Zindonukọn Nado Nọ “Yí Gbẹtọ-Yinyin Yọyọ lọ Dogo” to Baptẹm Godo

1. Etẹwẹ nọ yinuwado gbẹtọ-yinyin mítọn ji hugan?

VLAVO mí ko yí baptẹm e ko dẹn kavi lala, mímẹpo wẹ nọ jlo na tindo gbẹtọ-yinyin wunmẹ he Jehovah yiwanna. Nado yin omẹ mọnkọ, mí dona nọ dava nulẹnpọn mítọn. Etẹwutu? Na linlẹn mítọn lẹ nọ yinuwado gbẹtọ-yinyin mítọn ji sinsinyẹn wutu. Eyin mí nọ saba lẹnnupọndo lehe mí na hẹn pekọ wá na ojlo agbasalan tọn mítọn lẹ do ji, mí na nọ dọ kavi wà nudelẹ he ma sọgbe. (Efe. 4:17-19) To alọ devo mẹ, eyin linlẹn dagbe lẹ nọ gọ́ ayiha mítọn mẹ, e yọnbasi taun dọ mí na nọ dọho bosọ nọ yinuwa to aliho he na hẹn homẹhun Otọ́ mítọn Jehovah mẹ.—Gal. 5:16.

2. Kanbiọ tẹlẹ wẹ mí na gbadopọnna to hosọ ehe mẹ?

² Dile mí dọ do to hosọ he wayi mẹ, mí ma gán glọnalina linlẹn ylankan lẹ mlẹnmlẹn nado biọ ayiha mítọn mẹ. Amọ́, mí gán de ma nado yinuwa sọgbe hẹ linlẹn mọnkọ lẹ. Whẹpo mí do yí baptẹm, mí dona ko doalọtena hodidọ kavi nuyiwa to aliho he Jehovah gbẹwanna mẹ. Enẹ wẹ afọdide tintan podọ dehe yin nujọnu hugan lọ nado de gbẹtọ-yinyin hoho lọ sẹ̀ sọn ogo. Amọ́, nado hẹn homẹ Jehovah tọn hùn to gigọ́ mẹ, mí sọ dona setonuna gbedide etọn he dọmọ: ‘Mì yí gbẹtọ-yinyin yọyọ lọ dogo.’ (Kol. 3:10) To hosọ ehe mẹ, mí na na gblọndo kanbiọ ehelẹ tọn: Etẹwẹ yin “gbẹtọ-yinyin yọyọ lọ”? Nawẹ mí gán yí gbẹtọ-yinyin yọyọ lọ dogo bosọ hẹn e go gbọn?

ETẸWẸ YIN “GBẸTỌ-YINYIN YỌYỌ LỌ”?

3. Etẹwẹ yin “gbẹtọ-yinyin yọyọ lọ,” podọ nawẹ mẹde nọ yí i dogo gbọn? (Galatianu lẹ 5:22, 23)

³ “Gbẹtọ-yinyin yọyọ lọ” yin aliho nulẹnpọn tọn po nuyiwa po tọn de he nọ do jẹhẹnu Jehovah tọn lẹ hia. Mẹde nọ yí gbẹtọ-yinyin yọyọ lọ dogo, eyin e nọ do adà sinsẹ́n gbigbọ Jiwheyẹwhe tọn lẹ tọn hia, bo nọ na dotẹnmẹ gbigbọ wiwe nado yinuwado linlẹn, numọtolanmẹ po nuyiwa etọn lẹ po ji. (Hia Galatianu lẹ 5:22, 23.) Di apajlẹ, e nọ yiwanna Jehovah po omẹ Etọn lẹ po. (Mat. 22:36-39) Omẹ mọnkọ nọ hẹn ayajẹ etọn go, etlẹ yin to whenue e to ahidi hẹ whlepọn lẹ. (Jak. 1:2-4) E nọ yin jijọho-dintọ. (Mat. 5:9) E nọ fahomẹ bo nọ jọmẹ whenue e to nuyiwa hẹ mẹdevo lẹ. (Kol. 3:12, 13) E nọ yiwanna nuhe sọgbe bosọ nọ wà ẹ. (Luku 6:35) E nọ dohia to nuyiwa etọn lẹ mẹ dọ emi tindo yise dolido to Otọ́ olọn mẹ tọn emitọn mẹ. (Jak. 2:18) E nọ do walọmimiọn hia whenue yè hẹn homẹgble e, bosọ nọ do mawazẹjlẹgo hia whenue e yin whiwhlepọn.—1 Kọl. 9:25, 27; Titu 3:2.

