Be A Ko “Plọn Aṣli” Pekọ Tintindo Tọn Ya?

1. Etẹwẹ pekọ tintindo zẹẹmẹdo, podọ etẹwẹ e ma zẹẹmẹdo?

BE A nọ do pekọ ya? Mẹhe yin pekọnọ nọ do ayajẹ po jijọho po, na e nọ ze ayiha do dona etọn alọnu tọn lẹ ji wutu. E ma nọ duadi kavi gblehomẹ na nuhe e ma tindo lẹ wutu. Etomọṣo pekọnọ-yinyin ma zẹẹmẹdo nado yin vọdonanutọ. Di apajlẹ, e sọgbe dọ Klistiani de ni dín dotẹnmẹ lẹ nado gbloada na lizọnyizọn etọn. (Lom. 12:1; 1 Tim. 3:1) Etomọṣo, e ma nọ hẹn ayajẹ etọn bu eyin e ma yawu mọ lẹblanulọkẹyi sinsẹ̀nzọn tọn lẹ yí dile e donukun etọn do.

2. Naegbọn pekọ matindo do ylan taun?

² Pekọ matindo gán hẹn kọdetọn vẹadi lẹ wá. Mẹhe ma nọ do pekọ to nuhe yé tindo lẹ mẹ gbede lẹ gán nọ wazọ́n na gànhiho susu nado tindo agbasanu he yé ma do hudo yetọn nugbonugbo lẹ. E blawu dọ Klistiani delẹ tlẹ ko fìn akuẹ po nudevo he yé do ojlo na lẹ po. Yé gán ko dọna yede dọ, ‘n’jẹna ma,’ ‘n’ko to dindin din e ma pọ́,’ kavi ‘n’gán wá gọ̀ akuẹ lọ do otẹn etọn mẹ to nukọn mẹ.’ Etomọṣo, ajojijẹ wunmẹ depope ma nọ hẹn homẹ Jehovah tọn hùn podọ e nọ de yẹyi sọn ewọ go. (Howh. 30:9) Na mẹdevo lẹ ma ko mọ lẹblanulọkẹyi sinsẹ̀nzọn tọn de yí wutu, yé jẹflumẹ sọmọ bo jo Jehovah sinsẹ̀n do mlẹnmlẹn. (Gal. 6:9) Nawẹ sinsẹ̀n-basitọ Jehovah tọn he klan ede do wiwe de tlẹ gán lẹn nado wàmọ gbọn? Nuhahun lọ gán yindọ mẹlọ masọ nọ do pekọ ba.

3. Nugbo he vọ́ jidenamẹ tẹwẹ mí plọn to Filipinu lẹ 4:11, 12 mẹ?

³ Mímẹpo wẹ gán plọn nado nọ do pekọ. Apọsteli Paulu wlan dọ emi ko ‘plọn nado tindo pekọ mahopọnna ninọmẹ depope he mẹ emi tin te.’ (Hia Filipinu lẹ 4:11, 12.) E wlan hogbe ehelẹ to whenue e to gànpamẹ. Mahopọnna enẹ, e ma hẹn ayajẹ etọn bu. E ko “plọn aṣli” pekọ tintindo tọn. Eyin e nọ vẹawuna mí nado do pekọ, hogbe Paulu tọn lẹ po numimọ etọn po gán hẹn mí kudeji dọ mí gán wleawuna pekọ. Mí ma dona nọ donukun dọ mí na lẹzun pekọnọ to ninọmẹ mítọn lẹ mẹ to jọwamọ-liho. Kakatimọ, mí dona plọn nado nọ do pekọ. Gbọnna? Mì gbọ mí ni dọhodo jẹhẹnu delẹ ji he na gọalọna mí nado plọn aṣli pekọ tintindo tọn.

