Lehe Mí Gán Hẹn Owanyi Mítọn Na Ode Awetọ Siso Dogọ Do

1, 2. (a) Naegbọn apọsteli Paulu do dọ dọ owanyi wẹ jẹhẹnu he “klohugan”? (b) Kanbiọ tẹlẹ wẹ mí na gbadopọnna?

WHENUE apọsteli Paulu to hodọdo yise, todido po owanyi po ji, e dotana dọ “dehe klohugan to [jẹhẹnu] ehelẹ mẹ wẹ owanyi.” (1 Kọl. 13:13) Naegbọn Paulu gán dọ mọ? To sọgodo, e ma nasọ biọ dọ mí ni do yise hia to opagbe Jiwheyẹwhe tọn he gando aihọn yọyọ etọn go lẹ mẹ kavi to nukundo dọ yé na wá mọ hẹndi ba, na yemẹpo wẹ na ko mọ hẹndi wutu. Amọ́, mí na gbẹ́ do hudo nado to wanyina Jehovah po gbẹtọ lẹ po. Na nugbo tọn, owanyi mítọn na yé na to sinsinyẹn deji kakadoi.

² Na mí na gbẹ́ do hudo owanyi tọn to whelẹponu wutu, mí na gbadopọnna kanbiọ atọ̀n ehelẹ. Tintan, naegbọn mí dona yiwanna ode awetọ? Awetọ, nawẹ mí nọ do owanyi hia ode awetọ gbọn? Atọ̀ntọ, nawẹ mí gán hẹn owanyi he mí do na ode awetọ sinyẹn dogọ gbọn?

NAEGBỌN MÍ DONA YIWANNA ODE AWETỌ?

3. Whẹwhinwhẹ́n tẹlẹ wẹ mí tindo nado nọ yiwanna ode awetọ?

³ Naegbọn e do yin nujọnu dọ mí ni nọ yiwanna ode awetọ? Dopo to whẹwhinwhẹ́n lọ lẹ mẹ wẹ yindọ, owanyi nọ do mí hia taidi Klistiani nugbo lẹ. Jesu dọna apọsteli etọn lẹ dọmọ: “Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin—eyin mì tindo owanyi to mìde ṣẹnṣẹn.” (Joh. 13:35) Humọ, owanyi he mí do na ode awetọ nọ kọ̀n mí dopọ. Paulu ylọ owanyi dọ “gẹdẹ he nọ kọ̀n gbẹtọ lẹ dopọ to aliho pipé de mẹ.” (Kol. 3:14) Etomọṣo, mí gbẹ́ do whẹwhinwhẹ́n titengbe devo he wutu mí dona yiwanna ode awetọ. Apọsteli Johanu kanwehlan yisenọ hatọ lẹ dọmọ: “Mẹdepope he yiwanna Jiwheyẹwhe dona yiwanna mẹmẹsunnu etọn ga.” (1 Joh. 4:21) Eyin mí do owanyi hia ode awetọ, mí nọ dohia dọ mí yiwanna Jiwheyẹwhe ga.

4, 5. Basi zẹẹmẹ lehe owanyi mítọn na Jiwheyẹwhe tindo kanṣiṣa hẹ owanyi mítọn na ode awetọ do tọn.

⁴ Kanṣiṣa pẹkipẹki tẹwẹ tin to owanyi mítọn na Jiwheyẹwhe podọ to dehe mí nọ dohia mẹmẹsunnu po mẹmẹyọnnu mítọn lẹ po ṣẹnṣẹn? Di apajlẹ, lẹnnupọndo kanṣiṣa he tin to ahun mítọn po awutugonu mítọn he pò lẹ po ṣẹnṣẹn ji. Whenue doto de gbeje mí pọ́n, nado pọ́n eyin ahun mítọn to hihò ganji kavi eyin e tindo nuhahun de, ehe sọgan zọ́n bọ e na yọ́n nudọnamẹ delẹ gando ninọmẹ ahun mítọn tọn go. Kanṣiṣa tẹwẹ apajlẹ ehe tindo po owanyi didohia po?

