Lehe Agun lọ Nọ Do Pọndohlan Jehovah Tọn Gando Ylanwatọ lẹ Go Hia Do

1. Etẹwẹ Jehovah jlo na gbẹtọvi lẹpo?

JEHOVAH dá gbẹtọvi lẹ po mẹdekannujẹ nudide bibasi tọn po. A nọ saba yí nunina ehe zan whenue a to nudide lẹ basi. Nudide titengbe hugan he mẹde gán basi wẹ nudide lọ nado klan ede do wiwe na Jehovah bo lẹzun hagbẹ whẹndo he bẹ sinsẹ̀n-basitọ Etọn lẹ hẹn tọn. Jehovah jlo dọ mẹlẹpo ni wàmọ. Etẹwutu? Na e yiwanna gbẹtọvi lẹ bo nọ jlo nudagbe hugan lẹ na yé wutu. E jlo dọ yé ni jihọntọn hẹ emi bo nọgbẹ̀ kakadoi.—Deut. 30:19, 20; Gal. 6:7, 8.

2. Numọtolanmẹ tẹwẹ Jehovah nọ tindo gando ylanwatọ he ma lẹnvọjọ lẹ go? (1 Johanu 2:1)

² Amọ́, Jehovah ma nọ hẹn mẹde gánnugánnu nado sẹ̀n ewọ. E nọ na dotẹnmẹ mẹdopodopo nado basi dide nuhe e na wà tọn. Etẹwẹ lo, eyin Klistiani de he ko yí baptẹm gbà osẹ́n Jiwheyẹwhe tọn bo waylando sinsinyẹn de? Eyin e ma lẹnvọjọ, e dona yin didesẹ sọn agun mẹ. (1 Kọl. 5:13) Amọ́, etlẹ yin to whenẹnu, Jehovah nọ yí jejejininọ do donukun dọ ylanwatọ lọ na lẹkọwa Emi dè. Na nugbo tọn whẹwhinwhẹ́n titengbe de niyẹn he wutu e wleawuna ofligọ lọ, enẹ wẹ nado hẹn jonamẹ yọnbasi na ylandonọ he lẹnvọjọ lẹ. (Hia 1 Johanu 2:1.) Jiwheyẹwhe owanyinọ mítọn nọ yí zohunhun do basi oylọna ylandonọ lẹ bo nọ dotuhomẹna yé nado lẹnvọjọ.—Zek. 1:3; Lom. 2:4; Jak. 4:8.

3. Etẹ ji wẹ mí na dọhodo to hosọ ehe mẹ?

³ Jehovah nọ jlo dọ mí ni wleawuna pọndohlan emitọn nkọ gando ylanwiwa po ylanwatọ lẹ po go. Hosọ ehe na dọhodo lehe mí gán wàmọ do ji. Dile a to hosọ ehe hia, pọ́n (1) lehe whẹho ylanwiwa sinsinyẹn tọn de yin nukunpedego do to agun Kọlinti tọn mẹ to owhe kanweko tintan whenu, (2) anademẹ he apọsteli Paulu na whenue ylanwatọ de lẹnvọjọ, podọ (3) nuhe kandai Biblu tọn ehe dehia gando pọndohlan Jehovah tọn go na nuhe dù Klistiani he jai jẹ ylando sinsinyẹn mẹ lẹ.

LEHE YLANWIWA SINSINYẸN DE YIN NUKUNPEDEGO DO TO OWHE KANWEKO TINTAN WHENU

4. Ninọmẹ tẹwẹ fọ́n to agun owhe kanweko tintan whenu tọn Kọlinti tọn mẹ? (1 Kọlintinu lẹ 5:1, 2)

⁴ Hia 1 Kọlintinu lẹ 5:1, 2. To gbejizọnlin mẹdehlan tọn atọ̀ntọ Paulu tọn whenu, e sè linlin he dotuklamẹ de gando agun he ṣẹṣẹ yin didoai to Kọlinti lọ go. Mẹmẹsunnu de to agun enẹ mẹ to kọndopọ zanhẹmẹ tọn tindo hẹ asi otọ́ etọn tọn. Walọyizan mọnkọ hẹnmẹ jọsi bo “ma tlẹ tin to akọta lẹ ṣẹnṣẹn”! E ma yindọ agun lọ miọnnukundo walọyizan etọn kẹdẹ wẹ gba, amọ́ e gán ko sọ mọdọ e ma ylan. Vlavo mẹdelẹ lẹndọ aliho de niyẹn nado do lehe Jiwheyẹwhe yin lẹblanunọ bosọ nọ mọnukunnujẹ gbẹtọvi mapenọ lẹ mẹ do hia. Amọ́, Jehovah ma nọ nọgodona ylanwiwa to omẹ etọn lẹ ṣẹnṣẹn. Matin ayihaawe, walọ gblezọn dawe lọ tọn hẹn yinkọ dagbe agun lọ tọn gble. E gán ko sọ to nuyiwa do Klistiani devo he nọ dogbẹ́ hẹ ẹ lẹ ji. Enẹwutu, etẹwẹ Paulu degbena agun lọ nado wà?

