Be Jehovah Na Na Gblọndo Odẹ̀ Ṣie lẹ Tọn Ya?

1, 2. Naegbọn mí gán lẹndọ Jehovah ma to gblọndo na na odẹ̀ mítọn lẹ?

“NỌ MỌ awuvivi susu to Jehovah mẹ, ewọ nasọ na we ojlo ahun towe mẹ tọn lẹ.” (Salm. 37:4) Opagbe he jiawu nankọ die! Amọ́, be mí dona donukun dọ Jehovah ni nọ na mí nuhe mí biọ lẹ to afọdopolọji wẹ ya? Naegbọn mí gán kàn kanbiọ enẹ sè? Lẹnnupọndo nujijọ he bọdego ehelẹ ji. Mẹmẹyọnnu tlẹnnọ de hodẹ̀ nado yì Wehọmẹ Wẹndagbe-Jlatọ Ahọluduta lọ tọn lẹ tọn. Amọ́, owhe susu lẹ juwayi bọ e ma ko yin oylọ-basina. Mẹmẹsunnu jọja de biọ to Jehovah si nado mọ pọngbọ na awutu sinsinyẹn he jẹ e te de, na e nido sẹ̀n to agun mẹ to gigọ́ mẹ dogọ. Amọ́, awutu etọn ma pọnte. Mẹjitọ Klistiani delẹ hodẹ̀ dọ ovi yetọn ni gbọṣi nugbo lọ mẹ. Amọ́, ovi lọ basi dide nado jo Jehovah sinsẹ̀n do.

² Vlavo hiẹ lọsu ko biọ nude Jehovah, amọ́ bo ma ko mọ ẹn yí. Taidi kọdetọn de, a gán wá tadona lọ kọ̀n dọ Jehovah nọ na gblọndo na odẹ̀ mẹdelẹ tọn, amọ́ e ma nọ wàmọ na emitọn lẹ. Kavi a gán lẹndọ, na emi ko wà nude yindo wutu wẹ. Numọtolanmẹ mọnkọ wẹ mẹmẹyọnnu de he nọ yin Janiceb do. Ewọ po asu etọn po hodẹ̀ gando ojlo yetọn nado sẹ̀n to Bẹtẹli go. E dọmọ: “N’kudeji dọ mí na yì Bẹtẹli to madẹnmẹ.” Amọ́, owhe lẹ juwayi bọ asu po asi po lọ ma yin oylọ-basina. Janice dọmọ: “N’blawu bosọ biọ bẹwlu mẹ. N’kanse dee eyin n’ko wà nude he vẹna Jehovah. N’ko hodẹ̀ susu nado yì Bẹtẹli. Naegbọn e ma do na gblọndo odẹ̀ ṣie tọn?”

3. Etẹlẹ ji wẹ mí na dọhodo to hosọ ehe mẹ?

³ To whedelẹnu, mí gán nọ kanse eyin Jehovah nọ dotoaina odẹ̀ mítọn lẹ. Sunnu nugbonọ he nọgbẹ̀ to hohowhenu delẹ tlẹ kàn kanbiọ mọnkọ sè. (Jobu 30:20; Salm. 22:2; Hab. 1:2) Etẹwẹ gán hẹn we kudeji dọ Jehovah na na gblọndo odẹ̀ towe lẹ tọn? (Salm. 65:2) Nado mọ gblọndo na kanbiọ enẹ, jẹnukọn whẹ́, mí na dín gblọndo kanbiọ he bọdego lẹ tọn: (1) Etẹwẹ mí gán nọ biọ Jehovah? (2) Etẹwẹ Jehovah nọ biọ to mí si? (3) Naegbọn e gán biọ dọ mí ni nọ vọ́ nulẹnpọndo obiọ mítọn delẹ ji?

ETẸWẸ MÍ GÁN NỌ BIỌ JEHOVAH?