⁵ Kẹdẹdile doto de nọ yọ́n nudọnamẹ lẹ gando agbasalilo po ninọmẹ ahun mítọn tọn po go to whenue e gbeje ahun mítọn pọ́n, mílọsu lẹ gán yọ́n obá he mẹ owanyi he mí tindo na Jiwheyẹwhe siso jẹ eyin mí nọ gbeje owanyi he mí tindo na mẹdevo lẹ pọ́n. Eyin mí doayi e go dọ owanyi mítọn na yisenọ hatọ lẹ jẹ didepo ji to aliho de mẹ, ehe dohia dọ owanyi mítọn na Jiwheyẹwhe lọsu ko jẹ didepo ji niyẹn. Amọ́ eyin mí nọ do owanyi hia yisenọ hatọ mítọn lẹ whẹwhẹ, ehe nọ dohia dọ owanyi mítọn na Jiwheyẹwhe lodo deji.

6. Eyin owanyi mítọn na mẹmẹsunnu po mẹmẹyọnnu mítọn lẹ po jẹ didepo ji, naegbọn enẹ dona nọ duahunmẹna mí? (1 Johanu 4:7-9, 11)

⁶ Eyin owanyi mítọn na mẹmẹsunnu po mẹmẹyọnnu lẹ po jẹ didepo ji, enẹ dona nọ duahunmẹna mí. Etẹwutu? Na ehe na dohia dọ mí to owù mẹ to gbigbọ-liho wutu. Apọsteli Johanu hẹn ehe họnwun whenue e flinnu mí dọmọ: “Mẹhe ma yiwanna mẹmẹsunnu etọn, he e mọ, ma sọgan yiwanna Jiwheyẹwhe, mẹhe e ma mọ.” (1 Joh. 4:20) Etẹwẹ yin nuplọnmẹ lọ na mí? Homẹ Jehovah tọn nọ hùn do mí go kiki eyin mí “nọ yiwanna ode awetọ.”—Hia 1 Johanu 4:7-9, 11.

NAWẸ MÍ NỌ DO OWANYI HIA ODE AWETỌ GBỌN?

7, 8. Etẹwẹ yin aliho delẹ he mẹ mí gán nọ do owanyi hia ode awetọ te?

⁷ Gbedide lọ dọ mí “ni yiwanna ode awetọ” sọawuhia to Ohó Jiwheyẹwhe tọn mẹ whlasusu. (Joh. 15:12, 17; Lom. 13:8; 1 Tẹs. 4:9; 1 Pita 1:22; 1 Joh. 4:11) Ṣigba, owanyi yin jẹhẹnu ahun mẹ tọn de kavi gbẹtọ-yinyin homẹ tọn mẹde tọn, podọ gbẹtọvi depope ma gán mọnú jẹ ahun mítọn mẹ. Enẹwutu, nawẹ mí gán nọ dohia dọ mí yiwanna ode awetọ gbọn? Mí gán nọ wàmọ gbọn ohó po walọ mítọn po gblamẹ.

⁸ Aliho susu lẹ mẹ wẹ mí gán nọ dohia mẹmẹsunnu po mẹmẹyọnnu mítọn lẹ po te dọ mí yiwanna yé. Di apajlẹ: “Mì nọ dọ nugbo na ode awetọ mìtọn.” (Zek. 8:16) Mì “nọ jijọho mẹ hẹ ode awetọ mìtọn.” (Malku 9:50) Mì yin nukọntọ “to gbégbò didohia ode awetọ mẹ.” (Lom. 12:10) “Mì nọ kẹalọyi ode awetọ.” (Lom. 15:7) Mì ‘nọ to jijona ode awetọ zọnmii.’ (Kol. 3:13) “Mì nọ to alọgọna ode awetọ to nuhe to agbàn pẹ̀n mì lẹ mẹ.” (Gal. 6:2) Mì nọ “to homẹmiọnna ode awetọ zọnmii.” (1 Tẹs. 4:18) Mì “nọ to ode awetọ hẹn lodo” zọnmii. (1 Tẹs. 5:11) Mì “nọ hodẹ̀ na ode awetọ.”—Jak. 5:16.

