Alọ Jehovah Tọn Ma Whete Gbede

1. Nawẹ Mose do jidide etọn to Jehovah mẹ hia gbọn whenue e plan Islaelivi lẹ tọ́n sọn Egipti?

TO MẸHE yin apajlẹ yise tọn lẹ mẹ bo yin nùdego to owe Heblu lẹ tọn mẹ, Mose jẹna ayidego. (Heb. 3:2-5; 11:23-25) E do yise hia whenue e plan Islaelivi lẹ tọ́n sọn Egipti. E ma dibuna Falo po awhànpa etọn po. Na e dejido Jehovah go wutu, e deanana mẹlọ lẹ gbọn Ohù Vẹẹ mẹ, podọ to godo mẹ gbọn danfafa ji. (Heb. 11:27-29) Suhugan Islaelivi lẹ tọn hẹn jidide yetọn bu to nugopipe Jehovah tọn nado penukundo yé go mẹ, amọ́ Mose gbẹ́ zindonukọn nado nọ dejido Jiwheyẹwhe etọn go. Owhẹ̀ Mose tọn whẹ́n nado tindo yise, na Jiwheyẹwhe gbọn azọ́njiawu dali wleawuna núdùdù po osin po nado gọalọna mẹlọ lẹ to danfafa he gbọgbé enẹ ji.a—Eks. 15:22-25; Salm. 78:23-25.

2. Naegbọn Jiwheyẹwhe do kanse Mose dọ: “Be alọ Jehovah tọn whete wẹ”? (Sọha lẹ 11:21-23)

² Amọ́ mahopọnna yise dolido Mose tọn, nudi owhe dopo to whenue Islaelivi lẹ yin tuntundote to azọ́njiawu-liho godo, e tindo ayihaawe gando nugopipe Jehovah tọn nado na olàn omẹ Etọn lẹ go. E vẹawuna Mose nado yí nukun homẹ tọn do mọ lehe Jehovah gán wleawuna olàn he pemẹnu do nado hẹn pekọ wá na gbẹtọ livi susu he dosla do danfafa he jẹvọ́ lọ ji lẹ. Jehovah gblọnna Mose bo kanse e dọmọ: “Be alọ Jehovah tọn whete wẹ?” (Hia Sọha lẹ 11:21-23.) Tofi, hodidọ lọ, “alọ Jehovah tọn” to alọdlẹndo gbigbọ wiwe Jiwheyẹwhe tọn kavi huhlọn yí do wazọ́n etọn. Na nugbo tọn, Jehovah to kinkanse Mose dọ ‘Be a lẹn nugbonugbo dọ n’ma gán wà nuhe n’dọ wẹ ya?’

3. Naegbọn mí dona do ojlo to numimọ he Mose po Islaelivi lẹ po tindo mẹ?

³ Be a ko hanú pọ́n eyin Jehovah na penukundo nuhudo agbasa tọn towe kavi whẹndo towe tọn lẹ go ya? Vlavo a ko wàmọ kavi lala, gbọ mí ni gbadopọnna numimọ Mose po Islaelivi lẹ po tọn, yèdọ mẹhe hẹn jidide yetọn to nugopipe Jiwheyẹwhe tọn nado penukundo yé go mẹ bu. Nunọwhinnusẹ́n Owe-wiwe tọn he e bẹhẹn lẹ na gọalọna mí nado hẹn jidide mítọn sinyẹn deji dọ alọ Jehovah tọn ma whete pọ́n gbede.

PLỌNNU SỌN MOSE PO ISLAELIVI LẸ PO DÈ

4. Etẹwẹ gán ko zọ́n bọ mẹsusu na ko do ayihaawe gando nugopipe Jehovah tọn nado penukundo nuhudo agbasa tọn yetọn lẹ go?

⁴ Lẹnnupọndo lẹdo nujijọ lọ tọn ji. Akọta Islaeli tọn po “gbẹtọgun daho flusọ́ de” he ma yin Islaelivi lẹ po nọ danfafa daho de ji na ojlẹ de dile yé zingbejizọnlin sọn Egipti jei Aigba Pagbe tọn lọ ji. (Eks. 12:38; Deut. 8:15) Agbọ́ manna dùdù tọn pé gbẹtọgun flusọ́ lọ po Islaelivi he hopódona yé to lewuwu lọ mẹ lẹ po. (Sọh. 11:4-6) Gbẹtọ lọ lẹ jẹ núdùdù he yé ko nọ dù dai to Egipti lẹ ví ji. Na Mose mọdọ mẹlọ lẹ to kọgbidina emi wutu, e taidi dọ e lẹndọ emi lọsu wẹ dona penukundo nuhudo yetọn lẹ go.—Sọh. 11:13, 14.

