HOSỌ OPLỌN TỌN 25
Mẹho Agun Tọn lẹ Emi —Mì Plọnnu sọn Apajlẹ Gideoni Tọn Mẹ
“Whenu ma na pé mi eyin yẹn zindonukọn nado dọ Gideoni tọn.”—HEB. 11:32.
OHÀN 124 Yin Nugbonọ to Whepoponu
BLADOPỌa
1. Sọgbe hẹ 1 Pita 5:2, lẹblanulọkẹyi tẹwẹ mẹho agun tọn lẹ tindo?
JEHOVAH ze lẹngbọ họakuẹ etọn lẹ do alọmẹ na mẹho agun tọn lẹ nado nọ penukundo yé go. Sunnu mẹdezejotọ ehelẹ nọ yọ́n pinpẹn lẹblanulọkẹyi he yé tindo nado wadevizọn na mẹmẹsunnu po mẹmẹyọnnu yetọn lẹ po tọn, podọ yé nọ wà nuhe go yé pé lẹpo nado yin “lẹngbọhọtọ he [nọ] yìn yé nugbonugbo lẹ.” (Jel. 23:4; hia 1 Pita 5:2.) Lehe homẹ mítọn nọ hùn do sọ nado do sunnu mọnkọ lẹ to agun mítọn lẹ mẹ!
2. Avùnnukundiọsọmẹnu tẹlẹ wẹ mẹho delẹ gán pehẹ?
2 Dile mẹho lẹ to azọngban yetọn lẹ hẹndi, yé nọ pehẹ avùnnukundiọsọmẹnu susu. Na nugbo tọn, nukunpipedo agun de go nọ biọ azọ́n susu. Tony he yin mẹho agun tọn de to États-Unis dona plọn nado nọ yọ́n dogbó edetiti tọn lẹ dogọ na nuhe dù azọ́n he e nọ kẹalọyi lẹ. E dọmọ: “To bẹjẹeji COVID-19 tọn, n’kẹalọyi azọ́ndenamẹ susu dogọ nado basi tito na opli lẹ po lizọnyizọn lọ po. Amọ́ mahopọnna obá he mẹ n’dovivẹnu jẹ, azọ́n he dona yin wiwà gbẹ́ nọ sù. To godo mẹ, alọnu ṣie nọ ján sọmọ bọ n’masọ nọ mọ whenu susu na Biblu hihia, oplọn mẹdetiti tọn po dẹ̀hiho po ba.” Ilir he yin mẹho agun tọn de to Kosovo pehẹ nuhahun devo. To whenue e to lẹdo he mẹ awhàn to núgbà te de, e nọ vẹawuna ẹn nado setonuna anademẹ titobasinanu lọ tọn lẹ. E dọmọ: “Adọgbigbo ṣie yin whiwhlepọn whenue alahọ deazọ́nna mi nado gọalọna mẹmẹsunnu po mẹmẹyọnnu he to lẹdo owùnọ de mẹ lẹ po. N’dibu podọ anademẹ lọ taidi nuhe ma yọ́n-na-yizan to nukun ṣie mẹ.” E vẹawuna Tim he yin mẹdehlan de to Asie nado wà nuhe e dona wà lẹpo to azán dopodopo ji. E dọmọ: “To whedelẹnu, e nọ taidi na mi dọ huhlọn vọ̀ do mi to apọ̀nmẹ podọ to numọtolanmẹ-liho.” Etẹwẹ gán gọalọna mẹho he to pipehẹ avùnnukundiọsọmẹnu mọnkọ lẹ?