9. Naegbọn homẹmimiọnna mẹdevo lẹ do yin aliho titengbe de nado do owanyi mítọn hia? (Sọ pọ́n yẹdide lọ.)

⁹ Mì gbọ mí ni gbadopọnna dopo to aliho he mẹ mí gán do owanyi hia te lẹ mẹ he yin nùdego to hukan he jẹnukọn lọ mẹ. Mí na gbadopọnna tudohomẹnamẹ Paulu tọn he dọmọ: Mì nọ “to homẹmiọnna ode awetọ zọnmii.” Naegbọn homẹmimiọnna mẹdevo lẹ do yin dohia owanyi tọn titengbe de? Sọgbe hẹ owe he nọ basi zẹẹmẹ do Biblu ji de, hogbe he Paulu yizan na ‘homẹmimiọn’ zẹẹmẹdo “nado to apá na mẹde bo na ẹn tuli whenue e to jujugbọn whlepọn sinsinyẹn de mẹ.” Enẹwutu, eyin mí miọnhomẹna yisenọ hatọ he to awufiẹsa mẹ de, mí nọ gọalọna ẹn nado zindonukọn bo to zọnlinzin to aliho ogbẹ̀ tọn lọ ji. Whedepopenu he mí miọnhomẹna mẹmẹsunnu kavi mẹmẹyọnnu de, owanyi he mí tindo na ẹn dohia wẹ mí te.—2 Kọl. 7:6, 7, 13.

10. Kanṣiṣa tẹwẹ tin to awuvẹmẹ po homẹmimiọn po ṣẹnṣẹn?

¹⁰ Kanṣiṣa pẹkipẹki de tin to numọtolanmẹ awuvẹmẹ tọn tintindo po homẹmimiọnna mẹdevo lẹ po ṣẹnṣẹn. To aliho tẹ mẹ? Awuvẹmẹtọ de nọ yin whinwhàn nado miọnhomẹna mẹdevo lẹ bosọ nọ tẹnpọn nado hẹn kọgbọ wá na yé. Enẹwutu jẹnukọn whẹ́, mí nọ do numọtolanmẹ awuvẹmẹ tọn; enẹgodo mí nọ miọnhomẹnamẹ. Doayi lehe Paulu do kanṣiṣa he tin to awuvẹmẹ Jehovah tọn po homẹmiọnnamẹ Etọn po ṣẹnṣẹn hia do go. Paulu basi zẹẹmẹ Jehovah tọn taidi “Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn.” (2 Kọl. 1:3) Tofi, Paulu yí hodidọ lọ “lẹblanu sisosiso” zan nado basi zẹẹmẹ numọtolanmẹ awuvẹmẹ tọn tintindo na mẹdevo lẹ tọn. Enẹwutu, “Jiwheyẹwhe yin yiylọdọ Otọ́ kavi Asisa lẹblanu sisosiso lẹ tọn, na ewọ do awuvẹmẹ sisosiso na gbẹtọ lẹ wutu.” Podọ awuvẹmẹ enẹ nọ whàn ẹn nado miọnhomẹna “mí to whlepọn mítọn lẹpo mẹ.” (2 Kọl. 1:4) Kẹdẹdile osin he wé ṣeke bo to tintọ́n sọn asisa de mẹ nọ fakọna mẹhe nugbla to hùhù lẹ do, Jehovah nọ fakọna mẹhe to awufiẹsa mẹ lẹ bosọ nọ miọnhomẹna yé. Nawẹ mí gán hodo apajlẹ Jehovah tọn bo nọ tindo numọtolanmẹ awuvẹmẹ tọn na mẹdevo lẹ bosọ nọ hẹn kọgbọ wá na yé gbọn? Aliho dopo nado wàmọ wẹ nado nọ wleawuna jẹhẹnu he na gọalọna mí nado nọ tindo numọtolanmẹ awuvẹmẹ tọn na mẹdevo lẹ bosọ nọ miọnhomẹna yé. Etẹwẹ yin delẹ to jẹhẹnu ehelẹ mẹ?