4. Naegbọn mí dona nọ do jẹhẹnu he yin nùdego to Galatianu lẹ 5:22, 23 mẹ lẹpo hia? Basi zẹẹmẹ.

⁴ Nado yí gbẹtọ-yinyin yọyọ lọ dogo, mí dona wleawuna jẹhẹnu he yin nùdego to Galatianu lẹ 5:22, 23 mẹ lẹ, gọna dehe sọawuhia to fidevo to Biblu mẹ lẹ.b Jẹhẹnu ehelẹ ma taidi adà voovo nusisọ́ mítọn tọn lẹ he mí ma gán zedo dopọ ji. Na nugbo tọn, adà jẹhẹnu ehelẹ tọn delẹ gán yin mimọ to jẹhẹnu devo lẹ mẹ. Di apajlẹ, eyin a yiwanna kọmẹnu towe nugbonugbo, a na nọ fahomẹ bosọ nọ jọmẹ hẹ ẹ. Podọ, nado do homẹdagbe hia nugbonugbo, mí dona nọ do walọmimiọn po mawazẹjlẹgo po hia.

NAWẸ MÍ GÁN YÍ GBẸTỌ-YINYIN YỌYỌ LỌ DOGO GBỌN?

5. Etẹwẹ e zẹẹmẹdo nado “tindo ayiha Klisti tọn,” podọ naegbọn mí dona nọ plọnnu gando gbẹzan Jesu tọn go? (1 Kọlintinu lẹ 2:16)

⁵ Hia 1 Kọlintinu lẹ 2:16. Nado yí gbẹtọ-yinyin yọyọ lọ dogo, mí dona “tindo ayiha Klisti tọn.” To hogbe devo mẹ, mí dona plọn aliho he mẹ Jesu nọ lẹnnupọn te bosọ hodo apajlẹ etọn. Jesu nọ do adà sinsẹ́n gbigbọ Jiwheyẹwhe tọn lẹ tọn hia to pipé mẹ. Taidi mẹpọ́nnu he madoblọ de, e nọ do jẹhẹnu Jehovah tọn lẹ hia dile yé te do pẹpẹ. (Heb. 1:3) Lehe mí to nulẹnpọn taidi Jesu sọ, mọ wẹ mí na yinuwa taidi ewọ, bo nasọ nọ penugo nado do jẹhẹnu etọn lẹ hia dogọ do niyẹn.—Flp. 2:5.

6. Nugbo tẹlẹ wẹ mí dona hẹn do ayiha mẹ whenue mí to vivẹnudo nado yí gbẹtọ-yinyin yọyọ lọ dogo?

⁶ Be e yọnbasi nugbo dọ mí ni hodo apajlẹ Jesu tọn ya? Mí gán dọ dọ: ‘Mẹpipe wẹ Jesu yin. N’ma gán taidi ewọ pẹẹ pọ́n gbede!’ Eyin a nọ do numọtolanmẹ mọnkọ, bo lẹnnupọndo nugbo ehelẹ ji. Tintan, a yin didá nado taidi Jehovah po Jesu po. Enẹwutu, a gán de nado hodo apajlẹ yetọn, podọ e gán pà we jẹ obá de mẹ. (Jen. 1:26) Awetọ, gbigbọ wiwe Jiwheyẹwhe tọn wẹ yin huhlọn daho hugan to wẹkẹ lọ mẹ. Po alọgọ etọn po, a gán wà nuhe hiẹ lọsu ma gán ko wà na dewe pọ́n gbede lẹ dotana. Atọ̀ntọ, todin whẹ́, Jehovah ma nọ donukun dọ a ni do adà sinsẹ́n gbigbọ tọn lẹ hia to pipé mẹ. Na nugbo tọn, Otọ́ owanyinọ mítọn ko de owhe fọtọ́n dovo na mẹhe tindo todido aigba ji tọn lẹ nido jẹ pipé kọ̀n. (Osọ. 20:1-3) To alọnu, nuhe Jehovah to nukundo sọn mí si wẹ nado wà nuhe go mí pé lẹpo bosọ ganjẹ ewọ go nado mọ alọgọ.