5. Etẹwẹ Paulu dọna agun lọ nado wà, podọ etẹ na dọ wẹ e te? (1 Kọlintinu lẹ 5:13) (Sọ pọ́n yẹdide lọ.)

⁵ Hia 1 Kọlintinu lẹ 5:13. To gbọdo glọ, Paulu kàn wekanhlanmẹ de bo na anademẹ dọ ylanwatọ lọ ni yin didesẹ sọn agun mẹ. Nawẹ Klistiani nugbonọ lẹ dona yinuwa hẹ ẹ gbọn? Paulu dọna yé “ma nado dogbẹ́” hẹ ẹ. Etẹwẹ enẹ zẹẹmẹdo? Paulu basi zẹẹmẹ dọ gbedide ehe biọ dọ yé ni ma “tlẹ dùnú hẹ omẹ mọnkọtọn blo.” (1 Kọl. 5:11) Aisinsin nado dùnú hẹ mẹde gán zọ́n bọ haṣinṣan he mí tindo hẹ ẹ na yinukọn po awubibọ po. Enẹwutu, e họnwun dọ nuhe dọ Paulu te wẹ yindọ agun lọ ma dona dogbẹ́ hẹ dawe enẹ. Ehe na zọ́n bọ nuyiwadomẹji ylankan etọn ma na bẹpla agun lọ. (1 Kọl. 5:5-7) Humọ, eyin yé dapana gbẹdido pẹkipẹki hẹ ẹ, enẹ gán zọ́n bọ e na mọ obá he mẹ e ko danbú sọn Jehovah dè jẹ, podọ nuhe e wà gán vẹna ẹn bọ e na yin whinwhàn nado lẹnvọjọ.

6. Nuyiwadomẹji tẹwẹ wekanhlanmẹ Paulu tọn tindo do agun lọ po ylanwatọ lọ po ji?

⁶ To whenue Paulu ko do wekanhlanmẹ etọn hlan Klistiani he to Kọlinti lẹ godo, e jẹ nuhà ji gando lehe agun lọ na yinuwa do go. To godo mẹ, Titu hẹn wẹndagbe de wá na ẹn. Agun lọ yinuwa to aliho dagbe mẹ gando wekanhlanmẹ Paulu tọn go. (2 Kọl. 7:6, 7) Yé hodo anademẹ etọn lẹ. Humọ, ojlẹ vude to whenue Paulu ko do wekanhlanmẹ etọn hlan godo, ylanwatọ lọ ko lẹnvọjọ sọn ylando etọn mẹ! E ko diọ walọyizan etọn po pọndohlan etọn po bo ko jẹ nujinọtedo dodo tọn Jehovah tọn lẹ hodo ji. (2 Kọl. 7:8-11) Todin, etẹwẹ Paulu na na anademẹ agun lọ nado wà?

LEHE AGUN LỌ DONA YINUWA HẸ YLANWATỌ HE LẸNVỌJỌ LỌ DO

7. Kọdetọn dagbe tẹwẹ ylanwatọ lọ didesẹ sọn agun mẹ hẹnwa? (2 Kọlintinu lẹ 2:5-8)

⁷ Hia 2 Kọlintinu lẹ 2:5-8. Paulu dọ dọ “wọhẹ he yin nina gbọn suhugan mìtọn dali . . . ko pé na dawe mọnkọtọn.” To hogbe devo mẹ, mẹplọnlọ lọ ko jẹ yanwle etọn kọ̀n. Yanwle tẹ? Nado plan ẹn jẹ lẹnvọjọ kọ̀n.—Heb. 12:11.

8. Etẹwẹ Paulu dọ bọdego dọ agun lọ ni wà?

⁸ Enẹwutu, Paulu degbena agun lọ dọmọ: ‘Mì jona’ mẹmẹsunnu he danbú lọ “sọn ojlo mẹ wá bo miọnhomẹna ẹn” bosọ “hẹn ẹn deji dọ mì yiwanna ẹn.” Doayi e go dọ Paulu jlo dọ agun lọ ni wà nususu hú dotẹnmẹ nina dawe lọ nado lẹkọwa omẹ Jehovah tọn lẹ ṣẹnṣẹn poun. E jlo dọ yé ni hẹn dawe he lẹnvọjọ lọ kudeji to ohó, nuyiwa po walọyizan yetọn lẹ po mẹ dọ yé ko jona ẹn nugbonugbo bosọ yiwanna ẹn. Gbọnmọ dali, yé na hẹn ẹn họnwun dọ homẹ yetọn hùn dọ e lẹkọwa agun lọ mẹ.

