Be Kunnudetọ Jehovah Tọn lẹ Nọ Hodo Osẹ́n Delẹ Gando Họntọnmẹninọ He Nọ Jẹnukọnna Alọwle Go Ya?

Kunnudetọ Jehovah tọn lẹ yise dọ nunọwhinnusẹ́n po gbedide he tin to Biblu mẹ lẹ po sọgan gọalọna mí nado basi nudide he na hẹn homẹ Jiwheyẹwhe tọn hùn bo nasọ hẹn ale wá na mí lẹ. (Isaia 48:17, 18) Jiwheyẹwhe wẹ wleawuna nunọwhinnusẹ́n po gbedide ehelẹ po, podọ mí nọ nọgbẹ̀ sọgbe hẹ yé. Pọ́n lehe delẹ to nunọwhinnusẹ́n po gbedide ehelẹ po mẹ gando whẹho họntọnmẹninọ tọn go do.a

• Kọndopọ tẹgbẹ tọn wẹ alọwle yin. (Matiu 19:6) Na họntọnmẹninọ yin afọdide de he nọ planmẹ jẹ alọwle kọ̀n wutu, Kunnudetọ Jehovah tọn lẹ nọ yí nukun nujọnu tọn do pọ́n ẹn.

• Họntọnmẹninọ tin na mẹhe whẹ́n bo sọgan wlealọ lẹ kẹdẹ. Omẹ enẹlẹ ko “zẹ̀ owhe aflanmẹ tọn go.” To hogbe devo mẹ, yé ko zẹ̀ ojlẹ he mẹ ojlo zanhẹmẹ tọn nọ sinyẹn hugan te go.​—1 Kọlintinu lẹ 7:​36.

• Mẹhe to họntọn mẹ lẹ dona pegan na alọwle. Osẹ́n Jiwheyẹwhe tọn wẹ yindọ fẹnnuwiwa zanhẹmẹ tọn wẹ yin whẹwhinwhẹ́n dopo gee he na jlọjẹ mẹde nado basi gbẹdai. Enẹwutu, e ma yin mẹhe basi gbẹdai sọgbe hẹ osẹ́n lẹpo wẹ Jiwheyẹwhe nọ pọnhlan taidi mẹhe sọgan vọ́ alọwle gba.​—Matiu 19:9.

• Biblu biọ to Klistiani he jlo na wlealọ lẹ si nado de mẹhe yé na dà lọ to yisenọ hatọ yetọn lẹ ṣẹnṣẹn. (1 Kọlintinu lẹ 7:39) Sọgbe hẹ gbedide ehe, Kunnudetọ Jehovah tọn lẹ mọnukunnujẹemẹ dọ mẹhe yé na dà lọ ma dona yin mẹde he nọ na sisi nuyise yetọn poun gba. Kakatimọ, e dona yin mẹde he tindo nuyise dopolọ po yé po bosọ nọ hodo yé taidi Kunnudetọ de he ko yí baptẹm. (2 Kọlintinu lẹ 6:14) Sọn hohowhenu gbọ́n wẹ Jiwheyẹwhe ko nọ biọ to sinsẹ̀n-basitọ etọn lẹ si nado nọ wlealọ hẹ mẹhe tindo nuyise dopolọ po yé po lẹ. (Gẹnẹsisi 24:3; Malaki 2:11) Podọ gbedide ehe yọ́n-na-yizan dile dodinnanutọ egbezangbe tọn lẹ doayi e go do.b

• Ovi lẹ dona setonuna mẹjitọ yetọn lẹ. (Howhinwhẹn lẹ 1:8; Kọlọsinu lẹ 3:20) Na ovi he topọ hẹ mẹjitọ yetọn lẹ, ehe zẹẹmẹdo dọ yé dona setonuna nuhe mẹjitọ yetọn lẹ dọ gando họntọnmẹninọ go ga. Di apajlẹ, mẹjitọ lẹ sọgan dọ dọ owhe tangan de wẹ visunnu kavi viyọnnu yetọn na tindo whẹpo do biọ họntọn mẹ. Podọ yé sọgan basi nudide gando nuwiwa voovo he yé na kẹalọyi na ovi yetọn go.