4. Sọgbe hẹ Jelemia 29:12, etẹwẹ Jehovah dopà nado wà?

⁴ Jehovah dopà nado nọ dotoaina odẹ̀ mítọn lẹ. (Hia Jelemia 29:12.) Jiwheyẹwhe mítọn yiwanna sinsẹ̀n-basitọ nugbo etọn lẹ, enẹwutu, e ma nọ do tókúkú odẹ̀ yetọn lẹ mẹ gbede. (Salm. 10:17; 37:28) Amọ́, enẹ ma zẹẹmẹdo dọ e na nọ na mí nuhe mí biọ ẹ lẹpo. E gán biọ dọ mí ni nọte kakajẹ aihọn yọyọ lọ mẹ whẹpo do mọ nuhe mí biọ delẹ yí.

5. Etẹ ji wẹ Jehovah nọ lẹnnupọndo whenue e to todoaina odẹ̀ mítọn lẹ? Basi zẹẹmẹ.

⁵ Jehovah nọ lẹnnupọndo lehe obiọ mítọn lẹ tindo kanṣiṣa hẹ lẹndai etọn blebu do ji. (Isa. 55:8, 9) Dopo to nuhe yin ojlo etọn lẹ mẹ wẹ yindọ gbẹtọvi he nọ yí ayajẹ do setonuna ewọ taidi Gandutọ yetọn lẹ kẹdẹ ni gọ́ aigba lọ blebu ji. Amọ́, Satani sọalọakọ́n dọ ninọmẹ gbẹtọvi lẹ tọn na pọnte dogọ eyin yé dugán do yede ji. (Jen. 3:1-5) Nado dohia dọ lalo wẹ Lẹgba do, Jehovah na dotẹnmẹ gbẹtọvi lẹ nado dugán do yedelẹ ji. Amọ́, gandudu gbẹtọvi lẹ tọn wẹ hẹn susu to nuhahun he mí nọ pehẹ to egbehe lẹ mẹ wá. (Yẹwh. 8:9) Mí yọnẹn dọ Jehovah ma na de nuhahun enẹ lẹpo sẹ̀ to afọdopolọji. Eyin e ko wàmọ wẹ, mẹdelẹ gán wá tadona kọ̀n dọ gandudu gbẹtọvi lẹ tọn tindo kọdetọn dagbe nugbo bosọ penugo nado didẹ nuhahun gbẹtọvi lẹ tọn.

6. Naegbọn mí dona kudeji dọ Jehovah na na gblọndo na odẹ̀ mítọn lẹ to aliho he do owanyi po whẹdida dodo po hia mẹ to whepoponu?

⁶ Jehovah gán na gblọndo obiọ dopolọ lẹ tọn to aliho voovo lẹ mẹ. Di apajlẹ, to whenue Ahọlu Hẹzekia to azọ̀njẹ sinsinyẹn, e vẹ̀ Jehovah nado gọalọna ẹn na e nido gọ̀ jẹgangan. Taidi kọdetọn de, Jehovah gbọazọ̀nna ẹn. (2 Ahọ. 20:1-6) To alọ devo mẹ, whenue apọsteli Paulu vẹ̀ Jehovah nado de ‘owùn he to agbasalan etọn mẹ’ de sẹ̀, vlavo nuhahun agbasa tọn de, Jehovah ma wàmọ. (2 Kọl. 12:7-9) Sọ lẹnnupọndo apajlẹ apọsteli Jakọbu po Pita po tọn ji. Yé omẹ awe lẹ wẹ Ahọlu Hẹlọdi jlo na hù. Agun lọ hodẹ̀ do ota Pita tọn mẹ podọ vlavo na Jakọbu lọsu. Amọ́, Jakọbu yin hùhù bọ Pita yin whinwhlẹngán to azọ́njiawu-liho. (Owalọ 12:1-11) Mí gán kanse dọ ‘Naegbọn Jehovah do whlẹn Pita bo ma ka whlẹn Jakọbu?’ Biblu ma dọ.c Nuhe họnwun wẹ yindọ Jehovah “ma nọ dawhẹ agọ̀ gbede.” (Deut. 32:4) Podọ, mí yọnẹn dọ Pita po Jakọbu po tindo nukundagbe Jehovah tọn. (Osọ. 21:14) To whedelẹnu, Jehovah gán nọma na gblọndo odẹ̀ mítọn lẹ tọn dile mí donukun do. Amọ́, na mí deji dọ gblọndo Jehovah tọn na odẹ̀ mítọn lẹ nọ sinai do owanyi po whẹdida dodo po ji wutu, mí ma nọ tindo ayihaawe gando aliho he mẹ e de nado na gblọndo yetọn te go.—Jobu 33:13.