9. Naegbọn mẹdelẹ gán ko whleawu nado jona ylanwatọ he lẹnvọjọ lọ?

⁹ Be mẹdelẹ to agun lọ mẹ whleawu nado kẹalọyi ylanwatọ he lẹnvọjọ lọ do ṣẹnṣẹn yetọn wẹ ya? Kandai lọ ma dọna mí, amọ́ e yọnbasi. To popolẹpo mẹ, nuyiwa etọn lẹ hẹn tukla wá agun lọ blebu mẹ podọ vlavo dowinyan mẹdelẹ ga. Mẹdelẹ gán mọdọ e ma sọgbe dọ yè ni yí zohunhun do kẹalọyi dawe lọ taidi mẹmẹsunnu de, to whenuena e yindọ yewlẹ ko vánkan nado hẹn wiwejininọ go to walọyizan-liho. (Yijlẹdo Luku 15:28-30 go.) Amọ́, naegbọn e do yin nujọnu dọ agun lọ ni do owanyi nujọnu tọn hia mẹmẹsunnu yetọn he lẹkọwa lọ?

10, 11. Etẹwẹ gán jọ eyin mẹho lẹ gbẹ́ nado jona ylanwatọ he lẹnvọjọ lọ?

¹⁰ Yí nukun homẹ tọn do pọ́n nuhe gán jọ eyin mẹho lẹ ma dike dawe he lẹnvọjọ nugbonugbo lọ ni lẹkọwa agun lọ mẹ, kavi eyin agun lọ gbẹ́ nado do owanyi hia ẹ to whenue e lẹkọ godo. E gán “tlọ biọ awubla zẹjlẹgo mẹ.” E gán mọdọ wagbọn-de-matin na emi. E tlẹ gán hònúpla, na nuhe dù vivẹnudido etọn lẹ nado jla haṣinṣan etọn hẹ Jiwheyẹwhe do.

¹¹ Dehe tlẹ sọ ylan hugan wẹ yindọ, eyin mẹmẹsunnu po mẹmẹyọnnu he to agun lọ mẹ lẹ po gbẹ́ nado jona ylanwatọ he lẹnvọjọ lọ, yé na ze haṣinṣan yedetiti tọn hẹ Jehovah do owù mẹ. Etẹwutu? Na yé na do pọndohlan kanyinylan po lẹblanu matindo po tọn Satani tọn hia, bo ma na hodo apajlẹ lehe Jehovah nọ jona ylanwatọ he lẹnvọjọ lẹ do tọn. Na nugbo tọn, yé na lẹzun nuyizan lẹ he Lẹgba gán yí do hù gbigbọnọ-yinyin dawe lọ tọn sudo.—2 Kọl. 2:10, 11; Efe. 4:27.

12. Nawẹ agun lọ gán hodo apajlẹ Jehovah tọn gbọn?

¹² Eyin mọ wẹ, nawẹ agun he to Kọlinti lọ gán hodo apajlẹ Jehovah tọn bọ e ma yin Satani tọn gbọn? Yé gán wàmọ eyin yé hodo aliho he mẹ Jehovah nọ yinuwa hẹ ylanwatọ he lẹnvọjọ lẹ te. Pọ́n nuhe Biblu-kantọ delẹ dọ gando Jehovah go. Davidi dọ, ewọ “yọ́n bo nọ wleawu nado jonamẹ.” (Salm. 86:5) Mika wlan dọmọ: “Jiwheyẹwhe tẹwẹ taidi hiẹ, he nọ jo nuṣiwa namẹ bo ma nọ flin sẹ́nhẹngba?” (Mika 7:18) Podọ Isaia dọmọ: “Mì gbọ mẹylankan ni jo aliho etọn do podọ kanylantọ ni jo linlẹn etọn lẹ do; mì gbọ ewọ ni lẹkọwa Jehovah, mẹhe na do lẹblanu hia ẹ lọ dè, yèdọ wá Jiwheyẹwhe mítọn dè, na ewọ na jonamẹ to gigọ́ mẹ.”—Isa. 55:7.

13. Naegbọn e do sọgbe nado gọ̀ ylanwatọ he lẹnvọjọ lọ yí? (Pọ́n apotin lọ “Whetẹnu Wẹ Dawe He to Kọlinti lọ Yin Gigọyí?”)

