Lehe Mí Gán Duto Avùnhiho Sọta Ojlo Ylankan lẹ Ji Do

1. Etẹwẹ yin nugbo gando gbẹtọvi mapenọ lẹpo go?

BE A ko tindo ojlo sinsinyẹn nado wà nude he Jehovah ma kẹalọyi pọ́n ya? Eyin mọ wẹ, ma lẹndọ mẹtẹnpọn he a pannukọn lọ sinyẹn hú mẹdevo lẹ tọn blo. Biblu dọmọ: “Whlepọn depope ma ko wá mì ji adavo dehe to paa mẹ na gbẹtọ lẹ.” (1 Kọl. 10:13) Ehe zẹẹmẹdo dọ mahopọnna ojlo ylankan depope he a to ahidi hẹ, adán dopolọ to mẹdevo lẹ gbò ga. A ma to dewe ṣo, podọ po alọgọ Jehovah tọn po, avùn lọ gán pà we.

2. Whlepọn wunmẹ tẹlẹ wẹ Klistiani po Biblu plọntọ delẹ po gán diahi hẹ? (Sọ pọ́n yẹdide lọ lẹ.)

² Biblu sọ dọmọ: “Mẹdopodopo nọ yin whiwhlepọn dile e yin dindọn yì bo yin omọ̀ do na gbọn ojlo edetiti tọn dali.” (Jak. 1:14) Nuhe yin omọ̀ na mẹde sọgan nọma yin omọ̀ na mẹdevo. Di apajlẹ, Klistiani delẹ gán yin whiwhlepọn nado doalọ to fẹnnuwiwa zanhẹmẹ tọn mẹ hẹ omẹ vijinu awetọnọ de; amọ́ mẹdevo lẹ gán yin whiwhlepọn nado wàmọ hẹ mẹhe tindo vijinu dopolọ de. Mẹdelẹ he ko jo yẹdide fẹnnuwiwa tọn pinpọn do gán tindo ojlo sinsinyẹn nado gọjẹ mọwà ji. Mẹsusu he ko jo amasin adínọ kavi ahàn sinsinyẹn ṣiṣizan do lẹ nọ pehẹ avùnnukundiọsọmẹnu dopolọ. Vude poun niyẹn to ojlo he Klistiani po Biblu plọntọ delẹ po nọ diahi hẹ lẹ mẹ. To ojlẹ delẹ mẹ, mímẹpo wẹ nọ wá tindo numọtolanmẹ dopolọ hẹ apọsteli Paulu he wlan dọ: “Whenue yẹn jlo nado wà nuhe sọgbe, nuhe ylan wẹ nọ tin to dè e.”—Lom. 7:21.

3. Nuyiwadomẹji tẹwẹ ojlo ylankan he gbọṣi aimẹ de gán tindo domẹji?

³ Eyin a to ahidi hẹ ojlo ylankan de he ma ko busẹ, e gán ṣí na we dọ a ma do huhlọn depope, dọ a ma gán duto whlepọn lọ ji wẹ nkọ. A gán sọ hẹn todido bu, bo lẹndọ Jehovah na gblewhẹdo we na a tindo ojlo ylankan lọ poun wutu. Deji dọ linlẹn enẹlẹ depope ma yin nugbo! Nado do nuhewutu mí do dọ mọ hia, to hosọ ehe mẹ, mí na gbadopọnna kanbiọ awe: (1) Fitẹ wẹ numọtolanmẹ lọ dọ a masọ do huhlọn kavi todido depope ba nọ wá sọn? (2) Nawẹ a gán duto avùnhiho sọta ojlo ylankan lẹ ji gbọn?

AYIKINKAN SATANI TỌN

4. (a) Naegbọn Satani nọ jlo dọ mí ni mọdọ mí ma tindo huhlọn? (b) Naegbọn mí gán kudeji dọ mí do huhlọn nado hoavùn sọta mẹtẹnpọn?