5, 6. Etẹwẹ mí gán plọn sọn nuyiwadomẹji he gbẹtọgun flusọ́ lọ tindo do Islaelivi susu ji mẹ?

⁵ E taidi dọ mayọndagbe he gbẹtọgun flusọ́ lọ dohia wẹ yinuwado Islaelivi lẹ ji. Gbigbọ pinpẹn-nutọn-mayọnẹn tọn mẹdevo lẹ tọn gán yinuwado mílọsu lẹ ji bọ mí ma na nọ do pekọ to nuhe Jehovah na mí lẹ mẹ. Enẹ gán jọ eyin ajlù nuhe mí do wayi lẹ tọn nọ wle mí kavi eyin mí jẹ awuwhàn mẹdevo lẹ ji na nuhe yé do lẹ wutu. Amọ́, mí na do ayajẹ dogọ eyin mí plọn nado nọ do pekọ mahopọnna ninọmẹ mítọn lẹ.

⁶ Islaelivi lẹ dona ko flindọ Jiwheyẹwhe ko na yé nujikudo dọ whenue yé na jẹ owhé yọyọ yetọn gbè, yé na duvivi nususu tọn to agbasa-liho. Aigba Pagbe tọn lọ ji wẹ opagbe enẹ na mọ hẹndi te, e ma yin whenue yé to gbejizọnlinzin gbọn danfafa ji. Mọdopolọ, kakati nado nọ ze ayiha do nuhe mí gán nọma tindo to titonu ehe mẹ lẹ ji, mí nọ wà dagbe nado ze ayiha do nuhe Jehovah dopà dọ emi na na mí to aihọn yọyọ lọ mẹ lẹ ji. Mí gán sọ lẹnayihamẹpọn do wefọ he gán gọalọna mí nado yidogọna jidide mítọn to Jehovah mẹ lẹ ji.

7. Naegbọn mí gán kudeji dọ alọ Jehovah tọn ma whete?

⁷ Amọ́, a gán gbẹ́ nọ kanse dewe nuhewutu Jiwheyẹwhe do kanbiọ Mose dọ: “Be alọ Jehovah tọn whete wẹ?” Jehovah gán ko to alọgọna Mose nado lẹnnupọn e ma yin do nugopipe he alọ huhlọnnọ Etọn tindo kẹdẹ ji gba, amọ́ do obá he mẹ alọ enẹ gán yinuwa jẹ ji. Jiwheyẹwhe gán wleawu olàn susugege tọn na Islaelivi lẹ kaka bọ e na lán, mahopọnna dọ danfafa he to olá de ji wẹ yé te. Jiwheyẹwhe do huhlọn etọn hia gbọn “alọ huhlọnnọ po awà dindlẹn etọn po” gblamẹ. (Salm. 136:11, 12) Enẹwutu, whenue mí to whlepọn glọ, mí ma dona do ayihaawe dọ alọ Jehovah tọn na dlẹn wá mí dè tlọlọ.—Salm. 138:6, 7.

8. Nawẹ mí gán dapana nuṣiwa dopolọ he mẹ mẹsusu jai jẹ to danfafa ji gbọn? (Sọ pọ́n yẹdide lọ.)

⁸ E ma dẹn bọ Jehovah wleawu olàn tọn na gbẹtọ lọ lẹ bọ yé mọ asọkle susugege yí. Amọ́, Islaelivi lẹ ma dopẹna Jiwheyẹwhe na azọ́njiawu ehe. Kakatimọ, nukunkẹn wẹ yinuwado susu yetọn ji. Yé dovivẹnu sinsinyẹn na gànhiho susu bo bẹ asọkle susugege pli. Jehovah gblehomẹ taun do mẹhe “do ojlo sinsinyẹn ṣejannabi tọn hia lọ lẹ” go, podọ e domẹplọnlọ yé go. (Sọh. 11:31-34) Mí gán plọnnu sọn apajlẹ enẹ mẹ. Mí dona to aṣeji ma nado nọ do nukunkẹn. Vlavo mí yin adọkunnọ kavi wamọnọ, yanwle tintan he mí dona tindo wẹ nado bẹ ‘adọkunnu lẹ pli do olọn mẹ’ gbọn awuwiwlena haṣinṣan pẹkipẹki de hẹ Jehovah po Jesu po dali. (Mat. 6:19, 20; Luku 16:9) Eyin mí nọ wàmọ, mí gán kudeji dọ Jehovah na penukundo nuhudo mítọn lẹ go.