3. Nawẹ mímẹpo gán mọaleyi gbọn eyin mí gbadopọnna apajlẹ Gideoni tọn?
3 Mẹho agun tọn lẹ gán plọnnu sọn apajlẹ Gideoni tọn mẹ. (Heb. 6:12; 11:32) E basi hihọ́na omẹ Jiwheyẹwhe tọn lẹ bosọ deanana yé. (Whẹ. 2:16; 1 Otàn. 17:6) Taidi Gideoni, mẹho agun tọn lẹ ko yin azọ́ndena nado penukundo omẹ Jiwheyẹwhe tọn lẹ go to ojlẹ hunyanhunyan tọn he sinyẹn taun de mẹ. (Owalọ 20:28; 2 Tim. 3:1) Mí gán plọnnu sọn dogbó mẹdetiti tọn yinyọnẹn, whiwhẹ po tonusise Gideoni tọn po mẹ. Akọndonanu etọn yin whiwhlepọn dile e to nukunpedo azọ́ndenamẹ etọn lẹ go. Vlavo mí yin mẹho agun tọn de kavi lala, mí gán yidogọna pinpẹn-nutọn-yinyọnẹn he mí nọ dohia mẹho agun tọn mítọn lẹ. Mí gán nọ nọgodona sunnu gbigbọnọ he yin azọ́n sinsinyẹnwatọ ehelẹ.—Heb. 13:17.
WHENUE DOGBÓ MẸDETITI TỌN YINYỌNẸN PO WHIWHẸ TOWE PO YIN WHIWHLEPỌN
4. Nawẹ Gideoni do dogbó mẹdetiti tọn yinyọnẹn po whiwhẹ po hia gbọn?
4 Gideoni yin dawe whiwhẹnọ de he sọ nọ yọ́n dogbó edetiti tọn.b Whenue angẹli Jehovah tọn dọna Gideoni dọ ewọ ko yin dide nado whlẹn Islaelivi lẹ sọn alọ Midianinu huhlọnnọ lẹ tọn mẹ, dawe whiwhẹnọ enẹ gblọn dọmọ: “Akọ̀ ṣie wẹ yin pẹvi pete to Manasse, podọ yẹn wẹ whè hugan to owhé otọ́ ṣie tọn gbè.” (Whẹ. 6:15) E mọdọ emi ma pegan na azọ́ndenamẹ lọ, amọ́ Jehovah yọnẹn dọ e gán pà ẹ. Po alọgọ Jehovah tọn po, Gideoni dotana azọ́ndenamẹ etọn po kọdetọn dagbe po.
5. Nawẹ whiwhẹ po dogbó mẹdetiti tọn yinyọnẹn mẹho agun tọn de tọn po gán yin whiwhlepọn gbọn?
5 Mẹho agun tọn lẹ nọ wà nuhe go yé pé lẹpo nado do dogbó mẹdetiti tọn yinyọnẹn po whiwhẹ po hia to nulẹpo mẹ. (Mika 6:8; Owalọ 20:18, 19) Yé ma nọ dósin nugopipe kavi nuwadotana yetọn lẹ ji; mọ yé ma nọ mọ yede di nuvọ́nọ na awugbopo kavi nuṣiwa yetọn lẹ wutu. Etomọṣo, mẹho agun tọn de gán pehẹ avùnnukundiọsọmẹnu lẹ. Di apajlẹ, e gán kẹalọyi azọ́ndenamẹ susu bo wá mọ to godo mẹ dọ e na vẹawu nado penukundo yemẹpo go. Kavi yè gán mọhodọdego na lehe e penukundo azọ́ndenamẹ de go do kavi pà ẹ na aliho he mẹ e hẹn devo di te. Etẹwẹ mẹho lẹ gán plọn sọn Gideoni dè he na gọalọna yé to ninọmẹ mọnkọ lẹ mẹ?
Gbọn apajlẹ Gideoni tọn hihodo dali, mẹho agun tọn he yọ́n dogbó ede tọn de nọ desọn ojlo mẹ nado biọ alọgọ, di apajlẹ na nuhe dù nukunpipedo kẹkẹvi kunnudide tọn lẹ go (Pọ́n hukan 6tọ)