7. Etẹwẹ mí na gbadopọnna todin?

⁷ Aliho tangan tẹ mẹ wẹ mí gán hodo apajlẹ Jesu tọn te? Mí na gbadopọnna ẹnẹ to adà sinsẹ́n gbigbọ wiwe Jiwheyẹwhe tọn lẹ tọn mẹ to kleun mẹ. To adà dopodopo mẹ, mí na mọ nuhe mí gán plọn sọn aliho he mẹ Jesu do jẹhẹnu enẹlẹ hia te mẹ. Dile mí to mọwà, mí na dọhodo kanbiọ delẹ ji he gán gọalọna mí nado gbeje lehe mí gán yí gbẹtọ-yinyin yọyọ lọ dogo ganji do pọ́n.

8. Nawẹ Jesu do owanyi hia gbọn?

⁸ Owanyi sisosiso he Jesu do na Jehovah whàn ẹn nado basi avọ́sinsan lẹ do Otọ́ etọn po míwlẹ po tamẹ. (Joh. 14:31; 15:13) Jesu dohia dọ emi yiwanna gbẹtọ lẹ sisosiso gbọn aliho he mẹ e nọgbẹ̀ to aigba ji te dali. Egbesọegbesọ, e nọ do owanyi po awuvẹmẹ po hia, etlẹ yin whenue mẹdelẹ diọnukunsọ ẹ. Aliho titengbe de he mẹ e do owanyi enẹ hia gbẹtọ lẹ te wẹ gbọn nupinplọn yé gando Ahọluduta Jiwheyẹwhe tọn go dali. (Luku 4:43, 44) Jesu sọ do owanyi matin ṣejannabi he e do na Jiwheyẹwhe podọ na gbẹtọ lẹ hia, whenue e desọn ojlo mẹ bo kú okú awufiẹsa tọn de to alọ ylandonọ lẹ tọn mẹ. Gbọnmọ dali, e hùn ali ogbẹ̀ madopodo tọn dote na mí whladopo dogọ.

9. Nawẹ mí gán hodo apajlẹ Jesu tọn bo nọ do owanyi hia gbọn?

⁹ Mí klan míde do wiwe na Jehovah bo yí baptẹm, na mí yiwanna Otọ́ olọn mẹ tọn mítọn wutu. Enẹwutu, taidi Jesu, mí dona do owanyi mítọn na Jehovah hia to aliho he mẹ mí nọ yinuwa hẹ gbẹtọ lẹ te. Apọsteli Johanu wlan dọmọ: “Mẹhe ma yiwanna mẹmẹsunnu etọn, he e mọ, ma sọgan yiwanna Jiwheyẹwhe, mẹhe e ma mọ.” (1 Joh. 4:20) Mí gán kanse míde dọ: ‘Be n’tindo owanyi sisosiso na gbẹtọ lẹ ya? Be n’nọ do awuvẹmẹ hia to nuyiwa ṣie hẹ mẹdevo lẹ mẹ, etlẹ yin to whenue yé ma jọmẹ hẹ mi ya? Be owanyi nọ whàn mi nado yí whenu po nutindo ṣie lẹ po do gọalọna mẹdevo lẹ nado plọnnu gando Jehovah go ya? Be n’nọ desọn ojlo mẹ nado wà onú ehelẹ, eyin suhugan mẹlẹ tọn ma tlẹ yọ́n pinpẹn vivẹnudido ṣie lẹ tọn, kavi eyin yé diọnukunsọ mi ya? Be n’gán dín aliho lẹ nado yí whenu zan dogọ to azọ́n mẹhẹnzun devi tọn lọ mẹ ya?’—Efe. 5:15, 16.