9. Nujikudo tẹwẹ mí gán tindo gando godonọnamẹ Jiwheyẹwhe tọn go?

⁹ Jehovah nọ dlẹn alọ etọn nado gọalọna omẹ etọn lẹ to egbehe. Amọ́, ehe ma zẹẹmẹdo dọ mí ma na hẹn nutindo mítọn lẹ bu gbede kavi dọ huvẹ ma na hù mí gbede.b Ṣigba, Jehovah ma na gbẹ́ mí dai gbede. E na hẹn mí dote to whlepọn voovo lẹ mẹ. Nado mọ nugbo-yinyin enẹ tọn, mí na gbadopọnna ninọmẹ awe he mẹ mí gán do jidide mítọn hia te dọ Jehovah na dlẹn alọ etọn nado penukundo nuhudo mítọn lẹ go to agbasa-liho: (1) whenue mí to pipehẹ nuhahun akuẹzinzan tọn lẹ podọ (2) whenue mí to tito-basina nuhudo sọgodo tọn mítọn lẹ to agbasa-liho.

WHENUE MÍ TO PIPEHẸ NUHAHUN AKUẸZINZAN TỌN LẸ

10. Nuhahun akuẹzinzan tọn tẹlẹ wẹ mí gán pehẹ?

¹⁰ Dile titonu ehe to dindọnsẹpọ vivọnu etọn, mí gán donukun dọ ninọmẹ akuẹzinzan tọn lẹ na ylan deji. Hunyanhunyan tonudidọ tọn, awhàn, nugbajẹmẹji jọwamọ tọn lẹ kavi azọ̀n bẹplamẹ yọyọ lẹ gán dekọtọn do akuẹzinzan madonukun lẹ mẹ kavi zọ́n bọ mí na hẹn agbasazọ́n mítọn, nutindo mítọn lẹ kavi owhé mítọn bu. E gán biọ dọ mí ni dín azọ́n yọyọ de to lẹdo he mẹ mí te to alọnu kavi lẹnnupọndo tẹnsisẹ na whẹndo mítọn yì lẹdo devo mẹ ji nado sọgan penukundo yé go. Etẹwẹ gán gọalọna mí nado basi nudide he na dohia dọ mí dejido alọ Jehovah tọn go?

11. Etẹwẹ gán gọalọna we nado pehẹ nuhahun akuẹzinzan tọn lẹ? (Luku 12:29-31)

¹¹ Afọdide tintan he nọ do kọdetọn dagbe wẹ nado dọ ahunmẹdunamẹnu towe lẹ na Jehovah. (Howh. 16:3) Nọ biọ nuyọnẹn he a do hudo etọn nado basi nudide dagbe lẹ podọ nado vò to ahun mẹ bo dapana “magbọjẹ he ma yin dandan tọn” gando ninọmẹ towe go. (Hia Luku 12:29-31.) Nọ vẹ̀ ẹ nado gọalọna we nado nọ tindo pekọ po dandannu gbẹ̀mẹ tọn lẹ po. (1 Tim. 6:7, 8) Basi dodinnanu to owe mítọn lẹ mẹ do lehe yè nọ pehẹ nuhahun akuẹzinzan tọn lẹ po kọdetọn dagbe po do ji. Mẹsusu wẹ ko mọaleyi sọn hosọ he to jw.org ji bo dọhodo nuhahun akuẹzinzan tọn ji lẹ mẹ.