6. Etẹwẹ mẹho agun tọn lẹ gán plọn sọn Gideoni dè gando dogbó mẹdetiti tọn yinyọnẹn go? (Sọ pọ́n yẹdide lọ.)
6 Nọ biọ alọgọ. Mẹhe nọ yọ́n dogbó ede tọn nọ yọnẹn dọ nudelẹ tin he emi ma gán wà. Gideoni yọ́n dogbó ede tọn na e desọn ojlo mẹ bo biọ alọgọ mẹdevo lẹ tọn wutu. (Whẹ. 6:27, 35; 7:24) Mẹho agun tọn nuyọnẹntọ lẹ nọ wà nudopolọ. Tony he go mí donù wayi dọmọ: “Na aliho he mẹ n’yin pinplọn whẹ́n te wutu, n’do aṣa lọ nado nọ kẹalọyi azọ́n susu hugan nuhe n’gán wà sọgbe hẹ lẹnpọn dagbe. Enẹwutu, n’basi dide dọ mí na gbadopọnna hosọ he dọhodo dogbó mẹdetiti tọn yinyọnẹn ji to sinsẹ̀n-bibasi whẹndo tọn mítọn whenu, bosọ kàn linlẹn asi ṣie tọn lẹ sè e. N’sọ gbadopọnna video lọ Plọnazọ́n Mẹdevo lẹ, Dejido Yé Go bo Na Huhlọn Yé Dile Jesu Nọ Wà Do to jw.org ji.” Tony jẹ alọgọ mẹdevo lẹ tọn biọ ji nado penukundo azọ́n etọn lẹ go. Etẹwẹ yin kọdetọn lọ? Tony dọmọ: “Azọ́n agun lọ tọn lẹ nọ yin nukunpedego ganji, podọ n’sọ nọ mọ whenu dogọ nado hẹn dee lodo to gbigbọ-liho.”
7. Nawẹ mẹho agun tọn lẹ gán hodo apajlẹ Gideoni tọn gbọn, eyin yè mọhodọdo yé go? (Jakọbu 3:13)
7 Nọ yí walọmimiọn do gblọn eyin yè mọhodọdo gowe. Avùnnukundiọsọmẹnu devo he mẹho lẹ nọ pehẹ wẹ whenue yè mọhodọdo yé go. Whladopo dogọ apajlẹ Gideoni tọn gán gọalọ. Na e yọ́n awugbopo ede tọn lẹ ganji wutu, e yí walọmimiọn do gblọn whenue Eflaiminu lẹ mọhodọdego. (Whẹ. 8:1-3) Gideoni ma gblọn po homẹgble po. E do gbigbọ mẹdezewhè tọn hia bo dotoaina ahunmẹdunamẹnu yetọn lẹ, podọ e yí zinzin do didẹ ninọmẹ sinsinyẹn lọ. Mẹho agun tọn nuyọnẹntọ lẹ nọ hodo apajlẹ Gideoni tọn bo nọ dotoai po sọwhiwhe po bosọ nọ gblọnho po walọmimiọn po to whenue yè mọhodọdo yé go. (Hia Jakọbu 3:13.) Gbọnmọ dali, yé nọ yidogọna jijọho to agun mẹ.
8. Nawẹ sunnu azọngbannọ lẹ dona nọ yinuwa gbọn eyin yé mọ pipà yí? Na apajlẹ.
8 Nọ ze pipà lọ jo na Jehovah. To whenue Gideoni yin pipà na e gbawhàn Midiani tọn wutu, e dọ̀n ayidonugo wá Jehovah ji. (Whẹ. 8:22, 23) Nawẹ sunnu azọ́ngbannọ lẹ gán hodo apajlẹ Gideoni tọn gbọn? Yé gán nọ na gigo Jehovah na nuhe yé wadotana lẹ. (1 Kọl. 4:6, 7) Di apajlẹ, eyin yè pà mẹho agun tọn de na nugopipe mẹpinplọn tọn etọn wutu, e gán dọ̀n ayidonugo wá asisa he mẹ nuplọnmẹ lọ wá sọn ji, enẹ wẹ Ohó Jiwheyẹwhe tọn, kavi wá azọ́nplọnmẹ he mí nọ mọyi to titobasinanu Jehovah tọn mẹ ji. To whedelẹnu, mẹho agun tọn lẹ gán nọ dindona eyin vlavo yé ma to ayidonugo he ma jẹ dọ̀n wá yede ji. Lẹnnupọndo apajlẹ mẹho agun tọn de tọn ji he nọ yin Timothy. Whenue e ṣẹṣẹ yin pipà, e nọ yiwanna nado na togunmẹho lẹ. E dọmọ: “N’nọ yí homẹbibiọ po apajlẹ he dite bosọ gẹdẹ lẹ po zan. Ehe nọ zọ́n bọ mẹdevo lẹ nọ saba na mi pipà. E blawu dọ enẹ nọ dọ̀n ayidonugo wá ji e kakati ni yin wá Biblu kavi Jehovah ji.” To nukọn mẹ, Timothy wá mọdọ emi dona vọ́ aliho mẹpinplọn tọn emitọn jlado, na enẹ nikaa dọ̀n ayidonugo he ma jẹ wá ede ji. (Howh. 27:21) Etẹwẹ yin kọdetọn lọ? E dọmọ: “Omẹ voovo lẹ wẹ nọ dọna mi lehe hodidọ ṣie ko gọalọna yé nado pehẹ nuhahun de, doakọnna whlepọn de kavi nado dọnsẹpọ Jehovah dogọ do. Nuhe yé dọ enẹlẹ nọ hẹn ayajẹ wá na mi taun hugan pipà he yé na mi to owhe delẹ die wayi.”