⁴ To whenue mí yin whiwhlepọn, ojlo Satani tọn wẹ nọ yindọ mí ni mọdọ mí masọ do huhlọn ba. Jesu hẹn ehe họnwun to whenue e plọn hodotọ etọn lẹ nado nọ hodẹ̀ dọ: “A sọ hẹn mí biọ whlepọn mẹ blo, ṣigba whlẹn mí sọn mẹylankan lọ si.” (Mat. 6:13) Satani fọ́n ayihaawe dote gando ojlo gbẹtọvi lẹ tọn nado setonuna Jehovah to whenue yé pehẹ whlepọn lẹ go. (Jobu 2:4, 5) Amọ́ na nugbo tọn, be e ma yin ayiha kàn wẹ Satani te poun na mí nido di ewọ wá? Satani wẹ yin omọ̀ do na gbọn linlẹn etọn titi dali, podọ e desọn ojlo mẹ ma nado yin nugbonọ na Jehovah. Matin ayihaawe, e nọ lẹndọ alọ dopolọ ji wẹ mí te po emi po, podọ dọ mí na yawu gbẹ́ Jehovah dai eyin mí yin whiwhlepọn. Satani tlẹ sọ lẹndọ whlepọn lẹ gán ze Visunnu pipé Jiwheyẹwhe tọn jai! (Mat. 4:8, 9) Amọ́ lẹnnupọndo ehe ji: Be nugbo wẹ dọ mí ma do huhlọn nado hoavùn sọta ojlo ylankan lẹ ya? Paali! Mí kọngbedopọ hẹ apọsteli Paulu, mẹhe wlan dọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Flp. 4:13.

5. Nawẹ mí wagbọn do yọnẹn dọ Jehovah kudeji dọ mí gán duto avùnhiho sọta ojlo ylankan lẹ ji?

⁵ To vogbingbọn mẹ na Satani, Jehovah kudeji dọ mí gán duto ojlo ylankan lẹ ji. Nawẹ mí wagbọn do yọnẹn? Na Jehovah dọ dọdai dọ gbẹtọ susugege tenọgligo-hẹntọ lẹ tọn de na lùn nukunbibia daho lọ tọ́n. Lẹnnupọndo nuhe enẹ zẹẹmẹdo ji. Jehovah, yèdọ mẹhe ma sọgan dolalo, dọ dọ gbẹtọ susugege—e ma yin omẹ vude poun—wẹ na biọ aihọn yọyọ etọn mẹ po teninọ dagbe de po, na yé ko “yàn tewu yetọn lẹ bo ko hẹn yé zun wewe to ohùn Lẹngbọvu lọ tọn mẹ” wutu. (Osọ. 7:9, 13, 14) Na Jehovah, e họnwun dọ mí dohuhlọn lọ nado hoavùn sọta ojlo ylankan lẹ.

6, 7. Naegbọn Satani jlo dọ mí ni lẹndọ mí ma tindo todido to avùnhiho mítọn sọta mẹtẹnpọn mẹ?

⁶ Gbọnvona dọ Satani jlo dọ mí ni do numọtolanmẹ lọ dọ mí ma do huhlọn, e sọ jlo dọ mí ni hẹn todido bu—taidi dọ Jehovah na gblewhẹdo mí na mí do ojlo ylankan lẹ poun wutu. Amọ́ na nugbo tọn, be e ma yin jijlo wẹ Satani te poun dọ mí ni taidi ewọ bo ma tindo todido na sọgodo wá? Satani wẹ mẹlọ he ma tindo todido, yèdọ mẹhe Jehovah ko dawhẹna dọ e ma jẹna ogbẹ̀ madopodo. (Jen. 3:15; Osọ. 20:10) Matin ayihaawe, Satani jlo dọ mílọsu ni hẹn todido bu, titengbe na mí tindo todido lọ nado mọ dona he ko gbọ e go lọ yí wutu. Amọ́, mí ma to alọ Satani tọn ji. Na nugbo tọn, Biblu hẹn mí deji dọ Jehovah jlo na gọalọna mí, e ma jlo na gblewhẹdo mí. E “ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.”—2 Pita 3:9.