12. Kanbiọ tẹlẹ wẹ gán gọalọna Klistiani de nado basi nudide dagbe hugan lọ do whẹndo etọn tamẹ?

¹² Mẹdelẹ ko yin whiwhlepọn nado kẹalọyi azọ́n he nọ biọ dọ yé ni sẹtẹn yì fie dẹn do whẹndo yetọn, amọ́ kunnudenu lẹ dohia dọ nudide nulú tọn wẹ e nọ saba yin. Whẹpo a nido kẹalọyi azọ́n yọyọ de, ma nọ lẹnnupọndo ale he e gán hẹnwa na we to akuẹzinzan-liho lẹ kẹdẹ ji blo, amọ́ do nuhe a na yí do sanvọ́ to gbigbọ-liho lẹ ji ga. (Luku 14:28) Kanse dewe dọ: ‘Nawẹ e na yinuwado alọwle ṣie ji gbọn eyin n’dẹn do alọwlemẹ ṣie? Nuyiwadomẹji tẹwẹ tẹnsisẹ ehe na tindo do gbẹdido Klistiani tọn ṣie po lizọnyizọn ṣie po ji?’ Eyin a tindo ovi lẹ, a dona sọ kàn kanbiọ titengbe ehe sè dewe: ‘Nawẹ n’gán plọn ovi ṣie lẹ “to mẹplọnlọ po tudohomẹnamẹ Jehovah tọn po mẹ” gbọn, eyin n’ma topọ hẹ yé?’ (Efe. 6:4) Dike pọndohlan Jiwheyẹwhe tọn ni deanana we, e ma yin hẹnnumẹ kavi họntọn he ma nọ na sisi nunọwhinnusẹ́n Owe-wiwe tọn lẹ tọn.c Tony he nọ nọ̀ whèyihọ-waji Asie tọn yin whiwhlepọn whlasusu nado kẹalọyi nuzedonukọnnamẹ lọ nado yì wazọ́n to tògodo. Amọ́, whenue e hodẹ̀ gando whẹho lọ go bo dọhodeji hẹ asi etọn godo, e basi dide nado gbẹ́ nuzedonukọnnamẹ lọ lẹ dai, podọ e dovivẹnu nado de akuẹzinzan whẹndo lọ tọn pò. To whenue Tony flinnu hlan godo, e dọmọ: “N’ko tindo lẹblanulọkẹyi lọ nado gọalọna mẹsusu nado wá yọ́n Jehovah, podọ ovi mítọn lẹ yiwanna nugbo lọ taun. Whẹndo mítọn ko plọn dọ dile e na dẹnsọ bọ mí na to gbẹnọ sọgbe hẹ nuhe Matiu 6:33 dọ, Jehovah na to nukunpedo mí go zọnmii.”

WHENUE MÍ TO TITO-BASINA NUHUDO SỌGODO TỌN MÍTỌN LẸ

13. Afọdide he sọgbe hẹ lẹnpọn dagbe tẹlẹ wẹ mí gán ze to alọnu din ehe na gọalọna mí nado penukundo nuhudo mítọn lẹ go whenue mí na poyọnho?

¹³ Jidide mítọn do alọ Jehovah tọn go gán sọ yin whiwhlepọn dile mí to nulẹnpọndo lehe ninọmẹ mítọn gán wá ṣí whenue mí na poyọnho ji. Biblu na mí tuli nado wazọ́n sinsinyẹn na mí nido sọgan wá penukundo nuhudo agbasa tọn mítọn lẹ go to sọgodo. (Howh. 6:6-11) E sọgbe hẹ lẹnpọn dagbe nado sẹ̀ nude do na sọgodo dile ninọmẹ mítọn na mí dotẹnmẹ etọn do. Na nugbo tọn, akuẹ nọ basi hihọ́namẹ jẹ obá de mẹ. (Yẹwh. 7:12) Amọ́, mí ma dona yí afọdidona agbasanu lẹ do basi yanwle mítọn tintan to gbẹ̀mẹ.

14. Naegbọn mí dona gbadopọnna Heblu lẹ 13:5 whenue mí to tito-basina nuhudo sọgodo tọn mítọn lẹ to akuẹzinzan-liho?

¹⁴ Jesu dohia dọ nulunu wẹ e yin nado bẹ akuẹ pli bo ma yin “adọkunnọ hlan Jiwheyẹwhe.” (Luku 12:16-21) Mẹdepope ma yọ́n nuhe osọ na hẹnwa. (Howh. 23:4, 5; Jak. 4:13-15) Taidi hodotọ Klisti tọn lẹ, mí nọ pehẹ avùnnukundiọsọmẹnu vonọtaun de. Jesu dọ dọ mí dona wleawufo nado “gbẹkọ” nutindo mítọn lẹpo go nado lẹzun devi emitọn lẹ. (Luku 14:33; Odò.) Klistiani owhe kanweko tintan whenu tọn he to Jude lẹ kẹalọyi nuhẹnbu mọnkọ po ayajẹ po. (Heb. 10:34) To egbehe, mẹmẹsunnu susu lẹ wẹ yí hihọ́ he akuẹ nọ hẹnwa do sanvọ́, na yé gbẹ́ nado doalọ to tonudidọ mẹ wutu. (Osọ. 13:16, 17) Etẹwẹ gọalọna yé nado wàmọ? Yé deji mlẹnmlẹn do opagbe Jehovah tọn lọ go dọmọ: “Yẹn ma na jo mì do gbede podọ yẹn ma na gbẹ́ mì dai gbede.” (Hia Heblu lẹ 13:5.) Mí nọ wà nuhe go mí pé lẹpo nado basi tito dai na nuhudo sọgodo tọn mítọn lẹ, podọ eyin nujijọ madonukun lẹ jọ do mí go, mí nọ dejido godonọnamẹ Jehovah tọn go.