WHENUE TONUSISE KAVI ADỌGBIGBO TOWE YIN WHIWHLEPỌN
Gideoni setonu bo de sọha awhànfuntọ etọn lẹ tọn pò wá 300, yèdọ sunnu he to aṣeji lẹ (Pọ́n hukanh 9tọ)
9. Nawẹ tonusise po adọgbigbo Gideoni tọn po yin whiwhlepọn gbọn? (Pọ́n yẹdide he to wepa ji.)
9 Whenue Gideoni yin dide taidi whẹdatọ godo, tonusise po adọgbigbo etọn po yin whiwhlepọn. E mọ azọ́ndenamẹ he bẹ owù hẹn de, enẹ wẹ nado họ́ agbà he ji otọ́ etọn nọ sẹ̀n Baali te liai. (Whẹ. 6:25, 26) To nukọn mẹ, to whenue e ko bẹ awhànpa de pli godo, Gideoni mọ anademẹ yí whla awe nado de sọha yetọn pò. (Whẹ. 7:2-7) To godo mẹ, e yin gbedena nado tọ́nawhàn osla kẹntọ lẹ tọn to zángbodawe mẹ.—Whẹ. 7:9-11.
10. Nawẹ tonusise mẹho agun tọn de tọn gán yin whiwhlepọn gbọn?
10 Mẹho lẹ dona nọ “wleawufo nado setonu.” (Jak. 3:17) Mẹho agun tọn tonusetọ de nọ wleawufo nado setonuna nuhe Owe-wiwe lẹ dọ gọna anademẹ he wá sọn titobasinanu Jiwheyẹwhe tọn dè lẹ. Gbọnmọ dali, e nọ ze apajlẹ dagbe dai na mẹdevo lẹ. Etomọṣo, tonusise etọn gán yin whiwhlepọn. Di apajlẹ, e gán mọdọ e vẹawu nado hodo anademẹ de he e mọyi. To ninọmẹ delẹ mẹ, e gán kanse ede eyin anademẹ de yọ́n-na-yizan nugbonugbo, kavi yin nuyọnẹnnu. Kavi e gán yin bibiọ to e si nado kẹalọyi azọ́ndenamẹ de he gán ze mẹdekannujẹ etọn do owù mẹ. Nawẹ mẹho agun tọn lẹ gán hodo apajlẹ Gideoni tọn to ninọmẹ mọnkọ lẹ mẹ gbọn?
11. Etẹwẹ gán gọalọna mẹho agun tọn lẹ nado nọ setonu?
11 Nọ dotoaina anademẹ po sọwhiwhe po bosọ nọ hodo e. Jiwheyẹwhe dọna Gideoni lehe e na họ́ agbà otọ́ etọn tọn liai do, fie e na gbá agbà yọyọ Jehovah tọn de do, gọna kanlin he e dona yí do sanvọ́. Gideoni ma mọhodọdo anademẹ lọ go, nuhe Jehovah dọ lọ pẹẹ wẹ e wà. To egbehe, titobasinanu Jehovah tọn nọ na anademẹ mẹho agun tọn lẹ gbọn wekanhlanmẹ, nulila lẹ podọ gbọn anademẹ he gán gọalọna mí nado to hihọ́ glọ bosọ dọnsẹpọ Jehovah lẹ gblamẹ. Mí yiwanna mẹho agun tọn mítọn lẹ na yé nọ hodo anademẹ yẹwhehọluduta tọn enẹlẹ po nugbonọ-yinyin po wutu. Agun lọ blebu wẹ nọ mọaleyi.—Salm. 119:112.
