Jesu “Plọn Tonusise”

Jesu ma nọma setonuna Jehovah gbede. (Joh. 8:29) Eyin mọ wẹ, naegbọn Biblu do dọ dọ: “E plọn tonusise sọn nuhe e jiya etọn lẹ mẹ”?—Heb. 5:8.

Whenue Jesu to aigba ji, e pehẹ ninọmẹ delẹ he ma to olọn mẹ. Mẹjitọ he yiwanna Jehovah amọ́ bo yin mapenọ lẹ wẹ plọn ẹn whẹ́n. (Luku 2:51) E jiya to alọ nukọntọ sinsẹ̀n tọn gọna aṣẹpatọ kanylantọ lẹ tọn mẹ. (Mat. 26:59; Malku 15:15) Humọ, “e whiwhẹ ede bo setonu kakajẹ okú,” yèdọ okú awufiẹsa sinsinyẹn tọn de.—Flp. 2:8.

Numimọ enẹlẹ plọn tonusise Jesu to aliho he mẹ e ma ko plọn te gbede to olọn mẹ. Gbọnmọ dali, e gán lẹzun Ahọlu podọ Yẹwhenọ Daho pipé de, yèdọ mẹde he gán vẹawu mí. (Heb. 4:15; 5:9) Jesu wá yọ́n-na-yizan dogọ na Jehovah to whenue e ko plọn tonusise sọn nuhe e jiya etọn lẹ mẹ godo. Mílọsu gán wá họakuẹ na Jehovah dogọ bosọ yọ́n-na-yizan to azọ́ndenamẹ depope he e gán dena mí mẹ, eyin mí nọ setonu to ninọmẹ sinsinyẹn lẹ glọ.—Jak. 1:4.