• Kunnudetọ lẹ nọ basi nudide yedetiti tọn eyin yé na biọ họntọn mẹ podọ mẹhe yé na biọ họntọn mẹ hẹ, ṣigba yé nọ hẹn ẹn diun dọ nudide yetọn ma sọta anademẹ Owe-wiwe tọn lẹ. Afọdide ehe sọgbe po nunọwhinnusẹ́n ehe po: “Omẹ dopodopo wẹ na hẹn agbàn edetiti tọn.” (Galatianu lẹ 6:5) Etomọṣo to whẹho họntọn mẹ bibiọ tọn mẹ, mẹsusu nọ ze afọdide nuyọnẹn tọn bo nọ dín ayinamẹ Kunnudetọ he whèwhín bosọ nọ hò yetọn pọ́n lẹ tọn.​—Howhinwhẹn lẹ 1:5.

• Walọ susu tin he gando họntọnmẹninọ go bo yin ylando sinsinyẹn. Di apajlẹ, Biblu degbe dọ mí ni dapana fẹnnuwiwa zanhẹmẹ tọn. Fẹnnuwiwa zanhẹmẹ tọn ma nọte do kọndopọ zanhẹmẹ tọn kẹdẹ ji gba, ṣigba e sọ nọ bẹ nuyiwa mawé devo lẹ to mẹhe ma ko wlealọ lẹ ṣẹnṣẹn hẹn, taidi alọ sisá do vijinu mẹdevo tọn go kavi nado tindo mahẹ to zanhẹmẹ nùmẹ tọn kavi yonu tọn mẹ. (1 Kọlintinu lẹ 6:9-11) Sunnu po yọnnu po he to họntọn mẹ delẹ nọ doalọ to walọ gblewa tọn lẹpo mẹ, ṣigba ma nọ zanhẹ yede bo nọ lẹndọ nude ma ylan to e mẹ. Ṣigba, nuyiwa “mawé” wẹ enẹlẹ yin ehe Jiwheyẹwhe gbẹwanna. (Galatianu lẹ 5:19-21) Gbọnvona enẹ, Biblu jẹagọdo “ohó gbigble” lẹ, enẹ wẹ nado dọhodopọ do gblewa ji.​—Kọlọsinu lẹ 3:8.

• Ahun, yèdọ gbẹtọ homẹ tọn, yin oklenọ. (Jelemia 17:9) E sọgan sisẹ́ mẹde nado wà nuhe e yọnẹn dọ e ylan. Eyin sunnu po yọnnu de po to họntọn mẹ bọ yé ma jlo dọ ahun yetọn ni klọ yé, nuyọnẹnnu wẹ e yin dọ yé ni dapana yedeṣo ninọ to ninọmẹ he sọgan zọ́n bọ yé na doalọ to walọ mawé mẹ. Di apajlẹ, yé sọgan nọ mọ yede to hagbẹ he tindo walọ dagbe lẹ ṣẹnṣẹn kavi yé na nọ hẹn ẹn diun dọ mẹde to apá na yé na yé nikaa wà nuhe ma sọgbe. (Howhinwhẹn lẹ 28:26) Klistiani tlẹnnọ he to alọwlemẹ dín lẹ nọ hẹn do ayiha mẹ dọ owùnu wẹ e yin nado dín mẹhe yé na biọ họntọn mẹ hẹ to nọtẹn Intẹnẹt tọn lẹ ji. Podọ yé nọ flindọ owù he sọ ylan hugan lọ wẹ nado wleawuna haṣinṣan owanyi tọn hẹ mẹhe go yé ma yọ́n nususu gando.​—Psalm lẹ 26:4.