11. Sọgbe hẹ Kolosinu lẹ 3:12 gọna 1 Pita 3:8, jẹhẹnu devo tẹlẹ wẹ mí dona wleawuna nado hẹn owanyi he na sisẹ́ mí nado miọnhomẹna mẹdevo lẹ go?

¹¹ Etẹwẹ na gọalọna mí nado hẹn owanyi he mí do hudo etọn nado “to homẹmiọnna ode awetọ zọnmii” go? Mí dona wleawuna jẹhẹnu dagbe delẹ taidi mẹtọnhopọn, owanyi mẹmẹsunnu tọn po homẹdagbe po. (Hia Kolosinu lẹ 3:12; 1 Pita 3:8.) Nawẹ jẹhẹnu ehelẹ na gọalọna mí gbọn? Eyin numọtolanmẹ awuvẹmẹ tọn po jẹhẹnu he tindo kanṣiṣa hẹ ẹ lẹ po lẹzun apadewhe gbẹtọ-yinyin mítọn tọn, mí na nọ do ojlo sinsinyẹn nado gọalọna mẹhe to awufiẹsa mẹ lẹ. Dile Jesu dọ do: “Sọn susugege nuhe tin to ahun mẹ lẹ tọn mẹ wẹ onù nọ dọtọ́n. Mẹdagbe nọ de nudagbe lẹ tọ́n sọn adọkunnu dagbe etọn lẹ mẹ.” (Mat. 12:34, 35) Homẹmimiọnna mẹmẹsunnu po mẹmẹyọnnu mítọn he to nuhudo mẹ lẹ po yin aliho titengbe de he mẹ mí nọ do owanyi he mí tindo na yé hia te.

NAWẸ MÍ GÁN HẸN OWANYI MÍTỌN NA ODE AWETỌ SINYẸN DEJI GBỌN?

12. (a) Naegbọn mí dona nọ to aṣeji? (b) Kanbiọ tẹwẹ mí na gbadopọnna todin?

¹² Mímẹpo wẹ nọ jlo na “zindonukọn nado nọ yiwanna ode awetọ.” (1 Joh. 4:7) Etomọṣo, nujọnu wẹ e yin dọ mí ni hẹn avase he Jesu na do ayiha mẹ dọmọ: “Owanyi suhugan gbẹtọ lẹ tọn na miọn.” (Mat. 24:12) Jesu ma to didọ dọ ehe na jọ do suhugan devi emitọn lẹ tọn go. Amọ́, mí dona to aṣeji na nuyiwa gbẹtọ lẹ tọn to aihọn he mẹ owanyi hán te ehe nikaa bẹpla mí. Po enẹ po to ayiha mẹ, mì gbọ mí ni gbadopọnna kanbiọ titengbe ehe: Nawẹ mí na wagbọn do yọnẹn eyin vlavo owanyi he mí tindo na mẹmẹsunnu mítọn lẹ lodo kavi lala?

13. Etẹwẹ sọgan whlé owanyi mítọn pọ́n?

¹³ Aliho dopo nado yọ́n obá he mẹ owanyi mítọn sinyẹn jẹ wẹ nado nọ gbadopọnna lehe mí nọ didẹ ninọmẹ delẹ do to gbẹ̀mẹ. (2 Kọl. 8:8) Apọsteli Pita donù dopo to ninọmẹ mọnkọ lẹ mẹ go whenue e dọmọ: “Hú popolẹpo, mì tindo owanyi sisosiso na ode awetọ, na owanyi nọ ṣinyọnnudo ylando susugege.” (1 Pita 4:8) Enẹwutu, awugbopo po mape mẹdevo lẹ tọn po gán whlé owanyi mítọn pọ́n.