12. Nawẹ mẹho lẹ gán yí Heblu lẹ 13:17 zan gbọn eyin anademẹ yẹwhehọluduta tọn de diọ?
12 Nọ wleawufo nado diọada. Flindọ Jehovah biọ to Gideoni si nado gọ̀ suhugan awhànpa etọn tọn dohlan whé. (Whẹ. 7:8) E gán ko lẹndọ: ‘Be e biọ dọ ma basi vọjlado ehe nugbonugbo a? Be anademẹ ehe na wazọ́n an?’ Ṣogan, Gideoni setonu. To egbehe, mẹho agun tọn lẹ nọ hodo apajlẹ Gideoni tọn bo nọ basi vọjlado he anademẹ yẹwhehọluduta tọn lẹ biọ lẹ. (Hia Heblu lẹ 13:17.) Di apajlẹ to 2014, Hagbẹ Anademẹtọ lọ diọ aliho he mẹ azọ́n Plitẹnhọ Ahọluduta tọn po Plidopọ po tọn lẹ gbigbá nọ yin godonọna to akuẹzinzan-liho te. (2 Kọl. 8:12-14) Agun lẹ ma nasọ nọ gọ̀ akuẹ he yin zinzan nado gbá plitẹnhọ na yé lọ sú ba. Kakatimọ, agun lẹ lẹdo aihọn pé na nọ hò akuẹ yetọn lẹ pli, na nọtẹn yẹwhehọluduta tọn lẹ nido nọ yin gbigbá to fidepope he nuhudo etọn tin te, mahopọnna nugopipe agun de tọn to akuẹzinzan-liho. Whenue José sèhó gando vọjlado lọ go, e do ayihaawe eyin e na wazọ́n, bo lẹn to ede mẹ dọ: ‘Plitẹnhọ Ahọluduta tọn dopo tata ma tlẹ gán yin gbigbá pọ́n gbede. Nulẹ ma nọ yì do mọ to lẹdo mítọn mẹ.’ Etẹwẹ gọalọna José nado nọgodona anademẹ lọ? E dọmọ: “Hogbe Howhinwhẹn lẹ 3:5, 6 tọn lẹ flinnu mi nado dejido Jehovah go. Podọ kọdetọn lọ lẹ jiawu taun! E ma yindọ mí to Plitẹnhọ Ahọluduta tọn susu dogọ gbá kẹdẹ wẹ gba, amọ́ mí ko plọn nado nọgodona tito lọ to aliho voovo lẹ mẹ na zẹ́nsisọ nido sọgan tin.”
Etlẹ yin to fie azọ́n mítọn to alọhẹndotenamẹ glọ te, mí gán yí adọgbigbo do dekunnu po azọnyinyọnẹn po (Pọ́n hukan 13tọ)
13. (a) Nujikudo tẹwẹ Gideoni tindo? (b) Nawẹ mẹho lẹ gán hodo apajlẹ Gideoni tọn gbọn? (Sọ pọ́n yẹdide lọ.)
