HOSỌ OPLỌN TỌN 20
OHÀN 7 Jehovah, Huhlọn Mítọn
Nọ Lẹhlan Jehovah Nado Mọ Homẹmimiọn
“Pipà ni tin hlan . . . Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn.”—2 KỌL. 1:3.
NUHE E BẸHẸN
Nuhe mí plọn sọn aliho he mẹ Jehovah miọnhomẹna Ju he to kanlinmọgbenu lẹ te mẹ.
1. Basi zẹẹmẹ ninọmẹ Ju he to kanlinmọgbenu lẹ tọn.
YÍ NUKUN homẹ tọn do pọ́n numọtolanmẹ he Ju he to kanlinmọgbenu lẹ dona ko tindo. Yé mọ bọ otò yetọn yin vivasudo. Na ylando yewlẹ po tọgbo yetọn lẹ po tọn wutu, yé yin bibẹ sọn owhé yetọn lẹ gbè sọyi otò devo mẹ. (2 Otàn. 36:15, 16, 20, 21) Na nugbo tọn, kanlinmọ he to Babilọni lẹ do mẹdekannujẹ jẹ obá de mẹ nado penukundo nuwiwa egbesọegbesọ tọn yetọn lẹ go. (Jel. 29:4-7) Etomọṣo, gbẹninọ ma bọawuna yé, podọ e họnwun dọ enẹ ma na ko yin gbẹzan he yé na ko de nado zan. Etẹwẹ yin numọtolanmẹ yetọn gando ninọmẹ yetọn go? Doayi nuhe Ju nugbonọ he to kanlinmọgbenu de dọ lẹ go, e dọmọ: “Tọ̀sisa Babilọni tọn lẹ tó wẹ mí sin. Mí sọ viavi to whenue mí flin Ziọni.” (Salm. 137:1) Kanlinmọ he jẹflumẹ sinsinyẹn ehelẹ do hudo homẹmimiọn tọn, amọ́ fie wẹ yé gán mọ homẹmimiọn te?
2, 3. (a) Etẹwẹ Jehovah wà na Ju he to kanlinmọgbenu lẹ? (b) Etẹwẹ mí na gbadopọnna to hosọ ehe mẹ?
2 Jehovah wẹ “Jiwheyẹwhe homẹmimiọn lẹpo tọn.” (2 Kọl. 1:3) Taidi Jiwheyẹwhe owanyinọ de, homẹ etọn nọ hùn nado miọnhomẹna mẹhe nọ dọnsẹpọ ẹ lẹpo. Jehovah yọnẹn dọ delẹ to kanlinmọ lọ lẹ mẹ na kẹalọyi mẹplọnlọ etọn bo lẹkọwa ewọ dè. (Isa. 59:20) Enẹwutu, owhe 100 linlán jẹnukọnna kanlinmọgbenu yìyì lọ, ewọ gbọdo yẹwhegán Isaia nado kàn owe he tindo yinkọ etọn lọ. Po yanwle tẹ po? Isaia dọmọ: “‘Mì miọnhomẹna omẹ ṣie lẹ, mì miọnhomẹna yé,’ wẹ Jiwheyẹwhe mìtọn dọ.” (Isa. 40:1) Mọwẹ, gbọn kandai yẹwhegán etọn lẹ tọn gblamẹ, Jehovah na Ju he to kanlinmọgbenu lọ lẹ homẹmimiọn he yé na do hudo etọn.
3 Taidi kanlinmọ Ju enẹlẹ, mílọsu nọ do hudo homẹmimiọn tọn sọn ojlẹ de mẹ jẹ devo mẹ. To hosọ ehe mẹ, mí na gbadopọnna aliho atọ̀n he mẹ Jehovah miọnhomẹna kanlinmọ lọ lẹ te: (1) E dopà nado jona mẹhe lẹnvọjọ lẹ, (2) e na todido omẹ etọn lẹ, podọ (3) e hẹn yé deji. Dile mí to dogbapọnna nuagokun ehelẹ, doayi lehe mí gán mọaleyi sọn hogbe jidevọnamẹ tọn Jehovah tọn lẹ mẹ do go.