¹³ Nado hodo apajlẹ Jehovah tọn, agun he to Kọlinti lọ dona kẹalọyi dawe he lẹnvọjọ lọ bo hẹn ẹn deji dọ yé yiwanna ẹn. Whenue agun lọ hodo anademẹ Paulu tọn nado kẹalọyi ylanwatọ he lẹnvọjọ lọ, yé dohia dọ emi “nọ setonu to nulẹpo mẹ.” (2 Kọl. 2:9) Nugbo wẹ dọ osun delẹ poun janwẹ juwayi sọn whenue e yin didesẹ, amọ́ mẹplọnlọ lọ ko plan ẹn jẹ lẹnvọjọ kọ̀n po kọdetọn dagbe po. Enẹwutu, e ma yin dandan dọ mẹho lẹ nisọ dọngbàn whẹpo do gọ̀ ẹ yí do agun mẹ.

NỌ DO WHẸDIDA DODO PO LẸBLANU JEHOVAH TỌN PO HIA

14, 15. Etẹwẹ mí plọn sọn aliho he mẹ whẹho he fọ́n to Kọlinti hohowhenu tọn lọ yin nukunpedego te mẹ? (2 Pita 3:9) (Sọ pọ́n yẹdide lọ.)

¹⁴ Kandai aliho he mẹ whẹho Kọlinti hohowhenu tọn lọ yin nukunpedego te tọn yin awuwlena bosọ yin hihọ́ basina “na oplọn mítọn.” (Lom. 15:4) Kandai ehe plọn mí dọ Jehovah ma nọ miọnnukundo ylanwiwa sinsinyẹn to omẹ etọn lẹ ṣẹnṣẹn. E ma nọ kẹalọyi pọndohlan lọ dọ yè ni “gbọn lẹblanu dali” jo ylanwatọ he ma lẹnvọjọ lẹ do nado to gbẹdo hẹ sinsẹ̀n-basitọ nugbonọ etọn lẹ. Lẹblanunọ wẹ Jehovah, amọ́ e ma nọ joalọdokọjinamẹ; mọ e ma nọ dekanpona nujinọtedo etọn lẹ. (Juda 4) Na nugbo tọn, mọwiwà ma na yin dohia lẹblanu tọn to aliho depope mẹ, na e na bẹpla agun lọ blebu.—Howh. 13:20; 1 Kọl. 15:33.

¹⁵ Etomọṣo, mí plọn dọ Jehovah ma jlo dọ mẹdepope ni yin vivasudo. Ojlo etọn wẹ nado whlẹn gbẹtọ lẹ gán whedepopenu he e yọnbasi. E nọ do lẹblanu hia mẹhe diọ sọn ahun mẹ bo jlo na jla haṣinṣan yetọn hẹ ewọ do lẹ. (Ezek. 33:11; hia 2 Pita 3:9.) Enẹwutu, whenue dawe he to Kọlinti lọ lẹnvọjọ bo diọ sọn ali ylankan etọn ji, Jehovah yí Paulu zan nado dọna agun lọ dọ yé dona jona ẹn bo gọ̀ ẹ yí.

16. Etẹwẹ yin numọtolanmẹ towe gando lehe whẹho he fọ́n to Kọlinti lọ yin nukunpedego do go?

¹⁶ Dogbigbapọnna aliho he mẹ whẹho he fọ́n to Kọlinti lọ yin nukunpedego te gọalọna mí nado mọ lehe Jehovah nọ do owanyi, dodowiwa po whẹdida dodo po hia do. (Salm. 33:5) Be enẹ ma whàn we nado pà Jiwheyẹwhe mítọn dogọ ya? To popolẹpo mẹ, mímẹpo wẹ yin ylandonọ bo do hudo jonamẹ etọn tọn. Dopodopo mítọn wẹ dona dopẹna Jehovah na ofligọ lọ, he hẹn jonamẹ yọnbasi. Lehe e nọ miọnhomẹnamẹ bosọ vọ́ jidenamẹ do sọ nado yọnẹn dọ Jehovah yiwanna omẹ etọn lẹ nugbonugbo bo nọ jlo dagbe hugan lọ na yé!

17. Etẹlẹ ji wẹ mí na dọhodo to hosọ he bọdego lẹ mẹ?

¹⁷ Bọ nawẹ whẹho ylanwiwa tọn lẹ dona yin nukunpedego do to egbehe? Nawẹ mẹho agun tọn lẹ gán wleawuna ojlo Jehovah tọn nkọ nado deanana ylanwatọ de jẹ lẹnvọjọ kọ̀n gbọn? Nawẹ agun lọ dona yinuwa gbọn whenue mẹho lẹ basi dide nado de mẹde sẹ̀ sọn agun mẹ kavi gọ̀ ẹ yí? Mí na dọhodo kanbiọ ehelẹ ji to hosọ he bọdego lẹ mẹ.