10. Nawẹ Jesu dohia dọ emi yin jijọho-dintọ gbọn?

¹⁰ Jesu yin gbẹtọ jijọho-dintọ. Whenue mẹlẹ yinuwa hẹ ẹ to aliho agọ̀ mẹ, e ma yí oylan do sú oylan họ́. Podọ, e sọ wà humọ. E ze afọdide tintan nado didẹ ninọmẹ sinsinyẹn lẹ, bo na tuli mẹdevo lẹ nado nọ didẹ gbemanọpọ yetọn lẹ. Di apajlẹ, e plọn yé dọ yé dona nọ basi jijọho hẹ ode awetọ eyin yé jlo dọ Jehovah ni nọ kẹalọyi sinsẹ̀n-bibasi yetọn. (Mat. 5:9, 23, 24) Podọ, whlasusu wẹ e gọalọna apọsteli lẹ nado didẹ nudindọn yetọn gando mẹhe klohugan to ṣẹnṣẹn yetọn go.—Luku 9:46-48; 22:24-27.

11. Nawẹ mí gán yin jijọho-dintọ gbọn?

¹¹ Nado yin jijọho-dintọ, e ma ko pé nado dapana nuhahun lẹ finfọndote. Mí dona ze afọdide tintan lọ nado basi jijọho hẹ mẹdevo lẹ, bosọ na tuli mẹmẹsunnu po mẹmẹyọnnu mítọn lẹ po nado nọ didẹ dẹ́sọ-dẹ́mẹ yetọn lẹ. (Flp. 4:2, 3; Jak. 3:17, 18) Mí gán kàn kanbiọ ehelẹ sè míde: ‘Etẹwẹ n’to gbesisọ mẹ nado yí do sanvọ́ nado basi jijọho hẹ mẹdevo lẹ? Eyin mẹmẹsunnu kavi mẹmẹyọnnu de gbleawuna mi, be n’nọ hẹn ẹn do homẹ wẹ ya? Be n’nọ nọte dọ mẹlọ ni ze afọdide tintan nado basi jijọho hẹ mi wẹ ya, kavi yẹn wẹ nọ ze afọdide tintan, eyin etlẹ taidi dọ mẹlọ wẹ ṣinuwa? Whenue e yọnbasi, be n’nọ na tuli mẹhe tindo gbemanọpọ lẹ nado basi jijọho hẹ ode awetọ ya?’

12. Nawẹ Jesu do homẹdagbe hia gbọn?

¹² Jesu nọ jọmẹ. (Mat. 11:28-30) E do homẹdagbe hia, na e jọmẹ bosọ yin lẹnpọn dagbenọ etlẹ yin to ninọmẹ sinsinyẹn lẹ mẹ. Di apajlẹ, whenue nawe Fenikenu de vẹ̀ ẹ nado gbọazọ̀nna viyọnnu etọn, e gbẹ́ obiọ etọn dai to tintan whenu, amọ́ whenue nawe lọ do yise ayidego tọn hia, e do homẹdagbe hia bo gbọazọ̀nna ovi etọn. (Mat. 15:22-28) Dile etlẹ yindọ Jesu jọmẹ, e ma nọ yialọna nuhe ma sọgbe. To whedelẹnu, e do homẹdagbe hia gbọn nuyiyiwa hẹ mẹhe e yiwanna lẹ po nujikudo po dali. Di apajlẹ, whenue Pita jlo na glọnalina Jesu nado wà ojlo Jehovah tọn, Jesu gbẹnuna ẹn to nukun devi he pò lẹ tọn mẹ. (Malku 8:32, 33) E wà ehe, e ma yin nado dowinyan Pita, amọ́ nado plọnazọ́n ẹn bosọ na avase devi he pò lẹ ma nado nọ yin saklanọ. Ayihaawe ma tin dọ winyan na ko hù Pita pẹẹde, amọ́ e mọaleyi sọn mẹplọnlọ lọ mẹ.