14. Sọgbe hẹ 1 Pita 4:8, owanyi alọpa tẹ sin hudo wẹ mí do? Na apajlẹ.

¹⁴ Mì gbọ mí ni lẹnnupọndo hogbe Pita tọn lẹ ji ganji. Adà tintan wefọ 8tọ tọn dọhodo owanyi alọpa he mí dona tindo ji, enẹ wẹ “owanyi sisosiso.” To paa mẹ, hogbe he Pita yizan na “sisosiso” zẹẹmẹdo “nado vlọ́n nude.” Adà awetọ wefọ lọ tọn dọhodo kọdetọn he owanyi sisosiso gán hẹnwa ji. E nọ ṣinyọnnudo ylando mẹmẹsunnu mítọn lẹ tọn. Mí gán yí nukun homẹ tọn do pọ́n ẹn hlan to aliho ehe mẹ: Mí ni dọ dọ mí yí alọ mítọn awe lẹ do hẹn owanyi mítọn go, taidi dọ mí hẹn avọ̀ de go bo to vinvlọ́n ẹn kaka bọ e ṣinyọnnudo, e ma yin ylando dopo kavi awe de poun, amọ́ “ylando susugege.” Nado ṣinyọnnudo nude yin aliho nuyijlẹdonugo tọn de nado dọho gando jonamẹ go. Dile avọ̀ de gán ṣinyọnnudo oblọ de do, owanyi gán ṣinyọnnudo awugbopo po mape mẹdevo lẹ tọn po ga.

15. Eyin owanyi mítọn na mẹmẹsunnu po mẹmẹyọnnu mítọn lẹ po sinyẹn jẹ obá he jẹ mẹ, etẹwẹ mí na penugo nado wà? (Kolosinu lẹ 3:13)

¹⁵ Owanyi mítọn na mẹdevo lẹ dona lodo ganji, ehe na zọ́n bọ mí na nọ jo nuṣiwa yisenọ hatọ mítọn lẹ tọn na yé eyin mọwiwà tlẹ nọ biọ vivẹnudido sinsinyẹn to whedelẹnu. (Hia Kolosinu lẹ 3:13.) Eyin e nọ pà mí nado nọ jona mẹdevo lẹ, mí na dohia dọ owanyi mítọn lodo bọ mí sọ jlo na hẹn homẹ Jehovah tọn hùn. Nudevo tẹwẹ nasọ gọalọna mí nado nọ miọnnukundo awugbopo po nuṣiwa mẹdevo lẹ tọn po?

16, 17. Nudevo tẹwẹ na gọalọna mí nado nọ miọnnukundo nuṣiwa flinflin mẹdevo lẹ tọn? Na apajlẹ. (Sọ pọ́n yẹdide lọ.)

¹⁶ Nọ ze ayiha do jẹhẹnu mẹmẹsunnu po mẹmẹyọnnu towe lẹ po tọn ji, e ma yin do awugbopo yetọn lẹ ji. Lẹnnupọndo nuyijlẹdonugo ehe ji. Mí ni dọ dọ a to nuwiwa pọmẹ tọn de tẹnmẹ hẹ mẹmẹsunnu po mẹmẹyọnnu delẹ po. Mì duvivi nuwiwa lọ tọn dopọ, podọ to vivọnu, mì de fọto de dopọ. Na taun tọn, a de fọto awe devo lẹ dogọ, nado hẹn ẹn diun dọ eyin de ma yọ́n be de na yọ́n. Din fọto lọ lẹpo yin atọ̀n. Amọ́ to dopo mẹ, a doayi e go dọ mẹmẹsunnu de ylọn nukunmẹ. Etẹwẹ a na wà po fọto enẹ po? A na súnsún in sẹ̀, na to awe he pò lẹ mẹ, mẹlẹpo wẹ to nuko kakajẹ mẹmẹsunnu lọ lọsu ji.

