HOSỌ OPLỌN TỌN 14
OHÀN 8 Jehovah Wẹ Fibẹtado Mítọn
“Mì bo De Na Mìdelẹ . . . Mẹhe Mì Na Sẹ̀n”
“Na yẹn po whédo ṣie po tọn, Jehovah wẹ mí na nọ sẹ̀n.”—JỌṢ. 24:15.
NUHE E BẸHẸN
Nado flin mí whẹwhinwhẹ́n he wutu mí do de nado sẹ̀n Jehovah lẹ.
1. Etẹwẹ mí dona wà nado tindo ayajẹ nujọnu tọn, podọ etẹwutu? (Isaia 48:17, 18)
OTỌ́ olọn mẹ tọn mítọn yiwanna mí sisosiso bosọ jlo dọ mí ni duvivi ogbẹ̀ tọn todin podọ to sọgodo. (Yẹwh. 3:12, 13) E dá mí po nunina jiawu delẹ po, amọ́ e ma na mí nugopipe lọ nado dugán do míde ji po kọdetọn dagbe po kavi nado ze nujinọtedo nuhe yin dagbe po oylan po tọn lẹ dai na míde. (Yẹwh. 8:9; Jel. 10:23) E yọnẹn dọ eyin mí na tindo ayajẹ nujọnu tọn, mí dona nọ sẹ̀n ewọ bo nọ nọgbẹ̀ sọgbe hẹ nujinọtedo etọn lẹ.—Hia Isaia 48:17, 18.
2. Etẹwẹ Satani jlo dọ mí ni yise, podọ nawẹ Jehovah ko na gblọndo lalo enẹ tọn gbọn?
2 Satani jlo dọ mí ni yise dọ mí gán do ayajẹ matin Jehovah, podọ dọ gbẹtọvi lẹ gán dugán do yede ji po kọdetọn dagbe po. (Jen. 3:4, 5) Nado na gblọndo na lalo enẹ, Jehovah na dotẹnmẹ gbẹtọvi atẹṣitọ lẹ nado dugán do yede ji na ojlẹ vude. E bọawu taun nado doayi kọdetọn he blawu he gandudu gbẹtọvi tọn ko hẹnwa lẹ go. To alọ devo mẹ, Owe-wiwe lẹ bẹ apajlẹ sunnu po yọnnu po susu he gbẹzan yetọn gọ́ na ayajẹ to sinsẹ̀nzọn Jehovah tọn mẹ lẹ tọn hẹn. Dehe tọ́nta hugan to yé mẹ wẹ apajlẹ Jesu Klisti tọn. Jẹnukọn whẹ́, mì gbọ mí ni pọ́n whẹwhinwhẹ́n he wutu e do basi dide nado sẹ̀n Jehovah lẹ. Enẹgodo, mí na gbadopọnna nuhewutu Otọ́ olọn mẹ tọn mítọn do jẹna sinsẹ̀n-bibasi mítọn. Podọ to godo mẹ, mí na gbadopọnna delẹ to whẹwhinwhẹ́n he wutu mí de nado sẹ̀n Jehovah lẹ mẹ.
NUHEWUTU JESU DO DE NADO SẸ̀N JEHOVAH
3. Etẹwẹ yin zizedonukọnna Jesu, podọ nudide tẹwẹ e basi?
3 To whenue Jesu to aigba ji, e dona basi nudide gando mẹhe ewọ na sẹ̀n go. Ojlẹ vude to whenue Jesu yí baptẹm godo, Satani dọ dọ eyin e basi sinsẹ̀n hlan emi whladopo poun, emi na na ẹn ahọluduta aigba ji tọn lẹpo. Jesu gblọn dọmọ: “Tọ́n sọn fi, Satani! Na e ko yin kinkan dọ: ‘Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.’” (Mat. 4:8-10) Naegbọn Jesu do basi nudide enẹ? Lẹnnupọndo delẹ to whẹwhinwhẹ́n lọ lẹ mẹ ji.
4, 5. Etẹwẹ yin delẹ to whẹwhinwhẹ́n he wutu Jesu do de nado sẹ̀n Jehovah lẹ mẹ?
