Dẹpẹ de to mẹlẹ pọ́n dile yé to Plitẹnhọ Ahọluduta tọn de mẹ biọ

KANBIỌ HE JỌJA LẸ NỌ KANSE

Naegbọn N’Dona Nọ Yì Opli to Plitẹnhọ Ahọluduta Tọn Mẹ?

Whla awe to sẹmẹsẹmẹ, Kunnudetọ Jehovah tọn lẹ nọ pli to nọtẹn sinsẹ̀n-bibasi tọn yetọn he nọ yin yiylọdọ Plitẹnhọ Ahọluduta tọn lẹ mẹ. Nawẹ nulẹ nọ yì do to finẹ, podọ nawẹ opli enẹlẹ yìyì sọgan hẹn ale wá na we gbọn?

Etẹwẹ nọ jọ to Plitẹnhọ Ahọluduta tọn de mẹ?

Plitẹnhọ Ahọluduta tọn yin nuplọntẹn de he nọ na ayidonugo nuplọnmẹ yọ́n-na-yizan he wá sọn Biblu mẹ. Opli he nọ yin bibasi to finẹ lẹ sọgan gọalọna we nado:

plọn nugbo lọ gando Jiwheyẹwhe go.
mọnukunnujẹ nuhe to godona nujijọ egbezangbe tọn lẹ mẹ.
hẹn gbẹtọ-yinyin towe pọnte.
mọ họntọn dagbe lẹ.

A yọnẹn ya? Sinsẹ̀nhọ Kunnudetọ Jehovah tọn lẹ tọn nọ yin yiylọdọ Plitẹnhọ Ahọluduta tọn, na Ahọluduta Jiwheyẹwhe tọn ji wẹ yè nọ dọhodo hugan to finẹ wutu.—Matiu 6:9, 10; 24:14; Luku 4:43.

Naegbọn a dona nọ yì?

Nudọnamẹ lọ lẹ na gọalọna we. Nunọwhinnusẹ́n Biblu tọn he nọ yin hodọdeji to opli Kunnudetọ Jehovah tọn lẹ tọn ji lẹ na gọalọna we nado “tindo nuyọnẹn.” (Howhinwhẹn lẹ 4:5) Enẹ zẹẹmẹdo dọ Biblu gán gọalọna we nado basi nudide dagbe lẹ to gbẹ̀mẹ. E sọ sọgan gọalọna we nado mọ gblọndo na kanbiọ titengbe hugan gbẹ̀mẹ tọn lẹ, taidi:

Naegbọn mí do togbẹ̀?
Be Jiwheyẹwhe wẹ mí na dowhẹ na yajiji mítọn ya?
Etẹwẹ nọ jọ to whenue mí kú?

Hodidọ he nọ yin nina to opli sẹfifo tọn mítọn ji delẹ sin hosọ die:

Naegbọn Mí Dona Dike Biblu Ni Deanana Mí?
Fie Wẹ Hiẹ Sọgan Mọ Alọgọ te to Ojlẹ Ayimajai Tọn lẹ Mẹ?
Nuhe Ahọluduta Jiwheyẹwhe Tọn to Wiwà Na Mí Todin.

“Klasigbẹ́ ṣie de wá dopo to opli mítọn lẹ mẹ. E sinai dopọ hẹ whẹndo mítọn bo pọ́n owe mítọn lẹ mẹ hẹ mí. Enẹgodo, e dọna mi dọ gblọndo he mẹlẹ na to adà he bẹ hodọdopọ hẹn lẹ mẹ yinuwado emi ji taun. E sọ dọ dọ to ṣọṣi etọn mẹ yé ma do owe nupinplọn tọn lẹ di mílẹ.”—Brenda.

A yọnẹn ya? Vọnu wẹ opli mítọn lẹ, podọ akuẹjọ depope ma nọ yin bibiọ.

