Kanbiọ lẹ sọn Wehiatọ lẹ Dè

Etẹwẹ Biblu dehia gando nugopipe Jehovah tọn nado dọ nuhe na jọ to sọgodo go?

Biblu hẹn ẹn họnwun hezeheze dọ Jehovah gán dọ nuhe na jọ to sọgodo. (Isa. 45:21) E ma na nudọnamẹ gigọ́ lẹpo gando lehe kavi whenue e nọ wàmọ te, kavi etlẹ yin obá he mẹ e nọ de nado yọ́n nuhe na jọ to sọgodo jẹ do go. Enẹwutu, mí ma yọ́n nulẹpo na nuhe dù nugopipe Jehovah tọn nado dọ dọdai gando sọgodo go. Amọ́, onú kleun delẹ tin he mí yọnẹn.

Jehovah ma tindo dogbó depope adavo dehe e zedai na ede lẹ. Na nuyọnẹn etọn ma do dogbó wutu, e gán dọ dọdai gando nudepope he jlo e go. (Lom. 11:33) Amọ́, na e tindo mawazẹjlẹgo pipé de wutu, e sọ sọgan de ma nado yọ́n nuhe na jọ to sọgodo.—Yijlẹdo Isaia 42:14 go.

Jehovah nọ hẹn lẹndai etọn di. Nawẹ enẹ gando nugopipe etọn nado dọ nuhe na jọ to sọgodo go gbọn? Isaia 46:10 basi zẹẹmẹ dọ: “Yẹn ko nọ dọ kọdetọn lọ sọn bẹjẹeji, bosọ nọ dọ nuhe ma ko yin wiwà lẹ sọn whenu dindẹn jẹnukọn. Yẹn dọmọ, ‘Nudide ṣie wẹ na nọte, yẹn nasọ wà nudepope he jlo mi.’”

Enẹwutu, dopo to whẹwhinwhẹ́n he wutu Jehovah gán dọ nuhe na jọ to sọgodo lẹ mẹ wẹ yindọ e tindo nugopipe lọ nado hẹn nulẹ nado jọ. E ma biọ dọ Jehovah ni dindona nuhe na jọ to sọgodo lẹ dile mí nọ pọ́n vivọnu sinima de tọn to whedelẹnu nado yọ́n lehe e fó do. Kakatimọ, Jehovah gán basi dide dọ nude na jọ to ojlẹ tangan de mẹ, podọ enẹgodo e sọgan hẹn nulọ nado jọ whenue ojlẹ sọ.—Eks. 9:5, 6; Mat. 24:36; Owalọ 17:31.

Na whẹwhinwhẹ́n ehe wutu, Biblu yí hogbe delẹ taidi “wleawu” po “lẹn ẹn dai” po zan nado basi zẹẹmẹ nuhe Jehovah nọ wà gando nujijọ sọgodo tọn delẹ go tọn. (2 Ahọ. 19:25; Isa. 46:11) Hogbe ehelẹ yin lẹdogbedevomẹ hogbe dowhenu tọn de tọn he tindo kanṣiṣa hẹ hogbe lọ “zẹ́ndotọ.” (Jel. 18:4) Kẹdẹdile zẹ́ndotọ azọ́nyọnẹntọ de gán lilẹ́ okò zun ozẹ́n whanpẹnọ de do, Jehovah gán yinuwa do nujijọ lẹ ji nado hẹn ojlo etọn di.—Efe. 1:11.

Jehovah nọ na sisi mẹdekannujẹ nudide bibasi tọn mítọn. E ma nọ kàn nude do dopodopo mítọn ji; mọjanwẹ e ma nọ sisẹ́ gbẹtọ ahunjijlọnọ lẹ nado wà nude he na zọ́n bọ yé na yin vivasudo do niyẹn. E nọ dike bọ mẹlẹpo nọ basi nudide yetọn titi, podọ e nọ dotuhomẹna yé nado basi nudide dagbe lọ.

Mì gbọ mí ni lẹnnupọndo apajlẹ awe ehelẹ ji. Apajlẹ tintan lọ gando Ninevenu lẹ go. Jehovah dọ dọdai dọ tòdaho lọ na yin vivasudo, na kanyinylan etọn wutu. Amọ́ whenue tòmẹnu etọn lẹ lẹnvọjọ, Jehovah “diọlinlẹn gando nugbajẹmẹji he e dọ dọ emi na hẹnwa yé ji lọ go bo masọ hẹn ẹn wá” ba. (Jona 3:1-10) Jehovah diọlinlẹn gando dọdai etọn go, na Ninevenu lẹ yí mẹdekannujẹ nudide bibasi tọn yetọn zan bo lẹnvọjọ gando avase he Jehovah na yé lọ go.

Apajlẹ awetọ wẹ dọdai he gando awhàngbatọ de he nọ yin Kilusi go, yèdọ mẹhe na tún Ju lẹ dote sọn kanlinmọgbenu bo degbe dọ tẹmpli Jehovah tọn ni yin vivọgbá. (Isa. 44:26–45:4) Ahọlu Kilusi Pẹlsia tọn hẹn dọdai enẹ di. (Ẹzla 1:1-4) Etomọṣo, Kilusi ma nọ sẹ̀n Jiwheyẹwhe nugbo lọ. Jehovah yí Kilusi zan nado hẹn dọdai etọn di, amọ́ e ma yinuwado mẹdekannujẹ etọn nado de mẹhe e na basi sinsẹ̀n hlan ji.—Howh. 21:1.

Na nugbo tọn, e ma yin adà ehelẹ kẹdẹ wẹ nugopipe Jehovah tọn nado dọ nuhe na jọ to sọgodo nọ bẹhẹn gba. Na taun tọn, gbẹtọvi depope ma gán mọnukunnujẹ aliho Jehovah tọn lẹ mẹ to gigọ́ mẹ. (Isa. 55:8, 9) Etomọṣo, nuhe Jehovah ko dọ dọdai etọn lẹ nọ hẹn yise mítọn lodo dọ ewọ nọ wà nuhe sọgbe to whelẹponu, etlẹ yin to whenue e to dọdai dọ gando sọgodo go.