⁷ Enẹwutu, eyin mí nọ mọdọ mí ma do huhlọn kavi todido dile mí to avùnho sọta ojlo ylankan lẹ, be aliho he mẹ Satani jlo dọ mí ni lẹnnupọn te wẹ mí to wiwà te niyẹn. Ehe yinyọnẹn gán zọ́n bọ mí na hẹn gbemima mítọn nado diọnukunsọ ẹ sinyẹn deji.—1 Pita 5:8, 9. 

NUYIWADOMẸJI YLANDO TỌN

8. Etẹwẹ ylando bẹhẹn? (Salmu lẹ 51:5) (Sọ pọ́n “Zẹẹmẹ Hogbe de Tọn.”)

⁸ Gbọnvona Satani, nudevo sọ tin he gán zọ́n bọ mí na mọdọ mí ma tindo huhlọn po todido po to avùnhiho mítọn sọta ojlo ylankan lẹ mẹ. Etẹwẹ yin nulọ? Ninọmẹ ylandonọ-yinyin tọn mítọn he mí dugu etọn sọn mẹjitọ mítọn tintan lẹ dè wẹ.a—Jobu 14:4; hia Salmu lẹ 51:5.

9, 10. (a) Nawẹ ninọmẹ ylandonọ-yinyin tọn yinuwado Adam po Evi po ji gbọn? (Sọ pọ́n yẹdide lọ.) (b) Nawẹ ninọmẹ ylandonọ-yinyin tọn nọ yinuwado mí ji gbọn?

⁹ Pọ́n lehe ninọmẹ ylandonọ-yinyin tọn yinuwado Adam po Evi po ji do. To whenue yé ko vẹtolina Jehovah godo, yé whlá yede bo tẹnpọn nado ṣinyọnnudo omẹ́ yetọn. Owe lọ Étude perspicace des Écritures basi zẹẹmẹ nuyiwa yetọn tọn dole: “Enẹwutu, ylando zọ́n bọ yé tindo numọtolanmẹ whẹhuhu, obu, winyan po nuvọ́nọ-yinyin po tọn.” E taidi dọ Adam po Evi po yin súsú do owhé de gbè he tindo abò ẹnẹ enẹlẹ kẹdẹ wẹ nkọ. Yé gán tọ́n sọn abò de mẹ biọ devo mẹ, amọ́ yé ma gán tọ́n sọn owhé lọ gbè. Yé ma gán họ̀ngán sọn ninọmẹ ylandonọ-yinyin tọn yetọn mẹ.

¹⁰ Nugbo wẹ dọ ninọmẹ mítọn ma yin dopolọ pẹẹ hẹ Adam po Evi po tọn. Ofligọ lọ—he ma yin awuwlena do asu po asi po tintan lọ tamẹ—gán klọ́ ylando mítọn lẹ sẹ̀ bo na mí ayihadawhẹnamẹnu wiwe de. (1 Kọl. 6:11) Mahopọnna enẹ, mí ko dugu ylando tọn. Enẹwutu, e ma yin nupaṣamẹnu de dọ mílọsu lẹ nọ do numọtolanmẹ whẹhuhu, ayimajai, hihọ́-matindo po winyan po tọn. Na nugbo tọn, Biblu dọ dọ ylando gbẹ́ to nuyiwa do gbẹtọvi lẹ ji taun. Podọ e ko wàmọ “etlẹ yin do mẹhe ma ko waylando dile Adam doalọ to sẹ́nhẹngba mẹ do lẹ ji.” (Lom. 5:14) Mahopọnna lehe whẹho ehe gán hẹnmẹ gbọjọ do sọ, e ma dona hẹn mí nado mọdọ mí ma do huhlọn po todido po. Mí gán gbẹ́ numọtolanmẹ agọ̀ enẹlẹ dai. Gbọnna?