Gbẹdido hẹ mẹhe to finẹ lẹ na na we tuli. Biblu dọ dọ dopo to nuhewutu Klistiani lẹ dona nọ pli lẹ mẹ wẹ nado “na tuli ode awetọ.” (Heblu lẹ 10:24, 25) Gbẹdido ayajẹ tọn hẹ mẹhe nọ ze Jiwheyẹwhe po mẹdevo lẹ po do otẹn tintan mẹ lẹ nọ fakọnamẹ to aihọn ṣejannabi tọn ehe mẹ.

“To azán he gọ́ na nuwiwa susu de godo, agbọ́ gán pé mi bọ n’na pò vẹjẹvẹjẹ, amọ́ mẹhe n’nọ mọ to Plitẹnhọ Ahọluduta tọn mẹ lẹ nọ vọ́ huhlọn na mi. Eyin opli fó bọ n’lẹkọ jei whé, n’nọ gọ́ na ayajẹ bo nọ to gbesisọ mẹ nado bẹ azán devo jẹeji.”—Elisa.

A yọnẹn ya? Agun Kunnudetọ Jehovah tọn lẹ tọn hugan 120 000 wẹ tin lẹdo aihọn pé bo nọ pli to nọtẹn 60 000 linlán mẹ. To madozẹnzẹn mẹ, nudi Plitẹnhọ Ahọluduta tọn 1 500 wẹ nọ yin gbigbá to whemẹwhemẹ na sọha pliwatọ lẹ tọn he to jijideji wutu.a

Nuhe ogbẹ́ towe lẹ nọ dọ

“Whenue n’gbẹ́ pò to wehọmẹ daho, klasigbẹ́ ṣie de hodo mi yì opli delẹ bọ e paṣa ẹ nado mọdọ mẹhe tindo owhe voovo lẹ wẹ nọ plọn Biblu dopọ to finẹ. To agọe, azọ́ngán ṣie lọsu wá bọ aliho he mẹ mí nọ yí Biblu zan gbọzangbọzan te hẹn awuji i. Pinpẹn-nutọn-yinyọnẹn etọn na opli lọ ko yidogọna pinpẹn-nutọn-yinyọnẹn yẹnlọsu tọn!”—Jessica.

“N’mọdọ opli lẹ nọ zọ́n bọ n’nọ de ayiha sọn lẹnpọn po magbọjẹ egbesọegbesọ tọn lẹ po ji. Mí nọ plọn lehe mí na zan gbẹzan he nọ hẹn pekọ wá do, lehe mí na hẹn gbẹtọ-yinyin mítọn pọnte do, gọna nususu devo lẹ. Whedepopenu he n’lẹkọ sọn Plitẹnhọ Ahọluduta tọn mẹ, n’nọ mọdọ n’mọ tuli po kọfanamẹ po yí.”—Timothy.

“Dawe he n’basi oylọna wá opli de dọ to godo mẹ dọ: ‘Nuhe zọ́n n’do wá poun wẹ nado pọ́n eyin n’gán dedòna nuyise towe lẹ. Amọ́, e wá họnwun dọ nuyise ṣie lẹ wẹ ma sọgbe!’ Aliho he mẹ Kunnudetọ Jehovah tọn lẹ jọmẹ te sọ yinuwadeji. E dọ: ‘Dile etlẹ yindọ tintan die bọ n’dukosọ hẹ mì, mì yinuwa hẹ mi didọ mí ko yọ́n míde hoho wẹ nkọ!’”—Jacob.

“Whedelẹnu n’nọ lẹndọ, ‘N’na yawu dedo eyin opli fó tlolo.’ Amọ́ to opli lọ whenu, numọtolanmẹ enẹ nọ busẹ. To opli lọ godo, n’nọ jẹ hodọ hẹ mẹlẹ ji bo ma tlẹ sọ nọ flin nuhewutu n’do dó numọtolanmẹ he n’do dai. Eyin opli lẹ tọn dẹ́n, n’ma na ko tindo họntọn dagbedagbe he n’tindo todin lẹ.”—Madison.

a Nado mọ nọtẹn opli tọn de, yì adà lọ “Opli Agun Tọn Kunnudetọ Jehovah Tọn lẹ Tọn De” ji bo zín “Dín Nọtẹn Opli Tọn He Sẹpọ We De.”