4 Whẹwhinwhẹ́n tangan he wutu Jesu do de nado sẹ̀n Jehovah wẹ owanyi he e tindo na ẹn—Jesu yiwanna Otọ́ etọn sisosiso. (Joh. 14:31) Humọ Jesu sẹ̀n Jehovah, na nuhe sọgbe nado wà lọ niyẹn. (Joh. 8:28, 29; Osọ. 4:11) E yọnẹn dọ Jehovah wẹ Asisa ogbẹ̀ tọn, podọ Mẹhe go yè gán dejido wẹ ewọ bosọ yin alọtlútọ. (Salm. 33:4; 36:9; Jak. 1:17) Jehovah nọ dọ nugbo na Jesu to whepoponu, podọ ewọ ko ze nuhe e tindo lẹpo do alọ etọn mẹ. (Joh. 1:14) To vogbingbọn mẹ, Satani ko hẹn okú wá. Lalonọ podọ nukunkẹnnọ wẹ bosọ nọ ví do edetiti tọn mẹ. (Joh. 8:44) Na Jesu yọ́n nugbo ehelẹ wutu, e ma tlẹ wá linlẹn mẹ na ẹn pọ́n gbede nado hodo apajlẹ Satani tọn bo ṣiatẹ sọta Jehovah.—Flp. 2:5-8.
5 Whẹwhinwhẹ́n devo he wutu Jesu do de nado sẹ̀n Jehovah wẹ yindọ, e to nukọnpọnhlan kọdetọn he sinsẹ̀nzọn nugbonọ-yinyin tọn etọn na hẹnwa. (Heb. 12:2) E yọnẹn dọ eyin emi hẹn nugbonọ-yinyin emitọn go, emi na klan oyín Otọ́ emitọn tọn do wiwe bosọ wleawuna pọngbọ lọ na yajiji he Lẹgba ko hẹnwa lẹpo.
NUHEWUTU JEHOVAH DO JẸNA SINSẸ̀N-BIBASI MÍTỌN
6, 7. Naegbọn mẹsusu ma nọ sẹ̀n Jehovah to egbehe, amọ́ etẹwutu wẹ ewọ do jẹna sinsẹ̀n-bibasi mítọn?
6 Mẹsusu ma nọ sẹ̀n Jehovah to egbehe, na yé ma ko wá yọ́n jẹhẹnu dagbedagbe etọn lẹ bo masọ nọ doayi nuhe e ko wà na yé lẹpo go. Ehe yin nugbo gando mẹhe apọsteli Paulu dọyẹwheho na to Atẹni lẹ go.—Owalọ 17:19, 20, 30, 34.
7 Paulu basi zẹẹmẹ na todoaitọ etọn lẹ dọ Jiwheyẹwhe nugbo lọ “wẹ nọ na gbẹtọ lẹpo ogbẹ̀, gbọfufu po nulẹpo po.” E yidogọ dọ: “Gbọn ewọ dali wẹ mí tindo ogbẹ̀ bo nọ yì bosọ tin.” Jiwheyẹwhe wẹ Mẹdatọ lọ, mẹhe “hẹn akọta gbẹtọ tọn lẹpo wá sọn mẹdopo mẹ,” enẹwutu e tindo jlọjẹ nado mọ sinsẹ̀n-bibasi mítọn yí.—Owalọ 17:25, 26, 28.
8. Etẹwẹ Jehovah ma na wà pọ́n gbede? Basi zẹẹmẹ.
8 Taidi Mẹdatọ podọ Nupojipetọ wẹkẹ lọ tọn, Jehovah gán ko hẹn mẹlẹ gbọ́gúngún-kangúngún nado sẹ̀n ẹn. Amọ́, Jehovah ma na wàmọ gbede. Kakatimọ, e na mí kunnudenu lẹ he dohia dọ ewọ tin bosọ yiwanna dopodopo mítọn sisosiso. E jlo dọ mẹsusu dile e sọgan yọnbasi do ni lẹzun họntọn etọn lẹ kakadoi. (1 Tim. 2:3, 4) Whẹwhinwhẹ́n enẹ wutu wẹ Jehovah ko plọnazọ́n mí nado plọnnu mẹdevo lẹ gando lẹndai etọn lẹ go, podọ nado dọ nudagbe he ewọ na wà na gbẹtọvi lẹ na yé. (Mat. 10:11-13; 28:19, 20) E ko wleawu agun voovo lẹ tọn na mí bosọ basi tito na nugopọntọ owanyinọ lẹ nado penukundo mí go.—Owalọ 20:28.
