2 | “Homẹmimiọn sọn Owe-Wiwe lẹ Mẹ”

NUHE BIBLU DỌ: “Nuhe ko yin kinkandai jẹnukọn lẹpo yin kinkandai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.”—LOMUNU LẸ 15:4.

Nuhe E Zẹẹmẹdo

Linlẹn homẹmiọnnamẹ tọn he gán na mí huhlọn po akọndonanu he mí do hudo etọn nado duto linlẹn agọ̀ lẹ ji po susu wẹ to Biblu mẹ. Owẹ̀n he to Biblu mẹ sọ nọ na mí todido dọ nuhe nọ hẹn awufiẹsa wá na mí to numọtolanmẹ-liho lẹ na busẹ to madẹnmẹ.

Lehe Ehe Gán Gọalọ Do

Mímẹpo wẹ nọ pehẹ ayimajai to whedelẹnu; amọ́ mẹhe to apọṣimẹ-zọ̀n jẹ kavi to yaji na magbọjẹ wutu lẹ gán nọ doakọnna awufiẹsa to numọtolanmẹ-liho egbesọegbesọ. Nawẹ Biblu gán gọalọ gbọn?

To Biblu mẹ, a na mọ linlẹn dagbe susu lẹ he gán diọtẹnna linlẹn agọ̀ lẹ. (Filipinu lẹ 4:8) Na nugbo tọn, po alọgọ Biblu tọn po, ayiha mítọn gán gọ́ na linlẹn homẹmiọnnamẹ po tudohomẹnamẹ tọn lẹ po, ehe na gọalọna mí nado deanana numọtolanmẹ mítọn lẹ.—Salmu lẹ 94:18, 19.
Biblu gán gọalọna mí nado duto linlẹn nuvọ́nọ-yinyin tọn lẹ ji.—Luku 12:6, 7.
Wefọ Biblu tọn susu lẹ wẹ hẹn mí deji dọ mí ma to mídeṣo, dọ Jiwheyẹwhe he yin Mẹdatọ mítọn nọ mọnukunnujẹ numọtolanmẹ mítọn lẹ mẹ to gigọ́ mẹ.—Salmu lẹ 34:18; 1 Johanu 3:19, 20.
Biblu dopà dọ Jiwheyẹwhe na hẹn oflin awufiẹsa tọn mítọn lẹ wá opodo. (Isaia 65:17; Osọhia 21:4) Whenue mí to yaji to apọ̀nmẹ podọ to numọtolanmẹ-liho, mí gán mọdọ opagbe ehe nọ na mí huhlọn nado zindonukọn.

Biblu Gọalọna Jessika

Lehe Apọṣimẹ Nọ Yinuwado Ji E Do

“Whenue n’do owhe 25, n’jẹazọ̀n bọ doto lẹ mọ apọṣimẹ-zọ̀n sinsinyẹn de na mi. N’nọ to nuylankan he ko jọ wayi to gbẹzan ṣie mẹ lẹ flin bọ yé sọ nọ to yadona mi. Doto lẹ dọna mi dọ linlẹn agọ̀ he onú ylankan he ko jọ wayi to gbẹzan ṣie mẹ lẹ nọ hẹnwa na mi lẹ wẹ zọ́n bọ n’to apọṣimẹ-zọ̀n jẹ. Gbọnvona amasin dagbe lẹ, n’sọ do hudo nukunpedomẹgo he na gọalọna mi nado doayi linlẹn agọ̀ ṣie lẹ go bosọ basi vọjlado tọn.”

Lehe Biblu Gọalọna Mi Do

“Whenue apọṣimẹ-zọ̀n lọ sinyẹn na mi taun, n’nọ jọsi, nọ do magbọjẹ zẹjlẹgo bo masọ nọ mọ amlọndọ. To zánmẹ lẹ, linlẹn agọ̀ lẹ nọ saba to ayiha mẹ gbọn na mi bo nọ húagbọ́ mi. Salmu lẹ 94:19 dohia dọ Jiwheyẹwhe gán miọnhomẹna mí bo hẹn kọgbọ wá na mí whenue magbọjẹ lẹ húagbọ́ mí. Enẹwutu, n’ze Biblu po kandai he mẹ wefọ tulinamẹ tọn lẹ te de po do akánma ṣie pá. Whenue amlọn gbẹ́ mi, n’nọ hia wefọ Biblu tọn delẹ bo nọ dike linlẹn Jiwheyẹwhe tọn lẹ ni miọnhomẹna mi.

“Biblu nọ na mí tuli nado họ́ linlẹn agọ̀ he jẹagọdo nuhe mí yọnẹn gando Jiwheyẹwhe go lẹ liai. To dai, n’kudeji dọ n’ma vó nude, dọ mẹde ma gán yiwanna mi. Amọ́, n’ko plọn dọ linlẹn mọnkọ lẹ gbọnvo taun na nuhe Biblu dọ. Biblu dọ dọ Jiwheyẹwhe yin Otọ́ owanyinọ podọ awuvẹmẹtọ de he nọ dọ dopodopo mítọn tọn. Pẹẹde pẹẹde, n’wá jẹ anadena linlẹn ṣie lẹ ji kakati nado dike yelẹ ni deanana mi. N’ko plọn nado mọ dee dile Jiwheyẹwhe nọ mọ mi do. Afọdide titengbe de wẹ ehe yin he gọalọna mi nado sukúndona linlẹn agọ̀ he n’nọ do gando dee go lẹ.

“N’to jejeji pọ́n ojlẹ lọ whenue oflin ylankan po linlẹn agọ̀ lẹpo po na busẹ. Na n’yọnẹn dọ nuhahun apọ̀nmẹ tọn lẹ na juwayi wutu, enẹ nọ na mi huhlọn nado doakọnna dogbó ṣie lẹ todin, podọ e sọ nọ na mi todido jiawu de gando sọgodo go whenue n’ma nasọ jẹ apọṣimẹ-zọ̀n gbede ba.”