HOSỌ OPLỌN TỌN 22
OHÀN 15 Mì Pà Plọnji Jehovah Tọn!
Oyín Jehovah Tọn—Nuhe E Zẹẹmẹdo Na Jesu
“N’ko hẹn oyín towe zun yinyọnẹn na yé bo nasọ hẹn ẹn zun yinyọnẹn.”—JOH. 17:26.
NUHE E BẸHẸN
Lehe Jesu hẹn oyín Jehovah tọn zun yinyọnẹn do gọna lehe e klan ẹn do wiwe bosọ suwhẹna ẹn do.
1, 2. (a) Etẹwẹ Jesu wà to ozán he jẹnukọnna okú etọn mẹ? (b) Kanbiọ tẹlẹ wẹ na yin hodọdeji to hosọ ehe mẹ?
YỌNNUZANGBE whèjai wẹ to Nisan 14 owhe 33 W.M., podọ ojlẹ ko dibla sọ̀ na yè nido de Jesu hia bo dawhẹna ẹn, gblewhẹdo e, sayana ẹn bosọ hù i. E ṣẹṣẹ dù núdùdù vonọtaun de hẹ apọsteli nugbonọ etọn lẹ wẹ to abò aga tọn de mẹ. To núdùdù enẹ godo, Jesu dọ ohó tulinamẹ tọn godo tọn delẹ na apọsteli etọn lẹ. Podọ ojlẹ kleun de whẹpo yemẹpo nido tọ́n sọn abò aga tọn lọ mẹ, Jesu nọte bo hodẹ̀ he tindo zẹẹmẹ taun de. Apọsteli Johanu basi kandai odẹ̀ enẹ tọn; e yin mimọ to Johanu weta 17tọ mẹ.
2 Etẹwẹ odẹ̀ Jesu tọn dehia mí gando nuhe to ahunmẹduna ẹn to ojlẹ enẹ mẹ go? Nawẹ odẹ̀ enẹ do nuhe yin nujọnu na ẹn to lizọnyizọn etọn blebu whenu to aigba ji fi hia gbọn? Mì gbọ mí ni gbadopọnna gblọndo kanbiọ ehelẹ tọn.
“N’KO HẸN OYÍN TOWE ZUN YINYỌNẸN NA YÉ”
3. Etẹwẹ Jesu dọ gando oyín Jehovah tọn go, podọ etẹwẹ nuhe e dọ zẹẹmẹdo? (Johanu 17:6, 26)
3 To odẹ̀ Jesu tọn mẹ, e dọmọ: “N’ko hẹn oyín towe zun yinyọnẹn na yé.” Na nugbo tọn, whla awe wẹ e dọ dọ emi ko hẹn oyín Jehovah tọn zun yinyọnẹn na devi emitọn lẹ. (Hia Johanu 17:6, 26.) Etẹ na dọ wẹ e te? Be oyín he yé ma yọnẹn de wẹ e dehia yé ya? Ju lẹ wẹ devi Jesu tọn lẹ, enẹwutu yé ko yọ́n oyín Jiwheyẹwhe tọn lọ, Jehovah. Oyín enẹ sọawuhia whla fọtọ́n susu lẹ to Owe-wiwe Heblu tọn lẹ mẹ. Enẹwutu, Jesu ma to alọdlẹndo oyín mẹdetiti tọn Jiwheyẹwhe tọn; kakatimọ nuhe oyín enẹ zẹẹmẹdo hodọ wẹ e te. Jesu hẹn Omẹ nankọ he Jehovah yin, lẹndai Etọn lẹ, nuyiwa Etọn lẹ, po jẹhẹnu Etọn lẹ po zun yinyọnẹn to aliho he mẹ mẹdepope ma gán wàmọ te gbede.
4, 5. (a) Apajlẹ tẹwẹ mí gán na nado do nuhe e zẹẹmẹdo nado wá yọ́n oyín mẹde tọn dogọ hia? (b) Aliho tẹ mẹ wẹ devi Jesu tọn lẹ wá yọ́n oyín Jehovah tọn dogọ te?
