ SABA DO AYILINLẸN WANGBẸNA TỌN. Sunnu tintan lọ Adam, hodo apajlẹ Satani tọn. Enẹwutu, gbẹtọvi lẹpo wẹ dugu ylando po mape po tọn. (Lomunu lẹ 5:12) Kaini he yin visunnu tintan Adam tọn, gbẹwanna nọvisunnu etọn Abẹli sọmọ bo hù i. (1 Johanu 3:12) Nugbo wẹ dọ mẹsusu nọ do owanyi po awuvẹmẹ po hia. Amọ́, na ylando he mí dugu etọn wutu, gbẹtọ susu lẹ nọ yin ṣejannabinọ, nọ tindo nuvẹun bosọ yin goyitọ—yèdọ jijọ delẹ he nọ fọ́n wangbẹna dote.—2 Timoti 3:1-5.

HẸNGOGO NỌ YIDOGỌNA WANGBẸNA. Nuyiwa lẹblanu matindo po kanyinylan po tọn lẹ ko zọ́n bọ wangbẹna gọ́ aihọn lọ mẹ. Nuyiwa hẹngogo, nuvẹun, mẹzunzun, nukunvandomẹ, po nuhẹngble po tọn lẹ sù, na “aihọn lọ pete tin to huhlọn mẹylankan lọ,” enẹ wẹ Satani Lẹgba tọn glọ wutu.—1 Johanu 5:19.

Amọ́, Biblu ma dọ nuhe nọ hẹn wangbẹna wá lẹ poun. E sọ dọhodo pọngbọ etọn lẹ ji ga.