‘Mẹhe Tindo Ninọmẹ Ahun mẹ Tọn He Jẹ’ lẹ Na Yinuwa

1. Aliho voovo tẹlẹ mẹ wẹ mẹlẹ nọ yinuwa gando wẹndagbe lọ go te? (Owalọ 13:47, 48; 16:14, 15)

TO OWHE kanweko tintan whenu, mẹsusu wẹ kẹalọyi nugbo lọ tlolo he yé sè owẹ̀n he lá Klistiani lẹ te. (Hia Owalọ lẹ 13:47, 48; 16:14, 15.) Mọdopolọ to egbehe, e nọ vivi na mẹdelẹ to whenue yé sè wẹndagbe lọ whla tintan. Mẹhe ma tlẹ do ojlo depope hia to owẹ̀n Ahọluduta lọ tọn mẹ to tintan whenu lẹ gán wá hùn ahun yetọn donuvo to nukọn mẹ nado kẹalọyi i. Etẹwẹ mí dona wà to whenue mí mọ mẹhe tindo ‘ninọmẹ ahun mẹ tọn he jẹ’ lẹ to lizọnyizọn mítọn mẹ?

2. Aliho tẹ mẹ wẹ azọ́n mẹhẹnzun devi tọn mítọn taidi azọ́n glesi de tọn te?

² Lẹnnupọndo apajlẹ ehe ji. Azọ́n mẹhẹnzun devi tọn mítọn gán yin jijlẹdo azọ́n glesi de tọn go. Eyin delẹ to jinukun etọn lẹ mẹ ko whẹ́n, e yọnbasi dọ ni gbẹ̀n yé dile etlẹ yindọ e gán gbẹ́ to aigba jlo kavi to núdo do fidevo to ogle etọn mẹ. Mọdopolọ to whenue mí mọ mẹde he ko wleawufo nado kẹalọyi owẹ̀n mítọn, mí nọ jlo na gọalọna ẹn nado lẹzun devi Klisti tọn de dile e gán yawu yọnbasi do. To ojlẹ dopolọ mẹ, mí nọ zindonukọn nado doafọna ojlo mẹdevo he do hudo whenu susu tọn dogọ nado mọ nuhọakuẹ-yinyin nuhe plọn yé te lẹ tọn. (Joh. 4:35, 36) Wuntuntun na gọalọna mí nado de aliho he yọ́n hugan na todoaitọ mítọn lẹ. Todin, mì gbọ mí ni gbadopọnna nuhe mí gán wà nado gọalọna mẹhe ko wleawufo nado yinuwa lẹ to hodọdopọ mítọn tintan whenu. Mí nasọ mọ lehe mí gán gọalọna omẹ mọnkọ lẹ do nado to nukọnyi zọnmii.

EYIN MẸLẸ WLEAWUFO NADO KẸALỌYI OWẸ̀N LỌ

3. Aliho tẹ mẹ wẹ mí gán yinuwa te to whenue mí mọ jlodotọ lẹ to lizọnyizọn mítọn mẹ? (1 Kọlintinu lẹ 9:26)

³ To whenue mí mọ mẹhe do ojlo hia lẹ to lizọnyizọn mítọn mẹ, mí nọ jlo na gọalọna yé to afọdopolọji nado hẹ ali he planmẹ yì ogbẹ̀ mẹ lọ ji. To ninọmẹ mọnkọ lẹ mẹ, mí ma dona whleawu nado ze plọnmẹ Biblu de donukọnna yé bo basi oylọna yé wá opli mítọn lẹ to hodọdopọ mítọn tintan whenu.—Hia 1 Kọlintinu lẹ 9:26.