4 Di apajlẹ, mí ni dọ dọ mẹho agun tọn de to agun towe mẹ bo nọ yin David, podọ doto mẹzẹtọ de wẹ. A ko yọ́n mẹmẹsunnu ehe sọn owhe susu lẹ die. Amọ́ to gbèdopo, a do hudo nukunpedomẹgo dotowhé tọn niyaniya tọn de. A yawu yì dotowhé he mẹmẹsunnu enẹ nọ wazọ́n te bọ e yí azọ́nyinyọnẹn dotozọ́nwiwa tọn etọn zan nado whlẹn ogbẹ̀ towe. Be oyín mẹmẹsunnu enẹ tọn ma nasọ do zẹẹmẹ na we dogọ ya? Ayihaawe matin dọ mọwẹ! David masọ yin mẹho agun tọn he a yọnẹn dai poun ba; e sọ lẹzun doto mẹzẹtọ he whlẹn ogbẹ̀ towe gán.
5 Mọdopolọ, devi Jesu tọn lẹ ko yọ́n oyín Jehovah tọn. Amọ́, lizọnyizọn Jesu tọn zọ́n bọ oyín enẹ sọ do zẹẹmẹ he gbloada dogọ na yé. Naegbọn mí gán dọ mọ? Na Jesu nọ do jẹhẹnu Otọ́ etọn tọn lẹ hia to nuhe e nọ dọ po nuhe e nọ wà lẹpo po mẹ wutu. Enẹwutu, todidoai na nuhe Jesu plọnmẹ lẹ po aliho he mẹ e yinuwa hẹ gbẹtọ lẹ te po zọ́n bọ apọsteli etọn lẹ wá “yọ́n” Jehovah ganji dogọ.—Joh. 14:9; 17:3.
“OYÍN TOWE HE HIẸ KO NA MI LỌ”
6. Linlẹn tẹ mẹ wẹ Jehovah na oyín Etọn Jesu te? (Johanu 17:11, 12)
6 To odẹ̀ he Jesu hò do ota devi etọn lẹ tọn mẹ, e dọmọ: “Họ́ yé na oyín towe he hiẹ ko na mi lọ wutu.” (Hia Johanu 17:11, 12.) Be ehe zẹẹmẹdo dọ Jesu na yin yinyọnẹn todin taidi Jehovah wẹ ya? Paali. Doayi e go dọ to odẹ̀ Jesu tọn mẹ, e ylọ oyín Jehovah tọn dọ “oyín towe.” Enẹwutu, oyín Jehovah tọn ma lẹzun oyín mẹdetiti tọn Jesu tọn gba. Eyin mọ wẹ, etẹ na dọ wẹ Jesu te whenue e dọ dọ oyín Jiwheyẹwhe tọn ko yin nina emi? Jẹnukọn whẹ́, Jesu wẹ yin afọzedaitọ podọ Hoyidọtọ Jehovah tọn. Oyín Otọ́ etọn tọn mẹ wẹ e wá te bosọ wazọ́n huhlọnnọ lẹ to oyín enẹ mẹ. (Joh. 5:43; 10:25) Humọ, oyín Jesu tọn zẹẹmẹdo “Jehovah Wẹ Whlẹngán.” Mọwẹ, oyín Jesu tọn tindo kanṣiṣa pẹkipẹki hẹ oyín Jiwheyẹwhe tọn.
7. Na apajlẹ lehe Jesu gán dọho to oyín Jehovah tọn mẹ do tọn.
7 Di apajlẹ, na afọzedaitọ de nọ ze afọ gandutọ de tọn dai wutu, e gán dọhodo ota gandutọ lọ tọn mẹ. Enẹwutu, nuhe afọzedaitọ lọ dọ nọ do zínpinpẹn dopolọ hẹ nuhe gandutọ lọ dọ. Mọdopolọ, Jesu ze afọ Jehovah tọn dai bo dọhona gbẹtọ lẹ to oyín Etọn mẹ.—Mat. 21:9; Luku 13:35.