9. Kunnudenu tẹlẹ wẹ do owanyi Jehovah tọn hia?
9 Mí nọ mọ owanyi ayidego tọn Jehovah tọn to aliho he mẹ e nọ yinuwa hẹ mẹhe ma jlo na yise dọ ewọ tin lẹ te. Lẹnnupọndo ehe ji: To whenuho gblamẹ, gbẹtọ liva susu wẹ ko basi dide nado nọgbẹ̀ sọgbe hẹ nujinọtedo dagbe po oylan po tọn yetọn titi lẹ. Mahopọnna enẹ, Jehovah ko gbọn homẹdagbe dali na yé nuhe yé do hudo etọn nado nọgbẹ̀ bosọ duvivi ogbẹ̀ tọn lẹ. (Mat. 5:44, 45; Owalọ 14:16, 17) E ko na yé nugopipe lọ nado wleawuna haṣinṣan owanyinọ lẹ, do whẹndo de ai bosọ duvivi kọdetọn azọ́n sinsinyẹn yetọn lẹ tọn. (Salm. 127:3; Yẹwh. 2:24) Kunnudenu lẹ dohia hezeheze dọ Otọ́ olọn mẹ tọn mítọn yiwanna gbẹtọvi lẹpo. (Eks. 34:6) Todin, mì gbọ mí ni flinnu míde gando whẹwhinwhẹ́n delẹ he wutu mí do de nado sẹ̀n Jehovah go gọna lehe ewọ nọ yinuwa hẹ mí do.
NUHEWUTU MÍ DO DE NADO SẸ̀N JEHOVAH
10. (a) Whẹwhinwhẹ́n tangan tẹ wutu wẹ mí do nọ sẹ̀n Jehovah? (Matiu 22:37) (b) Nawẹ homẹfa Jehovah tọn ko hẹn ale wá na we gbọn? (Salmu lẹ 103:13, 14)
10 Taidi Jesu, whẹwhinwhẹ́n tangan he wutu mí do nọ sẹ̀n Jehovah wẹ owanyi sisosiso he mí tindo na Ẹn. (Hia Matiu 22:37.) Mí nọ mọdọ mí dọnsẹpọ Jehovah to whenue mí plọnnu gando jẹhẹnu etọn lẹ go. Di apajlẹ, lẹnnupọndo lehe Jehovah nọ fahomẹ hẹ mí do ji. To whenue Islaelivi lẹ vẹtolina ẹn, e vẹ̀ yé dọmọ: “Yẹn vẹ̀ mì, mì lẹ́ sọn aliho ylankan mìtọn lẹ ji.” (Jel. 18:11) Jehovah nọ flindọ mapenọ wẹ mí, podọ dọ kọ́gudu wẹ mí. (Hia Salmu lẹ 103:13, 14.) To whenue a lẹnayihamẹpọn do homẹfa Jehovah tọn gọna jẹhẹnu dagbedagbe etọn devo lẹ ji, be a ma nọ yin whinwhàn nado sẹ̀n ewọ kakadoi ya?
11. Whẹwhinwhẹ́n devo tẹlẹ wutu wẹ mí nọ de nado sẹ̀n Otọ́ olọn mẹ tọn mítọn?
11 Mí sọ nọ yin whinwhàn nado sẹ̀n Jehovah, na nuhe sọgbe nado wà lọ niyẹn. (Mat. 4:10) Humọ, mí yọ́n kọdetọn sinsẹ̀nzọn nugbonọ-yinyin tọn mítọn tọn. Nugbonọ-yinyin mítọn nọ klan oyín Jehovah tọn do wiwe, nọ do Lẹgba hia di lalonọ, bosọ nọ hẹn homẹ Otọ́ mítọn tọn hùn. Podọ eyin mí de to egbehe nado sẹ̀n Jehovah, mí nọ tindo todido lọ nado sẹ̀n ẹn kakadoi!—Joh. 17:3.