4. Dọ numimọ mẹde he kẹalọyi plọnmẹ Biblu to afọdopolọji tọn.

⁴ Plọnmẹ Biblu zizedonukọnnamẹ. Delẹ to mẹhe mí nọ dọhona lẹ mẹ nọ kẹalọyi plọnmẹ Biblu to afọdopolọji. Di apajlẹ to jeudi de, jọja yọnnu de to Canada dọnsẹpọ kẹkẹvi kunnudide tọn de bo yí vọkan alọnuwe lọ Duvivi Ogbẹ̀ Tọn Kakadoi! tọn dopo. Mẹmẹyọnnu he to kẹkẹvi lọ kọ̀n dọna ẹn dọ e gán sọ plọn Biblu vọnu. Jọja yọnnu lọ do ojlo hia bo na sọha alokan tọn etọn. Enẹgodo to azán lọ ji, e kanwehlan mẹmẹyọnnu lọ gando oplọn lọ go. Whenue mẹmẹyọnnu lọ dọ dọ emi na wá to sẹfifo, jọja yọnnu lọ kanse dọ: “Bọ osọ lo? N’ma do tito de to osọ.” Yé plọnnu to wunkẹngbe to vendredi. Jọja yọnnu lọ wá opli whla tintan to sẹfifo enẹ dopolọ podọ e zindonukọn nado to nukọnyi po awuyiya po.

5. Etẹwẹ mí dona wà eyin mí mọdọ mẹlẹ ma ko to gbesisọ mẹ nado plọn Biblu hẹ mí? (Sọ pọ́n yẹdide lọ lẹ.)

⁵ Na nugbo tọn, mí ma nọ donukun dọ mẹhe dotoaina owẹ̀n mítọn lẹpo ni yinuwa po jejejininọ po dile jọja yọnnu enẹ wà do. E gán biọ dọ mí ni doafọna ojlo mẹdelẹ tọn. To tintan whenu, mí gán bẹ hodọdopọ jẹeji hẹ yé do hosọ he mẹ yé tindo ojlo te de ji. Amọ́, eyin mí tindo pọndohlan dagbe bo zindonukọn nado nọ do ojlo hia to yé mẹ, to ojlẹ kleun de godo, e gán pà mí bọ mí na bẹ oplọn de jẹeji. Etẹwẹ mí gán dọ whenue mí jlo na ze oplọn donukọnna yé? Kanbiọ ehe ko yin kinkanse mẹmẹsunnu po mẹmẹyọnnu delẹ po he nọ bẹ plọnmẹ Biblu lẹ jẹeji po kọdetọn dagbe po.

6. Nawẹ mí gán zindonukọn to hodọdopọ hẹ mẹhe do ojlo hia de mẹ gbọn?

⁶ Wẹnlatọ po gbehosọnalitọ he yè kanhose gando plọnmẹ Biblu bibẹjẹeji go lọ lẹ po dọ dọ to otò delẹ mẹ, eyin mí to hodọdo lehe mí nọ plọnnu hẹ mẹ do ji, e nọ yọ́n hugan nado dapana hogbe delẹ taidi “nupinplọn,” “Biblu pinplọn,” kavi “plọnnu we.” Yé doayi e go dọ e nọ wazọ́n taun eyin yè yí hogbe delẹ zan taidi “hodọhẹmẹ,” “hodọdopọ” po “yọ́n nususu dogọ to Biblu mẹ” po. A gán zindonukọn to hodọdopọ he a ko bẹjẹeji de mẹ dole: “Aliho he mẹ Biblu na gblọndo na kanbiọ titengbe gbẹ̀mẹ tọn lẹ te jiawu taun,” kavi “Biblu ma yin owe sinsẹ̀n tọn de poun; e sọ nọ gọalọna mí to aliho dagbe lẹ mẹ.” A gán yidogọ dọ: “E ma na yí whenu; nukunwhiwhe 10 jẹ 15 ko pé nado plọn nuhọakuẹ de.” A tlẹ gán nọma donù hogbe lọ lẹ “tito” kavi “sẹmẹsẹmẹ” go, ehe gán na mẹlọ linlẹn lọ dọ emi to dandannu glọ nado biọ gbekọndopọ de mẹ.