8. Linlẹn tẹ mẹ wẹ Jesu ‘yinuwa to’ oyín Jehovah tọn mẹ te whẹpo do wá aigba ji? (Eksọdusi 23:20, 21)
8 Nado hẹn azọngban etọn taidi Ohó lọ di, Jesu yin Hoyidọtọ Jehovah tọn bo nọ má nudọnamẹ po anademẹ he e mọyi lẹ po hẹ visunnu gbigbọmẹ tọn Jiwheyẹwhe tọn devo lẹ gọna gbẹtọvi lẹ. (Joh. 1:1-3) E yọnbasi dọ Jesu wẹ angẹli he Jehovah dohlan nado penukundo Islaelivi lẹ go to whenue yé tọ́n sọn Egipti. Whenue Jehovah to didọna Islaelivi lẹ nado setonuna angẹli enẹ, e dọmọ: “Na oyín ṣie mẹ wẹ e to nuyiwa te wutu.”a (Hia Eksọdusi 23:20, 21.) Jesu ‘yinuwa to’ oyín Jehovah tọn mẹ to linlẹn lọ mẹ dọ e ze afọ Jehovah tọn dai podọ ewọ wẹ yin tọ́ntlọ́ngbọ́n na nuhe dù avùnlọyiyi na oyín Otọ́ etọn tọn po kinklan ẹn do wiwe po.
“OTỌ́, PAGIGONA OYÍN TOWE”
9. Obá tẹ mẹ wẹ oyín Jehovah tọn yin nujọnu na Jesu jẹ? Basi zẹẹmẹ.
9 Dile mí ṣẹṣẹ dọ do, etlẹ yin whẹpo Jesu do wá aigba ji, oyín Jehovah tọn ko yin nujọnu taun na ẹn. Abajọ nuhe Jesu wà to whenue e to aigba ji lẹpo tin to kọndopọ mẹ hẹ oyín Jehovah tọn! Jei vivọnu lizọnyizọn Jesu tọn, e dọmọ: “Otọ́, pagigona oyín towe.” To afọdopolọji, Otọ́ etọn siọ ẹ po ogbè lélé de po sọn olọn mẹ dọmọ: “Yẹn ko pagigona ẹn bo nasọ vọ́ pagigona ẹn.”—Joh. 12:28.
10, 11. (a) Nawẹ Jesu pagigona oyín Jehovah tọn gbọn? (Sọ pọ́n yẹdide lọ.) (b) Naegbọn e do biọ dọ oyín Jehovah tọn ni yin kinklandowiwe bo yin whẹsuna?
10 Jesu lọsu pagigona oyín Otọ́ etọn tọn. Gbọnna? Aliho de he mẹ e wàmọ te wẹ gbọn jẹhẹnu jiawu Otọ́ etọn tọn gọna nuyiwa etọn lẹ didehia mẹdevo lẹ dali. Amọ́, gigopipana oyín enẹ sọ bẹ nudevo lẹ hẹn dogọ. Oyín Jehovah tọn dona yin kinklandowiwe bosọ yin whẹsuna.b Jesu do lehe ehe yin nujọnu sọ hia whenue e plọn odẹ̀ apajlẹnọ lọ hodotọ etọn lẹ. E dọmọ: “Otọ́ mítọn he tin to olọn mẹ, na oyín towe ni yin kinklandowiwe.”—Mat. 6:9.