WLEAWUNA PINPẸN-NUTỌN-YINYỌNẸN

4. Nawẹ gbigbọ pinpẹn-nutọn-yinyọnẹn tọn tintindo nọ gọalọna mí nado nọ do pekọ gbọn? (1 Tẹsalonikanu lẹ 5:18)

⁴ Mẹhe nọ yọ́n pinpẹn nutọn nọ saba do pekọ. (Hia 1 Tẹsalonikanu lẹ 5:18.) Di apajlẹ, eyin mí nọ yọ́n pinpẹn dandannu gbẹ̀mẹ tọn he mí do lẹ tọn nugbonugbo, e nọ bọawuna mí ma nado nọ hanú zẹjlẹgo gando nuhe mí jlo amọ́ bo ma tindo lẹ go. Eyin mí nọ lẹnnupọndo lẹblanulọkẹyi sinsẹ̀nzọn tọn he mí to vivi yetọn dù to alọnu lẹ ji bo nọ yọ́n pinpẹn yetọn, e na zọ́n bọ mí na ze ayiha do nuhe go mí pé lẹpo wiwà to azọ́ndenamẹ mítọn mẹ ji, kakati nado tindo ojlo zogbe na azọ́ndenamẹ yọyọ de. Abajọ, Owe-wiwe lẹ dotuhomẹna mí nado nọ zan hogbe pẹdido tọn lẹ na Jehovah to odẹ̀ mítọn lẹ mẹ! Gbigbọ pinpẹn-nutọn-yinyọnẹn tọn tintindo nọ gọalọna mí nado tindo “jijọho Jiwheyẹwhe tọn he yiaga hugan nukunnumọjẹnumẹ lẹpo.”—Flp. 4:6, 7.

5. Whẹwhinwhẹ́n tẹlẹ wutu wẹ Islaelivi lẹ dona ko yọ́n pinpẹn nutọn? (Sọ pọ́n yẹdide lọ.)

⁵ Lẹnnupọndo nuhe jọ do Islaelivi lẹ go ji. Whlasusu wẹ yé wule na Jehovah, bo nọ ví núdùdù he yé nọ saba dù to Egipti lẹ. (Sọh. 11:4-6) Na nugbo tọn, gbẹninọ to danfafa ji ma bọawu. Etẹwẹ na ko gọalọna yé nado do pekọ? Yé dona ko lẹnnupọndo nuhe Jehovah ko wà na yé lẹ ji bo yọ́n pinpẹn yetọn. To Egipti, yèdọ fihe yè nọ yinuwa hẹ yé po kanyinylan po taidi kanlinmọ lẹ te, Jehovah hẹn azọ̀nylankan ao wá nukunbianamẹtọ yetọn lẹ ji. To whenue Islaelivi lẹ yin tuntundote godo, yé “bẹ adọkunnu Egiptinu lẹ tọn yì,” yèdọ fataka, sika po avọ̀ yetọn lẹ po. (Eks. 12:35, 36) Whenue yè yangbé Islaelivi lẹ tọn kakajẹ Ohù Vẹẹ kọ̀n, Jehovah má osin lọ do awe to azọ́njiawu-liho. Podọ dile yé to gbejizọnlinzin gbọn danfafa ji, ewọ nọ na yé manna egbesọegbesọ nado dù. Bọ etẹwẹ yin nuhahun lọ lo? Islaelivi lẹ ma do pekọ, e ma yin na núdùdù he yé do hudo etọn hán yé wutu wẹ gba, amọ́ na yé ma yọ́n pinpẹn nuhe yé ko do lẹ tọn wutu.