7. Etẹwẹ mí nọ tẹnpọn nado dapana, podọ etẹwutu?

⁷ Mí nọ tẹnpọn ma nado yí ninọmẹ mítọn jlẹdo mẹdevo lẹ tọn go. Di apajlẹ, mí gán biọ to Jehovah si dọ ni gọalọna mí to aliho tangan de mẹ, amọ́ obiọ mítọn ma mọ gblọndo. To nukọn mẹ, mí mọdọ mẹdevo de basi obiọ mọnkọ bọ e taidi dọ Jehovah sè odẹ̀ etọn. Mẹmẹyọnnu de he nọ yin Anna do numimọ mọnkọ. E hodẹ̀ dọ kansẹẹ-zọ̀n ni gbọ̀ na asu etọn Matthew. To ojlẹ dopolọ mẹ, mẹmẹyọnnu mẹhomẹ awe devo lẹ to ahidi hẹ kansẹẹ-zọ̀n ga. Anna hodẹ̀ vẹkuvẹku na Matthew po mẹmẹyọnnu awe lọ lẹ po. Mẹmẹyọnnu lọ lẹ jẹgangan, amọ́ Matthew kú. To tintan whenu, Anna kanse ede eyin mẹmẹyọnnu lọ lẹ jẹgangan na Jehovah wẹ yí nude wà wutu. Podọ eyin mọ wẹ, naegbọn ewọ ma do na gblọndo na odẹ̀ he e hò na asu etọn nido jẹgangan lẹ? Na nugbo tọn, mí ma gán dọ nuhewutu mẹmẹyọnnu lọ lẹ do jẹgangan. Nuhe mí yọnẹn na taun tọn wẹ yindọ Jehovah tindo pọngbọ tẹgbẹ tọn de na awufiẹsa mítọn lẹpo, podọ e do ojlo vẹkuvẹku nado fọ́n họntọn etọn he kú lẹ sọnku.—Jobu 14:15.

8. (a) Sọgbe hẹ Isaia 43:2, nawẹ Jehovah nọ gọalọna mí gbọn? (b) Nawẹ odẹ̀ gán gọalọna mí gbọn whenue mí to jujugbọn whlepọn sinsinyẹn lẹ mẹ? (Pọ́n video lọ Odẹ̀ Gọalọna Mí Nado Doakọnnanu.)

⁸ Jehovah na nọ gọalọna mí to whelẹponu. Taidi Otọ́ owanyinọ mítọn, Jehovah ma nọ yiwanna nado mọ mí to awufiẹsa mẹ. (Isa. 63:9) Etomọṣo, e ma nọ glọnalina whlepọn mítọn lẹpo, ehe gán yin yiyijlẹdo tọ̀sisa lẹ kavi miyọ́n de go. (Hia Isaia 43:2.) Ṣigba na nugbo tọn, e dopà dọ emi na gọalọna mí nado ‘jugbọn’ yé mẹ. Podọ, e ma na dike whlepọn mítọn ni hẹn awugble tẹgbẹ tọn wá mí ji. Jehovah sọ nọ na mí gbigbọ wiwe huhlọnnọ etọn nado gọalọna mí na mí nido doakọnnanu. (Luku 11:13; Flp. 4:13) Taidi kọdetọn de, mí gán kudeji dọ mí na tindo nuhe sin hudo mí do pẹẹ to whelẹponu nado doakọnnanu bosọ hẹn nugbonọ-yinyin mítọn na ewọ go.d

ETẸWẸ JEHOVAH NỌ BIỌ TO MÍ SI?