11 Naegbọn e do biọ dọ oyín Jehovah tọn ni yin kinklandowiwe bo yin whẹsuna? Na eyin mí lẹkọyi jipa Edẹni tọn mẹ, Satani Lẹgba ko de yẹyi sọn Jehovah Jiwheyẹwhe go bosọ kọnmasin dego. Satani sọalọakọ́n dọ lalonọ wẹ Jehovah, podọ E sọ to nudagbe de tẹ̀ Adam po Evi po. (Jen. 3:1-5) Satani sọ dohia dọ aliho he mẹ Jehovah nọ wà nulẹ te ma yọ́n. Whẹsadokọnamẹ lalo Satani tọn kọnmasin do Jehovah kavi oyín etọn go tlọlọ. To nukọn mẹ, to ojlẹ Jobu tọn mẹ, Satani dọ po nujikudo po dọ mẹhe to Jehovah sẹ̀n lẹ nọ wàmọ kiki na nuhe yé gán mọyi sọn Ewọ si lẹ wutu. Whẹsadokọnamẹtọ enẹ sọ dohia dọ na nugbo tọn gbẹtọvi depope ma yiwanna Jehovah jẹ obá lọ mẹ nado to sinsẹ̀n Ẹn to whlepọn glọ. (Jobu 1:9-11; 2:4) E biọ whenu nado do mẹhe to lalodo to Jehovah po Satani po ṣẹnṣẹn hia.
Jesu plọn hodotọ etọn lẹ nuhewutu e do yin nujọnu nado klan oyín Jiwheyẹwhe tọn do wiwe (Pọ́n hukan 10tọ)
“YẸN ZE OGBẸ̀ ṢIE JO”
12. Etẹwẹ Jesu desọn ojlo mẹ bo wà na owanyi he e do na oyín Jehovah tọn wutu?
12 Na owanyi he Jesu tindo na Jehovah wutu, e jlo na wà nuhe go e pé lẹpo nado klan oyín etọn do wiwe bosọ suwhẹna ẹn. Jesu dọmọ: “Yẹn ze ogbẹ̀ ṣie jo.” (Joh. 10:17, 18) Mọwẹ, e tlẹ desọn ojlo mẹ bo kú na oyín Jehovah tọn wutu.c Gbẹtọvi pipé awe tintan lẹ, enẹ wẹ Adam po Evi po dogodo Jehovah bo yì adà Satani tọn mẹ. To vogbingbọn mẹ, Jesu desọn ojlo mẹ bo wá aigba ji bosọ do owanyi etọn na Jehovah hia. Jesu wà ehe gbọn tenọgli etọn go hinhẹn mlẹnmlẹn dali. (Heb. 4:15; 5:7-10) E hẹn tenọgli etọn go to gbẹzan etọn blebu mẹ, kakajẹ whenue e kú to yatin de ji. (Heb. 12:2) Gbọnmọ dali, e dohia dọ emi yiwanna Jehovah po oyín Etọn po.
13. Naegbọn Jesu wẹ to otẹn dagbe hugan mẹ nado do Satani hia di lalonọ? (Sọ pọ́n yẹdide lọ.)
13 Gbọn aliho gbẹninọ tọn Jesu tọn gblamẹ, e dohia hezeheze dọ Satani wẹ yin lalonọ, e ma yin Jehovah! (Joh. 8:44) Jesu yọ́n Jehovah hugan mẹdevo depope he ko nọgbẹ̀ pọ́n. Eyin nugbo depope tin gando owhẹ̀ he Satani sadokọna Jehovah go, Jesu na ko yọnẹn. Amọ́, Jesu magbe nado yiavùnlọna oyín dagbe Jehovah tọn. Etlẹ yin to whenue e taidi dọ Jehovah gbẹ́ Jesu dai, e desọn ojlo mẹ nado kú kakati nado vẹtolina Otọ́ yiwanna etọn.—Mat. 27:46.d
Aliho gbẹninọ tọn Jesu tọn dohia hezeheze dọ Satani wẹ yin lalonọ, e ma yin Jehovah! (Pọ́n hukan 13tọ)
“N’KO DOTANA AZỌ́N HE HIẸ NA MI NADO WÀ”
