Be A Yọnẹn Ya?

Tẹnsẹnamẹnu wunmẹ tẹ mẹ wẹ ojọ̀ Etiopianu lọ te to whenue Filipi dọnsẹpọ ẹ?

HOGBE dowhenu tọn lọ he yin lilẹdo “osọ́-kẹkẹ” to Lẹdogbedevomẹ Aihọn Yọyọ Tọn mẹ gán dlẹnalọdo tẹnsẹnamẹnu voovo lẹ. (Owalọ 8:28, 29, 38) Amọ́, e taidi dọ tẹnsẹnamẹnu he mẹ Etiopianu lọ te klohugan osọ́-kẹkẹ awhàn tọn tata de poun. Lẹnnupọndo nuhewutu mí wá tadona ehe kọ̀n delẹ ji.

Etiopianu lọ yin ahọluzọnwatọ nukundeji de he zingbejizọnlin gaa. E yin “dawe [de] he tindo aṣẹpipa daho to ahọsi Kandasi Etiopianu lọ glọ, he sọ tin to adọkun etọn lẹpo ji.” (Owalọ 8:27) Etiopia hohowhenu tọn bẹ Soudan egbehe tọn po lẹdo he to hùwaji pete Egipti egbezangbe tọn po hẹn. Dile etlẹ yindọ e taidi dọ e ma yin tẹnsẹnamẹnu dopolọ wẹ dawe lọ yizan to gbejizọnlin lọ blebu whenu, e dona ko hẹn agbàn susu na gbejizọnlin gaa lọ. Delẹ to tẹnsẹnamẹnu he mẹlẹ nọ yizan nado bẹ ahisinọ lẹ to owhe kanweko tintan W.M. lẹ mẹ nọ do afọ̀ ẹnẹ. Owe de dọmọ: “Osọ́-kẹkẹ mọnkọ lẹ nọ hẹn agbàn susu, nọ hẹn gbejizọnlin lẹ bọawu dogọ podọ vlavo nọ hẹn ẹn yọnbasi na mẹlẹ nado zingbejizọnlin yì fie dẹn taun lẹ.” (Acts—An Exegetical Commentary)

Etiopianu lọ to wehia whenue Filipi dọnsẹpọ ẹ. Kandai lọ dọ dọ “Filipi họ̀nwezun plá ẹ bo sè bọ [ojọ̀ lọ] to owe yẹwhegán Isaia tọn hia daga.” (Owalọ 8:30) Osọ́-kẹkẹ he yè do nọ basi gbejizọnlin lẹ ma nọ yin awuwlena nado họ̀nwezun. Na osọ́-kẹkẹ ehe ma nọ họ̀nwezun wutu, e zọ́n bọ ojọ̀ lọ tindo dotẹnmẹ nado hiawe, podọ e zọ́n bọ Filipi penugo nado họ̀nwezun plá ẹ.

Etiopianu lọ “vẹ̀ Filipi nado biọ e mẹ bo sinai hẹ ẹ.” (Owalọ 8:31) To paa mẹ, ote wẹ mẹhe to osọ́-kẹkẹ awhàn tọn de kùn lẹ nọ nọ̀. Amọ́ to osọ́-kẹkẹ he nọ basi gbejizọnlin de mẹ, tẹnmẹ na ko tin na ojọ̀ lọ po Filipi po nado sinai.

Sọgbe hẹ kandai gbọdo he to Owalọ lẹ weta 8​tọ mẹ gọna kunnudenu whenuho tọn he tin-to-aimẹ lẹ, to agọe owe mítọn lẹ do ojọ̀ Etiopianu lọ hia dile e to tẹnsẹnamẹnu he klohugan osọ́-kẹkẹ awhàn tọn tata de poun mẹ.