¹⁷ Mí sọgan yí fọto awe he mí ma súnsún lẹ jlẹdo ojlẹ dagbe he mí ma nọ wọn lẹ go. Mí nọ saba flin ojlẹ dagbe he mí zan dopọ hẹ mẹmẹsunnu po mẹmẹyọnnu mítọn lẹ po. Amọ́, mí ni dọ dọ to nuwiwa mọnkọ de tẹnmẹ, mẹmẹsunnu de kavi mẹmẹyọnnu de dọ kavi wà nude he ma yọ́n. Be mí na hẹn nujijọ enẹ do ayiha mẹ wẹ ya? Naegbọn a ma na tẹnpọn nado súnsún in sẹ̀ dile a súnsún fọto he ma yọ́n enẹ sẹ̀ do? (Howh. 19:11; Efe. 4:32) Mí gán súnsún nujijọ he whenu yisenọ hatọ de ṣì nude wà sẹ̀, na mí nọ flin ojlẹ dagbe susu he mí zan dopọ hẹ ẹ lẹ wutu. Oflin ojlẹ dagbe enẹlẹ tọn wẹ mí dona nọ hẹn do ayiha mẹ bosọ nọ yọ́n pinpẹn yetọn.

NUHEWUTU MÍ DO DÓ HUDO OWANYI TỌN TITENGBE TO EGBEHE

18. Nuagokun titengbe tẹlẹ wẹ mí gbadopọnna gando owanyi go to hosọ ehe mẹ?

¹⁸ Naegbọn mí nọ jlo na hẹn owanyi he mí do na ode awetọ lodo dogọ? Dile mí ko mọ do, eyin mí do owanyi hia mẹmẹsunnu po mẹmẹyọnnu mítọn lẹ po, mí nọ dohia dọ mí yiwanna Jehovah. Nawẹ mí nọ do owanyi hia yisenọ hatọ mítọn lẹ gbọn? Dopo to aliho he mẹ mí nọ wàmọ te lẹ mẹ wẹ nado nọ miọnhomẹna yé. Gbọnmọ dali, mí na penugo nado “to homẹmiọnna ode awetọ zọnmii,” eyin mí nọ do numọtolanmẹ awuvẹmẹ tọn. Nawẹ mí sọgan hẹn owanyi he mí do na ode awetọ lodo dogọ gbọn? Mí nọ wàmọ gbọn vivẹnudido nado jo nuṣiwa mẹdevo lẹ tọn na yé dali.

19. Naegbọn e do yin nujọnu taun to egbehe nado nọ do owanyi hia ode awetọ?

¹⁹ Naegbọn e do yin nujọnu taun to egbehe nado nọ do owanyi hia ode awetọ? Doayi whẹwhinwhẹ́n he Pita na go dọmọ: “Opodo nulẹpo tọn ko sẹpọ. Enẹwutu, . . . mì tindo owanyi sisosiso na ode awetọ.” (1 Pita 4:7, 8) Dile opodo aihọn ylankan ehe tọn to sisẹpọ hugan gbede pọ́n, etẹwẹ mí gán donukun? Whenue Jesu to hodọ gando hodotọ etọn lẹ go, e dọmọ: “Akọta lẹpo na gbẹwanna mì, na oyín ṣie tọn wutu.” (Mat. 24:9) Nado nọavùnte sọta wangbẹna mọnkọ, mí dona nọ hẹn pọninọ go. Dile mí to mọwà, e ma na pà Satani nado klan mí, na owanyi na kọ̀n mí dopọ pẹkipẹki wutu, yèdọ “gẹdẹ [lọ] he nọ kọ̀n gbẹtọ lẹ dopọ to aliho pipé de mẹ.”—Kol. 3:14; Flp. 2:1, 2.