6. Etẹwẹ yin aliho delẹ he mẹ mí gán wleawuna pinpẹn-nutọn-yinyọnẹn te?

⁶ To whelọnu lo, nawẹ a gán wleawuna pinpẹn-nutọn-yinyọnẹn gbọn? Tintan, nọ de whenu dovo to azán dopodopo ji nado lẹnnupọndo onú dagbe he a duvivi etọn lẹ ji. A tlẹ gán kàn onú awe kavi atọ̀n he a yọ́n pinpẹn yetọn lẹ dai. (Avi. 3:22, 23) Awetọ, nọ do pinpẹn-nutọn-yinyọnẹn towe hia. Ze afọdide tintan lọ nado dọnudo mẹdevo lẹ na nuhe yé ko wà na we. Hú popolẹpo, nọ dopẹna Jehovah whẹwhẹ. (Salm. 75:1) Atọ̀ntọ, nọ dogbẹ́ hẹ mẹhe nọ yọ́n pinpẹn nutọn lẹ. Pinpẹn-nutọn-yinyọnẹn nọ yinuwado mẹdevo lẹ ji; mọdopolọ wẹ e te na pekọ matindo. (Deut. 1:26-28; 2 Tim. 3:1, 2, 5) Eyin mí nọ dín dotẹnmẹ lẹ nado do pinpẹn-nutọn-yinyọnẹn hia, e na vẹawu taun dọ numọtolanmẹ he pekọ matindo nọ hẹnwa lẹ ni bẹpla mí.

7. Etẹwẹ Aci wà nado wleawuna pinpẹn-nutọn-yinyọnẹn, podọ etẹwẹ yin kọdetọn lọ?

⁷ Lẹnnupọndo nuhe jọ do Aci he nọ nọ̀ Indonésie go ji. E dọmọ: “To azọ̀n bẹplamẹ COVID-19 tọn whenu, n’jẹ ninọmẹ ṣie lẹ yijlẹdo yisenọ hatọ ṣie lẹ tọn go ji. Taidi kọdetọn de, n’masọ do pekọ ba.” (Gal. 6:4) Etẹwẹ gọalọna ẹn nado diọ pọndohlan etọn? Aci dọmọ: “N’jẹ dona he n’nọ mọ egbesọegbesọ lẹ hia ji bosọ nọ lẹnnupọndo nudagbe susu he n’ko mọyi na n’to titobasinanu Jiwheyẹwhe tọn mẹ wutu lẹ ji. Enẹgodo, n’dopẹ́ yetọn na Jehovah. Ehe zọ́n bọ n’wá do pekọ nugbonugbo.” Eyin linlẹn agọ̀ lẹ to agbọ́ hú we, be a gán ze afọdide dopolọ lẹ bo nọ do pinpẹn-nutọn-yinyọnẹn hia whladopo dogọ ya?

NỌ ZE AYIHA DO FIDOPO BO YIN WHIWHẸNỌ

8. Omọ̀ tẹ mẹ wẹ Baluki jai jẹ?

⁸ Wekantọ yẹwhegán Jelemia tọn Baluki jai jẹ omọ̀ de mẹ na ojlẹ de. Azọ́ndenamẹ Baluki tọn vẹawu taun, enẹ wẹ nado nọgodona Jelemia dile e to owẹ̀n avase tọn sinsinyẹn de lá na akọta he ma nọ yọ́n pinpẹn nutọn de. E wá jẹ fide bọ Baluki masọ nọ ze ayiha do fidopo ba. Kakati nado na ayidonugo nuhe Jehovah jlo dọ e ni wà, e taidi dọ e jẹ nulẹnpọn ji glanglan do ede po nuhe e na ko jlo e nado wà po ji. Jehovah dọna Baluki gbọn Jelemia gblamẹ dọmọ: “Hiẹ to onú daho lẹ dín na dewe. A sọ dín onú mọnkọtọn lẹ ba blo.” (Jel. 45:3-5) To hogbe devo mẹ, nuhe dọ e te wẹ yindọ: “Nọ do pekọ to ninọmẹ towe alọnu tọn lẹ mẹ.” Baluki kẹalọyi wọhẹ lọ bo to vivi nukundagbe Jehovah tọn dù zọnmii.