11. Eyin mí mọdọ mí ma dohuhlọn, etẹwẹ Lomunu lẹ 6:12 plọn mí nado wà?

¹¹ Eyin mí mọdọ mí ma dohuhlọn bọ e taidi dọ mí ma gán hoavùn sọta ojlo ylankan lẹ ganji, mí gán nọ pọ́n linlẹn mọnkọ hlan taidi nuyiwadomẹji ninọmẹ ylandonọ-yinyin tọn mítọn, podọ mí ma dona joawuna ẹn. Etẹwutu? Na Biblu plọn mí dọ mí ma dona na dotẹnmẹ ylando nado to “gandu taidi ahọlu” do mí ji. (Hia Lomunu lẹ 6:12.) Ehe zẹẹmẹdo dọ mí gán de ma nado yinuwa sọgbe hẹ ojlo ylankan lẹ. (Gal. 5:16) Jehovah kudeji dọ mí gán nọavùnte sọta mẹtẹnpọn lẹ; eyin e ma yinmọ, e ma na ko biọ to mí si nado wàmọ. (Deut. 30:11-14; Lom. 6:6; 1 Tẹs. 4:3) E họnwun dọ mí tindo huhlọn nado hoavùn sọta ojlo agọ̀ lẹ.

12. Etlẹ yin whenue mí hẹn todido bu, etẹwẹ mí gán gbẹ́ wà podọ etẹwutu?

¹² Mọdopolọ, eyin mí tlẹ hẹn todido bu, bọ e taidi dọ Jehovah na gblewhẹdo mí na mí do ojlo ylankan lẹ poun wutu, mí gán nọ pọ́n linlẹn mọnkọ hlan taidi nuyiwadomẹji ninọmẹ ylandonọ-yinyin tọn mítọn, podọ mí ma dona joawuna ẹn. Etẹwutu? Na Biblu plọnmẹ dọ Jehovah nọ mọnukunnujẹ ninọmẹ ylandonọ-yinyin tọn mítọn mẹ. (Salm. 103:13, 14) E “yọ́n nulẹpo” gando mí go, kakajẹ aliho voovo he mẹ ninọmẹ ylandonọ-yinyin tọn mítọn ko yidogọna ayilinlẹn mítọn he ma sọgbe lẹ te ji. (1 Joh. 3:19, 20) Dile e na dẹnsọ bọ mí ma na wanu sọgbe hẹ ayilinlẹn ylando tọn mítọn lẹ bo joawuna ojlo ylankan lẹ, mí gán tindo teninọ dagbe de to Jehovah nukọn. Naegbọn mí gán kudo enẹ ji?

13, 14. Be ojlo ylankan lẹ tintindo poun ko dohia dọ mí gboawupo wẹ ya? Basi zẹẹmẹ.

¹³ Biblu nọ basi vogbingbọn to nuhe ma sọgbe wiwà (he ji mí gán dù te) po ojlo tintindo na nuhe ma sọgbe (he gán fọ́n to mayọnẹn mẹ) po ṣẹnṣẹn. Di apajlẹ, Klistiani owhe kanweko tintan whenu tọn delẹ to Kọlinti ko doalọ to zanhẹmẹ mẹhe tindo vijinu dopolọ lẹ tọn mẹ dai. Paulu wlan dọmọ: “Nuhe delẹ to mì mẹ yin dai niyẹn.” Be ehe dohia dọ e masọ jlo yé gbede nado doalọ to zanhẹmẹ mẹhe tindo vijinu dopolọ lẹ ṣẹnṣẹn tọn mẹ ba wẹ ya? E ma na sọgbe hẹ lẹnpọn dagbe nado yí enẹ sè, na walọ mọnkọ lẹ ko nọ saba doadọ̀do to ahun mẹ wutu. Amọ́, Jehovah nọ kẹalọyi Klistiani he nọ do mawazẹjlẹgo hia bo ma nọ joawuna ojlo yetọn lẹ. Ewọ nọ pọ́n yé hlan di mẹhe “yin kiklọ́we.” (1 Kọl. 6:9-11) E gán yinmọ na hiẹ lọsu.

¹⁴ Mahopọnna ojlo ylankan depope he a to ahidi hẹ, e gán pà we nado duto e ji. Eyin a ma tlẹ gán sukúndona yé, a gán do mawazẹjlẹgo hia bo dapana ‘nuhe yin ojlo agbasalan po linlẹn towe tọn lẹ po wiwà.’ (Efe 2:3) Nawẹ a gán wàmọ bosọ gbọnmọ dali duto avùnhiho towe sọta ojlo ylankan lẹ ji gbọn?