9. Sọgbe hẹ Jakọbu 1:6, 7, naegbọn mí dona deji dọ Jehovah na gọalọna mí?

⁹ Jehovah nọ donukun dọ mí ni dejido emi go. (Heb. 11:6) To whedelẹnu, whlepọn mítọn lẹ gán taidi nuhe ji mí ma gán dute. Mí tlẹ gán jẹ ayihaawe do ji eyin vlavo Jehovah na gọalọna mí. Amọ́, Biblu hẹn mí deji dọ po huhlọn Jiwheyẹwhe tọn po mí gán “lọ́n dasá adó.” (Salm. 18:29) Enẹwutu, kakati nado joawuna ayihaawe tintindo, mí dona nọ hodẹ̀ bo tindo yise po jidide mlẹnmlẹn po dọ Jehovah na na gblọndo odẹ̀ mítọn lẹ tọn.—Hia Jakọbu 1:6, 7.

10. Na apajlẹ lehe mí dona yinuwa to kọndopọ mẹ hẹ odẹ̀ mítọn lẹ do tọn.

¹⁰ Jehovah nọ donukun dọ mí ni yinuwa sọgbe hẹ odẹ̀ mítọn lẹ. Di apajlẹ, mẹmẹsunnu de gán biọ Jehovah dọ ni gọalọna emi na yè nido na ẹn gbè to azọ́nmẹ nado yì plidopọ daho de. Nawẹ Jehovah gán na gblọndo na odẹ̀ enẹ gbọn? E gán na mẹmẹsunnu lọ adọgbigbo he e do hudo etọn nado biọgbè mẹhe yí i do azọ́nmẹ. Amọ́, mẹmẹsunnu lọ dona gbẹ́ yinuwa sọgbe hẹ odẹ̀ etọn bo biọgbè. E gán biọ dọ ni biọgbè whlasusu. E tlẹ gán dọ po azọ́nwatọgbẹ́ devo po nado diọ azọ́nzan. Podọ, eyin e biọ domọ, e gán dọ dọ yè ni de akuẹ azán he gbè emi ma na wazọ́n lọ tọn sọn azọ́nkuẹ emitọn mẹ.

11. Naegbọn mí dona nọ hodẹ̀ whẹwhẹ gando ahunmẹdunamẹnu mítọn lẹ go?

¹¹ Jehovah nọ donukun dọ mí ni hodẹ̀ whlasusu gando ahunmẹdunamẹnu mítọn lẹ go. (1 Tẹs. 5:17) Jesu dohia dọ obiọ mítọn delẹ ma na mọ gblọndo to afọdopolọji. (Luku 11:9) Enẹwutu, ma hònúpla blo! Nọ hodẹ̀ vẹkuvẹku podọ whlasusu. (Luku 18:1-7) Eyin mí zindonukọn nado nọ hodẹ̀ gando whẹho de go, mí nọ dohia Jehovah dọ obiọ mítọn lẹ duahunmẹna mí. Mí sọ nọ dohia dọ mí do nujikudo lọ dọ ewọ do nugopipe lọ nado gọalọna mí.

NAEGBỌN E GÁN BIỌ DỌ MÍ NI VỌ́ NULẸNPỌN DO OBIỌ MÍTỌN DELẸ JI?

12. (a) Etẹwẹ yin dopo to kanbiọ he mí dona kanse míde gando obiọ mítọn go lẹ mẹ, podọ etẹwutu? (b) Nawẹ mí gán hẹn ẹn diun dọ odẹ̀ mítọn lẹ nọ do sisi hia Jehovah gbọn? (Pọ́n apotin lọ “Be Obiọ Ṣie lẹ Nọ Do Sisi Hia Jehovah Ya?”)