14. Nawẹ Jehovah suahọ Jesu na nugbonọ-yinyin etọn gbọn?
14 To odẹ̀ he Jesu hò to ozán he jẹnukọnna okú etọn mẹ, e dọmọ: “N’ko dotana azọ́n he hiẹ na mi nado wà.” E deji dọ Jehovah na suahọ emi na nugbonọ-yinyin emitọn. (Joh. 17:4, 5) Jesu sin owhẹ̀ whẹ́n nado dejido Otọ́ etọn go. Jehovah ma dike ewọ ni gbọṣi yọdò mẹ. (Owalọ 2:23, 24) E fọ́n Jesu sọnku bo na ẹn otẹn he yiaga taun de to olọn mẹ. (Flp. 2:8, 9) To godo mẹ, Jesu jẹ gandu ji taidi Ahọlu Ahọluduta Jiwheyẹwhe tọn. Etẹwẹ Ahọluduta enẹ na wadotana? Adà awetọ odẹ̀ apajlẹnọ lọ tọn dọ dọ: “Na Ahọluduta towe ni wá. Na ojlo towe [Jehovah tọn] ni yin wiwà, kẹdẹdi to olọn mẹ, mọdopolọ to aigba ji.”—Mat. 6:10.
15. Nudevo tẹwẹ Jesu na wadotana?
15 To sọgodo he to yakẹ de, Jesu na funawhàn sọta kẹntọ Jiwheyẹwhe tọn lẹ bo na và mẹylankan lẹ sudo to Amagẹdọni. (Osọ. 16:14, 16; 19:11-16) Ojlẹ kleun de to enẹgodo, ewọ na ze Satani dlan “odò mapote” mẹ, yèdọ do ninọmẹ nude ma yiwà tọn mẹ. (Osọ. 20:1-3) Jesu na hẹn jijọho gọwá na gbẹtọvi lẹ bosọ hẹn yé jẹ pipé kọ̀n to Gandudu Owhe Fọtọ́n tọn etọn whenu. E na fọ́n oṣiọ lẹ sọnku. E na hẹn aigba lọ blebu zun paladisi de. Lẹndai Jehovah tọn na mọ hẹndi!—Osọ. 21:1-4.
16. Etẹwẹ na yin wiwadotana jei vivọnu Gandudu Owhe Fọtọ́n tọn lọ tọn?
16 Etẹwẹ mí gán donukun dọ e na jọ jei vivọnu Gandudu Owhe Fọtọ́n tọn lọ tọn? Ylando po mape gbẹtọvi lẹ tọn po na busẹ. E ma nasọ biọ dọ gbẹtọvi lẹ ni biọ jona ylando yetọn lẹ tọn to dodonu ofligọ lọ tọn ji ba; mọ yé ma nasọ do hudo whẹgbọtọ kavi yẹwhenọduta de tọn ba. Podọ “kẹntọ godo tọn, yèdọ okú [he Adam hẹnwa na ko yin] hinhẹn zun ovọ́.” Yọdò lẹ na jẹvọ́. Oṣiọ lẹ na yin hinhẹngọwa ogbẹ̀. Mẹhe to aigba ji lẹpo na yin pipé. —1 Kọl. 15:25, 26.
17, 18. (a) Etẹwẹ na jọ to vivọnu Gandudu Owhe Fọtọ́n tọn lọ tọn? (b) Etẹwẹ Jesu na wà whenue ojlẹ lọ sọ̀ nado dotana gandudu etọn? (1 Kọlintinu lẹ 15:24, 28) (Sọ pọ́n yẹdide lọ.)
17 Nudevo tẹwẹ na jọ to vivọnu Gandudu Owhe Fọtọ́n tọn lọ tọn? To ojlẹ enẹ mẹ, onú vonọtaun de na jọ. Nudindọn he gando klandowiwe oyín Jehovah tọn go na wá vivọnu. Gbọnna? To jipa Edẹni tọn mẹ, Satani sọalọakọ́n dọ Jehovah yin lalonọ bo ma nọ dugán do gbẹtọvi lẹ ji po owanyi po. Sọn whenẹnu, oyín etọn ko yin kinklandowiwe whlasusu gbọn mẹhe nọ gbògbéna ẹn bosọ nọ na ẹn sisi lẹ dali. Enẹwutu, to vivọnu Gandudu Owhe Fọtọ́n tọn lọ tọn, yinkọ dagbe Jehovah tọn na yin whẹsuna mlẹnmlẹn. E na ko dohia to aliho he họnwun mẹ dọ emi yin Otọ́ olọn mẹ tọn owanyinọ de.