LEHE A GÁN DUDEJI DO

15. Eyin mí na duto avùnhiho sọta ojlo agọ̀ lẹ ji, naegbọn mí dona nọ dọ nugbo na míde?

¹⁵ Nado duto avùnhiho sọta ojlo ylankan lẹ ji, a dona nọ dọ nugbo na dewe gando awugbopo towe lẹ go. Payi ma nado nọ klọ dewe po “linlẹn agọ̀” lẹ po. (Jak. 1:22) Eyin a nọ yí nukunpẹvi do pọ́n nuhahun lọ, vlavo bo nọ lẹn nude di ‘Mẹdevo lẹ nọ nùahàn hú mi,’ kavi eyin a nọ dowhẹ mẹdevo lẹ bo nọ dọ dọ, ‘N’ma na ko yin whiwhlepọn nado pọ́n yẹdide fẹnnuwiwa tọn eyin asi ṣie nọ do owanyi hia mi ganji wẹ,’ na zọ́n bọ a na joawuna mẹtẹnpọn lọ. Enẹwutu etlẹ yin to linlẹn towe mẹ, ma tẹnpọn nado dín whẹjijọ gando walọyizan towe he ma sọgbe de go blo. Wleawufo nado hẹn agbàn walọyizan towe lẹ tọn.—Gal. 6:7.

16. Nawẹ a gán hẹn gbemima towe nado wà nuhe sọgbe sinyẹn gbọn?

¹⁶ Gbọnvona nugbodidọ na dewe gando awugbopo towe lẹ go, a sọ dona hẹn gbemima towe ma nado joawuna yé sinyẹn. (1 Kọl. 9:26, 27; 1 Tẹs. 4:4; 1 Pita 1:15, 16) Nọ doayi nuhe nọ whlé we pọ́n hugan lẹ go gọna whenue yé nọ wàmọ. E gán yin mẹtẹnpọn wunmẹ de kavi ojlẹ de to azán lọ ji wẹ e nọ yọnbasi taun dọ a ni yin whiwhlepọn te. Di apajlẹ, be e nọ bọawuna we nado yin whiwhlepọn eyin agbọ́ pé we kavi eyin ozán ko kú gbau wẹ ya? Mọ mẹtẹnpọn lọ hlan nukọn, bo basi zepọn to apọ̀nmẹ gando lehe a na yinuwa sọta ẹ do go. E na yọ́n hugan nado wàmọ whẹpo mẹtẹnpọn lọ nido wá.—Howh. 22:3.

17. Etẹwẹ mí gán plọn sọn apajlẹ Josẹfu tọn mẹ? (Jenẹsisi 39:7-9) (Sọ pọ́n yẹdide lọ lẹ.)

¹⁷ Lẹnnupọndo nuhe Josẹfu wà to whenue asi Pọtifali tọn tẹnpọn nado doyẹklọ ẹ ji. E yí nujikudo do gbẹ́ nuzedonukọnnamẹ etọn to afọdopolọji. (Hia Jenẹsisi 39:7-9.) Etẹwẹ enẹ dohia? Lehe Josẹfu dona yinuwa do gando asi mẹdevo tọn yíyí go ko họnwun na ẹn whẹpo asi Pọtifali tọn do tẹnpọn nado doyẹklọ ẹ. Mọdopolọ, a gán hẹn gbemima towe nado wà nuhe sọgbe sinyẹn whẹpo ninọmẹ he na whlé we pọ́n de nido wá. Gbọnmọ dali, whenue a na yin whiwhlepọn, e na bọawuna we dogọ nado yinuwa sọgbe hẹ nudide he a ko basi.