7. Whetẹnu wẹ mẹdelẹ kẹalọyi nugbo Biblu tọn? (1 Kọlintinu lẹ 14:23-25)

⁷ Nọ basi oylọna yé wá opli. E taidi dọ to ojlẹ apọsteli Paulu tọn mẹ, mẹdelẹ kẹalọyi nugbo Biblu tọn whla tintan he yé wá opli Klistiani tọn. (Hia 1 Kọlintinu lẹ 14:23-25.) Nudopolọ nọ saba jọ to egbé. Mẹyọyọ susu nọ saba yinukọn po awuyiya po tlolo he yé jẹ opli mítọn lẹ wá ji. Whetẹnu wẹ a dona basi oylọna yé? Owe lọ Duvivi Ogbẹ̀ Tọn Kakadoi! bẹ oylọ-basinamẹ de hẹn to nupinplọn 10​tọ mẹ, amọ́ e ma biọ dọ a ni nọte kakajẹ whenue a jẹ adà owe lọ tọn enẹ ji whẹ́. To hodọdopọ tintan whenu, a gán basi oylọna todoaitọ towe wá opli sẹfifo tọn, vlavo bo donù hosọ hodidọ na mẹlẹpo lọ tọn kavi nuagokun de go sọn zinjẹgbonu Oplọn tọn Atọ̀họ̀-Nuhihọ́ lọ Tọn osẹ lọ tọn mẹ.

8. Adà opli lẹ tọn tẹlẹ wẹ mí gán na ayidonugo whenue mí to oylọ-basina mẹde nado wá? (Isaia 54:13)

⁸ Whenue a to oylọ-basina jlodotọ de, basi zẹẹmẹ nuhewutu opli mítọn lẹ do gbọnvona nuwiwa sinsẹ̀n tọn he e gán ko jẹakọ hẹ lẹ tọn na ẹn. Whla tintan he Biblu plọntọ de nọ Oplọn Atọ̀họ̀-Nuhihọ́ lọ Tọn tẹnmẹ to opli sẹfifo tọn de whenu, e kanse mẹplọntọ etọn dọ, “Anademẹtọ lọ yọ́n yinkọ mẹlẹpo tọn wẹ a?” Mẹmẹyọnnu lọ dọ dọ mímẹpo wẹ to vivẹnudo nado yọ́n yinkọ mẹhe to agun lọ mẹ lẹ tọn, dile mí nọ yọ́n yinkọ mẹhe to whẹndo mítọn mẹ lẹ tọn do. Nuplọntọ lọ mọdọ ehe gbọnvo pete na nuhe e nọ mọ to sinsẹ̀n etọn mẹ. Humọ, yanwle opli mítọn lẹ tọn sọ nọ yin nuyọyọ na mẹsusu. (Hia Isaia 54:13.) Mí nọ pli nado basi sinsẹ̀n hlan Jehovah, plọnnu sọn ewọ dè bosọ na tuli ode awetọ. (Heb. 2:12; 10:24, 25) Nuhe zọ́n niyẹn bọ opli mítọn lẹ nọ nọ̀ titoji bosọ nọ wà dagbe na mí, e ma nọ yin nuwiwa aṣa tọn de. (1 Kọl. 14:40) Plitẹnhọ Ahọluduta tọn mítọn mẹ nọ họ́n ganji, na mí nọ wá finẹ nado plọnnu wutu. Podọ mí ma nọ ze pipli tonudidọ tọn de daga na devo, na mí nọ nọ̀ kada wutu; mọjanwẹ mí masọ nọ dawhá kavi doalọ to nudindọn sinsinyẹn lẹ mẹ do niyẹn. E nọ gọalọ taun nado do video lọ Etẹwẹ Nọ Jọ to Plitẹnhọ Ahọluduta Tọn? hia nuplọntọ lọ jẹnukọn. Po ehe po, e na do linlẹn de gando nuhe mọ gbé e ja go.