12, 13. Etẹwẹ mí plọn sọn numimọ Jane po Pam po tọn mẹ?
12 To whenue mí gbẹ́ yin jọja, mí gán wleawuna owanyi sisosiso na Jehovah, yèdọ owanyi de he na to sinsinyẹn deji dile mí to whinwhẹ́n. Doayi apajlẹ nọviyọnnu awe delẹ tọn go, enẹ wẹ Jane po Pam po.a Owhe 11 wẹ Jane tindo bọ Pam do owhe 10 whenue yé jẹ Biblu plọn ji whla tintan. Dile etlẹ yindọ mẹjitọ yetọn lẹ ma jlo na plọnnu, yé nagbè Jane po Pam po nado nọ dogbẹ́ hẹ Kunnudetọ lẹ dile e na dẹnsọ bọ yé na nọ yì ṣọṣi to pọmẹ hẹ whẹndo lọ to sẹfifo lẹ. Jane dọmọ: “Nuhe Kunnudetọ lẹ plọn mi to Biblu mẹ gọalọna mi nado duto kọgbidinamẹ hagbẹ ṣie lẹ tọn nado zan amasin adínọ bo doalọ to fẹnnuwiwa mẹ ji.”
13 Whenue viyọnnu awe lọ lẹ sẹpọ vivọnu owhe aflanmẹ tọn, yé lẹzun wẹnlatọ. To nukọn mẹ, yé jẹ gbehosọnalitọ basi ji dile etlẹ yindọ yé to nukunpedo mẹjitọ yetọn he ko lẹzun mẹhomẹ lẹ go. To whenue Jane lẹnnupọndo numimọ yetọn ji godo, e dọmọ: “N’plọn dọ Jehovah nọ penukundo họntọn etọn lẹ go po nugbonọ-yinyin po, podọ dọ dile 2 Timoti 2:19 dọ do, ‘Jehovah yọ́n mẹhe yin etọn lẹ.’” Matin ayihaawe, Jehovah nọ penukundo mẹhe de nado yiwanna ẹn bosọ sẹ̀n ẹn lẹ go!
14. Nawẹ ohó po walọyizan mítọn lẹ po nọ gọalọ nado de vlẹko sẹ̀ sọn oyín Jehovah tọn go gbọn? (Sọ pọ́n yẹdide lọ lẹ.)
14 Mí jlo na gọalọ nado de vlẹko lẹpo sẹ̀ sọn oyín Jehovah tọn go. Lẹnnupọndo ninọmẹ ehe ji: A do họntọn vivẹ́ de he jọmẹ bo nọ tlúalọ bosọ nọ jonamẹ. To gbèdopo, a sè bọ mẹde to whẹsadokọna họntọn towe dọ e yin kanylantọ podọ nugbomadọtọ. Etẹwẹ a na wà? A na yiavùnlọna ẹn. Mọdopolọ, to whenue Satani po mẹhe tin to nuyiwadomẹji etọn glọ lẹ po tẹnpọn nado kọnmasin do yinkọ dagbe Jehovah tọn go bo hẹn lalo lẹ gbayipe gando Ewọ go, mí nọ yinuwa gbọn nugbo lọ didọ gando Jehovah go dali, podọ gbọn zohunhun yíyí do yiavùnlọna oyín Etọn dali. (Salm. 34:1; Isa. 43:10) Mí nọ dohia dọ mí jlo na yí alindọn mítọn lẹpo do sẹ̀n Jehovah gbọn ohó po walọyizan mítọn lẹ po dali.