13. Nawẹ mí gán nọ do homẹdagbe nujọnu tọn hia gbọn?

¹³ Nado do homẹdagbe nujọnu tọn hia mẹhe a yiwanna lẹ, e gán biọ to whedelẹnu dọ a ni nọ dọ hójọhó na yé. Whenue a to mọwà, nọ hodo apajlẹ Jesu tọn bo nọ ze ayinamẹ towe sinai do nunọwhinnusẹ́n he to Ohó Jiwheyẹwhe tọn mẹ lẹ ji. Nọ yin homẹdagbenọ. Ma nọ vẹnudo yé blo, nọ deji dọ mẹhe yiwanna Jehovah bosọ yiwanna we lẹ na kẹalọyi ayinamẹ owanyinọ towe. Nọ kàn kanbiọ ehelẹ sè dewe: ‘Be n’nọ yí adọgbigbo do dọho whenue mẹhe n’yiwanna de to nuhe ma sọgbe wà ya? Eyin e biọ dọ ma na ayinamẹ, be n’nọ dọho po homẹdagbe po ya, kavi po homẹgble po? Etẹwẹ nọ whàn mi nado na ayinamẹ? Be n’nọ wàmọ, na n’gblehomẹ do mẹlọ go wutu wẹ ya, kavi na onú etọn nọ duahunmẹna mi sisosiso wutu?’

14. Nawẹ Jesu do dagbewà hia gbọn?

¹⁴ Gbọnvona dọ Jesu yọ́n nuhe sọgbe, e sọ nọ wà ẹ. Jesu yiwanna Otọ́ etọn, enẹwutu e nọ wà nuhe sọgbe po mẹwhinwhàn dagbe po to whelẹponu. Mẹhe yin homẹdagbenọ nọ dín aliho lẹ to whelẹponu nado gọalọna mẹdevo lẹ bosọ wà nudagbe lẹ na yé. E ma ko pé nado yọ́n nuhe e jẹ dọ mí ni wà; mí sọ dona wà ẹ po mẹwhinwhàn dagbe po. Mẹde gán kanse dọ: ‘Be e yọnbasi nado wà dagbe po mẹwhinwhàn he ma sọgbe po ya?’ Gbau. Di apajlẹ, Jesu dọho gando mẹhe nọ nanú wamọnọ lẹ amọ́ bo nọ hẹn ẹn diun dọ mẹdevo lẹ yọ́n nuhe yé na lẹ go. Nuhe taidi azọ́n dagbe enẹlẹ, ma nọ hẹn homẹ Jehovah tọn hùn.—Mat. 6:1-4.

15. Nawẹ mí gán do dagbewà nujọnu tọn hia gbọn?

¹⁵ Mí gán dọ dọ mí nọ do dagbewà nujọnu tọn hia, eyin mí nọ wà nuhe sọgbe po mẹwhinwhàn dagbe po. Enẹwutu, a gán nọ kanse dewe dọ: ‘Gbọnvona dọ n’yọ́n nuhe sọgbe, be n’sọ nọ wà ẹ nugbonugbo ya? Etẹwẹ nọ whàn mi nado wà dagbe?’

NAWẸ MÍ GÁN WLEBÒNA GBẸTỌ-YINYIN YỌYỌ LỌ GBỌN?