9, 10. To whenue mí to oylọ-basina mẹde wá opli, etẹwẹ mí gán wà nado hẹn ẹn diun dọ mí ma nọ gbidikọna ẹn nado wá kavi do mahẹ to e mẹ? (Sọ pọ́n yẹdide lọ.)

⁹ Mẹdelẹ nọ whleawu nado wá opli na yé nọ lẹndọ yè na biọ to yé si nado lẹzun Kunnudetọ wutu. Hẹn mẹlọ deji dọ homẹ mítọn nọ hùn nado mọ mẹyọyọ lẹ podọ mí ma nọ gbidikọna yé nado wá opli lẹ kavi do mahẹ to yé mẹ. Whẹndo lẹ vò nado wá kakajẹ dehe tindo ovi flinflin lẹ ji. To opli mítọn lẹ ji, yè ma nọ plọnnu ovi lẹ dovo. Amọ́, mẹjitọ lẹ po ovi lẹ po nọ sinai dopọ bosọ nọ plọnnu dopọ. Enẹ nọ zọ́n bọ mẹjitọ lẹ nọ yọ́n fihe ovi yetọn lẹ te gọna nuhe yè to pinplọn yé lẹ. (Deut. 31:12) Mí ma nọ ṣinyan akuẹjọ, kavi má wepò nunina bibasi tọn na mẹlẹ. Kakatimọ, mí nọ yí nuhe Jesu dọ do yizan mẹ dọ: “Vọnu wẹ mì mọyi, vọnu wẹ mì ni namẹ.” (Mat. 10:8) A gán sọ basi zẹẹmẹ na mẹlọ dọ e ma biọ dọ ni do avọ̀ akuẹgegenu tọn whẹpo do wá. Ahun mẹ wẹ Jiwheyẹwhe nọ pọ́n, e ma yin awusọhia mẹtọn.—1 Sam. 16:7.

¹⁰ Eyin mẹlọ wá, wà nuhe go a pé lẹpo nado hẹn ẹn voawu. Do e hia mẹho agun tọn lẹ po wẹnlatọ devo lẹ po. Eyin e mọdọ yè yí emi ganji, e yọnbasi taun dọ ni jlo nado wá to whedevonu. To opli lọ whenu, eyin e ma hẹn Biblu, pọ́n towe dopọ hẹ ẹ bo do lehe mí nọ hodo nuhe dọ hodọtọ lọ te kavi nuhe ji mí to nuplọn do lọ do hia ẹ.

WHENUE PLỌNMẸ BIBLU DE BẸJẸEJI

11. Nawẹ a gán dohia dọ a nọ na sisi whenu po tito todoaitọ towe tọn po gbọn?

¹¹ Nuagokun tẹlẹ wẹ mí dona hẹn do ayiha mẹ gando oplọn bibasi na mẹde to whégbè go? Na sisi whenu po tito whétọ lọ tọn po. Di apajlẹ, mahopọnna nukun he mẹlẹ nọ yí do pọ́n gànmẹ ji ninọ to lẹdo towe mẹ, eyin a do gànmẹ na mẹde, ma gbọwhenu blo. Humọ, a gán mọdọ e yọ́n hugan nado deanana oplọn tintan lọ to kleun mẹ, sọgbe hẹ lẹnpọn dagbe. Wẹnlatọ numimọnọ delẹ na ayinamẹ nado yawu fó oplọn lọ, eyin mẹlọ tlẹ jlo na zindonukọn. Podọ ma nọ dọho susu blo. Na dotẹnmẹ whétọ lọ nado dọho.—Howh. 10:19.