Be a na gọalọ nado yiavùnlọna oyín Jehovah tọn ya? (Pọ́n hukan 14tọ)b
15. Nawẹ apọsteli Paulu mọaleyi sọn yanwle etọn lẹ didiọ mẹ gbọn? (Filipinu lẹ 3:7, 8)
15 Mí nọ desọn ojlo mẹ bo nọ diọ yanwle mítọn lẹ to gbẹ̀mẹ nado sọgan sẹ̀n Jehovah to aliho he ewọ kẹalọyi mẹ kavi to gigọ́ mẹ. Di apajlẹ, apọsteli Paulu de nado jo otẹn nukundeji he mẹ e te to sinsẹ̀n Ju lẹ tọn mẹ do nado sọgan hodo Klisti bo sẹ̀n Jehovah. (Gal. 1:14) Taidi kọdetọn de, gbẹzan etọn doale bọ dotẹnmẹ lọ hundote na ẹn nado dugán hẹ Klisti to olọn mẹ. Nudide etọn nado sẹ̀n Jehovah ma vẹna ẹn pọ́n gbede, mọ e ma na vẹna mílọsu.—Hia Filipinu lẹ 3:7, 8.
16. Etẹwẹ mí plọn sọn numimọ Julia tọn mẹ? (Sọ pọ́n yẹdide lọ lẹ.)
16 Eyin mí yí Jehovah sinsẹ̀n do basi yanwle tangan mítọn, gbẹzan mítọn gán doale todin podọ to sọgodo. Lẹnnupọndo numimọ mẹmẹyọnnu de he nọ yin Julia tọn ji. Whẹpo Julia do plọn nugbo lọ, sọn pẹvi gbọ́n wẹ e nọ jihàn to hànjigbẹ́ ṣọṣi tọn de mẹ. Hànjitọ azọ́nyọnẹntọ he nọ jihàn to nupọntẹn daho opéra tọn de doayi nunina etọn go bo plọnazọ́n ẹn. E ma dẹn bọ Julia jẹ yindi ji bo nọ jihàn to núhò-tẹn dahodaho lẹ. Dile e to wehọmẹ hànjiji tọn he mẹsusu yọnẹn de yì, wehọmẹvigbẹ́ de jẹ hodọna ẹn ji gando Jiwheyẹwhe go bo basi zẹẹmẹ na ẹn dọ Jiwheyẹwhe tindo oyín de, enẹ wẹ Jehovah. Ojlẹ vude to enẹgodo, Julia jẹ Biblu plọn ji whla awe to sẹmẹsẹmẹ. To godo mẹ, e basi dide nado ze Jehovah sinsẹ̀n do otẹn tintan mẹ to gbẹzan etọn mẹ kakati nado doafọna nuhiho. Nudide enẹ ma bọawu. E dọmọ: “Mẹsusu wẹ dọna mi dọ, nunina ṣie wẹ n’yí do to aihunda, amọ́ n’jlo na yí gbẹzan ṣie do sẹ̀n Jehovah to gigọ́ mẹ.” Etẹwẹ yin numọtolanmẹ etọn to egbehe gando nudide he e ko basi sọn owhe 30 linlán die enẹ go? E dọmọ: “N’tindo jijọho ahun mẹ tọn, podọ n’deji dọ Jehovah na na mi ojlo ahun ṣie mẹ tọn lẹpo to sọgodo.”—Salm. 145:16.
Eyin mí yí Jehovah sinsẹ̀n do basi yanwle tangan mítọn, mí nọ duvivi gbẹzan he doale hugan lọ tọn (Pọ́n hukan 16tọ)c
ZINDONUKỌN TO JEHOVAH SINSẸ̀N MẸ
17. Nawẹ niyaniya-yinyin ojlẹ he mẹ mí te lẹ tọn nọ gando mẹhe ko de nado sẹ̀n Jiwheyẹwhe lẹ po mẹhe ma ko wàmọ lẹ po go gbọn?