16. Etẹwẹ mí dona nọ wà egbesọegbesọ, podọ etẹwutu?

¹⁶ Mí ma dona wá tadona kọ̀n dọ vivẹnu he e nọ biọ nado yí gbẹtọ-yinyin yọyọ lọ dogo lẹ nọ wá vivọnu to baptẹm mítọn whenu. Taidi avọ̀ yọyọ de, mí dona hẹn gbẹtọ-yinyin yọyọ mítọn do ninọmẹ dagbe mẹ. Aliho dopo nado wàmọ wẹ nado nọ dín dotẹnmẹ lẹ to azán dopodopo ji nado do adà sinsẹ́n gbigbọ Jiwheyẹwhe tọn lẹ tọn hia. Etẹwutu? Na Jehovah yin Jiwheyẹwhe de he nọ yinuwa, podọ gbigbọ etọn yin huhlọn yí do wazọ́n de. (Jen. 1:2) Enẹwutu, adà sinsẹ́n gbigbọ tọn lẹpo gán nọ whàn mí nado yinuwa, podọ mọ wẹ e dona nọ yin. Di apajlẹ, devi Jakọbu wlan dọmọ: “Yise matin azọ́n lẹ yin oṣiọ.” (Jak. 2:26) Mí gán dọ nudopolọ gando adà sinsẹ́n gbigbọ Jiwheyẹwhe tọn he pò lẹ go. Whedepopenu he mí do yé hia, e nọ yin kunnudenu lọ dọ gbigbọ Jiwheyẹwhe tọn to nuyiwa do mí ji.

17. Nawẹ mí dona nọ yinuwa gbọn eyin mí gboawupo nado do adà sinsẹ́n gbigbọ tọn lẹ hia?

¹⁷ Klistiani he tlẹ ko yí baptẹm sọn owhe susu die lẹ nọ gboawupo to whedelẹnu nado do adà sinsẹ́n gbigbọ tọn hia. Amọ́, nuhe yin nujọnu lọ wẹ ma nado hònúpla. Lẹnnupọndo apajlẹ ehe ji. Eyin a hẹn avọ̀ he a yiwanna taun de vún, be a na ze e dlan to afọdopolọji wẹ ya? Paali. Matin ayihaawe, a na yí sọwhiwhe do vọ́ fihe vún lọ tọ̀ eyin e yọnbasi. Podọ besọn whenẹnu, a na nọ wà dẹẹdẹ po e po dogọ. Mọdopolọ, eyin a gboawupo nado do dagbewà, homẹfa kavi owanyi hia mẹde to ninọmẹ de mẹ, ma gbọjọ blo. Vẹvivẹ ahundopo tọn gán jla ninọmẹ lọ do, bosọ hùnali na we nado vọ́ haṣinṣan towe hẹ mẹlọ jlado. Magbe ma nado vọ́ jai jẹ nuṣiwa dopolọ mẹ to whedevonu.

18. Nujikudo tẹwẹ mí gán do?

¹⁸ Lehe mí yọ́n pinpẹn apajlẹ he Jesu zedai tọn do sọ! Lehe mí to apajlẹ aliho nulẹnpọn po nuyiwa po tọn etọn hodo sọ, mọ wẹ e na bọawuna mí dogọ nado taidi ewọ do niyẹn. Lehe mí to nuyiwa di Jesu sọ, mọ wẹ mí nọ ze gbẹtọ-yinyin yọyọ lọ dogo dogọ do niyẹn. To hosọ ehe mẹ, ẹnẹ poun to adà sinsẹ́n gbigbọ Jiwheyẹwhe tọn lẹ tọn mẹ wẹ mí gbadopọnna. Naegbọn a ma na yí whenu zan nado gbadopọnna adà sinsẹ́n gbigbọ tọn devo lẹ, bo lẹnnupọndo lehe a gán nọ do jẹhẹnu enẹlẹ hia dogọ do ji? A na mọ todohukanji hosọ lẹ tọn gando whẹho ehe go to Anademẹwe Dodinnanu Tọn mẹ to hosọ lọ “Gbẹzan Klistiani Tọn,” podọ to hóvila lọ “Sinsẹ́n Gbigbọ Tọn” glọ. A gán kudeji dọ eyin a yí adà towe wà, Jehovah na gọalọna we nado yí gbẹtọ-yinyin yọyọ lọ dogo bosọ hẹn e go.