KANBIỌ HE JỌJA LẸ NỌ KANSE
Etẹwẹ N’Dona Yọnẹn Gando Wekanhlanmẹ Alokan Ji Tọn lẹ Go?
:-) Eyin wekanhlanmẹ alokan ji tọn yin yiyizan po nuyọnẹn po, e gán gọalọ nado nọ sè linlin họntọn lẹ tọn.
:-( Eyin e ma yin yiyizan po nuyọnẹn po, e gán hẹn haṣinṣan dagbe he a tindo hẹ mẹdevo lẹ gble—kavi hẹn yinkọ dagbe towe gble.
Hosọ ehe na dọ nuhe a dona yọnẹn gando nuhe bọdego ehelẹ go na we
Nudevo he to hosọ ehe mẹ lẹ:
Mẹhe a nọ kanwehlan
Jọja aflanmẹ susu wẹ nọ pọ́n wekanhlanmẹ alokan ji tọn hlan taidi aliho titengbe de nado dọho hẹ mẹdevo lẹ. E nọ gọalọ nado nọ sè linlin mẹdepope he a tindo sọha alokan etọn tọn—eyin mẹjitọ towe lẹ ma jẹagọdo.
“Baba ṣie ma nọ jlo dọ yẹn po nọviyọnnu ṣie po ni nọ to hodọ hẹ sunnu lẹ. Whẹpo e nado yigbena, e dona yin to alokan whégbè tọn ji, to agbà ji, podọ to whenue mẹdevo lẹ to finẹ.”—Lenore.
Nuhe a dona yọnẹn: Eyin a nọ na sọha alokan towe tọn mẹdepope poun, a gán wá biọ nuhahun mẹ.
“Eyin a ma to aṣeji gando mẹhe a nọ na sọha alokan towe tọn lẹ go, a na wá jẹ wekanhlanmẹ kavi fọto he a ma jlo lẹ mọyi ji.”—Scott.
“Eyin a nọ kanwehlan omẹ vijinu awetọnọ de whẹwhẹ, bleun wẹ a gán jẹ numọtolanmẹ owanyi tọn tindo na ẹn ji.”—Steven.
Biblu dọmọ: “Zinzintọ nọ mọ owù hlan bo nọ whlá ede.” (Howhinwhẹn lẹ 22:3) Gbọn afọdide kleun delẹ zize dali, a sọgan dapana nuhahun susu.
Apajlẹ jọnun: “Yẹn po dẹpẹ de po yin họntọn bo nọ kanwehlan míde taun. N’nọ dọna dee dọ họntọn mítọn vẹ́ poun wẹ. N’ma mọ nuhe ylan to e mẹ kakajẹ whenue dẹpẹ lọ wá dọna mi dọ emi jẹ numọtolanmẹ owanyi tọn tindo na mi ji. Eyin n’lẹnnupọndo ninọmẹ lọ ji todin, n’nọ mọdọ n’ma dona ko dogbẹ́ hẹ ẹ—bo kanwehlan ẹn—sọmọ dai.”—Melinda.
Lẹnnupọndo ehe ji: Nawẹ a lẹndọ owanyi hó he dẹpẹ lọ dọ na yinuwado họntọnjiji etọn hẹ Melinda ji gbọn?
Diọ ninọmẹ lọ! Etẹwẹ Melinda sọgan ko wà, na ewọ po dẹpẹ lọ po nido yin họntọn poun bọ owanyi hó ma na biọ e mẹ?
Nuhe wekanhlanmẹ lọ nọ bẹhẹn
Wekanhlanmẹ alokan ji tọn didohlan nọ bọawu bọ mimọ ẹn yí sọ nọ hẹn ayajẹ wá sọmọ bọ bleun wẹ a gán wọnji dọ mẹdevo lẹ gán mọnukunnujẹ nuhe kàn a te lẹ mẹ to aliho agọ̀ mẹ.
Nuhe a dona yọnẹn: Wekanhlanmẹ lọ sọgan yin nukunnumọjẹemẹ to aliho agọ̀ mẹ.
“A ma gán do numọtolanmẹ kavi kọnugbè towe hia to wekanhlanmẹ de mẹ, eyin a tlẹ yí yẹdide finflin ṣiṣavi tọn lẹ zan. Enẹ sọgan zọ́n bọ yè na mọnukunnujẹ nuhe dọ a te mẹ to aliho agọ̀ mẹ.”—Briana.
“N’yọ́n awhli delẹ he hẹn yinkọ dagbe yetọn gble bo wá yin yinyọnẹn taidi mẹhe nọ daihun gblewa tọn, na nuhe yé dohlan dẹpẹ lẹ to alokan ji wutu.”—Laura.
Biblu dọmọ: “Gbẹtọ ahunjijlọnọ nọ lẹn tamẹ pọ́n whẹpo do kẹnù do ohó de go.” (Howhinwhẹn lẹ 15:28, Mawuhowema Fọngbe tọn) Etẹwẹ yin nuagokun lọ? Nọ vọ́ wekanhlanmẹ towe hia whẹpo do dó e hlan!