17 Mí to gbẹnọ to vivọnu pete titonu ehe tọn. Apọsteli Paulu wlan dọmọ: “Na ‘whenu vude dogọ’ wẹ e pò, bọ ‘ewọ he ja lọ na wá bo ma na dọngbàn.’” (Heb. 10:37) Nawẹ ehe gando mí go gbọn? Jẹnukọn whẹ́, ojlẹ he pò na mẹlẹ nido de nado sẹ̀n Jehovah ma sù paali. (1 Kọl. 7:29) Podọ eyin mí ko de nado sẹ̀n Jiwheyẹwhe, mí yọnẹn dọ mahopọnna dọ mí na doakọnna whlepọn lẹ, “whenu vude dogọ” wẹ e na yinmọ na.
18. Etẹwẹ Jesu po Jehovah po jlo dọ mí ni wà?
18 Jesu na tuli devi etọn lẹ, e ma yin nado jẹ hihodo e ji poun, amọ́ nado to hihodo e zọnmii. (Mat. 16:24) Enẹwutu eyin mí ko to Jehovah sẹ̀n na owhe susu, mì gbọ mí ni magbe ma nado jogbe. Mí dona to vivẹnudo zọnmii nado to gbẹnọ sọgbe hẹ nudide mítọn nado sẹ̀n ewọ. E gán nọma bọawu, amọ́ lehe mí na do ayajẹ bosọ duvivi dona susu lẹ tọn do sọ, etlẹ yin todin!—Salm. 35:27.
19. Etẹwẹ mí plọn sọn numimọ Gene tọn mẹ?
19 Mẹdelẹ nọ lẹndọ Jehovah sinsẹ̀n nọ biọ avọ́sinsan susu. Eyin jọja de wẹ a yin, be a nọ do numọtolanmẹ lọ dọ nude to gbigbọ gowe na a to Jehovah sẹ̀n wutu wẹ ya? Mẹmẹsunnu jọja de he nọ yin Gene dọmọ: “N’do numọtolanmẹ lọ dọ Kunnudetọ Jehovah tọn he n’yin nọ glọnali nususu tọn na mi. E taidi dọ susu ogbẹ́ ṣie lẹ tọn wẹ nọ duvivi nudelẹ tọn taidi agọ́ dùdù, tintọ́n hẹ omẹ vijinu awetọnọ de kavi aihundida video ji tọn he bẹ danuwiwa hẹn lẹ to whenue yẹn dona nọ zan whenu ṣie to opli lẹ ji podọ to lizọnyizọn lọ mẹ.” Nawẹ linlẹn enẹ yinuwado Gene ji gbọn? E dọmọ: “N’jẹ gbẹzan awe zan ji bosọ dugbẹ na ojlẹ de. Amọ́, enẹ ma hẹn ayajẹ he dẹn-to-aimẹ depope wá na mi. N’jẹ nulẹnpọndo nugbo Biblu tọn he n’de nado dovọ́na lọ lẹ ji bo magbe nado yí ahun lẹpo do sẹ̀n Jehovah. Sọn whenẹnu, e taidi dọ Jehovah ko na gblọndo na odẹ̀ ṣie lẹ dopodopo wẹ nkọ.”
20. Etẹwẹ dona yin gbemima mítọn?
20 Salmu-kantọ de jihàn dọmọ: “Ayajẹnọ wẹ mẹhe hiẹ de bo dọ̀n ẹn sẹpọ dewe nado nọ nọ̀ awánu towe lẹ mẹ.” (Salm. 65:4) Mì gbọ mí ni tindo gbemima dopolọ taidi Jọṣua he dọmọ: “Na yẹn po whédo ṣie po tọn, Jehovah wẹ mí na nọ sẹ̀n.”—Jọṣ. 24:15.
OHÀN 28 Họntọnjiji hẹ Jehovah
a Yinkọ delẹ ko yin didiọ.
b ZẸẸMẸ YẸDIDE LẸ TỌN: To whenue nawe de ko dotó nukundiọsọmẹtọ mítọn lẹ to gbonu nọtẹn plidopọ tọn de tọn godo, e dọnsẹpọ kẹkẹvi kunnudide tọn de bo sè ohó nugbo tọn lẹ.
c ZẸẸMẸ YẸDIDE TỌN : Nujijọ he yin vivọbasi de do nudide he Julia basi nado yí Jehovah sinsẹ̀n do basi yanwle tangan etọn to gbẹ̀mẹ hia.