9. Sọgbe hẹ 1 Kọlintinu lẹ 4:6, 7, etẹwẹ whiwhẹ na whàn mí nado kẹalọyi? (Sọ pọ́n yẹdide lọ lẹ.)

⁹ To whedelẹnu, Klistiani de gán mọdọ e jẹ dọ emi ni mọ lẹblanulọkẹyi sinsẹ̀nzọn tọn de yí. E gán do nugopipe taun, nọ wazọ́n sinsinyẹn kavi tindo numimọ—kavi vlavo atọ̀n lẹpo. Amọ́, mẹdevo lẹ gán mọ lẹblanulọkẹyi he e na ko jlo lọ pẹẹ yí. Pọndohlan tẹwẹ e gán wleawuna gando whẹho lọ go? E gán lẹnnupọndo nuhe apọsteli Paulu wlan ji to 1 Kọlintinu lẹ 4:6, 7 mẹ. (Hia.) Jehovah dè wẹ lẹblanulọkẹyi kavi nugopipe depope he mí tindo wá sọn. E ma yin jlọjẹ mítọn, mọ mí ma jẹna nunina enẹlẹ. Dohia nukundagbe majẹhẹ Jehovah tọn wẹ yemẹpo yin.—Lom. 12:3, 6; Efe. 2:8, 9.

10. Nawẹ mí gán wleawuna whiwhẹ gbọn?

¹⁰ Mí gán wleawuna whiwhẹ eyin mí nọ lẹnnupọndo apajlẹ he Jesu zedai na mí ji. Lẹnnupọndo nuhe jọ to ozán he mẹ Jesu klọ́ afọ na apọsteli etọn lẹ te mẹ ji. Apọsteli Johanu wlan dọ: ‘Na Jesu yọnẹn dọ [1] Otọ́ ko yí nulẹpo do alọ emitọn mẹ [2] Jiwheyẹwhe dè wẹ emi wá sọn podọ [3] bo nasọ lẹkọyi Jiwheyẹwhe dè wutu, e jẹ afọ klọ́ na devi etọn lẹ ji.’ (Joh. 13:3-5) Jesu gán ko mọdọ emilẹ wẹ e jẹ dọ yè ni klọ́ afọ na. Amọ́, to gbẹzan aigba ji tọn etọn mẹ, e ma lẹn gbede dọ jlọjẹ emitọn wẹ nado duvivi gbẹzan fẹẹmẹninọ tọn de tọn. (Luku 9:58) Jesu yin whiwhẹnọ; e do pekọ. E ze apajlẹ pipé de dai na mí.—Joh. 13:15.

11. Nawẹ whiwhẹ gọalọna Dennis nado do pekọ gbọn?

¹¹ Dennis he nọ nọ̀ Pays-Bas ko tẹnpọn nado hodo apajlẹ whiwhẹ tọn Jesu tọn, amọ́ e ma bọawuna ẹn. E dọmọ: “To whedelẹnu, n’nọ mọ to dee mẹ dọ numọtolanmẹ goyiyi kavi pekọ matindo tọn nọ sọawuhia to ahun ṣie mẹ, taidi to whenue mẹdevo mọ lẹblanulọkẹyi sinsẹ̀nzọn tọn de yí. Eyin enẹ jọ, n’nọ plọnnu do whiwhẹ ji. To aplikasiọn JW Library^® mẹ, n’ko dohiagona wefọ tangan delẹ gando whiwhẹ go nado yawu mọ yé bo vọ́ yé hia. Humọ, n’ko yí hodidọ delẹ do alokan ṣie ji gando whiwhẹ go bo nọ saba dotoaina yé.a N’ko plọn dọ lẹndai azọ́n he wà mí te lẹpo tọn wẹ nado pagigona Jehovah, e ma yin míde. Adà vude poun yiwà wẹ dopodopo mítọn te to nuhe Jehovah to wiwadotana lẹ mẹ.” Eyin a jẹ numọtolanmẹ pekọ matindo tọn tindo ji gando ninọmẹ towe go, ze afọdide lẹ nado wleawuna whiwhẹ. Ehe na hẹn haṣinṣan towe hẹ Jehovah lodo bo gọalọna we nado do pekọ.—Jak. 4:6, 8.