15. Pọndohlan jlẹkaji tọn tẹwẹ mẹjitọ Klistiani lẹ dona tindo gando ovi yetọn lẹ go? (Sọ pọ́n yẹdide lọ.)

¹⁵ To aṣa delẹ mẹ, mẹlẹ nọ dọ dọ ovi wẹ yin ale. Enẹwutu asu po asi po lẹ nọ mọdọ yé dona jivi lẹ, na yé nido wá penukundo yé go to akuẹzinzan-liho eyin yé poyọnho. Biblu dọ dọ mẹjitọ lẹ wẹ dona penukundo nuhudo ovi yetọn lẹ tọn go. (2 Kọl. 12:14) Na nugbo tọn, mẹjitọ lẹ gán do hudo alọgọ yọ́n-na-yizan delẹ tọn whenue owhe to owhe ji jẹ na yé, podọ homẹ ovi susu tọn wẹ nọ hùn nado basi tito alọgọ enẹ tọn na yé. (1 Tim. 5:4) Amọ́, mẹjitọ Klistiani lẹ nọ mọnukunnujẹemẹ dọ ayajẹ daho hugan yetọn nọ wá sọn alọgigọna ovi yetọn lẹ nado lẹzun sinsẹ̀n-basitọ Jiwheyẹwhe tọn lẹ mẹ, e ma yin sọn ovi lẹ pinplọn whẹ́n po pọndohlan lọ po dọ yé na wá zan akuẹ do emi go to sọgodo mẹ.—3 Joh. 4.

16. Nawẹ mẹjitọ lẹ gán gọalọna ovi yetọn lẹ nado wá yin yede to akuẹzinzan-liho gbọn? (Efesunu lẹ 4:28)

¹⁶ Mì nọ plọn ovi mìtọn lẹ gbọn apajlẹ mìtọn gblamẹ nado nọ dejido Jehovah go dile mì to alọgọna yé nado wá yin yede. Sọn whenue yé gbẹ́ to jọja, mì nọ dohia yé dọ nujọnu wẹ e yin nado nọ wazọ́n sinsinyẹn. (Howh. 29:21; hia Efesunu lẹ 4:28.) Dile yé to whinwhẹ́n, mì nọ gọalọna yé nado nọ wà nuhe go yé pé to wehọmẹ. Mẹjitọ Klistiani lẹ nọ wà dagbe nado basi dodinnanu do nunọwhinnusẹ́n Biblu tọn lẹ ji bosọ yí yé do yizan mẹ nado gọalọna ovi yetọn lẹ nado basi nudide lehe yé na yí wepinplọn zan po nuyọnẹn po do tọn. Ehe na zọ́n bọ ovi yetọn lẹ na wá penugo nado penukundo yede go bosọ tindo mahẹ gigọ́ to lizọnyizọn Klistiani tọn mẹ.

17. Nujikudo tẹwẹ mí gán tindo?

¹⁷ Devizọnwatọ nugbonọ Jehovah tọn lẹ gán deji dọ e tindo nugopipe po ojlo lọ po nado penukundo nuhudo yetọn lẹ go. Dile mí to dindọnsẹpọ vivọnu titonu ehe tọn, mí gán donukun dọ jidide mítọn to Jehovah mẹ na yin whiwhlepọn. Amọ́ eyin etlẹ to kínni bo to kanna, mì gbọ mí ni magbe nado nọ deji dọ Jehovah na yí huhlọn etọn zan nado penukundo mí go to agbasa-liho. Mí gán deji dọ alọ huhlọnnọ po awà dindlẹn etọn po ma na whete gbede nado jẹ mí dè.