Lehe Awhàn po Nudindọn Danuwiwa Tọn lẹ po Na Wá Opodo Do

JIWHEYẸWHE NA SUKÚNDONA GANDUDU GBẸTỌVI LẸ TỌN

Jiwheyẹwhe na sukúndona gandudu gbẹtọvi lẹ tọn gbọn awhàn de gblamẹ, ehe Biblu ylọdọ Amagẹdọni.a (Osọhia 16:16) To ojlẹ enẹ mẹ, “ahọlu aigba fininọ lẹpo tọn lẹ” na yin bibẹpli dopọ “na awhàn azán daho Jiwheyẹwhe Ganhunupotọ lọ tọn.” (Osọhia 16:14) Amagẹdọni yin awhàn Jiwheyẹwhe tọn he na hẹn opodo wá na awhàn lẹpo.

Jiwheyẹwhe na yí Ahọluduta kavi gandudu etọn do diọtẹnna gandudu gbẹtọvi lẹ tọn, podọ gandudu enẹ na dugán sọn olọn mẹ bo ma na yin vivasudo gbede. (Daniẹli 2:44) Jiwheyẹwhe ko de Visunnu etọn, Jesu Klisti nado yin Ahọlu lọ. (Isaia 9:6, 7; Matiu 28:18) Gandudu ehe wẹ Ahọludutab he go Jesu plọn hodotọ etọn lẹ nado nọ hodẹ̀ gando. (Matiu 6:9, 10) Gbẹtọvi lẹpo na yin kinkọndopọ to gandudu lẹdo aihọn pé ehe glọ, ehe Jesu na yin Ahọlu na.

To vogbingbọn mẹ na gandudu gbẹtọvi lẹ tọn, Jesu ma na yí aṣẹpipa etọn zan nado hẹn ale wá na ede. Jesu nọ wà dodo bo masọ nọ homẹnukuntapọn, enẹwutu mẹde ma na hanú dọ emi na yin kọgbẹ́ e go na sinmẹ agbasa tọn, otò he mẹ e wá sọn, kavi akọ̀ etọn. (Isaia 11:3, 4) Podọ e ma na biọ dọ gbẹtọ lẹ ni nọ hoavùn na jlọjẹ yetọn lẹ. Etẹwutu? Na Jesu na tindo ojlo to dagbemẹninọ mẹdopodopo tọn mẹ. “Ewọ na nọ whlẹn wamọnọ he to awhádo na alọgọ, gọna agbátọnọ po mẹdepope he ma tindo alọgọtọ po. . . . E na nọ whlẹn yé sọn kọgbidinamẹ po danuwiwa po mẹ.”—Salmu lẹ 72:12-14.

Ahọluduta Jiwheyẹwhe tọn na zà awhànfunnu mẹvasudo tọn lẹ sẹ̀ sọn aigba ji. (Mika 4:3) E nasọ de mẹylankan he gbẹ́ nado doalọtena awhànfunfun kavi he nọ ze jijọho mẹdevo lẹ tọn do owù mẹ lẹ sẹ̀. (Salmu lẹ 37:9, 10) Sunnu, yọnnu po ovi lẹpo po na tin to jijọho mẹ to fidepope he yé na yì to aigba ji.—Ezekiẹli 34:28.

Gbẹtọvi lẹ na duvivi ninọmẹ dagbe lẹ tọn to gbẹ̀mẹ to gandudu Jiwheyẹwhe tọn glọ. E na sukúndona nuhahun he nọ zọ́n bọ gbẹtọ lẹ nọ funawhàn lẹ, taidi ohẹ́n, huvẹ po adọtẹn dagbe matindo po. Mẹlẹpo na mọ núdùdù hunsindagbe tọn bo nasọ tindo ofi dagbe he yé na nọ nọ̀.—Salmu lẹ 72:16; Isaia 65:21-23.

To Ahọluduta Jiwheyẹwhe tọn glọ, nuyiwadomẹji ylankan he awhàn nọ tindo domẹji na yin didesẹ. Ehe ma bẹ awugble agbasa tọn lẹ kẹdẹ hẹn gba, amọ́ e sọ bẹ awufiẹsa he mẹlẹ nọ jiya etọn to apọ̀nmẹ podọ to numọtolanmẹ-liho na nuylankan he awhàn ko hẹnwa lẹ wutu hẹn ga. Mẹhe tlẹ ko kú lẹ na yin finfọn do ogbẹ̀ to aigba ji. (Isaia 25:8; 26:19; 35:5, 6) Whẹndo lẹ na gọjẹ pọ́ podọ oflin nuylankan he awhàn nọ hẹnwa lẹ tọn na tin to “onú hoho [he] ko juwayi” lẹ mẹ.—Osọhia 21:4.

JIWHEYẸWHE NA SUKÚNDONA YLANDO

Ahọluduta Jiwheyẹwhe tọn na kọ̀n mẹlẹ dopọ to sinsẹ̀n-bibasi Jiwheyẹwhe nugbo dopo kẹdẹ lọ Jehovahc tọn mẹ, yèdọ “Jiwheyẹwhe owanyi tọn po jijọho tọn po.” (2 Kọlintinu lẹ 13:11) Mẹlẹ na plọn nado nọ nọgbẹ̀ to pọmẹ to jijọho mẹ. (Isaia 2:3, 4; 11:9) Ylando ma nasọ yinuwado mẹhe nọ yí nuhe yé plọn lẹ do yizan mẹ lẹ ji ba.—Lomunu lẹ 8:20, 21.

JIWHEYẸWHE NA SUKÚNDONA SATANI PO AOVI ETỌN LẸ PO

Ahọluduta Jiwheyẹwhe tọn na và mẹhe nọ hẹn awhàn wá lẹ sudo, enẹ wẹ Satani po aovi etọn lẹ po. (Osọhia 20:1-3, 10) Na nuyiwadomẹji ylankan yetọn ma nasọ tin ba wutu, “jijọho na sudeji.”—Salmu lẹ 72:7.

A gán kudeji dọ opà he Jiwheyẹwhe do nado hẹn awhàn po nudindọn he nọ bẹ danuwiwa hẹn lẹ po wá opodo na mọ hẹndi. E tindo nugopipe lọ gọna ojlo lọ nado hẹn awhàn wá opodo.

• Jiwheyẹwhe tindo nuyọnẹn gọna huhlọn he e biọ nado hẹn awhàn po danuwiwa po wá opodo. (Jobu 9:4) Nudepope ma glo e.—Jobu 42:2.

• E nọ vẹna Jiwheyẹwhe taun eyin mẹlẹ to yaji. (Isaia 63:9) E sọ nọ “gbẹwanna mẹdepope he yiwanna danuwiwa.”—Salmu lẹ 11:5.

• Jiwheyẹwhe nọ wà nuhe e dọ janwẹ; e ma gán dolalo.—Isaia 55:10, 11; Titu 1:2.