13 Nọ wà ojlo Jehovah tọn po adọgbigbo po. Gideoni setonuna Jehovah mahopọnna dọ e to budi bọ azọ́ndenamẹ lọ sọ do owù. (Whẹ. 9:17) To whenue Jehovah ko hẹn Gideoni deji godo, e kudeji mlẹnmlẹn dọ Ewọ na nọgodona emi dile e to hihọ́-basina omẹ etọn lẹ. Mẹho agun tọn he nọ nọ̀ lẹdo he mẹ azọ́n mítọn yin alọhẹndotena te lẹ nọ hodo apajlẹ Gideoni tọn. Yé nọ yí adọgbigbo do yin nukọntọ to opli lẹ ji, podọ to lizọnyizọn lọ mẹ mahopọnna owù lọ dọ yé gán yin wiwle, yin hokanse, hẹn azọ́n yetọn bu kavi yin nuyiwa hẹ po kanyinylan po.c To nukunbibia daho lọ whenu, mẹho lẹ na do hudo adọgbigbo tọn nado hodo anademẹ he yé na mọyi lẹ, mahopọnna owù he mọwiwà na bẹhẹn lẹ. Anademẹ lọ lẹ gán gando owẹ̀n he taidi kẹ́nsu lẹ lilá go, kavi gando lehe yè gán lùn mẹgbeyinyan Gọgi Magọgi tọn tọ́n do go.—Ezek. 38:18; Osọ. 16:21.
WHENUE AKỌNDONANU TOWE YIN WHIWHLEPỌN
14. Nawẹ akọndonanu Gideoni tọn yin whiwhlepọn gbọn?
14 Azọ́ndenamẹ Gideoni tọn taidi whẹdatọ biọ vivẹnudido susu. To whenue Midianinu lẹ họ̀n to avùnhiho zánmẹ tọn de whenu, Gideoni domọ́na yé sọn Agbàdo Jezleẹli tọn mẹ kakayì Tọ̀sisa Jọdani tọn tó, he e yọnbasi dọ zungbo lẹ wẹ lẹdo. (Whẹ. 7:22) Be Gideoni nọte do tọ̀sisa Jọdani tọn tó wẹ ya? Paali! Dile etlẹ yindọ agbọ́ ko pé ewọ po sunnu 300 he hodo e lẹ po, yé dasá tọ̀sisa lọ bo zindonukọn to mẹgbeyinyan lọ mẹ. To godo mẹ, yé plá Midianinu lẹ bo gbawhàn yetọn mlẹnmlẹn.—Whẹ. 8:4-12.
15. Whetẹnu wẹ akọndonanu mẹho agun tọn de tọn gán yin whiwhlepọn?
15 To whedelẹnu, nukunpipedo agun po whẹndo po go gán nọ zọ́n bọ agbọ́ na pé mẹho agun tọn de taun to agbasa-liho, to apọ̀nmẹ kavi to numọtolanmẹ-liho. To ninọmẹ mọnkọ lẹ mẹ, nawẹ mẹho agun tọn lẹ gán hodo apajlẹ Gideoni tọn gbọn?
Mẹho agun tọn awanyinọ lẹ ko penugo bo hẹn mẹsusu he do hudo godonọnamẹ tọn lẹ lodo (Pọ́n hukan 16, 17tọ)
16, 17. Etẹwẹ gọalọna Gideoni nado doakọnnanu, podọ jide tẹwẹ mẹho lẹ gán tindo? (Isaia 40:28-31) (Sọ pọ́n yẹdide lọ.)
16 Nọ deji dọ Jehovah na na we huhlọn. Gideoni deji dọ Jehovah na na emi huhlọn, podọ nuhe Jehovah wà niyẹn. (Whẹ. 6:14, 34) To gbèdopo, Gideoni po sunnu etọn lẹ po bẹwezun jẹ godo na ahọlu Midianinu awe delẹ, to whenuena ahọlu lọ lẹ gán ko to kanklosọ lẹ ji. (Whẹ. 8:12, 21) Ṣogan po alọgọ Jiwheyẹwhe tọn po, Islaelivi lẹ wle yé bosọ gbawhàn yetọn. Mọdopolọ, mẹho agun tọn lẹ gán nọ ganjẹ Jehovah go, yèdọ mẹlọ he ‘agbọ́ ma nọ pé, mọ onú ma nọ ṣikọna.’ Ewọ na na yé huhlọn whenue yé do hudo etọn te.—Hia Isaia 40:28-31.
