Nọ Mọaleyi sọn Alọdlẹndonu Ṣẹnṣẹn mẹ Tọn lẹ Mẹ

Alọdlẹndonu ṣẹnṣẹn mẹ tọn he to Owe Wiwe lẹ—Lẹdogbedevomẹ Aihọn Yọyọ Tọn mẹ nọ do kanṣiṣa he to nuhe Biblu-kantọ lẹ kàn lẹ ṣẹnṣẹn hia gbọn anadidenamẹ yì wefọ he bẹ nudọnamẹ gigọ́ devo lẹ hẹn lẹ mẹ dali. Wekun pẹvi he to hogbe lẹ pá wẹ nọ dohiagona alọdlẹndonu ṣẹnṣẹn mẹ tọn lẹ. To zinjẹgbonu wema ji tọn Biblu tọn lẹ mẹ, pọ́n wekun pẹvi lọ to ṣẹnṣẹn Biblu lọ tọn kavi to mimá etọn mẹ nado mọ wefọ he e to alọdlẹndo lẹ. To jw.org ji kavi to aplikasiọn JW Library® mẹ, zín wekun he to apá na hogbe lọ nado mọ wefọ he yin alọdlẹndo lẹ.

Alọdlẹndonu ṣẹnṣẹn mẹ tọn lẹ gán plan we yì depope to nuhe bọdego ehelẹ kavi nudevo lẹ ji:

Kandai He Dọhodo Nujijọ Dopolọ Ji: Alọdlẹndonu lọ nọ do kandai devo he dọhodo nujijọ dopolọ ji hia. Di apajlẹ, pọ́n 2 Samuẹli 24:1 po 1 Otànnugbo lẹ 21:1 po.

Hoyidọ: Alọdlẹndonu lọ nọ do fihe hodidọ de yin yíyí sọn hia. Di apajlẹ, pọ́n Matiu 4:4 po Deutelonomi 8:3 po.

Dọdai he mọ hẹndi lẹ: Alọdlẹndonu lọ nọ planmẹ yì dọdai de po hẹndi etọn po ji. Di apajlẹ, pọ́n Matiu 21:5 po Zekalia 9:9 po.