Isaia 41:10—“A dibu blo; Na Yẹn Tin po Hiẹ Po”

“A dibu blo, na yẹn tin hẹ we. A yin magbọjẹnọ blo, na yẹn wẹ Jiwheyẹwhe towe. Yẹn na hẹn we lodo, mọwẹ, n’na gọalọna we, Na nugbo tọn, n’na yí adusilọ dodowiwa tọn ṣie do hẹn gowe gligli.”—Isaia 41:10, Lẹdogbedevomẹ Aihọn Yọyọ Tọn.

“A dibu blo; na yẹn tin po hiẹ po: adòyanu we blo: na yẹn wẹ Jiwheyẹwhe towe: yẹn na na huhlọn we; yẹn na gọalọna we; nugbo, yẹn na yí adusilọ ṣie dodo tọn do ze we daga.”—Isaia 41:10, Biblu Wiwe lọ—Gun Alada.

Zẹẹmẹ Isaia 41:10 Tọn

Jehovaha Jiwheyẹwhe hẹn sinsẹ̀n-basitọ nugbo etọn lẹ deji dọ emi to godona yé, mahopọnna nuhahun depope he yé na pehẹ.

“Yẹn na tin hẹ we.” Jehovah na sinsẹ̀n-basitọ etọn lẹ whẹwhinwhẹ́n de he wutu yé ma dona dibu—enẹ wẹ yindọ yé ma to ṣokẹdẹ. Na e nọ mọ adán he to gbigbò yé lẹ bosọ nọ sè odẹ̀ yetọn lẹ wutu, e nọ taidi dọ e to apá yetọn tútútú wẹ nkọ.—Salmu lẹ 34:15; 1 Pita 3:12.

“Yẹn wẹ Jiwheyẹwhe towe.” Jehovah fahomẹ na sinsẹ̀n-basitọ etọn lẹ gbọn finflin yé dali dọ emi gbẹ́ nọ mọ emide di Jiwheyẹwhe yetọn podọ emi kẹalọyi yé taidi sinsẹ̀n-basitọ emitọn lẹ. Yé sọgan kudeji dọ ninọmẹ depope ma gán glọnalina Jiwheyẹwhe nado yinuwado ota yetọn mẹ.—Salmu lẹ 118:6; Lomunu lẹ 8:32; Heblu lẹ 13:6.

“Yẹn na hẹn we lodo, mọwẹ, n’na gọalọna we, Na nugbo tọn, n’na yí adusilọ dodowiwa tọn ṣie do hẹn gowe gligli.” Jehovah vọ́ nuzindo linlẹn dopolọ ji to aliho voovo atọ̀n mẹ nado dohia dọ emi na nọgodona yé dandan. Ewọ yí hodidọ yẹhiadonu tọn de zan nado do lehe e nọ yinuwa do hia to whenue omẹ etọn lẹ do hudo alọgọ tọn. Eyin mẹde jai, Jiwheyẹwhe gán dlẹn adusilọ etọn do e bo jlọ ẹ ṣite.—Isaia 41:13.

Aliho titengbe he mẹ Jiwheyẹwhe nọ hẹn sinsẹ̀n-basitọ etọn lẹ lodo bosọ nọ gọalọna yé te wẹ gbọn Ohó etọn, Biblu gblamẹ. (Jọṣua 1:8; Heblu lẹ 4:12) Di apajlẹ, Ohó Jiwheyẹwhe tọn nọ na nuyọnẹn yọ́n-na-yizan mẹhe to pipehẹ whlepọn delẹ, taidi ohẹ́n, azọ̀n kavi okú mẹyiwanna de tọn. (Howhinwhẹn lẹ 2:6, 7) Jiwheyẹwhe sọgan sọ yí gbigbọ wiwe, kavi huhlọn-yido-wazọ́n etọn zan nado na sinsẹ̀n-basitọ etọn lẹ huhlọn he yé tindo hudo etọn to numọtolanmẹ-liho podọ to apọ́nmẹ nado doakọnna whlepọn lẹ.—Isaia 40:29; Luku 11:13.

Nujijọ He Lẹdo Isaia 41:10 Lẹ

Hodidọ enẹlẹ miọnhomẹna Juvi nugbonọ he wá yin zize yì kanlimọgbenu to Babilọni to godo mẹ lẹ. Jehovah ko dọ dọdai dọ sẹpọ vivọnu kanlinmọgbenuninọ Juvi lẹ tọn, yè na sè linlin lẹ dọ awhàngbatọ de to dindọnsẹpọ nado và akọta he lẹdo Babilọni lẹ sudo bo nasọ yangbé Babilọni tọn. (Isaia 41:2-4; 44:1-4) Dile etlẹ yindọ linlin enẹlẹ na gbàhundona Babilọni po akọta he lẹdo e lẹ po, Ju lẹ ma na hanú, na Jehovah na basi hihọ́na yé. Whla atọ̀n wẹ e hẹn yé deji po hogbe ehelẹ po dọmọ, “a dibu blo.”—Isaia 41:5, 6, 10, 13, 14.

Dile etlẹ yindọ Ju nugbonọ he yì kanlinmọgbenu to Babilọni lẹ wẹ hodidọ Isaia 41:10 tọn lẹ yin kinkanhlan jẹnukọn, Jehovah Jiwheyẹwhe hẹn ẹn diun dọ ohó ehelẹ yin hihla dai nado miọnhomẹna sinsẹ̀n-basitọ etọn lẹpo. (Isaia 40:8; Lomunu lẹ 15:4) Ewọ nọ gọalọna yé to egbehe, kẹdẹdile e wà na devizọnwatọ etọn lẹ to hohowhenu do.