Lehe Awhàn po Nudindọn Danuwiwa Tọn lẹ po Nọ Yinuwado Mímẹpo Ji Do
“Sọn Wẹkẹ-Whàn Awetọ whenu, nudindọn he nọ bẹ danuwiwa hẹn lẹ ko jideji taun to aihọn lọ mẹ, podọ gbẹtọ liva 2, enẹ wẹ mado ẹnẹ gbẹtọvi lẹ tọn, wẹ nọ nọ̀ fihe nudindọn mọnkọ lẹ ko wá aimẹ te.”
Nuhe Amina J. Mohammed, Mẹhe Bọdo Wekantọ Daho ONU Tọn Go dọ niyẹn to 26 janvier 2023.
Awhàn po nudindọn he nọ bẹ danuwiwa hẹn lẹ po gán gbajẹgbonu to fihe jijọho tlẹ tin te to alọnu lẹ. Mẹhe tlẹ to fihe dẹn do lẹdo he mẹ awhàn to yìyì te de gán jiya, na kanṣiṣa he to otò voovo aihọn lọ tọn lẹ ṣẹnṣẹn ko sinyẹn hugan gbede pọ́n tọn wutu. Podọ awugble he awhàn nọ hẹnwa lẹ gbẹ́ nọ gbọṣi aimẹ na ojlẹ dindẹn to awhàn lọ godo. Pọ́n apajlẹ delẹ:
Núdùdù Whèdomẹ. “Awhàn wẹ nọ hẹn huvẹ wá hugan, podọ 70 to kanweko ji mẹhe to huvẹ to aihọn lọ mẹ lẹ tọn wẹ nọ nọ̀ lẹdo he mẹ awhàn po danuwiwa po wá aimẹ te lẹ.” (Programme alimentaire mondial.)
Nuhahun apọ̀nmẹ tọn po agbasa tọn lẹ po. Obu he awhàn po ayimajai po nọ hẹnwa lẹ gán zọ́n bọ mẹlẹ na do lẹnpọn bosọ jẹ nuhà ji. Gbọnvona dọ mẹhe nọ nọ̀ fihe awhàn to núgbà te lẹ gán jiya to agbasa-liho, yé sọ nọ do nuhahun apọ̀nmẹ tọn lẹ ga. Ṣogan, yé ma nọ saba mọ nukunpedomẹgo dotowhé tọn yí dile e jẹ do.
Tẹnsisẹ Gánnugánnu. To septembre 2023, gbẹtọ livi 114 linlán lẹdo aihọn pé wẹ to dandannu glọ nado họ̀n bo jo owhé yetọn lẹ do. (Haut Commissaire des Nations unies pour les réfugiés) Awhàn po nudindọn he nọ bẹ danuwiwa hẹn lẹ po wẹ yin adọ̀ nuhahun sinsinyẹn ehe tọn.
Nuhahun akuẹzinzan tọn. Mẹlẹ nọ saba pehẹ nuhahun akuẹzinzan tọn he awhàn nọ hẹnwa lẹ, taidi ahivivẹ nulẹ tọn. Yé gán jiya to whenue akuẹ otò lọ tọn he dona yin yiyizan nado penukundo whẹho agbasalilo tọn po wepinplọn po tọn lẹ go wá yin yiyizan nado nọgodona awhàn. Humọ, akuẹ he e nọ biọ nado vọ́ nuhe awhàn ko hẹngble lẹ jlado nọ sù taun.
Nuhahun lẹdo tọn lẹ. Mẹlẹ nọ jiya eyin adọkunnu jọwamọ tọn he go yé nọ ganjẹ lẹ yin hinhẹngble sọn ojlo mẹ wá. Hẹnflu osin, jẹhọn po aigba po tọn gán hẹn nuhahun agbasalilo tọn he nọ dẹn-to-aimẹ lẹ wá, podọ owù he bọmbu he yin dìdì do dòmẹ lẹ nọ hẹnwa gbẹ́ nọ nọ̀ aimẹ ojlẹ dindẹn to awhàn lọ godo.
Matin ayihaawe, awhàn ylan taun bosọ nọ hẹnnugble.