¹² Eyin mí ma mọ gblọndo nuhe mí biọ to odẹ̀ mẹ tọn, mí gán kàn kanbiọ atọ̀n delẹ sè míde. Tintan, kanse dewe dọ ‘Be nuhe sọgbe lọ go wẹ n’to dẹ̀ho gando ya?’ Mí nọ saba lẹndọ mí yọ́n nuhe yọ́n na mí hugan. Amọ́, nuhe go mí hodẹ̀ gando gán nọma yin nuhe na wà dagbe na mí hugan. Eyin mí to dẹ̀ho gando nuhahun de go, pọngbọ dagbe hugan devo gán tin gbọnvona dehe mí to bibiọ. Podọ, nuhe mí nọ biọ delẹ gán nọma sọgbe hẹ ojlo Jehovah tọn. (1 Joh. 5:14) Di dohia, lẹnnupọndo apajlẹ mẹjitọ he yin nùdego wayi lẹ tọn ji. Yé biọ to Jehovah si dọ ni hẹn ovi yetọn do nugbo lọ mẹ. Ehe taidi obiọ he sọgbe de. Amọ́, Jehovah ma na hẹn mẹde gbọ́gúngún-kangúngún nado sẹ̀n ewọ. E nọ jlo dọ mímẹpo, kakajẹ ovi mítọn lẹ ji ni basi dide nado sẹ̀n emi. (Deut. 10:12, 13; 30:19, 20) Enẹwutu, mẹjitọ lọ lẹ gán ko biọ dọ Jehovah ni gọalọna yé nado jẹ ahun ovi yetọn tọn mẹ, na ewọ nido yin whinwhàn nado yiwanna Jehovah bo lẹzun họntọn Etọn.—Howh. 22:6; Efe. 6:4.

13. Sọgbe hẹ Heblu lẹ 4:16, whetẹnu wẹ Jehovah na gọalọna mí? Basi zẹẹmẹ.

¹³ Kanbiọ awetọ wẹ, ‘Be ojlẹ ko sọ̀ na Jehovah nado na gblọndo na obiọ ṣie ya?’ Mí gán lẹndọ mí do hudo gblọndo niyaniya tọn na odẹ̀ mítọn lẹ. Amọ́ na nugbo tọn, Jehovah yọ́n ojlẹ dagbe hugan lọ nado gọalọna mí. (Hia Heblu lẹ 4:16.) Eyin mí ma mọ nuhe mí biọ yí to afọdopolọji, mí gán lẹndọ gblọndo Jehovah tọn na odẹ̀ mítọn wẹ yin ‘Lala.’ Amọ́ na nugbo tọn, e gán yindọ ‘E ma ko yá’ dọ wẹ e te. Di apajlẹ, lẹnnupọndo mẹmẹsunnu jọja he go mí donù wayi he hodẹ̀ nado jẹgangan sọn awutu de si lọ ji. Eyin Jehovah ko gbọazọ̀nna ẹn to azọ́njiawu-liho wẹ, Satani gán ko dọ dọ mẹmẹsunnu lọ zindonukọn nado to Jehovah sẹ̀n kiki na azọ̀n etọn yin hinhẹngbọ wutu. (Jobu 1:9-11; 2:4) Humọ, Jehovah ko de ojlẹ de dovo nado hẹn azọ̀n lẹpo gbọ̀. (Isa. 33:24; Osọ. 21:3, 4) Podọ kakajẹ whenẹnu, mí ma gán donukun azọ̀nhẹngbọ to azọ́njiawu-liho. Enẹwutu, mẹmẹsunnu lọ gán ko biọ to Jehovah si nado na ẹn huhlọn gọna jijọho ahun mẹ tọn nado doakọnna awutu etọn bosọ zindonukọn nado to Jiwheyẹwhe sẹ̀n po nugbonọ-yinyin po.—Salm. 29:11.