NỌ LẸNAYIHAMẸPỌN DO TODIDO TOWE JI

12. Todido sọgodo tọn tẹwẹ na gọalọna mí nado do pekọ? (Isaia 65:21-25)

¹² Mí nọ do pekọ dogọ to whenue mí lẹnayihamẹpọn do todido jiawu he to nukọn na mí lọ ji. Hogbe Jehovah lọsu titi tọn he yẹwhegán Isaia kàn dai lẹ do obá he mẹ gbẹninọ to egbehe gán ṣiapọmẹ jẹ hia bosọ hẹn mí kudeji dọ Jehovah na de apọṣimẹnu enẹlẹ sẹ̀. (Hia Isaia 65:21-25.) Mí na nọ nọ̀ owhé he do hihọ́ bosọ yọnwhanpẹ lẹ gbè. Mí na do azọ́n dagbe de, podọ mí na nọ dù núdùdù hunsindagbe tọn he vivi taun lẹ. Mí ma nasọ hanú gando nuhe na hẹn owù wá na mí kavi na ovi mítọn lẹ go gbede ba. (Isa. 32:17, 18; Ezek. 34:25) Sọgodo mítọn jiawu bosọ do jide.

13. Ninọmẹ tẹlẹ mẹ na taun tọn wẹ mí dona ze ayiha do todido mítọn ji te?

¹³ Todin hugan gbede pọ́n, mí dona nọ ze ayiha do todido mítọn ji. Etẹwutu? Na mí to gbẹnọ to “azán godo tọn lẹ” mẹ, podọ mímẹpo wẹ do nuhahun he “vẹawu nado pehẹ lẹ.” (2 Tim. 3:1) Jehovah nọ gọalọna mí to azán dopodopo ji nado doakọnnanu gbọn anademẹ, huhlọn po godonọnamẹ he mí do hudo etọn po nina mí gblamẹ. (Salm. 145:14) Humọ, todido Klistiani tọn mítọn gán hẹn mí dote to ojlẹ awusinyẹn tọn lẹ mẹ. Vlavo e nọ vẹawuna we nado penukundo nuhudo whẹndo towe tọn lẹ go to agbasa-liho. Be ehe zẹẹmẹdo dọ mọjanwẹ e na nọ kakadoi ya? Paali! Jehovah ko dopà nado na we nuhe a do hudo etọn lẹ—podọ humọ e nasọ wà na we hugan mọ to Paladisi mẹ. (Salm. 9:18; 72:12-14) A gán to ahidi hẹ awufiẹsa sinsinyẹn, apọṣimẹ kavi nuhahun agbasalilo tọn sinsinyẹn devo de. Be ogbẹ̀ towe fó do finẹ bọ todido kavi kọgbọ de ma tin na we gbede wẹ ya? Lala. Azọ̀n po okú po na busẹ to aihọn yọyọ Jiwheyẹwhe tọn mẹ. (Osọ. 21:3, 4) Todido ehe nọ gọalọna mí nado do pekọ—bo dapana homẹgble po adidudu po to alọnu din. Mí gán do pekọ eyin mí tlẹ to pipehẹ whẹdida mawadodo kavi hẹn mẹyiwanna de bu to okú mẹ, to akọndona azọ̀n kavi whlepọn devo depope. Etẹwutu? Na mahopọnna lehe nuhahun mítọn dintọn lẹ na sinyẹn sọ, mí yọnẹn dọ “ojlẹ gli wẹ nukunbibia [mítọn] tin na,” podọ dọ to madẹnmẹ, mí na mọ kọgbọ tẹgbẹ tọn to aihọn yọyọ lọ mẹ.—2 Kọl. 4:17, 18.