Ojlẹ he mẹ a nọ kanwehlan te
Gbọn lẹnpọn dagbenọ-yinyin dali, a sọgan ze nujinọtedo delẹ dai na dewe gando wekanhlanmẹ alokan ji tọn lẹ go.
Nuhe a dona yọnẹn: Eyin a ma nọ payi lehe a nọ do wekanhlanmẹ lẹ hlan do go, a na wá do dewe hia di mẹmasitọ bo na yàn họntọn towe lẹ dogbé, kakati nado dọ̀n yé dogo.
“E bọawu nado wọnji nujinọtedo walọ dagbe tọn lẹ go. To whedelẹnu, n’gán to hodọ hẹ mẹde kavi n’gán to núdù-ka kọ̀n bo ka na to wekanhlanmẹ alokan ji tọn dohlan to ojlẹ dopolọ mẹ.”—Allison.
“Nuylankan taun wẹ e yin nado to húnkun bosọ to wekanhlanmẹ to alokan ji. Eyin a ma pọ́n nukọn, a gán basi asidan.”—Anne.
Biblu dọmọ: “Nulẹpo wẹ ojlẹ dide de tin na, . . . ojlẹ de nado nabọẹ podọ ojlẹ de nado dọho.” (Yẹwhehodọtọ 3:1, 7) Ehe yin nugbo gando wekanhlanmẹ go kẹdẹdile e yin do gando hodidọ go!
Ayinamẹ delẹ gando wekanhlanmẹ alokan ji tọn go
Mẹhe a nọ kanwehlan
;-) Nọ hodo anademẹ mẹjitọ towe lẹ tọn.—Kolosinu lẹ 3:20.
;-) Ma nọ na sọha alokan towe tọn mẹdepope poun blo. Eyin a nọ yí sisi do gbẹ́ ma nado na nudọnamẹ mẹdetiti tọn lẹ—ehe bẹ sọha alokan towe tọn hẹn—jẹhẹnu de wleawuna wẹ a te he na wá yọ́n-na-yizan na we to whenue a whẹ́n mẹho.
;-) Ma dike haṣinṣan de ni zẹ̀pá gbọn wekanhlanmẹ gblewa tọn lẹ didohlan dali blo. Eyin owanyi hó biọ e mẹ, be flumẹjijẹ po awubla po hẹnwa dewe ji wẹ a te niyẹn.
“Mẹjitọ ṣie lẹ ko mọdọ n’nọ yí alokan ṣie zan to aliho dagbe mẹ, enẹwutu yé deji dọ n’na basi nudide nuyọnẹn tọn lẹ gando mẹhe n’na yigbe nado yí sọha alokan yetọn tọn lẹ go.”—Briana.
Nuhe wekanhlanmẹ lọ nọ bẹhẹn
;-) Whẹpo a nado jẹ wekanhlanmẹ de kàn ji, nọ kanse dewe dọ, ‘Be wekanhlanmẹ alokan ji tọn wẹ e jẹ nado yizan to ninọmẹ ehe mẹ ya?’ E sọgan pọnte nado tẹkan hlan mẹlọ kavi nọte jẹ whenue a gán dọho hẹ ẹ tlọlọ.
;-) Ma kàn nudepope he a ma gán dọ sọn nùmẹ tlọlọ hlan mẹde blo. “Eyin nulọ ma sọgan yin didọtọn, be e ma dona yin didohlan gbọn wekanhlanmẹ gblamẹ,” wẹ Sarah he tindo owhe 23 dọ.
“Eyin mẹde do yẹdide he hẹnmẹjọsi lẹ hlan we, dọna mẹjitọ towe lẹ. Enẹ na basi hihọ́na we bọ mẹjitọ towe lẹ nasọ dejido gowe dogọ.”—Sirvan.
Ojlẹ he mẹ a nọ kanwehlan te
;-) De ojlẹ he mẹ a ma na nọ yí alokan towe zan te lẹ jẹnukọn. “N’ma nọ hẹn alokan ṣie eyin n’to núdù-ka kọ̀n kavi whenue n’to weplọn,” wẹ viyọnnu de he nọ yin Olivia dọ. “N’nọ ṣí i to opli Klistiani tọn lẹ ji, na ojlo lọ nikaa wá ahun ṣie mẹ nado to pinpọn ẹn gbọzangbọzan.”
;-) Nọ hò mẹdevo lẹ tọn pọ́n. (Filipinu lẹ 2:4) Ma nọ do wekanhlanmẹ alokan ji tọn hlan to whenue a to hodọ hẹ mẹdevo nukun-sọ-nukun blo.
“N’ko ze nujinọtedo delẹ dai na dee, taidi ma nado nọ kanwehlan to whenue n’topọ hẹ họntọn lẹ adavo e biọ domọ. N’masọ nọ na sọha alokan ṣie tọn mẹhe n’ma jẹakọ hẹ ganji lẹ.”—Janelly.