12. Etẹwẹ dona yin yanwle mítọn to whenue mí bẹ plọnmẹ Biblu de jẹeji to whégbè tlolo?

¹² Sọn bẹjẹeji gbọ́n, yanwle towe dona yin nado gọalọna todoaitọ towe nado wá yọ́n Jehovah po Jesu po bosọ wleawuna owanyi na yé. A na jẹ yanwle ehe kọ̀n eyin a nọ dọ̀n ayidonugo etọn wá Ohó Jiwheyẹwhe tọn ji kakati ni yin do dewe po oyọnẹn towe titi po ji. (Owalọ 10:25, 26) Apọsteli Paulu nọ saba ze nuplọnmẹ etọn sinai do Jesu Klisti ji, yèdọ mẹlọ he Jehovah dohlan nado gọalọna mí nado yọ́n Ewọ bosọ yiwanna ẹn. (1 Kọl. 2:1, 2) Paulu sọ dohia dọ nujọnu wẹ e yin nado gọalọna devi yọyọ lẹ nado wleawuna jẹhẹnu dagbedagbe lẹ, ehe gán yin yiyijlẹdo sika, fataka po zannu he họakuẹ lẹ po go. (1 Kọl. 3:11-15) Jẹhẹnu họakuẹ ehelẹ bẹ yise, nuyọnẹn, wuntuntun po budisi Jehovah po hẹn. (Salm. 19:9, 10; Howh. 3:13-15; 1 Pita 1:7) A na hodo aliho mẹpinplọn tọn Paulu tọn eyin a nọ gọalọna nuplọntọ towe lẹ nado wleawuna yise he lodo gọna haṣinṣan mẹdetiti tọn de hẹ Otọ́ olọn mẹ tọn owanyinọ yetọn.—2 Kọl. 1:24.

13. Dile mí to alọgọna mẹhe do ojlo hia lẹ, nawẹ mí gán nọ fahomẹ bosọ nọ mọnukunnujẹ yé mẹ gbọn? (2 Kọlintinu lẹ 10:4, 5) (Sọ pọ́n yẹdide lọ.)

¹³ Nado hodo aliho mẹpinplọn tọn Jesu tọn, nọ do homẹfa hia bosọ nọ mọnukunnujẹ mẹlẹ mẹ. Dapana kanbiọ he na zọ́n bọ mẹlọ ma na voawu lẹ kinkanse e. Eyin e biọ domọ, jo nuagokun he e to awuvẹ na ẹn nado mọnukunnujẹemẹ lẹ do whẹ́ bo lẹkọwa yé ji to nukọn mẹ. Kakati nado hẹn ẹn gánnugánnu nado kẹalọyi nuplọnmẹ de to whenue e ma ko wleawufo nado wàmọ, jo whenu do na nugbo lọ ni doadọ̀do to ahun etọn mẹ. (Joh. 16:12; Kol. 2:6, 7) Biblu dọ dọ nuplọnmẹ lalo lẹ gán yin yiyijlẹdo “nuhe hẹnai lẹ” go, ehe mí dona “họliai.” To ogbè dowhenu tọn mẹ, nuyijlẹdonugo he Biblu yizan tofi nọ dlẹnalọdo figángán he dona yin hihọliai de. (Hia 2 Kọlintinu lẹ 10:4, 5.) Kakati nado họ́ figángán nuplọntọ towe tọn liai to nukọn etọn, gọalọna ẹn nado yí Jehovah do basi Fibẹtado etọn.—Salm. 91:9.

WHENUE MẸYỌYỌ LẸ WÁ OPLI

14. Nawẹ mí dona nọ yinuwa hẹ mẹyọyọ he wá opli mítọn lẹ gbọn?

¹⁴ Jehovah nọ donukun dọ mí ni do mẹnukuntamahopọn hia whenue mí to nuyiwa hẹ mẹyọyọ lẹ mahopọnna aṣa, ninọmẹ kavi akọ̀ he mẹ yé wá sọn. (Jak. 2:1-4, 9) Enẹwutu, nawẹ mí gán nọ do owanyi hia mẹyọyọ he wá opli mítọn lẹ gbọn?

15, 16. Nawẹ mí gán gọalọna mẹyọyọ he wá opli mítọn lẹ nado mọdọ yè yí yé ganji gbọn?

