ZẸẸMẸ WEFỌ BIBLU TỌN LẸ TỌN
Jelemia 29:11—“Yẹn Yọ́n Linlẹn He Yẹn Lẹn Hlan Mì Dali Lẹ”
“‘Na yẹn yọ́n nuhe lẹn n’te gando mì go lẹ ganji,’ wẹ Jehovah dọ,a ‘yèdọ linlẹn jijọho tọn lẹ bọ e ma yin nugbajẹmẹji tọn lẹ, na mìwlẹ nido tindo sọgodo dagbe de po todido de po.’”—Jelemia 29:11, Lẹdogbedevomẹ Aihọn Yọyọ Tọn.
“‘Na yẹn yọ́n linlẹn he yẹn lẹn hlan mì dali lẹ, wẹ OKLUNỌ dọ, linlẹn jijọho tọn lẹ, bo ma yin oylan tọn, nado na opodo godomẹ tọn mì po todido po.’”—Jelemia 29:11, Biblu Wiwe lọ—Gun Alada.
Zẹẹmẹ Jelemia 29:11 Tọn
Jehovah Jiwheyẹwhe dopà na sinsẹ̀n-basitọ etọn lẹ dọ sọgodo jijọho tọn de wẹ emi to linlẹn na yé. Dile e tlẹ yindọ mẹhe nọgbẹ̀ to hohowhenu lẹ wẹ opà enẹ yin dido na, e gbẹ́ de linlẹn he Jiwheyẹwhe tindo na mí to egbehe lẹ hia. Ewọ wẹ “Jiwheyẹwhe he nọ namẹ todido.” (Lomunu lẹ 15:13) Na nugbo tọn, e dike bọ opagbe mọnkọtọn lẹ yin kinkandai do Biblu mẹ, na “míwlẹ nido sọgan tindo todido” na sọgodo dagbe de.—Lomunu lẹ 15:4.
Nujijọ He Lẹdo Jelemia 29:11 Lẹ
Hodidọ ehelẹ yin apadewhe wekanhlanmẹ he yin didohlan Islaelivi he to Babilọni lẹ tọn, yèdọ Islaelivi he yin pinplan sọn Jelusalẹm yì kanlinmọgbenu lẹ tọn.b (Jelemia 29:1) Jiwheyẹwhe dọna yé dọ yé na nọ kanlinmọgbenu na ojlẹ dindẹn podọ yé na gbá ohọ̀ lẹ, do jipa lẹ bo nasọ do whẹndo lẹ ai. (Jelemia 29:4-9) Amọ́, Jiwheyẹwhe yidogọ dọmọ: “To whenue owhe 70 lọ lẹ to Babilọni na ko wá vivọnu, yẹn na lẹ́ ayidonugo ṣie hlan mì bo na hẹn opagbe ṣie di gbọn hinhẹn mì gọ̀ [wá Jelusalẹm] dali.” (Jelemia 29:10) Gbọnmọ dali, Jiwheyẹwhe hẹn yé deji dọ emi ma na wọn yé podọ todido yetọn nado lẹkọwa whé na mọ hẹndi.—Jelemia 31:16, 17.
Jiwheyẹwhe hẹn opagbe he e do na Islaelivi lẹ di. Dile ewọ ko dọ dọdai etọn do Ahọlu Pẹlsia tọn Kilusi gbawhàn Babilọni tọn. (Isaia 45:1,2; Jelemia 51:30-32) Enẹgodo, Kilusi na dotẹnmẹ Ju lẹ nado lẹkọyi whé to aigba yetọn ji. To owhe 70 kanlinmọgbenu-ninọ tọn godo, yé lẹkọwa Jelusalẹm.—2 Otànnugbo lẹ 36:20-23; Ẹzla 3:1.
Hẹndi opagbe he to Jelemia 29:11 mẹ tọn nọ na jide mẹhe tindo todido to opagbe Jiwheyẹwhe tọn lẹ mẹ to egbehe. Opagbe ehelẹ bẹ jijọho he Ahọluduta Jiwheyẹwhe tọn na hẹnwa to anademẹ Klisti Jesu tọn glọ lẹdo aihọn pé hẹn.—Salmu lẹ 37:10, 11, 29; Isaia 55:11; Matiu 6:10.
Pọndohlan Agọ̀ Gando Jelemia 29:11 Go
Pọndohlan Agọ̀: Jiwheyẹwhe tindo “tito kavi linlẹn” tangan de na mẹdopodopo.
Nugbo lọ: Jiwheyẹwhe nọ na dotẹnmẹ mẹlẹ nado de lehe yé na zan gbẹzan yetọn do. E dọ nue to Jelemia 29:11 mẹ lẹ na Islaelivi he to Babilọni lẹ taidi pipli de, podọ e tindo linlẹn de to ayiha mẹ na pipli enẹ—yèdọ sọgodo jijọho tọn. (Jelemia 29:4) Amọ́, Jiwheyẹwhe nọ na dotẹnmẹ mẹdopodopo nado de eyin e na mọaleyi sọn opagbe Etọn lẹ mẹ kavi lala. (Deutelonomi 30:19, 20; Jelemia 29:32) Mẹhe de nado dín Jiwheyẹwhe lẹ nọ wàmọ gbọn dẹ̀hiho hlan ẹn po ahun dopo po dali.—Jelemia 29:12, 13.
Hia Jelemia weta 29 gọna nudọnamẹ odò tọn lẹ po alọdlẹndonu ṣẹnṣẹn tọn lẹ po.
a Jehovah wẹ oyín Jiwheyẹwhe tọn.—Salmu lẹ 83:18.
b Gando Jelemia 29:11 go, wezẹhomẹ Biblu tọn de dọmọ: “E na vẹawu nado mọ opagbe dagbedagbe mọnkọ to fidevo to Owe-wiwe lẹ mẹ he do awuvẹmẹ sisosiso Yahweh [Jehovah] tọn na kanlinmọ ehelẹ hia, enẹ wẹ yindọ todin, yé tindo whẹwhinwhẹ́n nado tindo pọndohlan dagbe bo gọ́ na todido.”The Expositor’s Bible Commentary—Bladopọ 7tọ, weda 360.