JEHOVAH NỌ GBỌN LẸBLANU DALI JONA MÍ
4. Nawẹ Jehovah dohia gbọn dọ emi yin Jiwheyẹwhe lẹblanunọ? (Isaia 55:7)
4 Jehovah wẹ “Otọ́ lẹblanu sisosiso lẹ tọn.” (2 Kọl. 1:3) E do jẹhẹnu enẹ hia whenue e dopà nado jona kanlinmọ he lẹnvọjọ lẹ. (Hia Isaia 55:7.) E dọmọ: “Yẹn na gbọn owanyi nugbo madopodo dali do lẹblanu hia we.” (Isa. 54:8) Nawẹ Jehovah na do lẹblanu etọn hia gbọn? Dile etlẹ yindọ Ju lẹ taidi akọta de gbẹ́ dona jiya kọdetọn nuyiwa yetọn lẹ tọn, Jehovah dopà dọ yé ma na nọ Babilọni kakadoi. Yé na nọ kanlinmọgbenu na ojlẹ tangan de poun. (Isa. 40:2) Lehe hogbe ehelẹ dona ko miọnhomẹna mẹhe lẹnvọjọ to yé mẹ lẹ bosọ vọ́ jide na yé do sọ!
5. Naegbọn mí tlẹ do tindo whẹwhinwhẹ́n susu hú kanlinmọ Ju lẹ nado yọ́n pinpẹn lẹblanu Jehovah tọn?
5 Etẹwẹ mí plọn? Jehovah ko wleawufo nado jona devizọnwatọ etọn lẹ susugege. To egbehe, mí sọ tindo whẹwhinwhẹ́n susu hú Ju kanlinmọ lẹ nado yọ́n pinpẹn nugbo ehe tọn. Gbọnna? Mí mọnukunnujẹ dodonu he ji jonamẹ Jehovah tọn sinai do mẹ. Owhe kanweko susu lẹ to whenue Isaia ko dọ dọdai godo, Jehovah do Visunnu yiwanna etọn hlan aigba ji nado wá suahọ ofligọ tọn do ota ylandonọ he lẹnvọjọ lẹpo tọn mẹ. Avọ́sinsan Jesu tọn zọ́n bọ ylando mítọn lẹ gán yin ‘súnsúnsún sẹ̀’ mlẹnmlẹn. (Owalọ 3:19; Isa. 1:18; Efe. 1:7) Lehe Jiwheyẹwhe he sẹ̀n mí te yin lẹblanunọ do sọ!
6. Nawẹ ayiha zizedo lẹblanu Jehovah tọn ji na wà dagbe na mí gbọn? (Sọ pọ́n yẹdide lọ.)
6 Ohó gbọdo Jehovah tọn he to Isaia 55:7 mẹ lẹ gán miọnhomẹna mí eyin numọtolanmẹ whẹhuhu tọn lẹ to tuklado mí. Delẹ to mí mẹ gán gbẹ́ nọ do numọtolanmẹ whẹhuhu tọn na nuhe mí ṣiwà wayi de, etlẹ yin to whenue mí ko lẹnvọjọ godo. Enẹ nọ yinmọ titengbe eyin mí gbẹ́ to oyà kọdetọn nuṣiwa mítọn lẹ tọn ji. Etomọṣo eyin mí ko yigbe ylando mítọn lẹ tọn bo ko sọ basi vọjlado, mí gán kudeji dọ Jehovah ko jona mí. Podọ eyin Jehovah jona mí, e nọ de ma nado vọ́ flinnu jẹ ylando mítọn lẹ ji. (Yijlẹdo Jelemia 31:34 go.) Enẹwutu, eyin Jehovah ma nọ tẹdo nuṣiwa mítọn he wayi lẹ go, mílọsu ma dona nọ wàmọ. Nuhe yin nujọnu hugan to nukun Jehovah tọn mẹ wẹ nuhe mí to wiwà to alọnu, e ma yin nuhe mí ko ṣiwà wayi lẹ. (Ezek. 33:14-16) Podọ to madẹnmẹ, Otọ́ lẹblanu sisosiso lẹ tọn na tún mí dote sọn kọdetọn nuṣiwa mítọn lẹ tọn mẹ kakadoi.