14. Nawẹ mí gán hẹn todido mítọn lodo gbọn?

¹⁴ To whenuena e yindọ mí do hudo todido tọn nado do pekọ, nawẹ mí gán hẹn todido mítọn lodo gbọn? Kẹdẹdile mẹde gán do hudo gànnukun de tọn nado mọ nuhe to olá lẹ hlan hezeheze do, e gán biọ dọ mí ni ze afọdide he jẹ lẹ nado hẹn todido mítọn lodo, na mí nido penugo nado mọ Paladisi he to nukọn ja lọ hlan hezeheze. Eyin mí to nuhà gando akuẹ go, mí gán nọ yí nukun homẹ tọn do pọ́n lehe gbẹzan mítọn na ṣí to whenue akuẹ, ahọ́ po zẹ́nmasọ to akuẹzinzan-liho po na ko yin didesẹ godo. Eyin mí to nuhà gando lẹblanulọkẹyi sinsẹ̀nzọn tọn he mí ma ko mọyi lẹ go, mí gán lẹnnupọndo lehe nuhiha mọnkọ lẹ na lẹzun ovọ́ do ji to whenue mí jẹ pipé kọ̀n bo ko sẹ̀n Jehovah na owhe fọtọ́n susu lẹ godo. (1 Tim. 6:19) To tintan whenu, mí gán nọ mọdọ e vẹawu ma nado hanú gando ninọmẹ dintọn lẹ go bo lẹnayihamẹpọn do sọgodo ji. Amọ́ dile ojlẹ to yìyì, sọgodo he Jehovah dopà etọn pinpọnhlan gán wá lẹzun jọwamọnu na mí.

15. Etẹwẹ a plọn sọn nuhe Christa dọ lẹ mẹ?

¹⁵ Lẹnnupọndo lehe todido ko gọalọna Christa, yèdọ asi Dennis he go mí donù wayi tọn do ji. E dọmọ: “N’to azọ̀n sàsú tọn sinsinyẹn de jẹ, ehe zọ́n bọ n’nọ gbọ do kẹkẹ sẹkunọ tọn mẹ bosọ nọ to aimimlọn na whenu susu to azán dopodopo ji. Egbesọegbesọ wẹ n’nọ to awufiẹsa mẹ. To agọe, doto dọna mi dọ azọ̀n ṣie ma do pọngbọ. Amọ́ n’lẹn to afọdopolọji dọ, ‘Aliho vò mẹ wẹ e to sọgodo mọhlan te.’ N’ze ayiha do todido ṣie ji, podọ ehe nọ na mi jijọho ahun mẹ tọn. E gán biọ dọ ma doakọnnanu nado nọgbẹ̀ to aihọn ehe mẹ to egbehe, amọ́ n’na duvivi aihọn yọyọ lọ tọn to gigọ́ mẹ!”

“NUDE MA NỌ WHÈDO MẸHE NỌ DIBUSI I LẸ”

16. Naegbọn Ahọlu Davidi gán wlan dọ “nude ma nọ whèdo” mẹhe nọ dibusi Jehovah lẹ?

¹⁶ Devizọnwatọ Jehovah tọn he do pekọ de na gbẹ́ pehẹ nuhahun lẹ. E whè gbau ovi atọ̀n wẹ kú do Ahọlu Davidi. Yè sawhẹ agọ̀ dokọna ẹn, zán ẹn, podọ e họ̀njẹgbé na owhe susu, na yè to ogbé etọn yàn wutu. Etomọṣo, dile etlẹ to akọndona whlepọn sinsinyẹn de, e dọ gando Jehovah go dọmọ: “Nude ma nọ whèdo mẹhe nọ dibusi i lẹ.” (Salm. 34:9, 10) Naegbọn e gán dọ mọ? Na dile etlẹ yindọ taidi omẹ Jehovah tọn lẹ, mí ma nọ donukun dọ nuhahun lẹ na hán to gbẹzan mítọn mẹ, mí kudeji dọ nuhe mí do hudo etọn nugbonugbo lẹ ma na whèdo mí gbede. (Salm. 145:16) Podọ, mí gán deji dọ Jehovah na hẹn mí dote to nuhahun mítọn lẹpo mẹ. Mọwẹ, mí gán do pekọ.

17. Naegbọn a do magbe nado plọn aṣli pekọ tintindo tọn?

¹⁷ Jehovah jlo dọ a ni do pekọ. (Salm. 131:1, 2) Enẹwutu, dovivẹnu nado plọn aṣli pekọ tintindo tọn. Eyin a wà nuhe go a pé lẹpo nado wleawuna pinpẹn-nutọn-yinyọnẹn, ze ayiha do fidopo, yin whiwhẹnọ bosọ nọ hẹn todido towe lodo, a na penugo nado dọmọ: “Yẹn ko plọn nado tindo pekọ.”—Flp. 4:11.