14. Etẹwẹ a plọn sọn numimọ Janice tọn mẹ?

¹⁴ Flin apajlẹ Janice tọn, mẹhe hodẹ̀ nado sẹ̀n to Bẹtẹli. Owhe atọ́n juwayi whẹpo e do mọnukunnujẹ lehe Jehovah na gblọndo na odẹ̀ etọn do mẹ. E dọmọ: “Jehovah yí ojlẹ enẹ zan nado plọnnu mi, podọ nado gọalọna mi nado lẹzun Klistiani he pọnte de. N’dona hẹn jidide ṣie to ewọ mẹ sinyẹn deji. N’dona hẹn aṣa oplọn mẹdetiti tọn ṣie pọnte dogọ. Podọ, n’dona yọnẹn dọ n’gán do ayajẹ, mahopọnna fidepope he n’to Jehovah sẹ̀n te.” To nukọn mẹ, Janice po asu etọn po yin oylọ-basina nado sẹ̀n to azọ́n lẹdo tọn mẹ. To whenue Janice flin nuhe jọ wayi lẹ, e dọmọ: “Jehovah ko na gblọndo na odẹ̀ ṣie lẹ, amọ́ e ma yin to aliho he mẹ n’donukun te. E yí whenu to asi e nado doayi gblọndo dagbe etọn go, amọ́ n’yọ́n pinpẹn etọn taun dọ n’tindo numimọ owanyi po homẹdagbe etọn po tọn.”

15. Naegbọn e gán biọ dọ mí ni nọ diọalọ to odẹ̀ mítọn lẹ mẹ? (Sọ pọ́n yẹdide lọ lẹ.)

¹⁵ Kanbiọ atọ̀ntọ lọ wẹ yindọ, ‘Be n’dona hodẹ̀ gando nudevo go wẹ ya?’ Dile etlẹ yindọ e sọgbe nado to tlọlọ to odẹ̀ mítọn lẹ mẹ, mí gán penugo bo doayi ojlo Jehovah tọn na mí go eyin mí nọ diọalọ to odẹ̀ mítọn lẹ mẹ. Lẹnnupọndo apajlẹ mẹmẹyọnnu tlẹnnọ he ko to dẹ̀ho gando Wehọmẹ Wẹndagbe-Jlatọ Ahọluduta lọ tọn lẹ tọn yìyì go lọ ji. E jlo na yì Wehọmẹ lọ nado sẹ̀n to fie nuhudo sù te. Enẹwutu, dile e zindonukọn nado to dẹ̀ho nado yin oylọ-basina sọyi wehọmẹ lọ, e gán sọ biọ dọ Jehovah ni gọalọna ẹn nado doayi dotẹnmẹ hundote devo lẹ go nado gbloada na lizọnyizọn etọn. (Owalọ 16:9, 10) Enẹgodo, e gán yinuwa to kọndopọ mẹ hẹ odẹ̀ enẹ, bo kanhose nugopọntọ lẹdo tọn etọn nado yọnẹn eyin nuhudo gbehosọnalitọ tọn tin to agun he to yakẹ de mẹ. Kavi, e gán kanwehlan wekantẹn alahọ tọn de nado kanse fie nuhudo wẹnlatọ Ahọluduta lọ tọn tin te.e

16. Nujikudo tẹwẹ mí gán do?

¹⁶ Dile mí ko mọ do, mí gán kudeji dọ Jehovah na na gblọndo odẹ̀ mítọn lẹ tọn to aliho he do owanyi po whẹdida dodo po hia de mẹ. (Salm. 4:3; Isa. 30:18) To whedelẹnu, mí gán nọma mọ gblọndo he mí donukun. Amọ́, Jehovah ma na do tókúkú odẹ̀ mítọn lẹ mẹ pọ́n gbede. Ewọ yiwanna mí sisosiso. Podọ e ma na gbẹ́ mí dai gbede. (Salm. 9:10) Enẹwutu, zindonukọn nado nọ “dejido ewọ go to whepoponu” bo nọ dọ nuhe to ahun ji na we lẹpo na ẹn to odẹ̀ mẹ.—Salm. 62:8.