Nuhe yin nujọnu to nukun Jehovah tọn mẹ ma yin nuhe mí ṣiwà wayi lẹ, amọ́ nuhe mí to wiwà to alọnu (Pọ́n hukan 6tọ)
7. Etẹwẹ gán whàn mí nado dín alọgọ eyin mí ko to ylando de ze whlá?
7 Etẹwẹ mí dona wà eyin ayihadawhẹnamẹnu mítọn to tuklado mí na mí whlá ylando sinsinyẹn de wutu? Biblu dotuhomẹna mí nado biọ alọgọ mẹho agun tọn lẹ tọn. (Jak. 5:14, 15) Amọ́, e gán nọma bọawuna mí nado kẹalọyi nuṣiwa mítọn. Ṣigba mí na yin whinwhàn nado dọnsẹpọ sunnu nugbonọ enẹlẹ eyin mí lẹnvọjọ, podọ eyin mí flindọ Jehovah po mẹhe ewọ de nado gọalọna mí lẹ po na do owanyi po lẹblanu po hia mí. Pọ́n lehe lẹblanu Jehovah tọn miọnhomẹna Arthura do, yèdọ mẹmẹsunnu de he ayihadawhẹnamẹnu etọn to tuklado e sinsinyẹn. Arthur dọmọ: “Na nudi owhe dopo, n’nọ pọ́n yẹdide gblewa tọn lẹ. Amọ́ whenue n’sè hodidọ de gando ayihadawhẹnamẹnu go, n’yigbe ylando ṣie tọn na asi e po mẹho agun tọn lẹ po. To enẹgodo ayiha ṣie jai, amọ́ nuhe n’wà lọ gbẹ́ to tuklado mi sinsinyẹn. Mẹho lẹ flinnu mi dọ Jehovah ma gbẹ́ mi dai. E nọ domẹplọnlọ mí go na e yiwanna mí wutu. Hogbe homẹdagbe tọn yetọn lẹ mọ ahun ṣie bo gọalọna mi nado vọ́ aliho nulẹnpọn tọn ṣie jlado.” To egbehe, Arthur to sinsẹ̀n taidi gbehosọnalitọ bosọ yin devizọnwatọ lizọnyizọnwiwa tọn. Lehe e miọnhomẹnamẹ do sọ nado yọnẹn dọ Jehovah nọ do lẹblanu hia mí eyin mí lẹnvọjọ!
JEHOVAH NỌ NA MÍ TODIDO
8. (a) Todido tẹwẹ Jehovah na kanlinmọ lọ lẹ? (b) Sọgbe hẹ Isaia 40:29-31, nawẹ todido gán gọalọna Ju he lẹnvọjọ lẹ gbọn?
8 To pọndohlan gbẹtọvi tọn mẹ, Ju he to kanlinmọgbenu lẹ ma tindo todido. Babilọni he yin Huhlọn Aihọn tọn yin yinyọnẹn ma nado nọ tún kanlinmọ etọn lẹ dote. (Isa. 14:17) Etomọṣo, Jehovah na todido omẹ etọn lẹ. E dopà nado tún yé dote, podọ nudepope ma gán glọnalina ẹn. (Isa. 44:26; 55:12) To nukun Jehovah tọn mẹ, Babilọni taidi afínfín vude. (Isa. 40:15) Eyin yè fú jẹhọn do afínfín, e nọ busẹ. Nawẹ todido gán gọalọna kanlinmọ lọ lẹ gbọn? E na miọnhomẹna yé. Amọ́ e gán sọ wà humọ. Isaia wlan dọmọ: “Mẹhe ze todido yetọn do Jehovah mẹ lẹ na vọ́ huhlọn mọyi.” (Hia Isaia 40:29-31.) Mọwẹ, todido na vọ́ huhlọn na yé; yé na “yí awà lẹ do zlọn taidi akùn lẹ.”
