Be Hiẹ Yọnẹn Ya?

Naegbọn e do yọ́n dọ Jehovah na dotẹnmẹ Islaelivi lẹ nado na owhlé kavi awhànnẹ taidi avọ́nunina?

TO OSẸ́N lọ glọ, owhlé po awhànnẹ lẹ po nọ yin alọkẹyi taidi avọ́nunina hlan Jehovah. Ohẹ̀ awe ehelẹ nọ yin nùdego to pọmẹ to osẹ́n he gando avọ́nunina go lẹ mẹ to whelẹponu, podọ ode gán yin nina do ode tẹnmẹ. (Lev. 1:14; 12:8; 14:30) Naegbọn enẹ do yin alenu? Whẹwhinwhẹ́n dopo wẹ yindọ, owhlé lẹ ma nọ tin-to-aimẹ to whepoponu. Etẹwutu?

Owhlé yin ohẹ̀ de he nọ zingbejizọnlin bosọ nọ nọ̀ aigba Isaleli tọn blebu ji to ojlẹ yozò tọn lẹ mẹ. To osun octobre tọn mẹ, yé nọ zingbejizọnlin dedo hùwaji yì otò he hùnmiyọ́n lẹ mẹ bo nọ lẹkọwa Islaeli to amakikọ-whenu. (Ohàn 2:11, 12; Jel. 8:7) Ehe zẹẹmẹdo dọ to ojlẹ Biblu tọn mẹ, e nọ vẹawuna Islaelivi lẹ nado na owhlé lẹ taidi avọ́nunina to avivọ-whenu.

To alọ devo mẹ, awhànnẹ lẹ ma nọ saba zingbejizọnlin, enẹwutu yé nọ tin-to-aimẹ to Islaeli to owhe lọ blebu mẹ. Humọ, mẹlẹ nọ saba yìn awhànnẹ lẹ to whégbè. (Yijlẹdo Johanu 2:14, 16 go.) Sọgbe hẹ owe de, “gbétatò po otò pẹvi Palestine tọn lẹpo po mẹ wẹ yè nọ yìn awhànnẹ lẹ te to whégbè. Whétọ dopodopo wẹ nọ do awhànnẹ-pó etọn, kavi odò de he nọ yin kùnkùn do adó mẹ fie ohẹ̀ lẹ gán nọ.” (Bible Plants and Animals)—Yijlẹdo Isaia 60:8 go.

Enẹwutu, Jehovah do owanyi po lẹnpọn dagbe po hia bo nọ kẹalọyi ohẹ̀ he tin-to-aimẹ na Islaelivi lẹ to owhe lọ blebu mẹ taidi avọ́nunina.