17 Lẹnnupọndo apajlẹ mẹmẹsunnu Matthew tọn ji he yin hagbẹ Wedegbẹ́ Whẹgbọtọ Dotowhé tọn de. Etẹwẹ gọalọna ẹn nado doakọnnanu? Matthew dọmọ: “N’ko mọ nugbo-yinyin Filipinu lẹ 4:13 tọn. Whenue agbọ́ pé mi petepete, whlasusu wẹ n’ko hodẹ̀ vẹkuvẹku hlan Jehovah bo vẹ̀ ẹ dọ ni na mi huhlọn he n’do hudo etọn to agbasa mẹ podọ to apọ̀nmẹ nado nọgodona mẹmẹsunnu ṣie lẹ. To ojlẹ enẹlẹ mẹ, n’ko mọdọ gbigbọ Jehovah tọn nọ na mi huhlọn bo nọ gọalọna mi nado doakọnnanu.” Taidi Gideoni, mẹho agun tọn mẹdezejotọ mítọn lẹ gán nọ pehẹ avùnnukundiọsọmẹnu lẹ dile yé to lẹngbọpa lọ yìn matin ṣejannabi. Na nugbo tọn, yé dona nọ yọ́n dogbó yetọn lẹ bo nọ kẹalọyi dọ yé ma gán nọ wà nuhe nọ jlo yé lẹpo. Amọ́, yé gán deji dọ Jehovah na sè obiọ yetọn lẹ na alọgọ bosọ na yé huhlọn nado doakọnnanu.—Salm. 116:1; Flp. 2:13.
18. To bladopọ mẹ, nawẹ mẹho lẹ gán hodo apajlẹ Gideoni tọn gbọn?
18 Nuplọnmẹ he wá do gànmẹ bosọ yọ́n-na-yizan susu wẹ mẹho lẹ gán plọn sọn Gideoni dè. Mẹho agun tọn lẹ na wà dagbe nado nọ yọ́n dogbó yede tọn bosọ yin whiwhẹnọ na nuhe dù azọ́n he yé nọ kẹalọyi lẹ, podọ to whenue mẹdevo lẹ mọhodọdo yé go kavi pà yé. Yé dona nọ do tonusise po adọgbigbo po hia titengbe dile vivọnu titonu ehe tọn to dindọnsẹpọ. Podọ yé dona deji dọ mahopọnna avùnnukundiọsọmẹnu depope he yé gán pehẹ, Jiwheyẹwhe gán na yé huhlọn. Matin ayihaawe, mí yọ́n pinpẹn lẹngbọhọtọ azọ́n sinsinyẹnwatọ enẹlẹ tọn taun, podọ mí “nọ pọ́n omẹ mọnkọtọn lẹ hlan di mẹvivẹ” lẹ.—Flp. 2:29.
OHÀN 120 Yin Walọmimiọnnọ Taidi Klisti
a Jehovah de Gideoni nado deanana omẹ Etọn lẹ bosọ basi hihọ́na yé to ojlẹ he vẹawu taun de mẹ to whenuho akọta Islaeli tọn mẹ. Gideoni penukundo azọ́ndenamẹ enẹ go po nugbonọ-yinyin po na nudi owhe 40. Amọ́ e pehẹ avùnnukundiọsọmẹnu susu lẹ. Mí na gbadopọnna lehe apajlẹ etọn gán gọalọna mẹho agun tọn lẹ do to egbehe whenue yé pannukọn avùnnukundiọsọmẹnu lẹ.
b Dogbó mẹdetiti tọn yinyọnẹn po whiwhẹ po sẹpo yede taun. Mí nọ dohia dọ mí yọ́n dogbó míde tọn eyin mí nọ do pọndohlan he sọgbe gando míde po nugopipe mítọn lẹ po go. Mí nọ dohia dọ mí yin whiwhẹnọ eyin mí nọ mọdọ mẹdevo lẹ yiaga hú mí. (Flp. 2:3) To paa mẹ, mẹhe nọ yọ́n dogbó ede tọn sọ nọ yin whiwhẹnọ.
c Pọ́n hosọ lọ, “Zindonukọn Nado to Jehovah Sẹ̀n Mahopọnna Alọhẹndotenamẹ” to Atọ̀họ̀-Nuhihọ́ lọ Tọn juillet 2019 tọn mẹ, w. 10, 11, huk. 10-13.