Apotin Kanbiọ Tọn

◼ Nunọwhinnusẹ́n Biblu tọn tẹlẹ wẹ mí dona nọ yí do yizan mẹ na nuhe dù alokan apòmẹ tọn yiyizan to whenue mí tin to opli Klistiani tọn lẹ ji kavi to mahẹ tindo to lizọnyizọn lọ mẹ?

“Onú Dopodopo Wẹ Ojlẹ de Tin Na.” (Yẹwh. 3:1): Alokan apòmẹ tọn nọ hẹn ẹn yọnbasi na mẹsusu nado kanwehlan mẹdevo lẹ kavi dọhodopọ hẹ yé diblayin to ojlẹ depope mẹ. Ṣigba, ninọmẹ delẹ tin he mẹ Klistiani lẹ ma nọ jlo dọ alokan apòmẹ tọn yetọn ni fẹayihasẹna yé te. Di apajlẹ, opli mítọn lẹ yin ojlẹ de he mẹ mí nọ basi sinsẹ̀n hlan Jehovah, nọ mọ anademẹ gbigbọmẹ tọn yí bosọ nọ duvivi tulinina ode awetọ tọn te. (Deut. 31:12; Ps. 22:22; Lom. 1:11, 12) Be e ma na yọ́n dọ mí ni nọ ṣí alokan apòmẹ tọn mítọn lẹ to whenue mí wá opli lẹ bo nọ gọ̀ yé tá to whenue mí lẹkọ jei whégbè ya? Eyin e biọ dọ mí ni jo alokan mítọn do titá vlavo na nujijọ ajiji lẹ wutu, mí dona ze e do ninọmẹ de mẹ he ma na fẹayihasẹna mẹdevo lẹ.

“Wà Onú Lẹpo Na Wẹndagbe lọ Tọn Wutu.” (1 Kọl. 9:23): To whedelẹnu, alokan apòmẹ tọn nọ yọ́n-na-yizan taun to lizọnyizọn lọ mẹ. Di apajlẹ, mẹmẹsunnu he to anadena pipli kunnudegbe tọn de sọgan yí alokan apòmẹ tọn zan nado ylọ wẹnlatọ he to yẹwhehodọ to fidevo to aigba-denamẹ lọ ji lẹ. To whedelẹnu, wẹnlatọ delẹ nọ yí alokan apòmẹ tọn yetọn zan nado ylọ jlodotọ kavi plọnmẹ Biblu de whẹpo do yì basi gọyìpọn etọn, titengbe eyin mẹlọ nọ nọ̀ fidindẹn. Eyin alokan apòmẹ tọn mítọn to titá, mí dona ze afọdide he jẹ lẹ ma nado dike ni doalọtena hodọdopọ mítọn hẹ whétọ de. (2 Kọl. 6:3) To whenue mí to tenọpọn wẹnlatọ devo lẹ, be e ma na yọ́n hugan nado ze ayidonugo mítọn lẹpo do lizọnyizọn lọ po mẹhe mí to azọ́nwa hẹ lẹ po ji kakati nado to họntọn de ylọ kavi to wekanhlan ẹn to alokan ji ya?

Nọ Hò Mẹdevo lẹ Tọn Pọ́n. (1 Kọl. 10:24; Flp. 2:4): Mí ma na jlo gbede nado nọ dovọ́na opli sinsẹ̀nzọn kunnudegbe tọn lẹ wiwá do gànmẹ po linlẹn lọ po dọ mí sọgan ylọ kavi kanwehlan wẹnlatọ he tin to pipli dopolọ mẹ hẹ mí lẹ nado yọ́n fie yé to azọ́nwa te. To paa mẹ, eyin mẹde gbọwhenu e nọ biọ dọ yè ni vọ́ omẹ lẹ má. Nugbo wẹ dọ to whedelẹnu, ninọmẹ madonukun lẹ sọgan zọ́n bọ mí na gbọwhenu. Ṣigba, eyin mí tindo aṣa lọ nado nọ wá do gànmẹ, enẹ nọ dohia dọ mí tindo sisi na awuwledainanu Jehovah tọn bo nọ hò mẹmẹsunnu he to anadena pipli lọ po wẹnlatọ hatọ mítọn lẹ po tọn pọ́n.