9. Whẹwhinwhẹ́n tẹlẹ wutu wẹ kanlinmọ lọ lẹ na ko dejido opagbe Jehovah tọn lẹ go?
9 Jehovah sọ na whẹwhinwhẹ́n kanlinmọ lọ lẹ nado dejido opagbe etọn lẹ go. Gbọnna? Lẹnnupọndo dọdai he ko mọ hẹndi lẹ ji. Yé yọnẹn dọ Asilia ko gbawhàn ahọluduta agewaji tọn Islaeli tọn, bo ko sọ plan mẹlọ lẹ yì kanlinmọgbenu. (Isa. 8:4) Yé mọ bọ Babilọninu lẹ và Jelusalẹm sudo bosọ plan tòmẹnu etọn lẹ yì kanlinmọgbenu. (Isa. 39:5-7) Yé yọnẹn dọ yè tọ́nnukunna Ahọlu Zedekia bosọ hẹn ẹn yì Babilọni. (Jel. 39:7; Ezek. 12:12, 13) Nuhe Jehovah dọ dọdai etọn lẹpo wẹ mọ hẹndi. (Isa. 42:9; 46:10) Lehe ehe lẹpo na ko na huhlọn yise yetọn dogọ do sọ dọ opagbe tundote tọn he Jehovah do nasọ yin nugbo ga!
10. Etẹwẹ gán gọalọna mí nado hẹn todido mítọn go to azán godo tọn ehelẹ mẹ?
10 Etẹwẹ mí plọn? Whenue mí jẹflumẹ, todido gán miọnhomẹna mí bosọ gọalọna mí nado vọ́ huhlọn mọyi. Mí to gbẹnọ to ojlẹ he vẹawu nado pehẹ lẹ mẹ bosọ nọ diahi hẹ kẹntọ he dohuhlọn taun lẹ. Ṣogan, mí ma dona gbọjọ. Jehovah ko na mí todido jiawu de, enẹ wẹ nado nọgbẹ̀ kakadoi to jijọho po hihọ́ nujọnu tọn po mẹ. Mí dona nọ hẹn todido enẹ dogbẹ̀ to ayiha po ahun mítọn po mẹ. Eyin e ma yinmọ, todido mítọn gán dózin taidi lẹdo whanpẹnọ de pinpọn gbọn fleṣe vitlinọ he kudiho de nù. Nawẹ mí gán súnsún fleṣe enẹ, bo hẹn todido mítọn họnwun gbọn? Mí gán nọ de whenu dovo whẹwhẹ nado nọ yí nukun homẹ tọn do pọ́n lehe gbẹzan mítọn na yọ́n taun do to aihọn yọyọ lọ mẹ. Mí gán nọ hia hosọ he dọhodo todido mítọn ji lẹ, nọ pọ́n video bo nọ doto ohàn he dọhodeji lẹ. Podọ, mí gán nọ dọhona Jehovah to odẹ̀ mẹ gando opagbe he mí to jejeji nado mọ hẹndi yetọn lẹ go.
11. Etẹwẹ gọalọna mẹmẹyọnnu de he to azọ̀n sinsinyẹn jẹ nado vọ́ huhlọn mọyi?
11 Lẹnnupọndo lehe todido miọnhomẹna mẹmẹyọnnu Joy bosọ vọ́ huhlọnna ẹn mahopọnna nuhahun agbasamalo tọn sinsinyẹn etọn lẹ do ji. E dọmọ: “Whenue ninọmẹ lọ húagbọ́ mi, n’nọ dọ numọtolanmẹ sisosiso ṣie lẹ na Jehovah, na n’yọnẹn dọ e nọ mọnukunnujẹ yé mẹ wutu. Taidi kọdetọn de, Jehovah na mi ‘huhlọn he hú jọwamọ tọn.’” (2 Kọl. 4:7) Joy sọ nọ mọ ede hlan aihọn yọyọ lọ mẹ, fie “depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ’” te. (Isa. 33:24) Eyin mílọsu nọ dọ nuhe to ahun ji na mí lẹ na Jehovah to odẹ̀ mẹ bosọ nọ ze ayiha do todido mítọn ji, mí gán vọ́ huhlọn mọyi.
12. Whẹwhinwhẹ́n tẹlẹ wẹ mí do nado dejido opagbe Jehovah tọn lẹ go? (Sọ pọ́n yẹdide lọ.)
12 Dile Jehovah wà na kanlinmọ lọ lẹ do, e sọ na mílọsu whẹwhinwhẹ́n susu nado dejido opagbe etọn lẹ go. Lẹnnupọndo opagbe he to hẹndi mọ to nukun mítọn mẹ lẹ ji. Di apajlẹ, mí mọ bọ ‘apadewhe huhlọn aihọn tọn de tọn dohuhlọn bọ apadewhe etọn yin madogánnọ.’ (Dan. 2:42, 43) Mí sọ nọ sèhó gando ‘aigba sisọsisọ lẹ go he nọ tin sọn fide jẹ fide,’ podọ mí nọ doalọ to azọ́n yẹwhehodidọ tọn he na yin wiwà to “akọta lẹpo” mẹ lọ mẹ. (Mat. 24:7, 14) Dọdai ehelẹ po susu devo lẹ po nọ hẹn yise mítọn to opagbe homẹmiọnnamẹ tọn Jehovah tọn he ma ko mọ hẹndi lẹ mẹ lodo.
