Kanbiọ lẹ sọn Wehiatọ lẹ Dè

Whenue Jesu do Tenu-Núdùdù Oklunọ tọn ai, fie wẹ devi 70 he e dohlan wayi nado yì dọyẹwheho lẹ te? Be yé ko gbẹ́ ewọ dai wẹ ya?

Mí ma dona lẹn poun dọ na devi 70 lọ lẹ ma to otẹn lọ mẹ whenue Jesu do Tenu-Núdùdù Oklunọ tọn ai wutu, yé ma pegan ba kavi ko gbẹ́ ewọ dai. Jesu jlo na nọpọ́ hẹ apọsteli etọn lẹ to nujijọ ehe whenu poun wẹ.

Apọsteli 12 lẹ gọna devi 70 lọ lẹpo wẹ do nukundagbe Jesu tọn. Jẹnukọn whẹ́, Jesu de sunnu 12 delẹ to devi susu he e tindo lẹ mẹ bo ylọ yé dọ apọsteli lẹ. (Luku 6:12-16) Galili wẹ e te whenue “e ylọ Omẹ Wiawe lẹ” podọ e “do yé hlan nado dọyẹwheho Ahọluduta Jiwheyẹwhe tọn podọ nado hẹnazọ̀ngbọ.” (Luku 9:1-6) To nukọn mẹ, whenue Jesu lẹkọwa Jude, e “de omẹ 70 devo lẹ bo do yé hlan awe-awe.” (Luku 9:51; 10:1) Gbọnmọ dali, Jesu tindo hodotọ lẹ to lẹdo voovo he mẹ owẹ̀n etọn to yinyin lilá te lẹ.

Ju he lẹzun devi Jesu tọn lẹ na gbẹ́ nọ dù Hùnwhẹ Juwayi tọn he nọ yin bibasi to whemẹwhemẹ vlavo to pọmẹ hẹ whẹndo yetọn lẹ. (Eks. 12:6-11, 17-20) Dile ojlẹ he mẹ Jesu na kú te to dindọnsẹpọ, ewọ po apọsteli etọn lẹ po yì Jelusalẹm. Amọ́ e ma basi oylọna devi etọn lẹpo nado wá Hùnwhẹ Juwayi tọn daho de tẹnmẹ, yèdọ sọn Jude, Galili po Pelea po. E họnwun dọ Jesu jlo nado topọ hẹ apọsteli etọn lẹ to nujijọ ehe whenu. E dọna yé dọmọ: “E jlo mi taun nado dù Juwayi ehe hẹ mì whẹpo yẹn nido jiya.”—Luku 22:15.

Owhẹ̀ etọn whẹ́n nado wàmọ. To ojlẹ kleun de godo, Jesu na kú taidi “Lẹngbọvu Jiwheyẹwhe tọn lọ he ze ylando aihọn tọn yì!” (Joh. 1:29) Enẹ na jọ to Jelusalẹm, yèdọ fie avọ́sinsan nọ yin bibasi na Jiwheyẹwhe te sọn ojlẹ dindẹn lẹ die. Okú Jesu tọn na hẹn tundote he klohugan de wá yijlẹdo dehe wá aimẹ gbọn lẹngbọvu he whẹndo Islaelivi lẹ tọn dù to ozán he mẹ yé tọ́n sọn Egipti te lọ gblamẹ go. (1 Kọl. 5:7, 8) Nuhe Jesu wà na hùn dotẹnmẹ dote na Omẹ Wiawe lẹ nado lẹzun apadewhe dodonu agun Klistiani tọn lọ tọn. (Efe. 2:20-22) E jẹna ayidego dọ tòdaho wiwe lọ Jelusalẹm tindo “zannu dodonu tọn 12,” ehe ji “oyín 12 apọsteli 12 Lẹngbọvu lọ tọn lẹ tọn” yin kinkan do. (Osọ. 21:10-14) Na nugbo tọn, apọsteli nugbonọ lẹ na yí adà titengbe de wà to hẹndi lẹndai Jiwheyẹwhe tọn mẹ. Enẹwutu, e sọgbe hẹ lẹnpọn dagbe dọ Jesu jlo dọ yé ni nọpọ́ hẹ emi to Juwayi godo tọn lọ whenu, podọ to nujijọ he bọdego tlolo lọ whenu ga, enẹ wẹ Tenu-Núdùdù Oklunọ tọn.

Omẹ 70 lẹ po devi devo lẹ po ma topọ hẹ Jesu to núdùdù enẹ whenu. Etomọṣo, devi he hẹn nugbonọ-yinyin yetọn go lẹpo wẹ na mọaleyi sọn nuhe Jesu doai lọ mẹ, enẹ wẹ Tenu-Núdùdù Oklunọ tọn. Mẹhe na wá lẹzun Klistiani yiamisisadode to nukọn mẹ lẹpo wẹ na biọ alẹnu ahọluduta lọ tọn mẹ, ehe go Jesu donù na apọsteli etọn lẹ to ozán enẹ mẹ.—Luku 22:29, 30.