¹⁵ Mẹdelẹ gán wá opli mítọn nado dín tlintlindo poun kavi na mẹde sọn lẹdo devo mẹ na yé tuli nado wàmọ wutu. Enẹwutu, mí ma dona nọ whleawu nado dọnsẹpọ omẹ mọnkọ he wá nọtẹn opli tọn mítọn lẹ. Nọ yí yé ganji bo hẹn yé voawu. Biọ to yé si nado wá sinai dopọ hẹ we. Dike yé ni pọ́n Biblu po owe he to yinyin pinplọn lẹ po hẹ we kavi mọ vọkan yetọn titi na yé. Humọ, hẹn numọtolanmẹ yetọn do ayiha mẹ. Dawe de he dla Plitẹnhọ Ahọluduta tọn de pọ́n dọna mẹmẹsunnu he dokuavọna ẹn dọ e dotukla emi dọ emi zọ̀n awù depope poun mẹ do wá. Mẹmẹsunnu lọ hẹn ẹn voawu bo basi zẹẹmẹ na ẹn dọ gbẹtọ paa lẹ wẹ Kunnudetọ Jehovah tọn lẹ lọsu yin. Dawe lọ he to godo mẹ wá yinukọn bo yí baptẹm ma nọ wọn nuyiwa mẹmẹsunnu lọ tọn pọ́n gbede. Amọ́, payi ehe go: Whenue a to hodọdopọ hẹ mẹyọyọ lẹ jẹnukọnna opli lẹ kavi to opli lẹ godo, nọ do ojlo mẹdetiti tọn hia to yé mẹ, ṣogan ma nọ kanhose yé do whẹho mẹdetiti tọn lẹ ji blo.—1 Pita 4:15.

¹⁶ Mí gán sọ dohia dọ mí yí mẹyọyọ lẹ ganji eyin mí nọ do sisi hia to hodọdopọ mítọn hẹ yé mẹ, to gblọndo mítọn lẹ mẹ, podọ to whenue mí to mahẹ tindo to adà he dọhodo mẹhe ma yin Kunnudetọ lẹ ji de mẹ kavi do nuyise yetọn lẹ ji. Nọ dapana hogbe he na hẹn yé dahli lẹ kavi mẹzunzun tọn lẹ. (Titu 2:8; 3:2) Di apajlẹ, mí ma na jlo gbede nado ṣàn nuyise mẹhe ma tindo nuyise dopolọ hẹ mí lẹ tọn kò. (2 Kọl. 6:3) To adà ehe mẹ, mẹmẹsunnu he nọ na hodidọ na mẹlẹpo lẹ nọ payi taun. Yé sọ nọ dohia dọ yé nọ hẹn mẹhe ma yin Kunnudetọ bo to mẹplidopọ lọ mẹ lẹ do ayiha mẹ eyin yé nọ basi zẹẹmẹ hogbe kavi linlẹn he mẹ yé ma na mọnukunnujẹ lẹ tọn.

17. Etẹwẹ nọ yin yanwle mítọn whenue mí mọ ‘mẹhe tindo ninọmẹ ahun mẹ tọn he jẹ’ lẹ to lizọnyizọn mítọn mẹ?

¹⁷ Azọ́n mẹhẹnzun devi tọn mítọn nọ lẹzun niyaniya tọn dogọ dile ozán to kúkú bọ owùn to kinkẹ̀n, podọ mí nọ zindonukọn nado to “mẹhe tindo ninọmẹ ahun mẹ tọn he jẹna ogbẹ̀ madopodo” lẹ dín. (Owalọ 13:48) Dile mí to mọwà, mí ma dona nọ whleawu nado ze plọnmẹ Biblu donukọnna yé kavi basi oylọna yé wá opli mítọn lẹ. Gbọnmọ dali, mí gán gọalọna yé nado de afọdide yetọn tintan lẹ to “aliho . . . he nọ planmẹ yì ogbẹ̀ mẹ” lọ ji.—Mat. 7:14.