Nuyizan lẹnunnuyọnẹn tọn lẹ, aihundida lanmẹyiya tọn lẹ, ayidedai po wehọmẹ-zọ́n lẹ po húagbọ́ jọja sunnu de

KANBIỌ HE JỌJA LẸ NỌ KANSE

Nawẹ N’Gán Dapana Nuṣikọ Sinsinyẹn Gbọn?

Be onú ko ṣikọna we sinsinyẹn pọ́n ya? Eyin mọ wẹ, hosọ ehe gán gọalọna we!

Naegbọn e do nọ jọ

Nususu wiwà dopọ. Jọja yọnnu de he nọ yin Julie dọmọ: “Adà gbẹzan mítọn tọn lẹpo mẹ wẹ yè nọ to didọna mí te dọ mí ni yinukọn, dọ mí ni hẹn nuyiwa mítọn lẹ pọnte dogọ bo nọ ze yanwle titengbe delẹ donukọnna míde bosọ nọ jẹ kọdetọn dagbe lẹ kọ̀n. E nọ vẹawu taun nado nọ kọgbidinamẹ mọnkọ glọ whẹwhẹ!”
Nuyizan lẹnunnuyọnẹn tọn lẹ. Mí nọ saba “to Intẹnẹt ji” to alokan apòmẹ tọn, tablẹti po onú mọnkọ devo lẹ po ji diblayin to ojlẹ lẹpo mẹ—yèdọ nude he sọgan hẹn agbọ́pe mí bo hẹn nuṣikọ sinsinyẹn plá mí.
Amlọn whèdomẹ. “Wehọmẹ, whégbè-zọ́n po ayidedai lẹ po ko zọ́n bọ jọja susu nọ yawu fọ́n to afọnnu bo nọ yihọ to gàngodo, yèdọ ninọmẹ ylankan de he e nọ didọ yé ma gán dapana,” wẹ jọja yọnnu de he nọ yin Miranda dọ. Ninọmẹ enẹ nọ saba hẹn nuṣikọ sinsinyẹn plamẹ.

Naegbọn e do yin whẹho sinsinyẹn de

Biblu namẹ tuli nado nọ wazọ́n sinsinyẹn. (Howhinwhẹn lẹ 6:6-8; Lomunu lẹ 12:11) Ṣigba, e ma na tuli azọ́nwiwa jẹ obá de he mẹ nudevo lẹ gán wá jẹdò to gbẹzan mítọn go—etlẹ yin agbasalilo mítọn lọsu.

“To gbèdopo, n’doayi e go dọ n’ma dù nude kakajẹ whèjai na n’na ayidonugo azọngban susu he n’dona hẹndi lẹ zẹjlẹgo wutu. N’wá plọn dọ e ma sọgbe nado zọ́n plaplaji do kẹalọyi azọ́ndenamẹ he yè dena mi lẹpo, kaka bo wá ze dagbemẹninọ ṣie do owù mẹ.”—Ashley.

Abajọ, Biblu do dọ: “Avún he togbẹ̀ pọnte hú kinnikinni kúkú.” (Yẹwhehodọtọ 9:4) Vivẹnudido glanglan gán zọ́n bọ a na lẹndọ emi dohuhlọn kinnikinni tọn nkọ de bo gán penukundo azọ́ndenamẹ lẹpo go—e whè gbau na ojlẹ de. Amọ́, vivẹnudido glanglan gán wá hẹn nuhahun agbasalilo tọn lẹ plá we.

Nuhe a sọgan wà

Plọn nado nọ dọ lala. Biblu dọmọ: “Nuyọnẹn tin to whiwhẹnọ lẹ dè.” (Howhinwhẹn lẹ 11:2) Mẹhe yin whiwhẹnọ nọ yọ́n dogbó ede tọn lẹ bo ma nọ kẹalọyi azọ́n depope he na zẹ̀ nugopipe etọn go.

“Mẹhe nuṣikọ sinsinyẹn na yawu bẹpla wẹ mẹhe ma plọn nado nọ dọ lala, yèdọ mẹhe nọ kẹalọyi azọ́ndenamẹ depope he yè zedonukọnna ẹn. Mọwiwà ma nọ do whiwhẹ hia. Podọ e yá wẹo kavi e dẹn wẹo, e na dekọtọn do nuṣikọ sinsinyẹn mẹ.”—Jordan.
Nọ gbọjẹ ganji. Biblu dọ dọ: “Gbọjẹ vude pọnte hú kanvinván zẹjlẹgo po wezundido to jẹhọn godo po.” (Yẹwhehodọtọ 4:6) Mẹlẹ nọ saba dọ dọ amlọn “wẹ yin núdùdù apọ̀n tọn,” amọ́ jọja susu ma nọ damlọn na gànhiho ṣinatọ̀n he e jẹ dọ yé ni damlọn na to zánto dopo mẹ.

“Whenue tito ṣie lẹ sù taun, n’masọ nọ damlọn dile e jẹ do ba. Amọ́ to whedelẹnu, amlọndidọ ganji wẹ na zọ́n bọ n’na wà nususu dotana bo do ayajẹ to wunkẹngbe.”—Brooklyn.
Basi tito towe. Biblu dọmọ: “Tito mẹhe nọ dovivẹnu tọn lẹ nọ tindo kọdetọn dagbe dandan.” (Howhinwhẹn lẹ 21:5) Pinplọn nado nọ yí whenu towe zan ganji bo nọ wazọ́n jẹ obá he sọgbe mẹ na gọalọna we taun to gbẹzan towe blebu mẹ.

“A gán dapana magbọjẹ didona mẹdetiti gbọn tito towe lẹ kinkandai debọdo-dego dali. Eyin tito towe lẹ tin to nukọn towe, e na bọawuna we nado yọ́n fie a na basi vọjlado te lẹ nado dapana nuṣikọ sinsinyẹn.”—Vanessa.

Nuhe ogbẹ́ towe lẹ nọ dọ

“Onú nọ ṣikọna mẹdelẹ sinsinyẹn na yé to tintẹnpọn nado dín akuẹ susu dogọ wutu. Ṣigba 1 Timoti 6:8 dọ mí ni nọ tindo pekọ to dandannu gbẹ̀mẹ tọn lẹ mẹ. Nuflinmẹ dagbe de niyẹn nado hẹn gbẹzan mítọn bọawu bo ma nọ dovivẹnu hugan na nuhe sin hudo mí ma tlẹ tindo lẹ.”—Gianna.

“Tito osẹ dopodopo tọn bibasi nọ gọalọna mi taun. Matin tito mọnkọ, n’nọ saba kẹalọyi azọ́ndenamẹ lẹ zẹ̀ nugopipe ṣie go. Enẹ nọ zọ́n bọ n’nọ do magbọjẹ na dee bo ma nọ wá penugo nado hẹn suhugan azọ́ndenamẹ lọ lẹ tọn di.”—Waylon.

“A gán lẹndọ emi dona kẹalọyi oylọ-basinamẹ lẹpo podọ dọ a ma na do ayajẹ eyin a ma wàmọ. Amọ́, n’wá mọdọ lalo wẹ. A na do ayajẹ bọ agbọ́ ma na pé we susu eyin a nọ de whenu de dovo bo nọ yí i zan na dewe.”—Kara.