18 To godo mẹ, whẹsadokọnamẹ Satani tọn na yin didohia taidi lalo whladopo podọ kakadoi. Etẹwẹ Jesu na wà whenue ojlẹ na sọ̀ na ẹn nado dotana gandudu etọn? Be e na hodo apajlẹ Satani tọn bo ṣiatẹ sọta Jehovah wẹ ya? Lala! (Hia 1 Kọlintinu lẹ 15:24, 28.) Jesu na gọ̀ Ahọluduta lọ jo na Otọ́ etọn. E na litaina gandudu Jehovah tọn. Mọwẹ, to vogbingbọn mẹ na Satani, Jesu wleawufo nado jo nulẹpo do na owanyi he e do na Jehovah tọn wutu.
Jesu to didesọn ojlo mẹ nado gọ̀ Ahọluduta lọ jo na Jehovah to vivọnu Gandudu Owhe Fọtọ́n tọn etọn tọn (Pọ́n hukan 18tọ)
19. Etẹwẹ oyín Jehovah tọn zẹẹmẹdo na Jesu?
19 Abajọ Jehovah do desọn ojlo mẹ nado na oyín Etọn Jesu! Jesu ko dohia dọ emi yin afọzedaitọ pipé Otọ́ emitọn tọn. Enẹwutu, etẹwẹ oyín Jehovah tọn zẹẹmẹdo na Jesu? E yin nujọnu na ẹn hugan nudevo depope. E desọn ojlo mẹ bo kú do oyín enẹ tamẹ, podọ e wleawufo nado gọ̀ nulẹpo jo na Jehovah to vivọnu Gandudu Owhe Fọtọ́n tọn lọ tọn. Nawẹ mí gán hodo apajlẹ Jesu tọn gbọn? Mí na dọhodo gblọndo kanbiọ enẹ tọn ji to hosọ he bọdego mẹ.
OHÀN 16 Mì Pà Jehovah Na Ovi Yiamisisadode Etọn
a To ojlẹ delẹ mẹ, angẹli lẹ lọsu ze afọ Jehovah tọn dote to whenue yé dowẹn delẹ to oyín etọn mẹ. Enẹ wẹ zọ́n bọ to fidelẹ to Biblu mẹ, angẹli de gán yin alọdlẹndo taidi dọ ewọ wẹ Jehovah lọsu. (Jen. 18:1-33) Dile etlẹ yindọ Owe-wiwe lẹ dọ dọ Mose mọ Osẹ́n lọ yí sọn Jehovah dè, wefọ devo lẹ dohia dọ angẹli lẹ wẹ Jehovah yizan nado na Osẹ́n enẹ do oyín Etọn tamẹ.—Lev. 27:34; Owalọ 7:38, 53; Gal. 3:19; Heb. 2:2-4.
b ZẸẸMẸ HOGBE LẸ TỌN: Nado “klandowiwe” zẹẹmẹdo nado gbògbéna, yí nukun onú wiwe tọn do pọ́n kavi na sisi sisosiso. Nado “suwhẹna” zẹẹmẹdo nado súnsún whẹsadokọnamẹ lalo lẹ sẹ̀ sọn oyín dagbe mẹde tọn go kavi nado yiavùnlọna mẹlọ kavi dohia dọ e ma hùwhẹ whẹsadokọnamẹ agọ̀ kavi masin he yin kinkọ̀n dego tọn.
c Okú Jesu tọn sọ hùn ali ogbẹ̀ madopodo tọn na gbẹtọvi lẹ.
d Pọ́n “Kanbiọ Lẹ sọn Wehiatọ Lẹ Dè” to Atọ̀họ̀-Nuhihọ́ lọ Tọn, avril 2021, weda 30-31 tọn mẹ.