Dọdai he to hẹndi mọ to nukun mítọn mẹ to egbehe lẹ na mí whẹwhinwhẹ́n susu nado dejido opagbe Jehovah tọn lẹ go (Pọ́n hukan 12tọ)
JEHOVAH NỌ HẸN MÍ DEJI
13. (a) Nuhahun tẹlẹ wẹ Ju lẹ na pehẹ to tundote yetọn whenu? (b) Dile Isaia 41:10-13 dọ do, nawẹ Jehovah miọnhomẹna Ju he to kanlinmọgbenu lẹ gbọn?
13 Dile etlẹ yindọ Jehovah yí todido jiawu de do miọnhomẹna mẹhe to kanlinmọgbenu lọ lẹ, e yọnẹn dọ yé na pehẹ nuhahun lẹ to whenue yé na yin tuntundote. Jehovah ko dọ dọdai dọ jei vivọnu kanlinmọgbenu ninọ Ju lẹ tọn, awhàngbatọ de na và akọta he lẹdo Babilọni lẹ sudo bo tlẹ sọ tọ́nawhàn Babilọni lọsu. (Isa. 41:2-5) Be e na biọ dọ Ju lẹ ni hanú wẹ ya? Jehovah miọnhomẹna omẹ etọn lẹ jẹnukọn po hogbe ehelẹ po dọmọ: “A dibu blo, na yẹn tin hẹ we. A yin magbọjẹnọ blo, na yẹn wẹ Jiwheyẹwhe towe.” (Hia Isaia 41:10-13.) Etẹ na dọ wẹ e te whenue e dọ “yẹn wẹ Jiwheyẹwhe towe”? E ma to nuflin Ju lẹ nado nọ sẹ̀n ewọ gba, yèdọ nude he ko họnwun. Kakatimọ, nuflin yé wẹ e te dọ emi gbẹ́ to adà yetọn mẹ.—Salm. 118:6.
14. Aliho devo tẹ mẹ wẹ Jehovah hẹn kanlinmọ lọ lẹ deji te?
14 Jehovah sọ hẹn kanlinmọ lọ lẹ deji whenue e flinnu yé gando huhlọn po oyọnẹn madodogbó etọn po go. E basi oylọna Ju he to kanlinmọgbenu lẹ nado pọ́n sunwhlẹvu he to agahomẹ lẹ tlintlin. E dọna yé dọ emi ma dá sunwhlẹvu lẹ poun, amọ́ emi sọ yọ́n yinkọ dopodopo yetọn tọn. (Isa. 40:25-28) To whelọnu lo, nẹmunẹmu wẹ e ma na yọ́n yinkọ devizọnwatọ etọn lẹ dopodopo tọn! Podọ, eyin Jehovah tindo huhlọn nado dá sunwhlẹvu lẹ, e họnwun dọ ewọ sọ dohuhlọn nado gọalọna omẹ etọn lẹ. Mọwẹ, Ju he to kanlinmọgbenu lẹ ma do whẹwhinwhẹ́n depope nado hanú kavi dibu.