‘NỌ TẸ́N DEWE PỌ́N’

18. Nawẹ a gán duto avùnhiho sọta ojlo ylankan lẹ ji gbọn? (2 Kọlintinu lẹ 13:5)

¹⁸ Nado duto avùnhiho sọta ojlo ylankan lẹ ji, a dona nọ ‘tẹ́n dewe pọ́n,’ enẹ wẹ nado nọ gbeje dewe pọ́n whẹwhẹ nado pọ́n nukọnyiyi towe. (Hia 2 Kọlintinu lẹ 13:5.) Nọ gbadopọnna linlẹn po nuyiwa towe lẹ po sọn ojlẹ de mẹ jẹ devo mẹ bo nọ basi vọjlado lẹ to fihe e biọ te lẹ. Di apajlẹ, etlẹ yin whenue a ko gbẹ́ mẹtẹnpọn de dai, a gán kanse dewe dọ: ‘Ojlẹ nẹmu wẹ e yí to asi e nado dọ lala?’ Eyin a doayi e go dọ e yí whenu, ma dowhẹ dewe blo. Kakatimọ, ze afọdide lẹ nado hẹn aṣejininọ towe pọnte. Nọ kàn kanbiọ ehe nkọ lẹ sè dewe: ‘Be n’gán de whenu he e nọ yí to asi e nado gbẹ́ linlẹn he ma sọgbe lẹ dai pò ya? Be nudide he n’nọ basi gando ayidedai go lẹ nọ hẹn ẹn vẹawuna mi dogọ nado nọavùnte sọta mẹtẹnpọn wẹ ya? Be n’nọ de nukun ṣie sẹ̀ sọn yẹdide mawé lẹ ji to afọdopolọji ya? Be n’yọ́n nuhewutu nujinọtedo Jehovah tọn lẹ do yin dagbe hugan to whelẹponu, eyin etlẹ biọ dọ n’ma do mawazẹjlẹgo hia nado hodo yé ya?’—Salm. 101:3.

19. Nawẹ nuhe taidi nudide nulú tọn flinflin lẹ gán hẹn ẹn vẹawuna mí dogọ nado hoavùn sọta ojlo ylankan lẹ gbọn?

¹⁹ A sọ dona dapana whẹjijọ dindin. Biblu dọmọ: “Ahun nọ klọmẹ hú nulẹpo bosọ yin owùnu.” (Jel. 17:9) Jesu dọ dọ ahun mẹ wẹ “linlẹn ylankan” lẹ nọ wá sọn. (Mat. 15:19) Di apajlẹ, mẹhe ko doalọtena yẹdide fẹnnuwiwa tọn pinpọn de gán lẹn to ojlẹ de godo dọ, e ma yin owùnu nado pọ́n yẹdide he nọ fọ́n ojlo zanhẹmẹ tọn dote lẹ, na yé ma nọ do mẹhe to omẹ́ tlọlọ lẹ hia wutu. Kavi e gán lẹndọ, ‘Nude ma ylan to e mẹ nado nọ lẹnnupọndo ojlo he ma sọgbe lẹ ji, eyin emi ma ko gbẹ́ joawuna yé.’ To linlẹn de mẹ ahun mẹlọ tọn he to kiklọ ẹ wẹ to ‘tito basi dai na ojlo agbasalan tọn lẹ.’ (Lom. 13:14) Nawẹ a gán dapana enẹ gbọn? Nọ aṣeji bosọ dapana nudide nulú tọn flinflin he na zọ́n bọ a na basi nudide nulú tọn dahodaho lẹ, taidi nado joawuna ylanwiwa.b Humọ, nọ gbẹ́ linlẹn depope, kavi “linlẹn ylankan,” he na hẹn we nado dín whẹjijọ gando walọ he ma sọgbe lẹ go dai.

20. Todido tẹwẹ mí tindo na sọgodo, podọ alọgọ tẹwẹ mí tindo todin?

²⁰ Dile mí ko plọn do, po alọgọ Jehovah tọn po, mí tindo huhlọn nado nọavùnte sọta mẹtẹnpọn. Humọ, gbọn lẹblanu etọn gblamẹ, mí do todido lọ nado nọgbẹ̀ kakadoi to aihọn yọyọ lọ mẹ. Lehe mí na mọ kọgbọ do sọ dile mí to Jehovah sẹ̀n po ayiha gọna ahun wiwe de po! Kakajẹ whenẹnu, mí gán kudeji dọ mí dohuhlọn podọ todido lọ dile mí to avùnho sọta ojlo ylankan lẹ. Na Jehovah ni dona vivẹnudido mítọn lẹ nado gbawhàn!