15. Nawẹ Jiwheyẹwhe wleawudaina kanlinmọ Ju lẹ gando nuhe to nukọn ja lẹ go gbọn?
15 Jehovah sọ wleawudaina omẹ etọn lẹ na nuhe to nukọn ja lẹ. To adà tintan owe Isaia tọn mẹ, Jiwheyẹwhe dọna akọta lọ dọmọ: “Mì yì bo biọ abò mìtọn lẹ mẹ, bosọ sú ohọ̀n mìtọn lẹ. Mì ze mìde whlá na ojlẹ kleun de kaka homẹgble lọ nido juwayi.” (Isa. 26:20) Wefọ ehe gán ko mọ hẹndi whla tintan whenue Ahọlu Kilusi gbawhàn Babilọni tọn. Whenuho-kantọ Glẹkinu hohowhenu tọn de dọ dọ whenue Kilusi biọ Babilọni, e “degbena [awhànfuntọ etọn lẹ] nado hù mẹhe yé mọ to gbonu lẹpo.” Yí nukun homẹ tọn do pọ́n obá he mẹ tòmẹnu Babilọni tọn lẹ na ko dibu jẹ! Amọ́, kanlinmọ Ju lọ lẹ gán ko yin whinwhlẹngán na yé setonuna anademẹ Jehovah tọn lẹ wutu.
16. Naegbọn mí ma dona nọ hanú zẹjlẹgo gando sọgodo mítọn go? (Sọ pọ́n yẹdide lọ.)
16 Etẹwẹ mí plọn? To madẹnmẹ, mí na pehẹ nukunbibia daho hugan he ma ko jọ pọ́n to whenuho gbẹtọvi tọn mẹ. To whenue e na bẹjẹeji, gbẹtọ lẹ to paa mẹ na biọ bẹwlu mẹ bo nasọ dibu taun. Amọ́, e ma na yinmọ na omẹ Jehovah tọn lẹ. Mí yọnẹn dọ Jehovah wẹ Jiwheyẹwhe mítọn. Mí na jlọ ṣite na mí yọnẹn dọ “whlẹngán [mítọn] to sisẹpọ.” (Luku 21:28) Etlẹ yin to whenue bẹplidopọ akọta lẹ tọn de na tọ́nawhàn mí, mí na nọte gligli. Jehovah na yí angẹli etọn lẹ zan nado basi hihọ́na mí bosọ na mí anademẹ gbẹwhlẹngán tọn lẹ. Nawẹ mí na mọ anademẹ enẹlẹ yí gbọn? E na biọ dọ mí ni nọte bo pọ́n. Amọ́, e yọnbasi dọ mí ni mọ anademẹ enẹlẹ yí gbọn agun mítọn lẹ gblamẹ. To linlẹn de mẹ, yé gán yin “abò” mítọn lẹ he mẹ mí na mọ hihọ́ te. Nawẹ mí gán wleawudaina nuhe to nukọn ja lẹ gbọn? Mí dona dọnsẹpọ mẹmẹsunnu po mẹmẹyọnnu mítọn lẹ po, nọ desọn ojlo mẹ nado setonuna anademẹ yẹwhehọluduta tọn lẹ bosọ kudeji dọ Jehovah wẹ to anadena titobasinanu mítọn.—Heb. 10:24, 25; 13:17.
Eyin mí nọ lẹnayihamẹpọn do huhlọn po nugopipe Jehovah tọn nado whlẹn mí po ji, e ma na biọ dọ mí ni hanú zẹjlẹgo to nukunbibia daho lọ whenu (Pọ́n hukan 16tọ)b
17. Nawẹ a gán lẹhlan Jehovah nado mọ homẹmimiọn gbọn?
17 Dile etlẹ yindọ Ju he to kanlinmọgbenu lẹ na gbọn ninọmẹ he vẹawu de mẹ, Jehovah na yé homẹmimiọn he yé na do hudo etọn. E na wà nudopolọ na mílọsu. Enẹwutu, mahopọnna nuhe sọgodo sọgan bẹhẹn lẹ, zindonukọn nado nọ lẹhlan Jehovah nado mọ homẹmimiọn yí. Mọwẹ, nọ dejido lẹblanu mayọnjlẹ etọn go. Nọ hẹn todido towe dogbẹ̀. Nọ flindọ na Jehovah wẹ Jiwheyẹwhe towe wutu, a ma do whẹwhinwhẹ́n depope nado dibu.
OHÀN 3 Huhlọn Mítọn, Todido Mítọn, Jidide Mítọn
a Yinkọ delẹ ko yin didiọ.
b ZẸẸMẸ YẸDIDE TỌN: Pipli pẹvi yisenọ lẹ tọn de pli dopọ. Yé dejido huhlọn po nugopipe Jehovah tọn nado basi hihọ́na omẹ etọn lẹ po go mahopọnna fie yé te to aigba ji.